ពលរដ្ឋក្រីក្រ​ក្នុង​ក្រុងសៀមរាប​ស្នើសុំស្បៀង ក្នុងគ្រា​បិទខ្ទប់​​សង្កាត់​​ចំនួន៣ក្នុងក្រុង

ដោយ ខែ សុណង
2021-04-20
Share
ពលរដ្ឋក្រីក្រ​ក្នុង​ក្រុងសៀមរាប​ស្នើសុំស្បៀង ក្នុងគ្រា​បិទខ្ទប់​​សង្កាត់​​ចំនួន៣ក្នុងក្រុង ប្រជាពលរដ្ឋនៅក្នុងខេត្តសៀមរាបពេលមកយកសំណាកធ្វើតេស្តរកជំងឺកូវីដ១៩ កាលពីថ្ងៃទី១៥ ខែមេសា មុនពេលវិធានការបិទក្រុង។
រូប៖ ហ្វេសប៊ុក រដ្ឋបាលខេត្តសៀមរាប

ពលរដ្ឋក្រីក្រ​រស់នៅ​ក្រុង​សៀមរាប ខ្វល់ចិត្តយ៉ាងខ្លាំង ក្នុងពេលដែលអាជ្ញាធរ​បិទខ្ទប់​សង្កាត់ចំនួន ៣ រយៈពេលពីរសប្តាហ៍ ចាប់ពីថ្ងៃទី១៦ រហូតដល់ថ្ងៃទី២៩ ខែមេសា ដើម្បីប្រឆាំងការរីករាលដាលជំងឺកូវីដ-១៩។​ ប្រការនេះ ធ្វើឱ្យពួកគេមិនអាច​ធ្វើដំណើរទៅស៊ីឈ្នួល ធ្វើសំណង់ រើសអេតចាយ និងការងារផ្សេងៗទៀតបានឡើយ ដើម្បី​រកប្រាក់​ទិញអង្កបរិភោគ។

ពលរដ្ឋរស់នៅក្រុងសៀមរាបលោក អរ យិន ឱ្យដឹងនៅថ្ងៃទី២០ ខែមេសាថា  លោក​មិនជំទាស់ការបិទខ្ទប់ផ្លូវរបស់អាជ្ញាធរនោះទេ ប៉ុន្តែបញ្ហាខ្វះស្បៀងចិញ្ចឹមជីវិត គឺជារឿងសំខាន់ ព្រោះពួកគាត់មិនអាចចេញក្រៅ ស្វែងរកប្រាក់ចំណូលបាន។ លោកថា មកទល់ពេលនេះ ពលរដ្ឋក្រីក្រជាច្រើនគ្រួសារ កំពុងដង្ហើយរកជំនួយ​មនុស្សធម៌ ព្រោះមិនទាន់ឃើញអាជ្ញាធរជួយសង្គ្រោះនៅឡើយទេ។ លើសពីនេះ ក្នុងពេលដែលអាជ្ញាធរបិទខ្ទប់ផ្លូវក្នុងក្រុងសៀមរាប គ្រួសារលោកស្ទើរតែ​គ្មានប្រាក់​ទិញអង្កច្រកឆ្នាំង៖ «សឹងតែ​ទាំងអស់គ្នា​ស្ទើរតែ​គ្រប់​ក្រុម​គ្រួសារ​ ​ខ្វះខាត​ទាំងអស់គ្នា​ ​គ្មាន​នរណា​ទៅ​ធូរ​ធា​ជាង​នរណា​។​ ​ខ្វះ​ចង់​លក់​ពោត​ក៏​គេ​បិទ​តំបន់​ ​តាម​ប្រាសាទ​គេ​បិទ​មិន​ឱ្យ​ចេញចូល​ ​ពោត​ក៏​ចុះថោក​ ​បន្លែ​ថោក​ ​ហើយ​អ្នកធ្វើការ​សំណង់​ភាគច្រើន​គឺ​គេ​បិទ​ក្រុង​ ​គឺ​អត់​មានការងារ​ធ្វើ​ទាំងស្រុង​ទៅទៀត​។​ ​អត់​ឃើញ​មាន​ជំនួយ​មានអី​ទេ​ ​»។

