ពលរដ្ឋនៅក្រុងប៉ោយប៉ែតបារម្ភពីជនជាតិចិនចូលមកកម្ពុជា ស្របពេលជំងឺកូវីដកំពុងតែរាតត្បាត
2020.03.25
ប្រជាពលរដ្ឋមួយចំនួននៅខេត្តបន្ទាយមានជ័យរិះគន់រដ្ឋាភិបាលថា បណ្ដោយឱ្យជនជាតិចិនចូលមករស់នៅក្រុងប៉ោយប៉ែតអំឡុងពេលរាតត្បាតជំងឺកូវីដ១៩។ ពួកគាត់ព្រួយបារម្ភខ្លាចជនបរទេសទាំងនេះនាំមេរោគរលាកផ្លូវដង្ហើមនេះមកចម្លងដល់ពលរដ្ឋក្នុងស្រុក។
ប្រជាពលរដ្ឋនៅម្នាក់រស់នៅក្រុងប៉ោយប៉ែតលោក ព្រីង សុផានី ប្រាប់អាស៊ីសេរី នៅថ្ងៃទី២៥ មីនាថា ចាប់តាំងពីដើមខែមីនាមក មានជនជាតិចិនជាច្រើនរយនាក់បានចូលមកស្នាក់នៅក្រុងប៉ោយប៉ែតជាបន្តបន្ទាប់ដោយពុំដឹងមូលហេតុអ្វីឡើយ។ ពលរដ្ឋរូបនេះ បន្ថែមថា ជនបរទេសទាំងនេះដោយមួយចំនួនជួលបន្ទប់ស្នាក់នៅតាមកាស៊ីណូ និងខ្លះទៀតស្នាក់នៅក្នុងបន្ទប់ជួលនៅជាប់ព្រំដែនកម្ពុជា-ថៃ៖ «មួយរយៈនេះមានច្រើនគេមកម្ដងបីបួនរថយន្តអីចឹងទៅគេមិនសម្រុកមកដូចពីមុខទេគ្រាន់តែមកអីចឹងប្រមូលផ្ដុំទៅវាច្រើន។ ដូចខ្ញុំឃើញសារព័ត៌មានក្រុងស្រុកបានបង្ហោះតាមហ្វេសប៊ុក នៅខាងក្រុងបាវិត ស្វាយរៀងក៏មកច្រើនដែរ តាមការលេចឮដូចជាចេញពីប្រទេសភូមា និងពីប្រទេសហ្វីលីពីនមក»។
លោកបន្តទៀតថា ជនជាតិចិនទាំងនេះនាំគ្នាដើរទាំងហ្វូងៗ ដោយអ្នកខ្លះមានពាក់ម៉ាស់និងខ្លះទៀតមិនមានពាក់ម៉ាស់ការពារជំងឺកូវីដ១៩នោះទេ។
ស្រដៀងគ្នានេះដែរ ពលរដ្ឋនៅក្រុងប៉ោយប៉ែតម្នាក់ទៀតឱ្យដឹងថា ជនបរទេសទាំងនេះទំនងមកពីក្រៅប្រទេសដោយចូលមកកម្ពុជាតាមព្រលានយន្តហោះអន្តរជាតិភ្នំពេញ និងសៀមរាប រួមធ្វើដំណើររថយន្តទេសចរណ៍មកក្រុងប៉ោយប៉ែត។ ពលរដ្ឋរូបនេះព្រួយបារម្ភខ្លាចជនជាតិចិនទាំងនេះ នាំជំងឺរលាកផ្លូវដង្ហើមកូវីដ១៩ មកជាមួយហើយចម្លងដល់ប្រជាពលរដ្ឋខ្មែរ ពីព្រោះអាជ្ញាធរពុំបានដាក់ពួកគេដាច់ដោយឡែករយៈពេល១៤ថ្ងៃនោះឡើយ៖ «ខ្ញុំព្រួយបារម្ភព្រោះយើងអត់ដឹងប្រភពតើគាត់មកពីណា គាត់មកពីតំបន់ដែលមានមេរោគកូវីដហ្នឹង ឬក៏គាត់មកពីណា។ អីចឹងជាក់ស្ដែងយើងឃើញហើយពលរដ្ឋខ្មែរក្នុងស្រុកដូចមិនមានឆ្លងទេ ក៏ប៉ុន្តែយើងឃើញជាក់ស្ដែងថ្មីពលរដ្ឋខ្មែរទៅចូលរួមពិធីសាសនានៅប្រទេសម៉ាឡេស៊ីក្រោយមកក៏ផ្ទុះជំងឺកូវីដ១៩ ដោយសារតែការធ្វេសប្រហែសរបស់ក្រសួងសុខាភិបាល»។
