ក្រុមហ៊ុនចិនមួយលួចជីកយករ៉ែមាសក្រោមរូបភាពគម្រោងវារីអគ្គិសនីស្ទឹងពោធិ៍សាត់១
2023.04.28
ច្រកចូលក្រុមហ៊ុនចិន ស៊ីនណូហាយដ្រូ (SINOHYDRO BUREAU 8 CO., LTD.) នៅឃុំប្រមោយ ស្រុកវាលវែង ខេត្តពោធិ៍សាត់។
រូប៖ ពលរដ្ឋផ្ដល់ឱ្យ
ប្រជាពលរដ្ឋរស់នៅក្បែរគម្រោងសាងសង់វារីអគ្គិសនីស្ទឹងពោធិ៍សាត់១ របស់ក្រុមហ៊ុន Stung Pursat Hydro Power (SPHP) (Cambodia) Co Ltd’s ដែលស្ថាបនាដោយក្រុមហ៊ុន ស៊ីនណូហាយដ្រូ (SINOHYDRO BUREAU 8 CO., LTD.) សង្ស័យក្រុមហ៊ុនមួយនេះ កំពុងលួចលាក់ជីកយករ៉ែមាសដឹកយកទៅប្រទេសរបស់ខ្លួន ក្រោយរូបភាពសាងសង់ទំនប់វារីអគ្គិសនី។ ប្រជាពលរដ្ឋរស់នៅឃុំប្រមោយ ស្រុកវាលវែង ខេត្តពោធិ៍សាត់ អះអាងថា ក្រុមហ៊ុនចិន ស៊ីនណូហាយដ្រូ (SINOHYDRO BUREAU 8 CO., LTD.) ដែលម៉ៅការសាងសង់ទំនប់វារីអគ្គិសនីនៅស្ទឹងពោធិ៍សាត់ ពីក្រុមហ៊ុន Stung Pursat Hydro Power (SPHP) (Cambodia) Co Ltd’s កំពុងលួចជីកយករ៉ែមាសដឹកចេញទៅក្រៅ។ ប្រជាពលរដ្ឋថា កម្មករខ្មែរដែលចូលធ្វើការនៅក្នុងការដ្ឋានបានប្រទះឃើញ ជនជាតិចិនជីកយកថ្មដែលមានលាយមាសដាក់ក្នុងកេសឈើបិទជិត រួចដឹកយកទៅក្រៅការដ្ឋានជាប្រចាំ។
ប្រជាពលរដ្ឋរស់នៅភូមិទួលគ្រួស និងភូមិស្ទឹងថ្មី ប្រាប់វិទ្យុអាស៊ីសេរី នៅថ្ងៃទី២៧ មេសា ថា ពលរដ្ឋក្នុងភូមិដែលជាកម្មករបានជួយលើកកេសឈើ ដាក់លើឡាន ក៏ប្រទះឃើញថ្មលាយឡំដោយពណ៌មាស ហើយកន្លែងទាំងនោះ គេមិនអនុញ្ញាតឲ្យកម្មករខ្មែរចេញចូលនោះទេ ដោយអនុញ្ញាតឱ្យតែកម្មករជាជនជាតិចិនប៉ុណ្ណោះចេញចូល នៅក្នុងការដ្ឋានជីកយកថ្មនោះ។ ពលរដ្ឋបន្តទៀតថា កម្មករខ្មែរដែលដឹងអំពីថ្មលាយមាស ត្រូវបានក្រុមហ៊ុនបញ្ឈប់ពីការងារហើយ។ ប្រជាពលរដ្ឋរូបនេះបន្ថែមថា ពួកគេមិនហ៊ានផ្សព្វផ្សាយបញ្ហានេះទៅកាន់អ្នកសារព័ត៌មានទេ ដោយសារអាជ្ញាធរមូលដ្ឋានបានគំរាមកំហែងដល់ពួកគេ។
ពលរដ្ឋសុំលាក់ឈ្មោះ៖ «ដឹកថ្មចេញសុទ្ធតែរ៉ែ កុំអីក៏ពួកយើងអត់ដឹងទេ ដោយសាររកកម្មករជួយលើក (លើកកេសដាក់ថ្ម) ព្រោះវាលើកអត់រួច ហើយថ្មនឹងថ្មមាសសុទ្ធ គ្រាន់តែទំនប់គេបើកឡានអាត្រាក់ពីរគ្រឿងមិនចង់ទើសផង»។
