អតីត​អ្នក​ទោស​មនសិការ បង្កើត​អង្គការលើក​ស្ទួយ​ប្រជាធិបតេយ្យ ការពារ​ធនធាន​ធម្មជាតិ និង​ពង្រឹង​វិស័យ​កសិកម្ម

ដោយ ឡេង ម៉ាលី
2022.11.01
Share on WhatsApp
Share on WhatsApp
អតីត​អ្នក​ទោស​មនសិការ បង្កើត​អង្គការលើក​ស្ទួយ​ប្រជាធិបតេយ្យ ការពារ​ធនធាន​ធម្មជាតិ និង​ពង្រឹង​វិស័យ​កសិកម្ម សមាជិក​អង្គការ "ពលរដ្ឋ​យើង" ប្រជុំ​រៀបចំ​រចនាសម្ព័ន្ធ​គ្រប់គ្រង កាល​ពី​ថ្ងៃ​ទី៣០ ខែតុលា ឆ្នាំ២០២២។
រូប៖ អង្គការ ពលរដ្ឋយើង

"អង្គការ​ពលរដ្ឋ​យើង" កំពុង​ចាប់​ផ្ដើម​ប្រតិបត្តិការ និង​បេសកកម្ម​របស់​ខ្លួន​ជួយ​សង្គម​ជាតិ បន្ទាប់​ពី​បាន​ចុះ​បញ្ជី​ជា​ផ្លូវការ​នៅ​ក្រសួង​មហាផ្ទៃ។ អង្គការ​នេះ​បង្កើត​ឡើង ដើម្បី​លើក​ស្ទួយ​ប្រជាធិបតេយ្យ ការពារ​ធនធាន​ធម្មជាតិ ជា​ពិសេស លើក​កម្ពស់​វិស័យ​កសិកម្ម តាម​រយៈ​ការ​ផ្សព្វផ្សាយ​ចំណេះ​ដឹង​ថ្មីៗ ទៅ​ដល់​កសិករ។

បន្ទាប់​ពី​បាន​ចុះ​បញ្ជី​ជា​ផ្លូវការ​នៅ​ក្រសួង​មហាផ្ទៃ "អង្គការ​ពលរដ្ឋ​យើង" ដែល​ជា​អង្គការ​ក្រៅ​រដ្ឋាភិបាល កំពុង​បំពេញ​បេសកកម្ម​របស់​ខ្លួន​ដោយ​ផ្អែក​ទៅ​លើ​ទស្សនវិស័យ និង​គោលដៅ ក្នុង​ការ​ជួយ​ប្រជាពលរដ្ឋ ជាពិសេស កសិករ។

នាយករង​នៃ​អង្គការ​ពលរដ្ឋ​យើង លោក នី ណាក់ ប្រាប់​វិទ្យុ​អាស៊ី​សេរី នៅ​ថ្ងៃ​ទី៣១ តុលា ថា អង្គការ​នេះ​បង្កើត​ឡើង ទៅ​តាម​ក្ដី​ស្រមៃ​របស់​លោក និង​សមាជិក​ដទៃ​ទៀត ដែល​ចង់​ជួយ​ប្រជាកសិករ និង​សង្គមជាតិ។ លោក​ឱ្យ​ដឹង​ថា "អង្គការ​ពលរដ្ឋ​យើង" មាន​ទស្សនៈ​វិស័យ និង​គោលដៅ​ច្រើន ក្នុង​នោះ​រួម​មាន ការ​លើក​ស្ទួយ​លទ្ធិ​ប្រជាធិបតេយ្យ​ឱ្យ​កាន់តែ​ប្រសើរ ការ​លើក​កម្ពស់​វិស័យ​អប់រំ ការ​ការពារ​ធនធាន​ធម្មជាតិ ជាពិសេស ការ​ពង្រឹង​វិស័យ​កសិកម្ម។ អ្នក​ជំនាញ​កសិកម្ម​រូប​នេះ​បន្ត​ថា សកម្មភាព​របស់​អង្គការ​នេះ​នឹង​ធ្វើ​ឱ្យ​លោក​កាន់តែ​មាន​លំហ​សេរីភាព​ទូលំទូលាយ​ក្នុង​ការ​ចែក​រំលែក​ចំណេះ​ដឹង និង​ជំនាញ​ក្នុង​វិស័យ​កសិកម្ម​ទៅ​កាន់​ប្រជាកសិករ។ លោក នី ណាក់ បន្ត​ថា ការ​ចែក​រំលែក​នេះ នឹង​ធ្វើ​ឱ្យ​កសិករ​នៅ​កម្ពុជា​កាន់តែ​មាន​បច្ចេកទេស និង​មាន​ភាព​រីក​ចម្រើន​ក្នុង​វិស័យ​កសិកម្ម​កាន់​តែ​ខ្លាំង។