ទាក់ទងនឹងបញ្ហានេះស្នងការរងនគរបាលខេត្តបន្ទាយមានជ័យទទួលបន្ទុកផ្នែកអន្តោប្រវេសន៍ លោក អេង លីហួ ប្រាប់អាស៊ីសេរីថា ជនជាតិចិនដែលស្នាក់នៅក្រុងប៉ោយប៉ែតនោះ ភាគច្រើនពួកគេបានមកស្នាក់នៅកម្ពុជា នៅមុនពេលផ្ទុះជំងឺកូវីដ១៩ ហើយពួកគេតែងប្ដូរទីតាំងស្នាក់នៅពីខេត្តមួយទៅតំបន់មួយទៀតដែលមានបន្ទប់ជួលថោក។ លោកបន្ថែមថា អាជ្ញាធរក៏តែងចុះអប់រំដល់ជនបរទេសដែលស្នាក់នៅក្នុងខេត្តមួយនេះឱ្យពាក់ម៉ាស់ និងលាងសំអាតដៃដើម្បីការពារជំងឺរលាកផ្លូវដង្ហើមនេះជាប្រចាំ៖ «ភាគច្រើនបើថាគាត់នៅកាស៊ីណូមួយមិនពេញចិត្តហើយកន្លែងណាធូរថ្លៃគាត់ទៅកន្លែងនោះ។ ឥឡូវពាក់ព័ន្ធមកម៉ោងហ្នឹងកាលណាថយអតិថិជនម្ចាស់អគារគាត់ត្រូវដេញថ្លៃគ្នាអីចឹង។ មានមកពីកំពង់សោមមានមកតិចតូច»។
ទោះជាយ៉ាងណា អេង លីហួ មិនទាន់មានតួលេខអំពីជនជាតិចិនដែលមកស្នាក់នៅក្រុងប៉ោយប៉ែតមានប៉ុន្មាននាក់ពិតប្រាកដនៅឡើយទេ ហើយលោកថា នឹងចុះធ្វើជំរឿនជនបរទេសក្នុងពេលឆាប់ៗខាងមុខនេះ។
អាស៊ីសេរីក៏ព្យាយាមទាក់ទងទៅអ្នកនាំអគ្គនាយកដ្ឋានអន្តោប្រវេសន៍ លោក កែវ វណ្ណថន ដើម្បីសុំអត្ថាធិប្បាយបន្ថែមជុំវិញបញ្ហានេះដែរ នៅថ្ងៃទី២៥ មីនា ប៉ុន្តែទូរស័ព្ទចូលជាច្រើនដងពុំមានអ្នកទទួល។
ទោះជាយ៉ាងនេះក្ដីប្រធានសហព័ន្ធសហជីពនិយោជិកវិស័យទេសចរណ៍ និងសេវាកម្មកម្ពុជាលោក ម៉ម រិទ្ធី មានប្រសាសន៍ថា រដ្ឋាភិបាលគួរតែបិទជើងហោះហើរកុំឱ្យជនជាតិចិនចូលកម្ពុជាអំឡុងពេលជំងឺកូវីដ១៩កំពុងរាតត្បាតនេះទេ ដោយសារប្រទេសចិនសព្វថ្ងៃក៏នៅតែជាប្រទេសដែលប្រឈមនឹងការរាតត្បាតមេរោគជំងឺរលាកផ្លូវដង្ហើមនេះដដែល ពីព្រោះលោកថា ប្រទេសមួយនេះជាប្រភពដើមនៃការកកើតជំងឺកូវីដ១៩៖ «អីចឹងខ្ញុំគិតថា រឿងមានការព្រួយបារម្ភខ្លាំងមែនទែន បើសិនជាយើងមានការបើកឱ្យជនជាតិចិនចូលមកបន្ថែមទៀតក្នុងអំឡុងពេលមកដែលមិនទាន់មានថ្នាំព្យាបាលជំងឺនេះផង។ ខ្ញុំគិតថា អត់សមហ្នឹងអ្វីដែលចិនមកចាយវាយធ្វើឱ្យប្រទេសយើងរីកចំរើនទេ។ ឥឡូវយើងមើលគាត់ចំលងមនុស្សម្នាក់ តើក្រសួងសុខាភិបាលតើគាត់មានចំណាយអីខ្លះ ចំណាយកន្លែងស្នាក់នៅចំណាយកន្លែងធ្វើហើយត្រូវតាមដានថែរក្សាពួកគាត់ទៀត។អីចឹងគ្រាន់តែកើតជំងឺនេះម្នាក់ត្រូវចំណាយប្រាក់រាប់ពាន់ដុល្លារចុះទម្រាំកើតដល់៣០ទៅ១០០នាក់ទៀត យើងពិចារណាមើល តើក្រសួងសុខាភិបាលចំណាយអីខ្លះ»។
ពលរដ្ឋនៅក្រុងប៉ោយប៉ែតឱ្យដឹងថា ជនជាតិចិននៅក្រុងប៉ោយប៉ែតមានប្រមាណ៣.០០០នាក់ ក្នុងនោះចិនប្រហែល ៨០០នាក់ជាអ្នកចំណូលថ្មីដែលទើបមកពីក្រៅប្រទេស បន្ទាប់ពីពួកគេបានចេញពីកម្ពុជាអំឡុងពេលយុទ្ធនាការបង្ក្រាបគណបក្សសង្គ្រោះជាតិកាលពីឆ្នាំ២០១៩៕