អ្នកភូមិនៅស្រុករំដួល ខេត្តស្វាយរៀង រិះគន់អាជ្ញាធរមូលដ្ឋាន ថាមិនអើពើទប់ស្កាត់រថយន្តដឹកដំឡូងមីរបស់ជនជាតិវៀតណាម ក្នុងទឹកដីខ្មែរ ដែលបណ្ដាលឲ្យខូចផ្លូវពិបាកធ្វើដំណើរ គ្មានអ្នកទទួលខុសត្រូវ។
ពួកគាត់បញ្ជាក់ថា ផ្លូវខូចទាំងស្រុងប្រមាណមួយគីឡូម៉ែត្រ ធ្វើឲ្យប្រជាពលរដ្ឋនៅតំបន់នោះ មិនអាចធ្វើដំណើរដោយរថយន្ត និងម៉ូតូបានឡើយ។ ប៉ុន្តែ មេឃុំបញ្ជាក់ថា ការអនុញ្ញាតឲ្យរថយន្តជនជាតិវៀតណាម ចូលមកដឹកដំឡូង ដើម្បីកាត់បន្ថយការខូចខាតផលដំណាំរបស់ប្រជាពលរដ្ឋ។
អ្នកភូមិដែលរស់នៅតំបន់ជាយដែនកម្ពុជាវៀតណាម សម្ដែងការមិនពេញចិត្ត និងខឹងសម្បាចំពោះរថយន្តដឹកដំឡូងរបស់ជនជាតិវៀតណាម ថាជាដើមចមបង្កផលលំបាកដល់ប្រជាពលរដ្ឋយ៉ាងខ្លាំង ហើយអាជ្ញាធរត្រូវដោះស្រាយជាបន្ទាន់។
ប្រជាពលរដ្ឋម្នាក់ថ្លែងក្នុងលក្ខខណ្ឌមិនឲ្យបញ្ចេញឈ្មោះ រស់នៅភូមិព្រែកពក ឃុំថ្នាធ្នង់ ស្រុករំដួល ខេត្តស្វាយរៀង ឲ្យដឹងនៅថ្ងៃទី១ សីហា ថា រថយន្តដឹកដំឡូងមីរបស់ជនជាតិវៀតណាម ធ្វើសកម្មភាពក្នុងទឹកដីខ្មែរនៅតំបន់នៃឃុំថ្នាធ្នង់ ជាយដែនប្រទេសកម្ពុជាវៀតណាម ហើយធ្វើឲ្យខូចផ្លូវទាំងស្រុងប្រមាណ ១គីឡូម៉ែត្រ មិនអាចឲ្យប្រជាពលរដ្ឋធ្វើដំណើរដោយរថយន្ត ឬម៉ូតូបាននោះទេ។
អ្នកភូមិរូបនេះបន្តថា ដំណាំកសិកម្មនោះភាគច្រើនជាកម្មសិទ្ធិរបស់ជនជាតិវៀតណាម ដែលក្នុងរូបភាពជួលដីខ្មែរធ្វើអាជីវកម្ម ហើយពេលប្រមូលផល គេយកទៅលក់នៅប្រទេសរបស់ខ្លួនវិញ ហើយធ្វើឲ្យខូចផ្លូវរបស់ខ្មែរពុំមានអាជ្ញាធរណាអើពើនោះទេ៖ «អាជ្ញាធរដែនដីគេចេះតែបណ្ដោយអ៊ីចឹង អាហ្នឹងប្រហែលគេមានសំណូកពីយួនខ្លះហើយ បានចេះតែចូលអីអ៊ីចឹងបានបង! គ្រលុកក្រហេងក្រហូងហ្នឹងវាច្រើនណាស់ ប៉ុន្តែគ្រាន់វាដោយដុំៗអាខូចទាំងស្រុងតែម្ដង ម៉ាគីឡូម៉ែត្រខូចទាំងអស់តែហ្មង ដូចជាអាផ្លូវរទេះបរក្នុងស្រែអ៊ីចឹងបង វាលែងទៅជាថ្នល់។ ប្រជាពលរដ្ឋគាត់ធ្វើដំណើរមក បើដើរថ្មើរជើងចេះតែបានហើយ ប៉ុន្តែប្រឡាក់ភក់ទាំងអស់តែហ្មងជើង»។
អ្នកភូមិបញ្ជាក់បន្ថែមថា ប្រជាពលរដ្ឋប្រមាណ ២០០គ្រួសារ ជួបការលំបាកដូចជាការធ្វើដំណើរទៅព្យាបាលជំងឺ និងការទៅទិញសម្ភារៈប្រើប្រាស់ប្រចាំថ្ងៃនៅឯទីផ្សារជាដើម គឺអ្នកភូមិត្រូវធ្វើដំណើរដោយថ្មើរជើង ត្រូវចំណាយពេលអស់ជាច្រើនម៉ោង។
ឆ្លើយតបនឹងបញ្ហានេះ មេឃុំថ្នាធ្នង់ លោក គឹម ញ៉ាញ ទទួលស្គាល់ថា រថយន្តដឹកដំឡូងមីរបស់ជនជាតិវៀតណាម នោះ ពិតជាចូលមកដឹកដំឡូងក្នុងទឹកដីខ្មែរ ធ្វើឲ្យខូចខាតផ្លូវថ្នល់ខ្លះមែន ប៉ុន្តែការដឹកជញ្ជូនរបស់ពួកគេទាំងនោះ ក្នុងគោលបំណងប្រមូលទិញដំណាំកសិកម្មរបស់ប្រជាពលរដ្ឋដែលដាំដុះនៅតាមតំបន់ជាយដែនប៉ុណ្ណោះ៖ «ហើយដល់ពេលមិនទាន់ដល់ខែផង មានទឹកជំនន់ជន់មក ហើយគាត់ត្រូវដើម្បីលក់ ហើយលក់ទៅណា យើងរោងចក្រសហគ្រាសដើម្បីស្លដំឡូងអីហ្នឹងកើតអ៊ីចឹង មានតែទំនាក់ទំនងបញ្ហារបស់វៀតណាម។ ដល់ទំនាក់ទំនងទៅ គេយកអាត្រាក់មកធំអីអ៊ីចឹងទៅ ខ្ញុំប្រាប់ហើយតើ បងប្អូនមានអាជីវកម្មកុំវាខាតផលប្រយោជន៍ ហើយកុំវាថាវានៅរាំងស្ទះ ប៉ុណ្ណឹងវាដកមិនទាន់ទៀត។ វាមិនឲ្យខូចខាតទាំងប្រជាជន កុំឲ្យខូចខាតទាំងផ្លូវថ្នល់»។
តាមការស្រាវជ្រាវរបស់អង្គការសង្គមស៊ីវិល បង្ហាញថា ផ្ទៃដីដាំដំឡូងមីតាមជាយដែនកម្ពុជាវៀតណាម ភាគច្រើនជាក្រុមហ៊ុនរបស់ជនជាតិវៀតណាម ជាពិសេសនៅស្រុករំដួលតែម្ដង។
ប្រធានសម្ព័ន្ធសហគមន៍កសិករកម្ពុជា លោក ថេង សាវឿន ចាត់ទុកការថ្លែងរបស់អាជ្ញាធរឃុំថ្នាធ្នង់ ថាជាលេសមួយដើម្បីដោះបន្ទុកពីការទទួលខុសត្រូវប៉ុណ្ណោះ។ លោកថា ប្រជាពលរដ្ឋខ្មែរនៅស្រុករំដួល ពុំមានលទ្ធភាពដាំដំឡូងមីឡើយ ហើយហេតុដែលកសិករខ្មែរពុំមានលទ្ធភាពនោះ ពីព្រោះថា ពួកគាត់ខ្វះបច្ចេកទេស និងគ្មានដើមទុនសម្រាប់ធ្វើកសិកម្ម៖ «អឺ! ដោយសារតែវៀតណាម ទាំងអស់ហ្នឹងគិតថាប្រជាពលរដ្ឋកម្ពុជា ហ្នឹងពុំមានលទ្ធភាពដាំ ទើបគេចុះមកជួលដី។ អ៊ីចឹង ប្រសិនបើក្រុមហ៊ុនវៀតណាម ដឹកឲ្យខូចផ្លូវខូចហេដ្ឋារចនាសម្ពន្ធហ្នឹង អាជ្ញាធរគួរតែព្យាយាមដោះស្រាយធ្វើយ៉ាងណាឲ្យក្រុមហ៊ុនទាំងអស់ហ្នឹង ទទួលខុសត្រូវ ពីព្រោះក្រុមហ៊ុនទាំងអស់ដែលធ្វើឲ្យខូចផ្លូវ ត្រូវទទួលខុសត្រូវទៅលើបញ្ហាការដឹកជញ្ជូន។ ហើយម្យ៉ាងវិញទៀត អាជ្ញាធរក៏ត្រូវទទួលខុសត្រូវផងដែរ»។
ដំណាំដំឡូងមីនៅឃុំថ្នាធ្នង់ ស្រុករំដួល សព្វថ្ងៃមានផ្ទៃដីដាំដុះសរុបប្រមាណ ៣០០ហិកតារ ហើយដំណាំទាំងនោះ ទីផ្សារសំខាន់នៅប្រទេសវៀតណាម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។