នៅថ្ងៃទី២៥ ខែកញ្ញា ត្រូវនឹងថ្ងៃទី១៥ រោច ខែភទ្របទ គឺជាថ្ងៃបញ្ចប់នៃពិធីបុណ្យភ្ជុំបិណ្ឌប្រពៃណីខ្មែរ។ នៅតាមទីវត្តអារាម និងកន្លែងកម្សាន្តនានានៅតាមបណ្ដាខេត្តមួយចំនួនមានសភាពអ៊ូអរ។ ក្រៅពីនេះ ប្រជាពលរដ្ឋក៏អាចជួបជុំគ្នា ពិសាអាហារលក្ខណៈគ្រួសារ ព្រមទាំងធ្វើបុណ្យទានតាមទំនៀមទម្លាប់នៃព្រះពុទ្ធសាសនាផង។ ទោះបីជាយ៉ាងណា ក៏មានពលរដ្ឋមួយចំនួនទៀតសោកសង្រេងក្នុងរដូវភ្ជុំបិណ្ឌ ដ្បិតសមាជិកគ្រួសារពួកគាត់ត្រូវបានរដ្ឋាភិបាល លោក ហ៊ុន សែន ចាប់ដាក់គុកដោយសារតែរឿងនិន្នាការនយោបាយ។
ចាប់ពីតាំងព្រឹកនៃថ្ងៃពិធីបុណ្យភ្ជុំបិណ្ឌឆ្នាំនេះ ទីវត្តអារាមនៅតាមបណ្តាខេត្តមួយចំនួនហាក់សភាពអ៊ូអរ ដោយសារតែប្រជាពលរដ្ឋអាចទៅធ្វើបុណ្យទានតាមទំនៀមទម្លាប់ខ្មែរ ក្រោយពីពួកគាត់មួយចំនួនខកខានមិនបានប្រារព្ធពិធីកាន់បិណ្ឌកាលពីឆ្នាំទៅ ដោយសារតែជំងឺរាតត្បាតសកល។
ព្រះតេជគណ ជា ផល្លីន គង់នៅវត្តគោកខ្ពស់ស្ថិតនៅខេត្តសៀមរាប មានថេរៈដីកាប្រាប់វិទ្យុអាស៊ីសេរីនៅថ្ងៃទី២៥ កញ្ញាថា នៅថ្ងៃបញ្ចប់នៃពិធីកាន់បិណ្ឌឆ្នាំនេះ មានប្រជាពលរដ្ឋច្រើនកុះករមករួមគ្នាធ្វើពិធីបោះបាយបិណ្ឌ។ ព្រះតេជគណបន្តថា នៅពេលព្រឹក និងនៅថ្ងៃត្រង់ ក៏មានពុទ្ធបរិស័ទក្មេងចាស់ប្រុសស្រីយ៉ាងច្រើនបានយកចង្ហាន់ប្រគេនព្រះសង្ឃ។ ព្រះតេជមានទឹកព្រះទ័យសប្បាយរីករាយ ពេលឃើញប្រជាពលរដ្ឋចេះសាមគ្គីគ្នាដោយ មិនប្រកាន់និន្នាការនយោបាយ បានមកធ្វើបុណ្យរួមគ្នាដោយសេចក្ដីជ្រះថ្លានៅក្នុងថ្ងៃបុណ្យភ្ជុំបិណ្ឌនេះ៖ «ភ្ជុំបិណ្ឌអត្ថន័យមានបីយ៉ាង៖ ន័យទីមួយហ្នឹងញាតិញោម ពុទ្ធបរិស័ទ គាត់ឧទ្ទិសកុសលជូនដល់បុព្វការីជន ដែលគាត់បានចែកឋានទៅកាន់បរលោក។ ទីពីរហ្នឹង សិរីសួស្ដី សេចក្ដីសុខជូនខ្លួនឯងជាម្ចាស់ទាន។ ទីបី គឺជាការរួបរួមសាមគ្គីជាតិ»។
នៅតាមតំបន់រមណីយដ្ឋានវប្បធម៌ដូចជា ប្រាសាទអង្គវត្ត ទីកន្លែងអបិយជំនឿព្រះអង្គចេក ព្រះអង្គចម ក្នុងឱកាសពិធីបុណ្យភ្ជុំបិណ្ឌឆ្នាំនេះក៏មានប្រជាពលរដ្ឋច្រើនកុះករទៅដើរលេងកម្សាន្ត និងបនស្រន់សុំសេចក្ដីចម្រើន និងបំណងប្រាថ្នារបស់ពួកគាត់។
