អ្នកទោសមេខ្លោងគ្រឿងញៀនជាជនជាតិតៃវ៉ាន់ ដែលក្រុមខ្មាន់កាំភ្លើងភ្ជង់មន្ត្រីពន្ធនាគាររំដោះនៅខេត្តសៀមរាប កាលពីសប្ដាហ៍មុន កម្លាំងសមត្ថកិច្ចរាជធានីភ្នំពេញចាប់បានវិញហើយ នៅថ្ងៃទី២២ ខែសីហា។ មន្ត្រីសិទ្ធិមនុស្សថា ករណីនេះ ជាបទពិសោធន៍ថ្មីមួយគួរឱ្យព្រួយបារម្ភសម្រាប់សន្តិសុខសង្គម ហើយពួកគេទទូចដល់អាជ្ញាធរបន្តស៊ើបអង្កេតដោយតម្លាភាព ចំពោះអ្នកនៅពីក្រោយខ្នងក្រុមជនល្មើស និងអ្នកលក់អាវុធឱ្យក្រុមខ្មាន់កាំភ្លើងធ្វើសកម្មភាព។
មន្ត្រីជាន់ខ្ពស់នគរបាលជាតិ បញ្ជាក់ថា សមត្ថកិច្ចនៅតែបន្តស៊ើបអង្កេតស្វែងរកមុខសញ្ញាពាក់ព័ន្ធ និងអ្នករៀបចំផ្ដល់អាវុធឱ្យក្រុមជនល្មើសធ្វើសកម្មភាព បើទោះបីជាពេលនេះ សមត្ថកិច្ចបានចាប់ខ្លួនអ្នកទោសជាមេខ្លោងគ្រឿងញៀនជនជាតិតៃវ៉ាន់យកមកវិញយ៉ាងណាក្ដី។
អគ្គស្នងការរងនគរបាលជាតិទទួលបន្ទុកបង្ក្រាបបទល្មើសគ្រឿងញៀន លោក ម៉ក់ ជីតូ ប្រាប់វិទ្យុអាស៊ីសេរី នៅថ្ងៃទី២៣ ខែសីហាថា ប្រតិបត្តិការចាប់អ្នកទោសមេខ្លោងគ្រឿងញៀនតៃវ៉ាន់នោះ ធ្វើឡើងក្រោមកម្លាំងសរុបចំណុះក្រសួងមហាផ្ទៃទាំងអស់ ដែលរួមមានទាំងព្រះរាជអាជ្ញានៅខេត្តសៀមរាប បាត់ដំបង់ និងនៅរាជធានីភ្នំពេញ។ លោកបញ្ជាក់ថា ការឈានដល់ឃាត់ខ្លួនអ្នកទោសជាជនជាតិតៃវ៉ាន់ គឺក្រុមការងារសម្ងាត់នៃកម្លាំងនគរបាលជាតិបានដឹងតម្រុយតាមរយៈការស៊ើបការណ៍សម្ងាត់ និងមានប្រជាពលរដ្ឋធ្វើជាសាក្សី និងផ្ដល់ដំណឹងនៃទីតាំងលាក់ខ្លួនរបស់អ្នកទោស ដែលក្រុមខ្មាន់កាំភ្លើងធ្វើសកម្មភាពរំដោះបាននោះ។
លោក ម៉ក់ ជីតូ៖«មកដល់ពេលនេះហើយ យើងបានរៀបចំផែនការស្រាវជ្រាវបន្ថែម គឺមិនទាន់ចប់ទេ។ យើងដឹងមុខសញ្ញាខ្លះទៀត ដែលយើងកំពុងតែបំភ្លឺ និងស្រាវជ្រាវ។ ជាគោលការណ៍ទីមួយ តាមស្រាវជ្រាវតាមចាប់មុខសញ្ញាសេសសល់។ សេសសល់ឥឡូវនេះមានគ្រាន់តែ តួកគីមាន ៦នាក់ ហើយខ្មែរ ២នាក់ទៀត ដែលជាឧក្រិដ្ឋជនចេញពីពន្ធនាគារ។ ដោយឡែកនឹងស្រាវជ្រាវតាមរកមុខសញ្ញាដែលពាក់ព័ន្ធទៀត ឃើញដល់ណា យើងធ្វើដល់ហ្នឹង»។