ពលរដ្ឋរស់នៅក្រុងសៀមរាបម្នាក់ទៀតលោកស្រី មីង ឡាង វ័យ ៥៥ ឆ្នាំ ថ្លែងថា ក្នុង​ពេលអាជ្ញាធរបិទខ្ទប់ផ្លូវ កូនៗរបស់លោកស្រី ៣នាក់ បានផ្អាកធ្វើការងារ សំងំ​តែ​នៅ​ក្នុង​ផ្ទះ​ជាច្រើនថ្ងៃមកហើយ។ រីឯផ្សារជាច្រើនកន្លែង​ក្នុងក្រុងសៀមរាប​បានបិទ​ទ្វារ លំបាក​ទិញ​ស្បៀងអាហារបរិភោគ​។  លោកស្រីថា ពលរដ្ឋក្រីក្រជាច្រើន​គ្រួសារកំពុង​ប្រឈម​ដាច់ស្បៀង ព្រោះគ្មានការងារធ្វើ៖ «ចេះតែ​ត្បិតត្បៀត​កូនក្មេង​ចេះតែ​រក​នេះ​ ​រក​នោះ​លក់​បន្តិច​ទៅ​ ​អេតចាយ​ក៏​លក់​ទៅ​ ​បងប្អូន​ចេះតែ​ឱ្យ ​សុំ​ខ្ចី​បងប្អូន​ពី​នេះ​ពី​នោះ​ទៅ​»។

ពលរដ្ឋម្នាក់ទៀត គឺលោក ប៉ក់ ថូរ  អំពាវនាវឱ្យអាជ្ញាធរចែកអង្ក និងម្ហូបអាហារ​តិចតួច​ជូនពលរដ្ឋទីទ័លក្រពិតប្រាកដ ដើម្បីសម្រាលការលំបាកមួយគ្រា ព្រោះ ក្នុងពេលនេះពួកគាត់ជាច្រើនគ្រួសារ កំពុងអត់ឃ្លាន។ លោកថា នៅគ្រាដែល​អាជ្ញាធរ​បិទ​ខ្ទប់​នេះ ពលរដ្ឋក្រីក្រមិនអាចធ្វើដំណើររកក្តាមខ្យង ត្រីសាច់ និង​បន្លែបង្កា​តាម​វាលស្រែមកបរិភោគបានទៀតទេ ដែលជាហេតុធ្វើឱ្យពួកគាត់ជួបការលំបាកខ្លាំង៖ «ក្នុងពេល​ដែល​ពលរដ្ឋ​រងគ្រោះ​ដោយសារ​ ​ការ​រីក​រាលដាល​ជំងឺ​កូ​វី​ដ​១​៩​ហ្នឹង​ ​រដ្ឋាភិបាល​គួរតែ​ហាមឃាត់​ទំនិញ​ឡើងថ្លៃ​ ​គឺ​ទំនិញ​ឡើងថ្លៃ​តាមទំនើងចិត្ត​ ​តម្លៃ​មួយ​គុណ​ជា​ពីរ​ ​គុណ​ជា​បី​ ​ត្រី​សាច់​ស្អី​ៗ​ ​ក្នុង​ផ្សារ​លក់ថ្លៃ​ ​អត់មាន​ការ​ត្រួតពិនិត្យ​ឱ្យ​ច្បាស់លាស់​ ​»​

អាស៊ីសេរីនៅមិនទាន់អាចសុំការឆ្លើយតបរឿងនេះពីអភិបាលក្រុងសៀមរាបលោក នួន ពុទ្ធារ៉ា និងអភិបាលខេត្តសៀមរាបលោក ទៀ សីហា បាននៅឡើយទេ នៅថ្ងៃទី២០ ខែមេសា ព្រោះពួកលោកមិនលើកទូរសព្ទ។ នៅក្នុងខេត្តសៀម មានសង្កាត់ចំនួន​ ៣​ ដែលអាជ្ញាធរសម្រេចបិទខ្ទប់ហាមមិនឲ្យពលរដ្ឋធ្វើដំណើរ រួមមាន សង្កាត់ស្វាយដង្គំ សង្កាត់សាលាកំរើក និងសង្កាត់សៀមរាប ក្នុងក្រុងសៀមរាប។