ពលរដ្ឋម្នាក់រស់នៅខេត្តបន្ទាយមានជ័យ លោក ឡេង ខុន សង្កេតឃើញថា ពលរដ្ឋមួយចំនួនដែលធ្វើដំណើរទៅទីវត្តអារាមមួយចំនួនហាក់ចេះយោគយល់ ហើយថែមទាំងសម្ដែងក្ដីរីករាយធ្វើបុណ្យជាមួយគ្នាទោះបីជាពួកគាត់មិនធ្លាប់ស្គាល់គ្នាពីមុនមកក្ដី។ លោកបន្តទៀតថា ប្រសិនពលរដ្ឋទូទាំងប្រទេសចេះរួមរួបគ្នាជាធ្លុងមួយ នោះប្រទេសជាតិក៏អាចរីកចម្រើន ហើយពលរដ្ឋក៏អាចមានសេរីភាពពេញលេចដែរ៖ «សម្រាប់ខ្ញុំមើលឃើញថា អ្នកដែលទៅវត្តបានរួបរួមគ្នាបានល្អ គោរពគ្នាទៅវិញទៅមក ឃើញមានថារាប់អានគ្នាច្រើនទៅវត្តជាមួយគ្នាមានភាពញញឹញញាមដាក់គ្នា ឃើញនៅវត្តអ៊ីចឹងហ្មង។ ដូចថា មានសទ្ធាគ្រប់ៗគ្នា»។
ចំណែកឯ ទីវត្តអារាមស្ថិតនៅប៉ែកនៃទិសនិរតីឯណោះវិញ គឺវត្តមុនីរតនៈកែវក្រសាំងស្ថិតនៅខេត្តកែប នារដូវពិធីភ្ជុំបិណ្ឌឆ្នាំនេះ ក៏មានប្រជាពលរដ្ឋទៅធ្វើបុណ្យទានច្រើនកុះករដែរ។ បន្ទាប់ពីពលរដ្ឋ ឬពុទ្ធបរិស័ទបានប្រគេនចង្ហាន់ និងធ្វើបុណ្យឧទ្ទិសដល់សាច់ញាតិដែលស្លាប់ទៅហើយនោះ ពួកគាត់ក៏នាំគ្នាដើរលេងកម្សាន្ត និងពិសារអាហារជុំគ្នាលក្ខណៈគ្រួសារនៅតាមមាត់ឆ្នេរក្រុងកែប។
ទោះបីជាប្រជាពលរដ្ឋក្មេងចាស់ប្រុសស្រីស្ទើរទូទាំងប្រទេសសប្បាយរីករាយ និងបានជួបជុំគ្រួសារនាពិធីបុណ្យភ្ជុំបិណ្ឌនេះយ៉ាងណាក្ដី ក៏មានកម្មករ ពលកម្មធ្វើការក្រៅប្រទេស ព្រមទាំងសាច់សកម្មជនបក្សប្រឆាំងមួយចំនួនទៀតមិនបានជួបជុំគ្នា ដើម្បីប្រារព្ធពិធីបុណ្យភ្ជុំបិណ្ឌដូចប្រជាពលរដ្ឋទូទៅទេ។
ប្រពន្ធសកម្មជនគណបក្សប្រឆាំងលោក កាក់ កុម្ភារ គឺលោកស្រី ព្រុំ ចន្ថា ប្រាប់វិទ្យុអាស៊ីសេរីថា គ្រួសារលោកស្រី សោកសង្រេងដ្បិតលោកស្រីមិនបានជួបប្តីអស់រយៈពេលជាង ២ឆ្នាំមកហើយ ដោយសារតែអាជ្ញាធររដ្ឋាភិបាលលោក ហ៊ុន សែន ចាប់ប្ដីលោកស្រីដាក់គុកទាំងគ្មានកំហុស។ លោកស្រី រំពឹងថាអាជ្ញាធរនៃរដ្ឋាភិបាលឯកបក្សនឹងដោះលែងប្ដីឆាប់ៗនេះ ព្រោះលោកស្រីយល់ថាការចាប់ខ្លួនលោកស្រីរួមទាំងសកម្មជននយោបាយដទៃទៀតគឺជាការបំបិទសិទ្ធិ ហើយវាគ្មានចំណេញអ្វីឡើយដល់រដ្ឋាភិបាល ពោលគឺមានតែការថ្កោលទោសពីសហគមន៍ជាតិ និងអន្តរជាតិ៖ «ខ្ញុំជួបជុំមីងមារទាំងអស់ ប្រារព្ធពិធីភ្ជុំបិណ្ឌ ដោយអត់មានវត្តមានគ្រួសារ។ និយាយរួមទៅខ្ញុំមានការសោកសៅ ព្រោះប្រជាពលរដ្ឋទូទៅ មានការជួបជុំគ្នាមានមីងមារ ពួកគាត់សប្បាយរីករាយ។ ខ្ញុំមានអារម្មណ៍ថា ក្ដុកក្ដួលខ្លាំងណាស់ ហើយឪខ្ញុំគាត់តែងតែសួរថា ប្តីខ្ញុំចេញពីពន្ធនាគារកាល? ព្រោះអីយប់មិញជុំគ្នា ទឹកភ្នែក ហើយក្មួយៗមកគ្រប់ខេត្តទាំងអស់ជួបជុំគ្នាអ៊ីចឹងទៅមានអារម្មណ៍សោកសៅមែនទែនហ្មង»។
