តំណាងក្រុមកម្មកររៀបរាប់ឲ្យដឹងថា ពួកគេធ្វើកូដកម្មទាមទារសុំដំឡើងប្រាក់ខែយូរមកហើយ ប៉ុន្តែក្រុមហ៊ុនមិនបានដំឡើងប្រាក់ខែដល់កម្មករនោះទេ ហើយកម្មករជួបការលំបាកដោយសារប្រាក់ខែតិចដែលមិនសមស្របទៅនឹងតម្លៃទំនិញទីផ្សាសព្វថ្ងៃនោះឡើយ។
ប្រធានសហព័ន្ធសហជីពចលនាកម្មករ លោក ប៉ាវ ស៊ីណា ថ្លែងនៅថ្ងៃទី២៣ ធ្នូ ថា កម្មករធ្វើកូដកម្មទាមទារដំឡើងប្រាក់ខែ ធ្វើឡើងបន្ទាប់ពីពួកគេបានទទួលព័ត៌មានថា នឹងមានការដំឡើងប្រាក់ខែកម្មករនៅដើមឆ្នាំ២០១៤ ខាងមុននេះ។ បញ្ហាទាំងនេះហើយដែលធ្វើឲ្យក្រុមកម្មកររួមកម្លាំងជាមួយគណបក្សសង្គ្រោះជាតិ ដើម្បីទាមទារដំឡើងប្រាក់ខែរបស់ពួកគេនោះ៖ «ដែលពួកគាត់ទទួលបានប្រាក់ឈ្នួលតិច ដែលជាបញ្ហាប្រឈមក្នុងជីវភាពរស់ប្រចាំថ្ងៃរបស់ពួកគាត់។ ដូច្នេះហើយទើបបណ្ដាលឲ្យពួកគាត់ហ្នឹងធ្វើការទាមទារ មិនចំពោះតែខេត្តយើងមួយនេះទេ គឺភ្នំពេញក៏មានការទាមទារដែរ»។
ទាក់ទងនឹងការធ្វើកូដកម្មទាមទារដំឡើងប្រាក់ខែរបស់កម្មករនៅក្រុងបាវិតនេះ ប្រធានគណបក្សសង្គ្រោះជាតិ ដែលបានចូលរួមជាមួយក្រុមកម្មករ លោក សម រង្ស៊ី មានប្រសាសន៍ថា លោកចូលរួមធ្វើកូដកម្មជាក្រុមកម្មករដើម្បីលើកទឹកចិត្តដល់កម្មករដែលពួកគេជួបការលំបាកកន្លងមក ដោយសារការបិទសិទ្ធិសេរីភាពពីសំណាក់ថៅកែរោងចក្រ និងមួយវិញទៀតដោយសារប្រាក់ខែរបស់កម្មករតិចតួចមិនគ្រប់គ្រាន់សម្រាប់ដោះស្រាយជីវភាពប្រចាំថ្ងៃជាដើម។
លោក សម រង្ស៊ី៖ «ពីព្រោះគេគាបសង្កាត់ សុំច្បាប់ពេលឈឺពេលអី ម្ដាយឪពុកស្លាប់ ឬមួយខ្លួនឯងមានបញ្ហាសុខភាពសូម្បីតែជិតសម្រាលកូនក៏គេមិនឲ្យឈប់ងាយៗទេ។ ហើយឃើញជាក់ស្ដែងព្រឹកមិញនេះ គេបិទទ្វារចាក់សោមិនឲ្យកម្មករចេញខ្លាចទៅចូលរួមធ្វើកូដកម្មជាមួយកម្មករមួយចំនួនធំដែលនៅក្រៅរោងចក្រ ហើយឃើញមានការគាបសង្កាត់សម្លុតមានការភ័យខ្លាចនៅតាមរោងចក្រ»។
លោក សម រង្ស៊ី ថ្លែងបន្តថា គណបក្សសង្គ្រោះជាតិ គាំទ្រការធ្វើកូដកម្មរបស់ក្រុមកម្មករ និងជួយទាមទារឲ្យមានការដំឡើងប្រាក់ខែកម្មករឲ្យបានម្នាក់ ១៦០ដុល្លារក្នុងមួយខែ។
ក្នុងថ្ងៃដដែលនេះដែរ លោក សម រង្ស៊ី បានចូលរួមបង្កើតសហជីពថ្មីមួយនៅក្រុងបាវិត ដោយមានក្រុមកម្មករចូលរួមចុះឈ្មោះជាសមាជិកក្នុងសហជីពយ៉ាងច្រើនកុះករ ហើយអ្នកទទួលខុសត្រូវរបស់សហជីពថ្មីមួយនេះជាសហការីនៃសហជីពរបស់ លោក រ៉ុង ឈុង។ ក្នុងនោះដែរសហជីពថ្មីនេះ បានបង្កើតឲ្យមានតំណាងរបស់ខ្លួននៅតាមបណ្ដារោងចក្រនានា នៅក្រុងបាវិត។ លោកបន្តថា សហជីពនេះជាសហជីពថ្មីមួយសេរីឯករាជ្យ បម្រើផលប្រយោជន៍កម្មករដោយគ្មានការគាបសង្កត់ពីស្ថាប័នដទៃឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ៕