មន្ត្រីព្រះបរមរាជវាំងបារម្ភអំពីសុវត្ថិភាពព្រះមហាក្សត្រ ដោយសារតែមានគេសង់អគារសណ្ឋាគារក្បែរព្រះបរមរាជវាំងខ្ពស់ជាងវាំង ដែលអាចធ្វើឲ្យជនខិលខូចឆ្លៀតឱកាសប្រើប្រាស់សណ្ឋាគារនេះ បង្កការគំរាមកំហែងដល់សុវត្ថិភាពផ្ទាល់របស់ព្រះអង្គ និងក្រុមគ្រួសាររាជវង្សានុវង្ស ព្រោះថា គេអាចមើលឃើញបរិវេណវាំងពីសណ្ឋាគារនោះមកដោយភ្នែកបានងាយ។
មន្ត្រីព្រះបរមរាជវាំងឲ្យដឹងថា ខុទ្ទកាល័យព្រះបរមរាជវាំងបានសុំឲ្យអាជ្ញាធរចាត់វិធានការរុះរើអគារថ្ម ដែលកំពុងសាងសង់ជាសណ្ឋាគារនៅជិតវាំងនោះចេញ ដើម្បីការពារសុវត្ថិភាពព្រះមហាក្សត្រ និងមន្ត្រីការទូតនានា។
មន្ត្រីខុទ្ទកាល័យព្រះបរមរាជវាំង លោក អ៊ុំ ដារាវុធ ឲ្យដឹងនៅថ្ងៃទី២៣ មេសា ថា សំណង់អគារសណ្ឋាគារនោះ ស្ថិតចម្ងាយប្រមាណ ៨០ម៉ែត្រ ទិសខាងជើងឆៀងខាងលិចព្រះបរមរាជវាំងនោះ ត្រូវបានគេសង់កម្ពស់ប្រហែល ៣០ម៉ែត្រ គឺខ្ពស់ជាងច្បាប់ដែលកំណត់ឲ្យសង់ប្រហែល ២០ម៉ែត្រ នៅតំបន់ក្បែរព្រះបរមរាជវាំង។
លោកព្រួយបារម្ភថា ការសង់អគារខ្ពស់ជិតព្រះបរមរាជវាំងដូច្នេះ គឺអាចបង្កគ្រោះថ្នាក់ដល់សុវត្ថិភាពព្រះមហាក្សត្រ រួមទាំងមន្ត្រីដទៃៗទៀតផង៖ «វាប៉ះពាល់ដល់ទី១ សន្តិសុខផ្ទាល់ខ្លួនព្រះមហាក្សត្រ ទី២ សុវត្ថិភាពផង។ សន្តិសុខស្អី? សន្តិសុខហ្នឹងខ្ញុំបានឃើញពេលដែលថា អូតែលហ្នឹងសង់អត់ទាន់ហើយក្ដី គឺដល់ដំបូលហើយ មើលទៅចំព្រះរាជដំណាក់សេរីមង្គល ព្រះរាជដំណាក់សេរីមង្គលហ្នឹង គឺថាសន្តិសុខហ្នឹង គឺថាជាព្រះរាជដំណាក់មួយដែលព្រះមហាក្សត្រព្រះ នរោត្តម សីហនុ ព្រះបរមរតនកោដ្ឋយើងទទួលផ្ញៀវធំៗ ដូចជាប្រមុខរដ្ឋ ប្រធានាធិបតីអីហ្នឹងមកជួបគ្នាកន្លែងហ្នឹង។ ដល់ពេលខ្ញុំមើលទៅចំហ្នឹងតែម្ដង ខាងលើហ្នឹងគឺថាមនុស្សយើងអាចដាក់កាំភ្លើងមួយមក ចង់ធ្វើឃាតនរណាក៏បានដែរ»។