ជុំវិញរឿងនេះដែរ នាយកទទួលបន្ទុកទូទៅនៃអង្គការលីកាដូ (LICADHO) លោក អំ សំអាត មានប្រសាសន៍ថា នារដូវពិធីបិណ្ឌភ្ជុំបិណ្ឌឆ្នាំនេះ ប្រជាពលរដ្ឋទាំងនៅទីក្រុង និងជនបទមានចំនួនច្រើនជាងឆ្នាំកន្លងទៅ ដោយពួកគាត់បានទៅធ្វើបុណ្យទាន និងធ្វើពិធីបង្សុកូលឧទ្ទិសកុសលដល់សាច់ញាតិដែលបានចែកឋានទៅ។ ទោះបីយ៉ាងណា លោកសោកស្ដាយដែលប្រជាពលរដ្ឋមួយចំនួនទៀតហាក់មានភាពសោកសង្រេង ដោយសារតែក្រុមគ្រួសារមួយចំនួនរងសម្ពាធផ្លូវចិត្តដ្បិតដីធ្លីត្រូវបានគេរំលោភ និងសាច់ញាតិពលរដ្ឋខ្លះទៀតត្រូវអាជ្ញាធរចាប់ដាក់គុកជាដើម។ លោក អំ សំអាច រំពឹងថាពលរដ្ឋរងគ្រោះដីធ្លី និងអ្នកជាប់ឃុំដោយសាររឿងនយោយនឹងអាចមានដំណោះស្រាយឆាប់ៗខាងមុខនេះ ហើយនាឱកាសពិធីភ្ជុំបិណ្ឌលោកក៏មានសារជូនពរដល់មហាជនខ្មែរដែរ៖ «ខ្ញុំសូមជូនពរ ទៅដល់បងប្អូន ប្រជាពលរដ្ឋខ្មែរទាំងអស់ មិនថាមិននៅក្នុងប្រទេស និងក្រៅប្រទេស សូមឱ្យមានសុខភាពល្អគ្រប់ៗគ្នា មានសុភមង្គលក្នុងគ្រួសារ ប្រកបមុខរបបអ្វីសូមឱ្យសម្រេចដូចបំណង និងការងារសូមឱ្យធ្វើហ្នឹងកាន់តែមានប្រសិទ្ធិភាព និងមានការងារល្អៗ»។
ជុំវិញពិធីបុណ្យភ្ជុំបិណ្ឌនេះដែរ ស្ថានទូតអាមេរិកចាំកម្ពុជាបានជូនពរដល់ប្រទេសកម្ពុជាឱ្យប្រកបតែសុវត្ថិភាព វិបុលភាព និងសុខសន្តិភាព ក្នុងពេលដែលប្រជាជនកម្ពុជាជួបជុំគ្រួសារ និងសម្ដែងការគោរពដល់បុព្វការីជន។
U.S. Embassy Phnom Penh wishes Cambodia a safe, prosperous, and peaceful Pchum Ben holiday as you gather with families...
Posted by U.S. Embassy Phnom Penh, Cambodia on Saturday, September 24, 2022
ទាក់ទងនឹងរឿងនេះដែរ អ្នកវិភាគចាស់វស្សាបណ្ឌិត ឡៅ ម៉ុងហៃ បានសរសេរនៅលើគណនីហ្វេកប៊ុករបស់លោកថា ស្មារតីនៃភ្ជុំបិណ្ឌ គឺជាការធ្វើបុណ្យភ្ជុំបិណ្ឌជួបជុំគ្នា ធ្វើអំពើល្អ កសាងឯកភាពជាតិ យកធម៌ព្រះពុទ្ធជាគ្រឹះ និងវត្តជាសសរទ្រទ្រង់។ លោកបណ្ឌិតសរសេរបន្តថា ដោយស្នើឱ្យស្មារតីនេះដក់ជាប់ក្នុងចិត្តគំនិតខ្មែរជានិច្ច ពេលប្រស្រ័យទាក់ទងគ្នា ជាលក្ខណៈការងារ និងការរកស៊ីធ្វើការចិញ្ចឹមជីវិតនៅក្នុងសង្គម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។