ពលរដ្ឋ និងអង្គការសង្គមស៊ីវិលលើកឡើងថា បំរាមលក់គ្រឿងស្រវឹងក្នុងអំឡុងពេលចូលឆ្នាំខ្មែរនេះនឹងមិនអាចទៅរួចទេបើអាជ្ញាធរមិនព្រមរឹតបន្តឹងការអនុវត្ត។
យុវជនម្នាក់រស់នៅរាជធានីភ្នំពេញលោក ខាន់ ភូមិន្ទ ជំរុញឲ្យអាជ្ញាធរមូលដ្ឋានរឹតបន្តឹងការលក់គ្រឿងស្រវឹង ក្នុងមូលដ្ឋានរបស់ខ្លួនព្រោះកន្លែងលក់គ្រឿងស្រវឹងមានច្រើន ងាយនឹងមានករណីលួចលក់គ្រឿងស្រវឹង។ លោកគាំទ្រ បំរាមលក់គ្រឿងស្រវឹង ក្នុងពិធីបុណ្យធំៗរបស់ជាតិ ដើម្បីកាត់បន្ថយអំពើហិង្សា និងគ្រោះថ្នាក់ចរាចរណ៍ជាដើម៖ « ខ្ញុំគិតថា អាជ្ញាធរ គាត់ប្រឹងប្រែងរារាំងឬក៏ប្រកាសហាមឃាត់ ( លក់គ្រឿងស្រវឹង ) អ៊ីចឹងណាបង។ រឿងមួយចំនួន នៅតែកើតមាន មិនអត់ទេ។ តែគ្រាន់ថា មិនអាចកើតឡើងជាទ្រង់ទ្រាយធំ ជួបជុំគ្នា ជាលក្ខណៈធំ។ ប៉ុន្តែ តូចតាច ខ្ញុំគិតថា វាអាចមាន។ នេះជាយោបល់ខ្ញុំ។ ប៉ុន្តែ វាអាចជួយបានច្រើន កាត់បន្ថយបានច្រើន។ បើទោះបី គាត់លួចលាក់ហូបតិចតួច អាហ្នឹង ជាសិទ្ធិរបស់គាត់។ ប៉ុន្តែបើកាលណា អាជ្ញាធរដឹង ជារឿងមួយ ដែលត្រូវប្រឈមដែរ»។
អាជ្ញាធររាជធានីភ្នំពេញ និងខេត្តមួយចំនួន (កណ្ដាល កំពង់ឆ្នាំង ជាដើម) បានដាក់ចេញបំរាមលក់គ្រឿងស្រវឹងក្នុងថ្ងៃបុណ្យចូលឆ្នាំ ៣ថ្ងៃ ដើម្បីទប់ស្កាត់ការជួបជុំគ្នា និងទប់ស្កាត់ការឆ្លងរីករាលដាលនៃជំងឺកូវីដ១៩ (Covid-19)។ ក្នុងរយៈពេលនេះ អាជ្ញាធរក៏បានណែនាំឲ្យតាមហាងលក់ចំណីអាហារ ភោជនីយដ្ឋាន កន្លែងលក់កាហ្វេ ហាងលក់ភេសជ្ជៈ ជាដើម មិនត្រូវអនុញ្ញាតឲ្យអតិថិជន ហូបនៅនឹងកន្លែងទេ គឺត្រូវតែវិចខ្ចប់អាហារ យកទៅពិសា នៅតាមផ្ទះរៀងៗខ្លួន ជាដាច់ខាត។
ជាមួយគ្នានេះ អភិបាលរាជធានីភ្នំពេញលោក ឃួង ស្រេង នៅថ្ងៃទី១៣ ខែមេសា បានចេញសេចក្ដីសម្រេច បន្តអនុវត្តវិធានការរដ្ឋបាលបណ្ដោះអាសន្នរយៈពេលពីរសប្ដាហ៍ទៀត គឺរហូតដល់ថ្ងៃទី២៨ ខែមេសា ដើម្បីទប់ស្កាត់ការឆ្លងរាលដាលជំងឺកូវីដ១៩។
វិធានការទាំងនោះ មានដូចជា បន្តឲ្យផ្អាកការធ្វើដំណើរ និងហាមឃាត់ការទទួលទានអាហារ ភេសជ្ជៈ និងគ្រឿងស្រវឹងជុំគ្នា នៅចន្លោះម៉ោង ៨យប់ ដល់ម៉ោង ៥ព្រឹក។ អ្នកល្មើសបម្រាបនេះ នឹងត្រូវផ្ដន្ទាទោសតាមច្បាប់ស្ដីពីការទប់ស្កាត់ការឆ្លងជំងឺរាលដាលនៃជំងឺកូវីដ១៩ និងជំងឺឆ្លងកាចសាហាវ និងបទដ្ឋានគតិយុត្តិពាក់ព័ន្ធផ្សេងទៀត។
ពាក់ព័ន្ធនឹងអ្នកល្មើសបម្រាបលក់គ្រឿងស្រវឹង នៅថ្ងៃបុណ្យចូលឆ្នាំខ្មែរនេះដែរ អាជ្ញាធរមានសមត្ថកិច្ចនឹងពិន័យតាមច្បាប់ ប្រសិនបើរកឃើញថា មានករណីលួចលក់គ្រឿងស្រវឹង។
អ្នកនាំពាក្យរដ្ឋាភិបាលលោក ផៃ ស៊ីផាន លើកទឹកចិត្តឲ្យពលរដ្ឋនិងអ្នកពាក់ព័ន្ធគោរពបំរាមរបស់អាជ្ញាធរ និងត្រូវរាយការណ៍ប្រាប់សមត្ថកិច្ច ប្រសិនបើទីតាំងណា លួចលក់គ្រឿងស្រវឹងនៅថ្ងៃចូលឆ្នាំ។ លោកបញ្ជាក់ថា អាជ្ញាធរនឹងបិទកន្លែងប្រកបអាជីវកម្មនោះមិនឲ្យបើកដំណើរការវិញទេ ប្រសិនបើរកឃើញថា មានករណីលួចលក់គ្រឿងស្រវឹងក្នុងថ្ងៃចូលឆ្នាំ។ ចំណែកអ្នកលួចជួបជុំគ្នាពិសាគ្រឿងស្រវឹង លោកថា ក៏នឹងត្រូវរងពិន័យដែរ៖ « អាហ្នឹង គេដើរចាប់រាល់តែយប់។ គេដើរគោះរាល់យប់។ គេដើរចាប់យកទៅតុលាការ មានបី បួន នាក់ គេចាប់បាន។ រួចសុំជម្រាបជួនផង កន្លែងណា ដែលលួចលក់គ្រឿងស្រវឹងហ្នឹង គឺប្រឈមនឹងការបិទហាង ឈប់ឲ្យប្រកបអាជីវកម្ម។ អាហ្នឹង សុំប្រាប់ទៅផង»។
សង្គមស៊ីវិល ស្វាគមន៍បំរាមនេះ តែទាមទារឲ្យអាជ្ញាធរមានសមត្ថកិច្ច បង្កើនការផ្សព្វផ្សាយ និងចុះអនុវត្តក្នុងមូលដ្ឋាន ទើបបំរាមលក់គ្រឿងស្រវឹង ក្នុងថ្ងៃបុណ្យចូលឆ្នាំខ្មែរមានប្រសិទ្ធិភាព។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាពលោក យង់ គឹមអេង ជំរុញ ឲ្យអាជ្ញាធរដាក់បំរាមលក់គ្រឿងស្រវឹងនៅគ្រប់កន្លែងទាំងអស់ទូទាំងប្រទេស ដើម្បីទប់ស្កាត់ការជួបជុំគ្នា និងជាការកាត់បន្ថយថ្លៃចំណាយរបស់ពលរដ្ឋ ក្នុងស្ថានភាពជួបវិបត្តិកូវីដ១៩។ ម្យ៉ាងទៀត លោកថា ក្នុងពិធីបុណ្យប្រពៃណីជាតិដូច្នេះ ពលរដ្ឋមិនគួរនាំគ្នាពិសាគ្រឿងស្រវឹងទេ៖ « បម្រាបនេះ នឹងមានប្រសិទ្ធិភាពល្អប្រសើរទៅបាន គឺទាល់តែអាជ្ញាធរហ្នឹង គាត់មានការចូលរួម តាមដានការអនុវត្តហ្នឹង។ ជាពិសេស គឺអាជ្ញាធរគ្រប់លំដាប់ថ្នាក់ហ្នឹង គឺត្រូវតែតាមដាន នូវការអនុវត្តហ្នឹង ឲ្យបានសម្រេចដែរ បើសិនជាគ្រាន់តែចេញវិធានការ ហើយគ្មានការត្រួតពិនិត្យច្បាស់លាស់ពីអាជ្ញាធរ ជាពិសេសអាជ្ញាធរមូលដ្ឋានឃុំសង្កាត់ហ្នឹង មិនអាចជោគជ័យបានទេ គឺភាគជោគជ័យ ឬមិនជោគជ័យ នៃវិធានការនេះ គឺអាជ្ញាធរនៅដែនដីផ្ទាល់»។
របាយការណ៍របស់អង្គការសុខភាពពិភពលោក បង្ហាញថា រៀងរាល់ឆ្នាំ មានមនុស្សប្រមាណបីលាន (៣.០០០.០០០) នាក់ ស្លាប់ ដោយសារផលប៉ះពាល់បង្កពីការប្រើប្រាស់គ្រឿងស្រវឹង តាមរយៈជំងឺជាងពីររយ (២០០) ប្រភេទដូចជា ជំងឺមហារីកបំពង់អាហារ មហារីកថ្លើម លើសសំពាធឈាម ស្ទះសរសៃឈាមបេះដូង និងខួរក្បាល ក្រិនថ្លើម រលាកលំពែង ជំងឺវិកលវិបល្លាស ជាដើម។ ក្រៅពីផលវិបាកនៃសុខភាព ការប្រើប្រាស់គ្រឿងស្រវឹង បង្កអោយមានគ្រោះថ្នាក់ចរាចណ៍ អំពើហិង្សា ខាតបង់សេដ្ឋកិច្ចគ្រួសារ និងបញ្ហាសង្គម ជាច្រើនទៀត។
ប្រជាពលរដ្ឋ និងសង្គមស៊ីវិល ស្នើសុំឲ្យអាជ្ញាធរមានសមត្ថកិច្ច បញ្ឈប់ការផ្សព្វផ្សាយពាណិជ្ជកម្មគ្រឿងស្រវឹងគ្រប់រូបភាព កាត់បន្ថយភាពងាយស្រួលរកទិញគ្រឿងស្រវឹង ការកំណត់អាយុអ្នកទិញ និងអាយុអ្នកពិសាគ្រឿងស្រវឹង និងការដំឡើងថ្លៃពន្ធលើផលិតផលគ្រឿងស្រវឹងឲ្យខ្ពស់ ជាដើម ដើម្បីកាត់បន្ថយការប្រើប្រាស់គ្រឿងស្រវឹងនៅកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។