កម្ពុជា និងវៀតណាមអះអាងថា សកម្មភាពបោះបង្គោលព្រំដែន និងកំណត់ខណ្ឌសីមាព្រំដែននៃប្រទេសទាំងពីរ ដោយគណៈកម្មការព្រំដែនចម្រុះ (JBC) នោះ បានប្រព្រឹត្តទៅដោយរលូន។
ភាគីទាំងពីរក៏បានស្វាគមន៍ចំពោះកំណត់ហេតុរវាងប្រធានគណៈកម្មការចម្រុះ ដែលបានចុះហត្ថលេខា កាលពីថ្ងៃទី២១ ខែធ្នូ ឆ្នាំ២០២១ នៅរាជធានីភ្នំពេញ។
ក្នុងកំណត់ហេតុនោះ ភាគីទាំងពីរបានប្ដេជ្ញាបន្តធ្វើយ៉ាងណាឲ្យមានភាពជិតស្និទ្ធជាមួយគ្នា ដើម្បីស្វែងរកដំណោះស្រាយ ដែលអាចទទួលយកបានទាំងសងខាង ចំពោះការបោះបង្គោលព្រំដែនគោក ដែលនៅសេសសល់ប្រមាណ ១៦%។
ការលើកឡើងបែបនេះ តាមរយៈសេចក្ដីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិកម្ពុជា កាលពីរសៀលថ្ងៃទី២១ ខែមករា ស្តីពីលទ្ធផលនៃដំណើរទស្សនកិច្ចរបស់រដ្ឋមន្រ្តីការបរទេសនៃសាធារណរដ្ឋសង្គមនិយមវៀតណាម លោក ប៊ូយ ថាញ់សឺន (Bui Thanh Son) នៅកម្ពុជា កាលពីថ្ងៃទី១៩ និងទី២០ ខែមករា។
ការសម្រេចបោះបង្គោលព្រំដែននៃប្រទេសទាំងពីរនេះ ធ្វើឡើងទាំងចម្រូងចម្រាសនឹងពាក្យរិះគន់ ពីអ្នកឃ្លាំមើលបញ្ហាព្រំដែន និងមានការប្រឆាំងដាច់ខាតពីគណបក្សសង្គ្រោះជាតិ ដែលជាបក្សប្រឆាំងធំជាងគេនៅកម្ពុជា។
សេចក្ដីប្រកាសព័ត៌មានរបស់ក្រសួងការបរទេស ក៏បានបញ្ជាក់ដែរថា ដំណើរទស្សនកិច្ចផ្លូវការរបស់លោក ប៊ូយ ថាញ់សឺន នៅកម្ពុជានាពេលនេះ ក្រៅពីជជែកអំពីបញ្ហាព្រំដែន ក៏សំដៅលើកកម្ពស់ និងធ្វើឱ្យស៊ីជម្រៅ ចំពោះទំនាក់ទំនង និងកិច្ចសហប្រតិបត្តិការទ្វេភាគីរវាងប្រទេសទាំងពីរដែរ។
លោក ប៊ូយ ថាញ់សឺន បានចូលជួបពិភាក្សាការងារដាច់ដោយឡែកពីគ្នាជាមួយមន្ត្រីជាន់ខ្ពស់កម្ពុជាជាច្រើនរូប ក្នុងនោះរួមមាន ជួបជាមួយលោកនាយករដ្ឋមន្ត្រី ហ៊ុន សែន ប្រធានព្រឹទ្ធសភា សាយ ឈុំ ប្រធានរដ្ឋសភា លោក ហេង សំរិន និងរដ្ឋមន្ត្រីក្រសួងការបរទេសកម្ពុជា លោក ប្រាក់ សុខុន ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។