ពលរដ្ឋខេត្តសៀមរាបថា ការពង្រាយកងកម្លាំងប្រដាប់អាវុធប៉ុន្មានថ្ងៃមកនេះធ្វើឲ្យប៉ះពាល់វិស័យទេសចរណ៍
2024.08.21
កងកម្លាំងនគរបាល និងយោធា កំពុងត្រួតពិនិត្យឡានអ្នកដំណើរ នៅទីរួមខេត្តសៀមរាប នាយប់ថ្ងៃទី២១ ខែសីហា ឆ្នាំ២០២៤។
រូប៖ ស្នងការដ្ឋាននគរបាលខេត្តសៀមរាប
អាជ្ញាធរខេត្តសៀមរាបបានសម្ញែងកម្លាំងសមត្ថកិច្ចចម្រុះដើរល្បាតទាំងយប់ទាំងថ្ងៃ ដើម្បីទប់ស្កាត់ពលរដ្ឋមិនឱ្យនាំគ្នា ធ្វើបាតុកម្មតវ៉ាមិនពេញចិត្តនឹងត្រីកោណអភិវឌ្ឍន៍បីប្រទេស គឺកម្ពុជា ឡាវ និងវៀតណាម (CLV-DTA)។
ពលរដ្ឋបារម្ភថា ទង្វើរបស់អាជ្ញាធរប៉ះពាល់វិស័យទេសចរណ៍មួយកម្រិតទៀត ដែលជាប្រភពចំណូលយ៉ាងសំខាន់របស់ពួកគាត់។
អាជ្ញាធរខេត្តសៀមរាប បានពង្រាយកងកម្លាំងប្រដាប់អាវុធ ដើរល្បាតគ្រប់តំបន់មិនត្រឹមតែហាមពលរដ្ឋមិនឱ្យ តវ៉ាមិនពេញចិត្ត នឹងកិច្ចសហប្រតិបត្តិការតំបន់ត្រីកោណ CLV-DTA ប៉ុណ្ណោះទេ សូម្បីតែពលរដ្ឋ និងក្រុមនិស្សិតដែលចួបជុំគ្នាច្រើន ធ្វើកិច្ចការសាលា ក៏អាជ្ញាធររារាំងដែរ ក្រោមហេតុផល ដើម្បីរក្សាសណ្ដាប់ធ្នាប់សាធារណៈ ព្រោះខ្លាចពួកគាត់បបួលគ្នាធ្វើបាតុកម្ម។
ពលរដ្ឋ និងអ្នកបម្រើសេវាកម្មផ្នែកទេសចរណ៍បានចាត់ទុកទង្វើរបស់អាជ្ញាធរថា ធ្វើឱ្យបរិយាកាសសង្គមមានភាពរញ៉េរញ៉ៃ ប៉ះពាល់ដល់អារម្មណ៍អ្នកទេសចរជាតិ និងអន្តរជាតិ ដែលមកទស្សនាខេត្តសៀមរាប និងតំបន់ផ្សេងទៀត។
ពលរដ្ឋរស់នៅក្រុងសៀមរាប លោក ម៉ាលី សានី សង្កេតឃើញថា អាជ្ញាធរតែងតែលើកហេតុផលថា ការពង្រាយសមត្ថកិច្ចល្បាត ដើម្បីរក្សាសណ្ដាប់ធ្នាប់សង្គម តែបង្កប់ន័យគំរាមកំហែងដល់ស្មារតីពលរដ្ឋមិនឱ្យតវ៉ា ដែលជាផ្នែកមួយ ប៉ះពាល់ដល់វិស័យទេសចរណ៍មួយកម្រិតទៀត។
លោកថា អាជីវកលក់ដូរតាមដងផ្លូវមួយចំនួនត្អូញត្អែរលក់មិនសូវដាច់ ព្រោះខ្សត់ភ្ញៀវ ប៉ះពាល់ជីវភាពគ្រួសារ ដោយសារអាជ្ញាធររឹតត្បិតពលរដ្ឋមិនឱ្យជួបជុំគ្នាច្រើន។