ពលរដ្ឋរូបនេះបន្តទៀតថា ជនជាតិចិនម្នាក់បានស្លាប់នៅពេលពួកគេកំពុងចុះសិក្សាស្រាវជ្រាវពីការសាងសង់ទំនប់វារីអគ្គិសនី។ អ្នកភូមិចាត់ទុកការស្លាប់នេះ ជាការដាក់ទោសទណ្ឌពីអ្នកតាក្រហមក ដែលបានថែរក្សាព្រៃភ្នំនៅតំបន់នោះ។ ប្រជាពលរដ្ឋនៅឃុំប្រមោយសោកស្ដាយការបាត់បង់ធនធានធម្មជាតិ និងមច្ឆាជាតិនៅតាមស្ទឹងពោធិ៍សាត់ ដែលប្រជាពលរដ្ឋតែងតែចុះទៅនេសាទជាប្រចាំ ដើម្បីផ្គត់ផ្គង់គ្រួសារ ដោយពលរដ្ឋខ្លះអាចរកត្រីទៅលក់រកកម្រៃទុកសម្រាប់កូនរបស់ពួកគេសិក្សារៀនសូត្រថែមទៀតផង។
វិទ្យុអាស៊ីសេរី មិនអាចសុំការបំភ្លឺជុំវិញរឿងនេះ ពីតំណាងក្រុមហ៊ុន ស៊ីនណូហាយដ្រូ បាននៅឡើយទេ។ ចំណែកអភិបាលខេត្តពោធិ៍សាត់ លោក ខូយ រីដា ក៏មិនអាចសុំការអត្ថាធិប្បាយបានដែរនៅថ្ងៃទី២៧ មេសា។ រីឯអ្នកនាំពាក្យក្រសួងរ៉ែ និងថាមពល លោក អ៊ឹង ឌីប៉ូឡា មិនអត្ថាធិប្បាយទេដោយលោកចុចបិទទូរស័ព្ទ។
សកម្មជនបរិស្ថាន លោក អាឡិកហាន់ដ្រូ ហ្គន់សាឡេស ដេវិតសុន (Alejandro Gonzalez Davidson) ហៅថា អាឡិច យល់ឃើញថា គ្រប់គម្រោងអភិវឌ្ឍន៍នៅក្នុងប្រទេសកម្ពុជាដោយក្រុមហ៊ុនចិន ប្រជាពលរដ្ឋកម្ពុជាមិនដែលទទួលបានព័ត៌មានច្បាស់លាស់ឡើយ ពោលគឺក្រុមហ៊ុនទាំងអស់នោះលាក់បាំងព័ត៌មានដល់ប្រជាពលរដ្ឋ ហើយតែងតែឆ្លៀតឱកាសទាញយកផលប្រយោជន៍ដោយខុសច្បាប់។ មិនតែប៉ុណ្ណោះ លោកថា អាជ្ញាធរគ្រប់ជាន់ថ្នាក់ក៏ជាប់ព័ន្ធរឿងអាស្រូវប្រព្រឹត្តិអំពើពុករលួយជាមួយនឹងក្រុមហ៊ុន។
លោក អាឡិច៖ «អាជ្ញាធរលួចលាក់ព័ត៌មានលាក់ដោយចេតនាជាទូទៅគឺអ៊ីចឹង ហើយក្រុមហ៊ុនចិននឹងក៏មិនមែនជាក្រុមហ៊ុនដែលមានទម្លាប់ បើជំហរមានតម្លាភាពអ្វីចំពោះប្រជាជនអីគឺអត់ទេទម្លាប់ធ្វើការរបស់ក្រុមហ៊ុនចិនគឺលាក់ព័ត៌មានប្រជាជន អ៊ីចឹងប្រជាជនយល់ច្រឡំ ប្រជាជនមិនដឹងប្រជាជនថា ជារឿងធម្មតា»។
គម្រោងវារីអគ្គិសនីស្ទឹងពោធិ៍សាត់១ នៅត្រង់ចំណុចចិនយំ ស្ថិតនៅឃុំប្រមោយ ស្រុកវាលវែង ដំណើរការ នៅចុងឆ្នាំ២០២២ ដោយក្រុមហ៊ុនចិន និងកូរ៉េ មានអានុភាព ៨០មេហ្គាវ៉ាត់។ គម្រោងនេះគ្រោងនឹងបញ្ចប់ការសាងសង់ និងដាក់ឲ្យប្រើប្រាស់ជាផ្លូវការ នៅចុងឆ្នាំ២០២៦។