លោក ម៉ក់ ជីតូ បញ្ជាក់ទៀតថា អ្នកទោសជាមេខ្លោងគ្រឿងញៀនតៃវ៉ាន់នឹងត្រូវកាត់ទោសសាជាថ្មី ដែលប្រឈមនឹងជាប់ពន្ធនាគារអស់មួយជីវិត។ កាលពីរសៀលថ្ងៃទី២២ ខែសីហា សមត្ថកិច្ចរាជធានីភ្នំពេញចេញប្រតិបត្តិការចាប់អ្នកទោសជនជាតិតៃវ៉ាន់ ស្ថិតនៅទីតាំងបុរីមួយកន្លែងក្នុងសង្កាត់ព្រែកលាប ហើយនៅថ្ងៃដដែលនោះសមត្ថកិច្ចអះអាងថា ក៏ចាប់បានជនសង្ស័យ ២នាក់ទៀត នៅទីតាំងផ្សេងគ្នា ដែលធ្វើសកម្មភាពរំដោះអ្នកទោស។ លោក ម៉ក់ជីតូ បញ្ជាក់ថា ក្នុងនោះជនសង្ស័យម្នាក់ជាជនជាតិ អារ៉ាប៊ី សាអូឌីត (Saudi Arabia) មានតួនាទីចង្អុលបង្ហាញព័ត៌មានក្នុងប្រតិបត្តិរំដោះអ្នកទោស ហើយសមត្ថកិច្ចចាប់បាននៅរាជធានីភ្នំពេញ ខណៈជនសង្ស័យម្នាក់ទៀត ជាជនជាតិចិន មានតួនាទីកាន់កញ្ចប់លុយ ដើម្បីចំណាយថ្លៃអាហារស្នាក់នៅរបស់ក្រុមធ្វើសកម្មភាព ត្រូវបានសមត្ថកិច្ចបង្ក្រាបនៅខេត្តបាត់ដំបង។ លោក ម៉ក់ ជីតូ ឱ្យដឹងទៀតថា នៅយប់ថ្ងៃទី២២ ខែសីហាដដែល សមត្ថកិច្ចក៏បង្ក្រាបបានជនសង្ស័យជនជាតិខ្មែរម្នាក់ទៀតខេត្តសៀមរាប ដែលមានតួនាទីក្នុងការរៀបចំមធ្យោបាយធ្វើដំណើរសម្រាប់ក្រុមប្រដាប់អាវុធ។
លោក ម៉ក់ ជីតូ៖«គាត់មានក្រុមរបស់គាត់។ ក្នុងនោះ មានក្រុមរៀបចំអាវុធឱ្យគាត់។ ឥឡូវនេះយើងមានព័ត៌មានហើយទិញពីណា ប៉ុន្តែ យើងកំពុងស្វែងរកចាប់ក្រុមទីមួយដឹកចេញ ដឹកចូលឱ្យសញ្ញា ហើយតួកគី ៦នាក់ ដែលដឹកនាំដោយ អារ៉ាប៊ី សាអូឌីត ហើយមានក្រុមឃ្លាំមើល ក្រុមត្រៀមបម្រុង ក្រុមដឹកជញ្ជូន ក្រុមនេះមានផែនការច្រើនមុខ»។
ចំណែកមតិរិះគន់ពាក់ព័ន្ធនឹងក្រុមជនល្មើសអាចប្រើអាវុធធ្វើប្រតិបត្តិរំដោះអ្នកទោសវិញ លោក ម៉ក់ ជីតូ បកស្រាយថា ក្រុមស៊ីឈ្នួលធ្វើសកម្មភាពគឺ ពួកគេមកពីអាមេរិកមិនមានអាវុធនោះទេ ហើយពេលពួកគេមកដល់កម្ពុជា គឺមានក្រុមការងាររបស់ពួកគេរៀបចំអាវុធសម្រាប់ធ្វើប្រតិបត្តិការ។ លោកថា អ្នកដែលរៀបចំអាវុធទាំងនោះ គឺជាជនជាតិតួគីមានគ្នាយ៉ាងហោចណាស់ ៦នាក់ និងជនខ្មែរធ្លាប់ជាប់ទោសពីបទឧក្រិដ្ឋ ២នាក់ ដែលកំពុងរត់គេចខ្លួន ហើយសមត្ថកិច្ចកំពុងបើកការស៊ើបអង្កេតស្រាវជ្រាវតាមចាប់ខ្លួន។
ជុំវិញរឿងនេះ នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ (LICADHO) លោក អំ សំអាត មានប្រសាសន៍ថា ករណីក្រុមប្រដាប់អាវុធរំដោះអ្នកទោសនេះ នៅតែមានមន្ទិលសង្ស័យច្រើន និងជារឿងដ៏ចម្រូងចម្រាស ដែលទាមទារឱ្យអាជ្ញាធរស៊ើបអង្កេតប្រកបដោយតម្លាភាព ស្វែងរកអ្នកពាក់ព័ន្ធនៅពីក្រោយខ្នងនៃក្រុមប្រដាប់អាវុធធ្វើសកម្មភាព និងអ្នកជួញដូរអាវុធឱ្យក្រុមជនល្មើស។
លោក អំ សំអាត៖«ករណីនេះ វាក្លាយជាមេរៀនមួយសម្រាប់អាជ្ញាធរពាក់ព័ន្ធ ជាពិសេសខាងពន្ធនាគាក្នុងការបញ្ជូនឧក្រិដ្ឋជនព្យាបាលត្រូវមានការរៀបចំកម្លាំងឱ្យបានត្រឹមត្រូវ ក្នុងការការពាររក្សានូវព័ត៌មានសន្តិសុខសុវត្ថិភាពចំពោះឧក្រិដ្ឋជនធំៗហ្នឹង ទីមួយកុំឱ្យមានការរិះគន់ផង ឧក្រិដ្ឋជនគ្រឿងញៀនធំៗដែលមានលុយមានកាក់អាចនឹងបញ្ជូនទៅ ប៉ុន្តែអ្នកទោសផ្សេងទៀតដូចជា សកម្មជនសង្គមសកម្មជនសិទ្ធិមនុស្ស សកម្មជនបរិស្ថាន ឬក៏សកម្មជនគណបក្សនយោបាយមានភាពយឺតយ៉ាវតឹងរឹងក្នុងបញ្ជូនទៅ [ព្យាបាល] កុំឱ្យមានការរិះគន់ដែរ»។
មកទល់ពេលនេះ សមត្ថកិច្ចបង្ក្រាបបានជនសង្ស័យចំនួន ១១នាក់ ក្នុងនោះខ្មែរម្នាក់ ខ្មែរមានសញ្ជាតិអាមេរិកកាំង ៦នាក់ ជនជាតិអារ៉ាប៊ី សាអូឌីត ជនជាតិតៃវ៉ាន់ម្នាក់ និងជនជាតិចិន ២នាក់ ដែលនគរបាលយុត្តិធម៌ចោទប្រកាន់ថា ពួកគេបានចូលរួមធ្វើសកម្មភាពប្រដាប់ដោយអាវុធភ្ជង់មន្ត្រីពន្ធនាគារ ដើម្បីរំដោះអ្នកទោសតៃវ៉ាន់ឈ្មោះ ឆេន ស៊ីនហាន (Chen Hsin Han) ជាប់ទោសចំនួន ៥២ឆ្នាំ ពីបទជួញដូរគ្រឿងញៀន ក្នុងគ្រាដែលមន្ត្រីពន្ធនាគារបញ្ជូនអ្នកទោសរូបនោះទៅព្យាបាលធ្មេញនៅគ្លីនិកធ្មេញ ជុំ ចិន្តា ក្នុងខេត្តសៀមរាប កាលពីថ្ងៃទី១៧ ខែសីហា។ លោក ម៉ក់ ជីតូ បញ្ជាក់ថា មកទល់ពេលនេះ សមត្ថកិច្ចមិនទាន់បញ្ជូនជនសង្ស័យ ១១នាក់ រួមទាំងអ្នកទោសជាមេខ្លោងគ្រឿងញៀនទៅតុលាការនៅឡើយ ហើយពួកគេកំពុងត្រូវបានឃុំខ្លួនបណ្ដោះអាសន្ននៅមន្ទីរប្រឆាំងបទល្មើសគ្រឿងនៅរាជធានីភ្នំពេញ ក្រោមការការពារសន្តិសុខតឹងរ៉ឹងរបស់កម្លាំងនគរបាលជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។