«អ្វី​ដែល​ជា​ចំណុច​ស្នូល​ធំ​បំផុត​នោះ​គឺ​យើង ធ្វើ​ការ​នៅ​ក្នុង​វិស័យ​កសិកម្ម។ យើង​នឹង​ធ្វើការ​ផ្សព្វផ្សាយ​បច្ចេកទេស​ថ្មីៗ ក៏​ដូច​ជា ការ​សម្រប​សម្រួល​ជាមួយ​នឹង​ដៃគូ​អភិវឌ្ឍ​នានា ធ្វើ​ម៉េច​ឱ្យ​កសិករ​មាន​ឱកាស​លក់​ផលិតផល ក៏​ដូច​ជា ការ​មាន​ទីផ្សារ​ក្នុង​ការ​លក់​ផលិតផល​ឱ្យ​បាន​ទូលំទូលាយ»

លោក នី ណាក់ ជា​អ្នក​ជំនាញ​កសិកម្ម​មួយ​រូប ធ្លាប់​ត្រូវ​បាន​អាជ្ញាធរ​ចាប់​ខ្លួន និង​ដាក់​ពន្ធនាគារ​អស់ ១៨ខែ យ៉ាងអយុត្តិធម៌កាលពីថ្ងៃទី១២ ខែធ្នូ ២០២០កាលពីថ្ងៃទី១២ ខែធ្នូ ២០២០កាលពីឆ្នាំ២០២០ ក្រោម​ការ​ចោទ​ប្រកាន់​ពី​បទ​ជេរ​ប្រមាថ​ជា​សាធារណៈ និង​ញុះញង់​ឱ្យ​មាន​ការ​រើសអើង បន្ទាប់​ពី​លោក​បាន​បង្ហោះ​សារ​ផ្សព្វផ្សាយ​ពី​ការ​ទិញ​ម៉ាស់​ពាក់​ឱ្យ​កូន​មាន់ និង​ត្រៀម​ដាក់​ទ្រុង​មាន់​ក្នុង​គ្រា​មាន​អាសន្ន ខណៈ​កម្ពុជា និង​ពិភព​លោក​កំពុង​ផ្ទុះ​ជំងឺ​កូវីដ-១៩ កាលចុងឆ្នាំ២០១៩។

"អង្គការ​ពលរដ្ឋ​យើង" ត្រូវ​បាន​ចុះ​ក្នុង​បញ្ជី​អង្គការ​មិនមែន​រដ្ឋាភិបាល នៅ​ក្រសួង​មហាផ្ទៃ កាល​ពី​ថ្ងៃ​ទី៩ ខែកញ្ញា ឆ្នាំ២០២២។ បច្ចុប្បន្ន​អង្គការ​នេះ​មាន​សមាជិក​ចំនួន ១០រូប និង​កំពុង​ស្វែងរក​កិច្ច​សហប្រតិបត្តិការ​ជាមួយ​ដៃគូ​ពាក់ព័ន្ធ​ដទៃ​ទៀត​សម្រាប់​គាំទ្រ និង​ចូលរួម​បេសកកម្ម។

វិទ្យុអាស៊ីសេរី​មិន​អាច​ទាក់ទង អ្នក​នាំ​ពាក្យ​ក្រសួង​មហាផ្ទៃ លោក ខៀវ សុភ័គ និង​ប្រធាន​អ្នក​នាំ​ពាក្យ​រដ្ឋាភិបាល លោក ផៃ ស៊ីផាន ដើម្បី​សុំ​ការ​អត្ថាធិប្បាយ​ការ​យល់​ឃើញ ជុំវិញ​ការ​បង្កើត​អង្គការ​ទើប​បង្កើត​ថ្មី​មួយ​នេះ​បាន​ទេ នៅ​ថ្ងៃ​ទី៣១ តុលា​នេះ។