ចៅសង្កាត់ស្វាយដង្គុំលោក ម៉ៃ ម៉េត មានប្រសាសន៍ថា អាជ្ញាធរសង្កាត់ និង​អាជ្ញាធរ​ក្រុង បានផ្តល់ស្បៀងអាហារចែកជូនពលរដ្ឋក្រីក្របានមួយចំនួនដែរ ប៉ុន្តែលោកមិន​បញ្ជាក់លម្អិតថា ប៉ុន្មានគ្រួសារនោះទេ។ លោកថា បច្ចុប្បន្នអាជ្ញាធរកំពុង​ប្រឹងប្រែង​ស្វែងរក​ជំនួយមនុស្សធម៌ពីគ្រប់មជ្ឈដ្ឋាន ដើម្បីចែកជូន​ពលរដ្ឋក្រីក្រពិតប្រាកដ តែ​ជំនួយនេះនៅមានកម្រិតនៅឡើយ៖ «​យើង​មើលតាម​ជាក់ស្តែង​ ​យើង​បាន​ជួយ​តិចតួច​ ​ផ្តល់​ដែល​ប​ន្ធូ​គាត់​ទីទ័ល​ច្រក​ផ្តល់​ជា​អង្ក​ ​ស្បៀង​បរិភោគ​ ​ដើម្បី​ជួយ​កាត់បន្ថយ​ដែល​គាត់​ទ័ល​ច្រក​។​ ​យើង​បិទ​ទប់​ស្កាត់​ក្នុង​សង្កាត់​ស្វាយ​ដង្គុំ​ ​ហើយ​អាជ្ញាធរ​ក្រុង​បាន​ចាត់ចែង​ជួយ​ ​ហើយនឹង​ព្រះសង្ឃ​ ​»។

ជុំវិញរឿងនេះ មន្ត្រីសង្គមស៊ីវិលអំពាវនាវឱ្យរដ្ឋាភិបាល​យកចិត្តទុកដាក់​ជួយ​ជ្រោមជ្រែង​ពលរដ្ឋក្រីក្រឱ្យគ្រប់ជ្រុយជ្រោយ នឹងផ្តល់ស្បៀងចែកជូនពលរដ្ឋ​ដែល​រងផលប៉ះពាល់ជាក់ស្តែង។

ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ ផ្តល់​ទស្សនៈ​ថា  អាជ្ញាធរត្រូវឆ្លើយតបឱ្យទាន់ពេលវេលា ដោះស្រាយក្តី​កង្វល់​រួមរបស់​ពលរដ្ឋ មិនត្រូវអូសបន្លាយពេលដែលនាំ​ឱ្យពលរដ្ឋកាន់តែលំបាក​វេទនា​នោះ​ទេ ៖  ​«ក្នុង​ឱកាស​នេះ​ខ្ញុំ​សូម​ឱ្យ​រដ្ឋ​ត្រូវ​គិត​ឱ្យ​បាន​ល្អិតល្អន់​ ​ទៅ​ការរស់នៅ​របស់​ពលរដ្ឋ​ ​ជាពិសេស​អង្ក​។​ ​ខ្ញុំ​ឃើញ​ថ្នាក់​ជាតិ​មាន​ឯកសារ​ ​គតិ​យុត្តិ​ជាច្រើន​ជំរុញ​ឱ្យ ​អាជ្ញាធរ​ថ្នាក់​មូលដ្ឋាន​ ​ត្រូវ​អនុវត្ត​បន្ទាន់​នូវ​ការសង្គ្រោះ​ពលរដ្ឋ​ ​»។

ពលរដ្ឋមួយចំនួន លើកឡើងថា អាជ្ញាធរខេត្តសៀមរាប មិនអាចគិតតែពីវិធានការ​បិទខ្ទប់មិនឲ្យពលរដ្ឋធ្វើដំណើរ ដោយមិនបានយកចិត្តទុកដាក់ជួយ ផ្តល់​ស្បៀង​អាហារ​ដល់ប្រជាពលរដ្ឋក្រីក្របែបនេះនោះទេ។ ពួកគេ យល់ថា វិធានការបែបនេះ គឺជាការ​ខ្វះការទទួលខុសត្រូវ និងរំលោភសិទ្ធិពលរដ្ឋ ព្រមទាំង​គ្មាន ប្រសិទ្ធិភាព​ក្នុង​ការ​ទប់ស្កាត់ជំងឺកូវីដ-១៩ ឡើយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល