ប្រជាពលរដ្ឋនៅឃុំខ្នារឆ្មារ ស្រុកសាមគ្គីមានជ័យ ខេត្តកំពង់ឆ្នាំង ស្នើឲ្យរដ្ឋាភិបាលពន្លឿននីតិវិធីផ្ដល់អត្តសញ្ញាណប័ណ្ណគំរូថ្មី ដើម្បីយកទៅធ្វើការងាររោងចក្រ និងប្រើប្រាស់ក្នុងការងារចាំបាច់ផ្សេងទៀត។ ពលរដ្ឋ និងអាជ្ញាធរមូលដ្ឋានថា ពលរដ្ឋ ៧ភូមិនៃឃុំខ្នារឆ្មារ បានថតរូបធ្វើអត្តសញ្ញាណប័ណ្ណតាំងពីចុងឆ្នាំ២០១៥ ប៉ុន្តែមកដល់ពេលនេះ នៅមិនទាន់បានទៀត។
អ្នកភូមិនៃឃុំខ្នារឆ្មារ មួយចំនួន ទន្ទឹងរង់ចាំអត្តសញ្ញាណប័ណ្ណគំរូថ្មី ខណៈសមត្ថកិច្ចនគរបាលនៅក្នុងមូលដ្ឋាននេះបញ្ជាក់ថា មានពលរដ្ឋក្នុងឃុំជាង ២ពាន់នាក់ បានថតរូបរួច ប៉ុន្តែមិនទាន់ចេញប័ណ្ណ។
បុរសវ័យ ៥០ឆ្នាំម្នាក់រស់នៅភូមិវត្ត គឺលោក សាយ ភារិន មានប្រសាសន៍នៅថ្ងៃទី២១ ខែឧសភា ថា សមាជិកគ្រួសារគាត់ចំនួន ៥នាក់ និងប្អូនថ្លៃពីរនាក់ទៀតដែលនាំគ្នាទៅធ្វើអត្តសញ្ញាណប័ណ្ណនៅសាលាឃុំដំណាលគ្នាកាលពីជាង ៦ខែមុននោះ មិនទាន់ទទួលបានអត្តសញ្ញាណប័ណ្ណនៅឡើយ។ លោកថា មានពលរដ្ឋជាច្រើនត្អូញត្អែរពីភាពយឺតយ៉ាវរបស់សមត្ថកិច្ចក្នុងការចេញប័ណ្ណ៖ « ខ្ញុំសំណូមពរឲ្យរដ្ឋាភិបាល ឬសម្ដេចនាយករដ្ឋមន្ត្រី មេត្តាជួយចាត់វិធានការកន្លែងថតឲ្យបានលឿន ព្រោះប្រជាពលរដ្ឋត្រូវការអត្តសញ្ញាណប័ណ្ណទៅធ្វើតេស្តនៅរោងចក្រ ហើយរោងចក្រហ្នឹងបើអត់មានអាថ្មីហ្នឹង គេអត់យកទៀត។អ៊ីចឹងចង់សំណូមពរថា បើអាថ្មីចេញអត់ទាន់ទេ សូមឲ្យចាស់ប្រើបានសិនទៅ »។
ទាក់ទងបញ្ហានេះ នាយប៉ុស្តិ៍នគរបាលរដ្ឋបាលឃុំខ្នារឆ្មារ លោក ឈឹម សំអាត ថាភាពយឺតយ៉ាវនេះ មិនបណ្ដាលមកពីសមត្ថកិច្ចថ្នាក់ឃុំ ឬស្រុកទេ ព្រោះឯកសារពាក់ព័ន្ធនឹងអ្នកធ្វើអត្តសញ្ញាណប័ណ្ណ បានបញ្ជូនទៅថ្នាក់លើជាបន្តបន្ទាប់ក្រោយពីថតរួច។លោកថា ប្រជាពលរដ្ឋនៅទូទាំងឃុំ បានថតធ្វើអត្តសញ្ញាណប័ណ្ណគំរូថ្មីនៅចុងឆ្នាំ២០១៥ និងដើមឆ្នាំ២០១៦ មានជាង ២ពាន់នាក់៖ « អត់ទាន់ធ្លាក់មកដល់ដៃយើងនៅឡើយទេ។ តែគ្រាន់ថាប៉ុន្មានហ្នឹងដោយតាមឃុំគេមកមួយពីរអ៊ីចឹងទៅណាក្មួយ ដល់ធ្លាក់មកដុំកំភួនអត់ទាន់មាន »។
វិទ្យុអាស៊ីសេរី នៅថ្ងៃទី២១ ខែឧសភា មិនអាចទាក់ទងស្នងការរងខេត្តកំពង់ឆ្នាំង លោក ឡូវ ម៉ាលី ទទួលបន្ទុកអត្តសញ្ញាណកម្ម ដើម្បីសាកសួរបញ្ហានេះបានទេ ខណៈស្នងការ លោក ប្រាក់ វុឌ្ឍី មិនទទួលទូរស័ព្ទ។
ប៉ុន្តែអ្នកនាំពាក្យសាលាខេត្តកំពង់ឆ្នាំង លោក ម៉ម ឈឿម បញ្ជាក់ថា នៅសប្ដាហ៍ក្រោយ លោកស្នងការនឹងទាក់ទងទៅក្រសួងមហាផ្ទៃ ផ្ទាល់ពីបញ្ហាអត្តសញ្ញាណប័ណ្ណនេះ៖ « តាមតួលេខរបស់លោក ឡូវ ម៉ាលី នៅអត់ដល់ពីរនាក់ទេ នៅឃុំខ្នារឆ្មារ ហ្នឹង ព្រោះធ្លាប់ចែកម្ដងរួចហើយ។កន្លងមក អាជ្ញាធរបានយកចិត្តទុកដាក់ណាស់បញ្ហាអត្តសញ្ញាណប័ណ្ណ បានលោកចុះចែកផ្ទាល់ៗ »។
មន្ត្រីជំនាញរបស់ក្រសួងមហាផ្ទៃ ប្រកាសពីភាពយឺតយ៉ាវផ្ដល់អត្តសញ្ញាណប័ណ្ណជូនពលរដ្ឋតាមរយៈសារព័ត៌មានក្នុងស្រុកថា អត្តសញ្ញាណប័ណ្ណសញ្ជាតិខ្មែរជិត ២០ម៉ឺនប័ណ្ណនៅទូទាំង ២៤រាជធានី-ខេត្ត បានបោះពុម្ពរួច ប៉ុន្តែអាជ្ញាធរមូលដ្ឋានមិនទាន់បានមកយកទៅចែកជូនប្រជាពលរដ្ឋនៅឡើយ។
តាមរបាយការណ៍របស់អគ្គនាយកដ្ឋានអត្តសញ្ញាណប័ណ្ណសញ្ជាតិខ្មែរដែលដកស្រង់ដោយវិទ្យុសំឡេងប្រជាធិបតេយ្យ វីអូឌី(VOD)បង្ហាញថា គិតត្រឹមថ្ងៃទី២១ ខែឧសភា ឆ្នាំ២០១៦ តាមបណ្ដាស្នងការដ្ឋានរាជធានី-ខេត្តចំនួន២៤ លើកលែងតែស្នងការដ្ឋាននគរបាលខេត្តកែប មិនទាន់បានមកយកអត្តសញ្ញាណប័ណ្ណទាំងនោះទៅចែកជូនប្រជាពលរដ្ឋនៅតាមមូលដ្ឋាននៅឡើយទេ។
សម្រាប់ស្នងការដ្ឋានរាជធានីភ្នំពេញមានចំនួន ២៩០ប័ណ្ណ ខេត្តកណ្ដាល ជាង ១ពាន់ប័ណ្ណ (១.៣៤៩ប័ណ្ណ) ខេត្តកំពង់ស្ពឺ ជិត ២ម៉ឺនប័ណ្ណ (១៩.២៤០ប័ណ្ណ) ខេត្តកំពង់ឆ្នាំង ជាង ១ពាន់ប័ណ្ណ (១.៤២៥ប័ណ្ណ) ខេត្តព្រៃវែង ជិត ៦ពាន់ប័ណ្ណ (៥.៦៨៧ប័ណ្ណ) ខេត្តកំពង់ចាម ៧០៤ប័ណ្ណ ខេត្តក្រចេះ ជិត ១ម៉ឺនប័ណ្ណ (៩.៧៨២ប័ណ្ណ) ខេត្តស្ទឹងត្រែង ជិត ២ពាន់ប័ណ្ណ (១.៨២០ប័ណ្ណ) ខេត្តស្វាយរៀង ជាង ៥ពាន់ប័ណ្ណ (៥.១៦៩ប័ណ្ណ) ខេត្តតាកែវ ជាង ១ម៉ឺនប័ណ្ណ (១១.១៨១ប័ណ្ណ) ខេត្តកំពត ជិត ១ម៉ឺនប័ណ្ណ (៩.៨២៨ប័ណ្ណ) ខេត្តព្រះសីហនុ ជិត ២ពាន់ប័ណ្ណ (១.៨៣០ប័ណ្ណ) ខេត្តកោះកុង ជាង ២ពាន់ប័ណ្ណ (២.២៥២ប័ណ្ណ) ខេត្តកំពង់ធំ ជាង ២ម៉ឺនប័ណ្ណ (២៤.៨៣៥ប័ណ្ណ) ខេត្តពោធិ៍សាត់ ជិត ៣ពាន់ប័ណ្ណ (២.៨៥៤ប័ណ្ណ) ខេត្តបាត់ដំបង ជាង ១ម៉ឺនប័ណ្ណ (១១.២៦៩ប័ណ្ណ) ខេត្តសៀមរាប ជាង ១ម៉ឺនប័ណ្ណ (១.៤០៥៦ប័ណ្ណ) ខេត្តបន្ទាយមានជ័យ ជិត ២ម៉ឺនប័ណ្ណ (១៥.៨០៥ប័ណ្ណ) ខេត្តឧត្តរមានជ័យ ជាង ២ពាន់ប័ណ្ណ (២.១០៥ប័ណ្ណ) ខេត្តប៉ៃលិន ២៤៥ប័ណ្ណ ខេត្តព្រះវិហារ ជាង ២ពាន់ប័ណ្ណ (២.៤១៦ប័ណ្ណ) ខេត្តមណ្ឌលគិរី ២៨៨ប័ណ្ណ ខេត្តរតនគិរី ជាង ១ពាន់ប័ណ្ណ (១.៣៣៤ប័ណ្ណ) និងខេត្តត្បូងឃ្មុំ ជាង ៥ម៉ឺនប័ណ្ណ (៥០.៤៩២ប័ណ្ណ)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។