លោកថា ទន្ទឹមពេលមិនទាន់មានចម្លើយអំពីការរុះរើសំណង់នោះតាមការស្នើសុំរបស់មន្ត្រីព្រះបរមរាជវាំង តាមរយៈអាជ្ញាធរ បែរជាម្ចាស់សំណង់សង់ព្រះបរមរូបអតីតព្រះវីរក្សត្រលើដំបូលអគារថែមទៀត ដែលទង្វើនេះលោកថា ខុសច្បាប់ និងផ្គើនទៅនឹងបទបញ្ជា។
លោក អ៊ុំ ដារាវុធ៖ «បើសិនជាយើងមិនព្រមរុះរើ ហើយយើងទៅសង់បន្ថែមទៀត មានន័យថា យើងឌឺដាក់អាជ្ញាធរ។ ទី២ តាមគំនិតរបស់ខ្ញុំ ខ្ញុំយល់ថា ម្ចាស់ហ្នឹងអត់មានភាពត្រឹមត្រូវទេ ពីព្រោះគាត់សាងសង់នេះសំអាងទៅលើស្អី? ទី១ អត់ច្បាប់ពីបរមរាជវាំង។ ទី២ គាត់សាងសង់ជារូបបរមរូបហ្នឹង ជាថ្ម ស៊ីម៉ង់ត៍ បេតុងនៅកណ្ដាលវាល។ ដូចយើងជ្រាបស្រាប់ហើយ ព្រះបរមរតនកោដ្ឋយើង សូម្បីរដ្ឋាភិបាលយើងសង់នៅសួនច្បារសម្ដេច ហ៊ុន សែន ក៏មានគ្របជាដំបូលកុំឲ្យលោកក្ដៅ អានេះដាក់កណ្ដាលវាល ហាលថ្ងៃ ហាលភ្លៀង អ៊ីចឹងអត់សម?»។
ចំណែកម្ចាស់សំណង់អគារ លោក ស៊ឹន គឹមហេង បដិសេធមិនឆ្លើយតបរឿងនេះទេ។ ក៏ប៉ុន្តែលោកបានប្រាប់កាសែត ឌឹ ខេមបូឌា ដេលី (The Cambodia Daily) កាលពីថ្ងៃទី២២ មេសា ថា មូលហេតុដែលលោកសង់ព្រះបរមរូបលើអគាររបស់លោកនេះ គឺដោយសារលោកគោរពស្រឡាញ់សម្ដេចឪ ហើយលោកថា លោកនឹងរើព្រះបរមរូបនេះបើសិនជាអាជ្ញាធរបញ្ជា។
រឿងសុំឲ្យម្ចាស់សណ្ឋាគាររុះរើសំណង់ឲ្យនៅទាបជាងកម្ពស់ព្រះបរមរាជវាំងនេះ លោក អ៊ុំ ដារាវុធ ឲ្យដឹងថា មន្ត្រីវាំងបានសុំឲ្យអាជ្ញាធររាជធានីភ្នំពេញ ចាត់វិធានការហើយ តែលោកនៅមិនទាន់ដឹងលទ្ធផលយ៉ាងណានៅឡើយទេ។
រីឯអ្នកនាំពាក្យសាលារាជធានីភ្នំពេញ លោក ឡុង ឌីម៉ង់ អះអាងថា សាលារាជធានីភ្នំពេញ កំពុងពិចារណាលើវិធានការនេះដោយប្រុងប្រយ័ត្ន ដើម្បីរក្សាផលប្រយោជន៍នៃភាគីទាំងពីរ។ លោកថា អាជ្ញាធរនឹងចុះទៅពិនិត្យមើលសំណង់នោះថា តើគួរត្រូវវាយតម្រឹមកម្ពស់ឲ្យទាប ឬក៏ត្រូវបាំងជញ្ជាំងវាំងឲ្យខ្ពស់បន្ថែម ដើម្បីកុំឲ្យមើលឃើញបរិវេណវាំងពីសណ្ឋាគារនោះមក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។