ជុំវិញ​រឿង​នេះ ប្រធាន​ប្រតិបត្តិ​នៃ​អង្គការ​ពលរដ្ឋ​យើង លោក សុខ ថារី ឱ្យ​ដឹង​ថា ត្បិត​នីតិវិធី​នៃ​ការ​បង្កើត​អង្គការ​នេះ​មាន​ភាព​លំបាក​ក៏​ពិត​មែន តែ​សមាជិក​គ្រប់​រូប​នៅ​តែ​ជម្នះ​បាន​ដោយសារ​ឆន្ទៈ​បម្រើ​ជាតិ​របស់​សមាជិក​គ្រប់​គ្នា។ លោក​បន្ត​ថា ក្រៅ​ពី​វិស័យ​កសិកម្ម គោល​ដៅ​បេសកកម្ម​បន្ទាប់​របស់​អង្គការ គឺ​ការ​លើកស្ទួយ​លទ្ធិ​ប្រជាធិបតេយ្យ សិទ្ធិមនុស្ស នីតិរដ្ឋ និង​ការ​អភិវឌ្ឍន៍​ប្រទេសជាតិ ជាពិសេស គឺ​ដើម្បី​ជួយ​បំពេញ​ចន្លោះ​ខ្វះខាត​ក្នុង​ការ​អនុវត្ត​គោល​នយោបាយ​របស់​រដ្ឋាភិបាល។ យ៉ាង​ណា​លោក​ថា មក​ទល់​ពេល​នេះ «អង្គការ​ពលរដ្ឋ​យើង» នៅ​ពុំ​ទាន់​ទទួល​បាន​ជំនួយ​ហិរញ្ញវត្ថុ​ពី​ស្ថាប័ន​ណា​មួយ​នៅ​ឡើយ​ទេ ខណៈ​ការ​ចូល​បំពេញ​ការងារ​ត្រូវ​ធ្វើ​ឡើង​ដោយ​ការ​ស្ម័គ្រចិត្ត។ លោក​រំពឹង​ថា ផ្អែក​លើ​ទស្សនវិស័យ និង​បេសកកម្ម អង្គការ​មួយ​នេះ​មាន​ការ​រីក​ចម្រើន ដើម្បី​ជួយ​ដល់​ប្រជាជន និង​ប្រទេសជាតិ។

«កន្លង​មក​ខ្ញុំ​មិន​មាន​ឱកាស ដើម្បី​ចូលរួម​នៅ​ក្នុង​កិច្ច​ការងារ​សង្គម​ជាតិ​នេះ​ទេ។ ប៉ុន្តែ​ទើប​នឹង​ពេល​ថ្មីៗ នេះ ពេល​ក្រុម​ការងារ​យើង​គាត់​មាន​គំនិត​ផ្ដួច​ផ្ដើម​ក្នុង​ការ​បង្កើត អង្គការ​ពលរដ្ឋ​យើង​នេះ​ឡើង»

«អង្គការ​ពលរដ្ឋ​យើង» ដែល​មាន​រូប​មនុស្ស​ឈរ​ព័ទ្ធ​ជុំវិញ​រង្វង់​អក្សរ​ជា​ឡូហ្គូ​សម្គាល់ បង្កើត​ឡើង​ដោយ​ឈរ​នៅ​លើ​ទស្សនវិស័យ​លើក​ស្ទួយ ពង្រឹង គោរព អនុវត្ត និង​ការពារ​លទ្ធិ​ប្រជាធិបតេយ្យ សិទ្ធិមនុស្ស នីតិរដ្ឋ និង​ការ​អភិវឌ្ឍន៍​សង្គម​ប្រកប​ដោយ​ចិរភាព។ បេសកកម្ម​របស់​អង្គការ គឺ​អប់រំ បណ្ដុះបណ្ដាល និង​ផ្សព្វផ្សាយ​អំពី​គោលការណ៍​លទ្ធិ​ប្រជាធិបតេយ្យ សិទ្ធិមនុស្ស ច្បាប់​ជាតិ ច្បាប់​អន្ដរជាតិ និង​ការ​គោរព​ច្បាប់​នានា ជា​ធរមាន។ ជាមួយ​គ្នា​នេះ មាន​ការ​ចូលរួម​លើក​កម្ពស់​ការ​ថែរក្សា​បរិស្ថាន និង​ការពារ​ធនធាន​ធម្មជាតិ ព្រមទាំង​ការ​បង្រៀន​ពី​បច្ចេកទេស​កសិកម្ម និង​បង្កើត​ទីផ្សារ​សហគមន៍​កសិផល។ លើស​ពី​នេះ នៅ​មាន​ការ​លើកស្ទួយ និង​ពង្រឹង​វិស័យ​អប់រំ ពង្រឹង​អំណាន​នៅ​ទូទាំង​ប្រទេស​ផង​ដែរ។

អង្គការ​មួយ​នេះ កើត​ចេញ​ពី​ឆន្ទៈ​របស់​អ្នក​ទោស​មនសិការ អតីត​មន្ត្រី​អង្គការ​សង្គម​ស៊ីវិល និង​អតីត​ស្ថាបនិក​ប៉ុស្តិ៍​វិទ្យុ។ ពួក​គាត់​ប្រមូលផ្ដុំ​ចងក្រង និង​បំពេញ​បេសកកម្ម​ទៅ​តាម​ជំនាញ​រៀង​ខ្លួន ក្នុង​គោលដៅ​តែ​មួយ​គឺ ជួយ​ប្រជាពលរដ្ឋ និង​ប្រទេស​ជាតិ។

អង្គការ​មិនមែន​រដ្ឋាភិបាល​ទាំង​ក្នុង​ស្រុក និង​អន្តរជាតិ បាន​ដើរ​តួ​យ៉ាង​សំខាន់​នៅ​ក្នុង​ការ​រៀបចំ និង​ការ​អភិវឌ្ឍ​ឡើង​វិញ នៅ​ក្នុង​ប្រទេស​កម្ពុជា ដោយ​ផ្អែក​ទៅ​លើ​កិច្ច​ព្រមព្រៀង​សន្តិភាព​ទីក្រុង​ប៉ារីស ឆ្នាំ១៩៩១ និង​ច្បាប់​រដ្ឋធម្មនុញ្ញ។

រដ្ឋធម្មនុញ្ញ​នៃ​ព្រះរាជាណាចក្រ​កម្ពុជា​ទទួល​ស្គាល់​សិទ្ធិ​ពលរដ្ឋ និង​សិទ្ធិ​សង្គម​ស៊ីវិល តាម​រយៈ​មាត្រា៣៥ ចែង​ថា ផ្តល់​សិទ្ធិ​ដល់​ប្រជាពលរដ្ឋ ដើម្បី​ចូលរួម​យ៉ាង​សកម្ម​នៅ​ក្នុង​ជីវភាព​នយោបាយ សេដ្ឋកិច្ច សង្គមកិច្ច និង​វប្បធម៌​របស់​ប្រទេស​ជាតិ។ មាត្រា ៤១ និយាយ​ពី​សេរីភាព​ក្នុង​ការ​បញ្ចេញ​មតិ សេរីភាព​ខាង​សារព័ត៌មាន សេរីភាព​ខាង​បោះពុម្ព​ផ្សាយ សេរីភាព​ក្នុង​ការ​ជួប​ប្រជុំ​គ្នា និង​មាត្រា ៤២ ផ្តល់​សិទ្ធិ​ដល់​ប្រជាពលរដ្ឋ​ក្នុង​ការ​បង្កើត​សមាគម និង​គណបក្ស​នយោបាយ។ ប្រជាពលរដ្ឋ​ខ្មែរ​ទាំង​ឡាយ អាច​ចូលរួម​ក្នុង​អង្គការ​មហាជន ជួយ​គ្នា​ទៅ​វិញ​ទៅ​មក​ការពារ​សមិទ្ធផល​ជាតិ និង​សណ្ដាប់ធ្នាប់​សង្គម។

ក្រោយ​រម្លាយ​គណបក្ស​សង្គ្រោះ​ជាតិ កាល​ពី​ចុង​ឆ្នាំ២០១៧ រដ្ឋាភិបាល​លោក​នាយក​រដ្ឋមន្ត្រី ហ៊ុន សែន បាន​បើក​យុទ្ធនាការ​ជា​ប្រព័ន្ធ​ធ្វើ​ទុក្ខ​បុក​ម្នេញ​ទៅ​លើ​ក្រុម​អង្គការ​សង្គម​ស៊ីវិល ដែល​ធ្វើ​ការ​ពាក់ព័ន្ធ​នឹង​វិស័យ​សិទ្ធិមនុស្ស ប្រជាធិបតេយ្យ និង​ប្រព័ន្ធ​ផ្សព្វផ្សាយ​នៅ​កម្ពុជា។ អង្គការ​សង្គម​ស៊ីវិល​ជាតិ និង​អន្តរជាតិ​បន្ត​អំពាវនាវ​ឲ្យ​រដ្ឋាភិបាល​លោក ហ៊ុន សែន បើក​លំហ​សិទ្ធិ​ពលរដ្ឋ និង​សិទ្ធិ​នយោបាយ​នៅ​មុន​ការ​បោះ​ឆ្នោត​ជាតិ​ខាង​មុខ​នេះ៕

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។