សង្គមស៊ីវិលនិងប្រជាពលរដ្ឋដែលមានរថយន្តស៊េរីទាប បានសាទរចំពោះការកំណត់តម្លៃបង់ពន្ធលើមធ្យោបាយយានយន្តរបស់រាជរដ្ឋាភិបាល នៅឆ្នាំ២០១៤ ខាងមុខ។
មន្ត្រីអគ្គនាយកដ្ឋានពន្ធដារនៃក្រសួងសេដ្ឋកិច្ចនិងហិរញ្ញវត្ថុ មិនបង្ហាញអត្តសញ្ញាណម្នាក់បានឲ្យដឹងថា តម្លៃយកពន្ធលើមធ្យោបាយដឹកជញ្ជូននៅឆ្នាំ២០១៤ ត្រូវកំណត់ជាថ្មី និងប្រែប្រួលខ្លះៗតាមស្ថានភាពជាក់ស្តែង។
មន្ត្រីដដែលបានអះអាងថា ការបង់ពន្ធយានជំនិះគ្រប់ប្រភេទសម្រាប់ឆ្នាំ២០១៤ បង្ហាញថា រថយន្តស៊េរីទំនើបៗ មានអាយុ ៥ឆ្នាំ គិតពីឆ្នាំផលិត តម្លៃបង់ពន្ធអាចនឹងកើនខ្ពស់។ ប៉ុន្តែនឹងថយចុះចំពោះរថយន្តស៊េរីទាប មានអាយុលើសពី ១០ឆ្នាំ។
មន្ត្រីក្រសួងសេដ្ឋកិច្ចបន្តថា តាមច្បាប់ថវិកាជាតិ ឆ្នាំ២០១៤ ស្តីពីការបង់ពន្ធលើមធ្យោបាយដឹកជញ្ជូនបង្ហាញថា ការយកពន្ធផ្លូវលើប្រភេទរថយន្តជាលក្ខណៈគ្រួសារចែកជាបីប្រភេទ។ សម្រាប់រថយន្តមានទំហំស៊ីឡាំង ១.៥០០សង់ទីម៉ែត្រគុប គិតចាប់ពីឆ្នាំផលិតមានអាយុ ៥ឆ្នាំ មានតម្លៃពន្ធ ១៥ម៉ឺនរៀល។ រថយន្តអាយុលើសពី ៥ឆ្នាំ ដល់ ១០ឆ្នាំ តម្លៃពន្ធ ១០ម៉ឺនរៀល និងរថយន្តអាយុលើសពី ១០ឆ្នាំ តម្លៃបង់ពន្ធ ៨ម៉ឺនរៀល។
រីឯរថយន្តមានទំហំស៊ីឡាំងលើសពី ១.៥០០សង់ទីម៉ែត្រគុប ដល់ ២.០០០សង់ទីម៉ែត្រគុប គិតពីឆ្នាំផលិតមានអាយុ ៥ឆ្នាំ មានតម្លៃ ២០ម៉ឺនរៀល។ លើសពី ៥ឆ្នាំ ដល់ ១០ឆ្នាំ តម្លៃ ១៥ម៉ឺនរៀល និងលើសពី ១០ឆ្នាំ តម្លៃ ១០ម៉ឺនរៀល។ ទំហំស៊ីឡាំងលើសពី ២ពាន់សង់ទីម៉ែត្រគុប ដល់ ២.៩០០សង់ទីម៉ែត្រគុប គិតពីឆ្នាំផលិតមានអាយុ ៥ឆ្នាំ តម្លៃពន្ធ ៦០ម៉ឺនរៀល។ លើសពី ៥ឆ្នាំ ដល់ ១០ឆ្នាំ តម្លៃ ៤០ម៉ឺនរៀល និងលើសពី ១០ឆ្នាំ មានតម្លៃ ២៥ម៉ឺនរៀល។
មន្ត្រីពន្ធដារបានឲ្យដឹងទៀតថា សម្រាប់រថយន្តមានទំហំស៊ីឡាំងលើសពី ២.៩០០សង់ទីម៉ែត្រគុប ដល់ ៤.០០០សង់ទីម៉ែត្រគុប គិតពីឆ្នាំផលិតមានអាយុ ៥ឆ្នាំ តម្លៃបង់ពន្ធចំនួន ១លាន ៦សែនរៀល។ ឆ្នាំផលិតលើសពី ៥ឆ្នាំ ដល់ ១០ឆ្នាំ តម្លៃពន្ធ ១លានរៀល និងលើសពី ១០ឆ្នាំ តម្លៃពន្ធ ៦០ម៉ឺនរៀល។ ទំហំស៊ីឡាំងលើសពី ៤ពាន់សង់ទីម៉ែត្រគុបឡើងទៅ គិតចាប់ពីឆ្នាំផលិតមានអាយុ ៥ឆ្នាំ តម្លៃពន្ធ ២លានរៀល។ អាយុលើសពី ៥ឆ្នាំ ដល់ ១០ឆ្នាំ មានតម្លៃ ១លាន ២សែនរៀល និងអាយុលើសពី ១០ឆ្នាំ មានតម្លៃ ៨០ម៉ឺនរៀល។
មន្ត្រីសង្គមស៊ីវិលនិងប្រជាពលរដ្ឋបានសាទរចំពោះតារាងតម្លៃបង់ពន្ធលើមធ្យោបាយដឹកជញ្ជូនឆ្នាំ២០១៤ របស់ក្រសួងសេដ្ឋកិច្ច ដែលបានបែងចែកប្រភេទរថយន្តស៊េរីទំនើប និងរថយន្តស៊េរីទាបពេលនេះ។
លោក សន ជ័យ មន្ត្រីសម្របសម្រួលបណ្ដាញរួបរួម ដើម្បីគណនេយ្យភាពសង្គមប្រចាំអាស៊ីបូព៌ា និងប៉ាស៊ីហ្វិក និងជាអ្នកឃ្លាំមើលការប្រមូលពន្ធលើមធ្យោបាយដឹកជញ្ជូនគ្រប់ប្រភេទនៅកម្ពុជា។ លោកបានចាត់ទុកការកំណត់តារាងតម្លៃពន្ធឆ្នាំ២០១៤ របស់ក្រសួងសេដ្ឋកិច្ច ថាបានផ្ដល់ប្រយោជន៍ច្រើនដល់អ្នកប្រើរថយន្តស៊េរីចាស់ៗ៖ «ការគិតលើកមុន គេគិតលើកម្លាំងម៉ាស៊ីនសុទ្ធតែម្ដង គេអត់ខ្វល់ពីឆ្នាំផលិតទេ។ ប៉ុន្តែដល់ពេលឥឡូវនេះ គេកែប្រែ កម្លាំងម៉ាស៊ីនក៏គេគិត ហើយគេគិតពីគុណភាពឡាន ពីឆ្នាំផលិតរបស់វាទៀត។ អ៊ីចឹងបើរថយន្តកាន់តែចាស់ ឬរថយន្តស៊េរីទាប តម្លៃបង់ពន្ធក៏កាន់តែទាប»។
ដូចគ្នាដែរ សម្រាប់ពលរដ្ឋមានរថយន្តស៊េរីទាប ហើយដែលធ្លាប់បង់តម្លៃពន្ធខ្ពស់ ក៏បានសាទរចំពោះការកំណត់តម្លៃពន្ធជាថ្មីរបស់ក្រសួងសេដ្ឋកិច្ចនេះដែរ៖ «រថយន្តស៊េរីទាបហើយទម្លាក់ពន្ធខ្ញុំគាំទ្រ។ ក៏ប៉ុន្តែរថយន្តទំនើបៗ ថ្លៃៗហ្នឹង ពន្ធថ្លៃវាត្រឹមត្រូវហើយ។ សម្រាប់ខ្ញុំ ខ្ញុំមានរថយន្តកាម៉ារី ឆ្លាម ៩៧ ថ្លៃបង់ពន្ធ គឺមានតម្លៃ ៣៧ ទៅ ៣៨ម៉ឺន។ តាមខ្ញុំគួរតែទាបជាងនេះ ព្រោះជាង ១០ឆ្នាំហើយ រថយន្តស៊េរី ៩៧ ឆ្លាម របស់ខ្ញុំ ១៦ឆ្នាំហើយ តម្លៃបង់ពន្ធត្រឹមតែជាង ១០ម៉ឺន ដូចឡាន ១២កៅអីដែលមានពន្ធ ១២ម៉ឺន ទៅ ១៥ម៉ឺនទើបសម»។
យ៉ាងណាក៏ដោយ មន្ត្រីសង្គមស៊ីវិលបានចាត់ទុកការផ្លាស់ប្ដូរ ឬការកំណត់តម្លៃបង់ពន្ធជាថ្មីទៅលើមធ្យោបាយដឹកជញ្ជូនគ្រប់ប្រភេទ នៅឆ្នាំ២០១៤ របស់ក្រសួងសេដ្ឋកិច្ច ឬរដ្ឋាភិបាលពេលនេះ អាចជាផ្នែកមួយនៃសំណើរបស់សង្គមស៊ីវិល និងប្រជាពលរដ្ឋនៅឆ្នាំកន្លងទៅ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ៕