ប្រទេសកម្ពុជាមានវារីអគ្គិសនីចំនួន ៧កន្លែងដោយ៥កន្លែងស្ថិតនៅភាគខាងត្បូងឆៀងខាងលិចនៃប្រទេសកម្ពុជា មានដូចជាវារីអគ្គិសនីតាតៃ ឫស្សីជ្រុំ កំចាយ គីរីរម្យ១ គីរីរម្យ៣ ។ ចំណែកមួយកន្លែងទៀតគឺវារីអគ្គិសនីសេសានក្រោម២ ស្ថិតនៅខេត្តស្ទឹងត្រែង។
ចំណែកខេត្តពោធិ៍សាត់ មានវារីអគ្គិសនីចំនួន ២កន្លែង គឺទី១ វារីអគ្គិសនីស្ទឹងអាតៃ ស្ថិតក្នុងឃុំអូរសោម ស្រុកវាលវែង សាងសង់ដោយក្រុមហ៊ុនចិន ហើយត្រូវបានដាក់ឲ្យប្រើប្រាស់ជាផ្លូវការតាំងពីឆ្នាំ២០១៥ និងទី២ វារីអគ្គិសនីស្ទឹងពោធិ៍សាត់១ ស្ថិតក្នុងភូមិស្ទឹងថ្មី ឃុំប្រមោយ ត្រង់ចំណុចចិនយំ កំពុងដំណើរការសាងសង់ដោយក្រុមហ៊ុនចិន កូរ៉េ គ្រោងបញ្ចប់ និងដាក់ឲ្យប្រើប្រាស់ជាផ្លូវការ នៅចុងឆ្នាំ២០២៦៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សង្គមស៊ីវិលបារម្ភថា កសាងស្តូបមិត្តភាព-កម្ពុជាវៀតណាមជាង ២០ខេត្ត/ក្រុង ជានិមិត្តរូបបំបែកបំបាក់សាមគ្គីខ្មែរ
- មេធាវីគ្រោងដាក់សេចក្តីសន្និដ្ឋានទៅសាលាឧទ្ធរណ៍ភ្នំពេញបញ្ជាក់ពីភាពស្អាតស្អំលោក កឹម សុខា
- លោក ហ៊ុន សែន ស្នើតែងតាំងលោក គុយ សុផល ភ្លាមៗ «ខ្លាចព្រះមហាក្សត្រយកមនុស្សក្រៅពីបក្ខពួកខ្លួន»
- ពលរដ្ឋខ្មែរនៅកូរ៉េខាងត្បូងប្រមាណ៣ពាន់ ធ្វើមហាបាតុកម្មប្រឆាំង CLV ម្តងទៀត
- លោក ហ៊ុន ម៉ាណែត អះអាងថា យុវជន ៩នាក់ ដែលកំពុងជាប់ឃុំ ពាក់ព័ន្ធនឹង «គម្រោងផ្ដួលរំលំរដ្ឋាភិបាល»
អត្ថបទពេញនិយម
សង្គម
- សមាគមឧកញ៉ារំឭកឧកញ៉ាឱ្យបង់វិភាគទានប្រចាំឆ្នាំ
- អ្នកវិភាគថា ការផ្ដល់ជំនួយគ្រឿងយោធារបស់ឥណ្ឌូណេស៊ីមកឱ្យកម្ពុជា គឺដើម្បីកាត់បន្ថយឥទ្ធិពលចិន
- កម្មករវៀតណាមកំពុងសម្ងំធ្វើការក្នុងក្រុមហ៊ុនចម្ការចេកខេត្តរតនគិរី
- សមត្ថកិច្ចឃាត់ខ្លួនជនជាតិចិន ៧នាក់ពាក់ព័ន្ធករណីផ្ទុះអាវុធនៅខេត្តព្រះសីហនុ
- កម្ពុជានឹងមិនអាចទាក់ទាញភ្ញៀវទេសចរទេ បើមិនដោះស្រាយបញ្ហាឧក្រិដ្ឋកម្មក្នុងប្រទេស