លោក ម៉ាលី សានី៖ «គ្មានអ្នកលក់ដូរធំដុំតែមនុស្សគ្នាទៅញ៉ាំអីវាជារឿងធម្មតា គាត់ទៅរឹតបន្តឹងការជួបជុំអ៊ីចឹងទៀត វាកាន់តែធ្វើឱ្យមានបញ្ហាសេដ្ឋកិច្ច បញ្ហាទេសចរណ៍ច្រើន»។
អាជីវកលក់ដូរម្នាក់ទៀតក្នុងក្រុងសៀមរាប លោកស្រី សម្បត្តិ ចាន់ធឿន ត្អូញត្អែរថា ក្នុងពេល ដែលអាជ្ញាធររឹតបន្តឹងមិនឱ្យពលរដ្ឋចួបជុំគ្នាច្រើន លោកស្រីលក់ដូរមិនសូវដាច់នោះទេ ហើយកាន់តែខ្សត់ភ្ញៀវថែមទៀត។
លោកស្រីថា ពលរដ្ឋខ្លះភ័យខ្លាចមិនហ៊ានធ្វើដំណើរចេញក្រៅ និងសម្ងំដេកនៅផ្ទះ ព្រោះខ្លាចក្រែងមានរឿងរ៉ាវជាមួយអាជ្ញាធរ។
លោកស្រី សម្បត្តិ ចាន់ធឿន៖ «បើភ្ញៀវគាត់មកគាត់ច្រើនតែមកលេងនៅទន្លេស្រូបខ្យល់ គេជិះទូក ជិះកាណូត អីអ៊ីចឹង! តែឥឡូវស្ងាត់ជ្រាបអត់មានភ្ញៀវ អត់មានអីទេគឺស្ងាត់»។
ចាប់តាំងពីថ្ងៃទី១៨ ខែសីហា មកទល់ពេលនេះ សមត្ថកិច្ចចម្រុះពាក់ឯកសណ្ឋានប្រដាប់ដោយអាវុធ ខ្លះស្លៀកពាក់ស៊ីវិល និងប្រជាការពារភូមិ បានដើរល្បាតគ្រប់តំបន់ ដោយពង្រាយបណ្ដាញចាប់ពីថ្នាក់ភូមិ រហូតដល់ខេត្ត មិនអនុញ្ញាតឱ្យពលរដ្ឋជួបជុំគ្នាច្រើន សម្ដែងមតិ និងជជែកពិភាក្សាគ្នានោះឡើយ។
សមត្ថកិច្ចខ្លះជិះឡានសារ៉ែនទាំងហ្វូង និងម៉ូតូដើរល្បាត ខុសពីសព្វមួយដង ខ្លះយាមតាមគោលដៅ ខ្លះស្លៀកពាក់ស៊ីវិលជិះម៉ូតូ ដើរលបៗ ចាំស្ទាក់ថតពលរដ្ឋជជែកគ្នា និងថតរូបពលរដ្ឋនៅពេលដែលពួកគាត់ជួបជុំគ្នាច្រើន។
វិទ្យុអាស៊ីសេរីមិនទាន់អាចទាក់ទងសុំការបំភ្លឺរឿងនេះ ពីស្នងការដ្ឋាននគរបាលខេត្តសៀមរាបលោក ហួត សុធី បាននៅឡើយទេ នៅថ្ងៃទី២០ សីហា។ រីឯអ្នកនាំពាក្យសាលាខេត្តសៀមរាប លោក លី វណ្ណៈ ក៏មិនទាន់អាចទាក់ទងសុំការបំភ្លឺបានដែរ នៅថ្ងៃដដែលនេះដោយទូរស័ព្ទហៅចូល តែគ្មានអ្នកលើក។
ជុំវិញរឿងនេះអ្នកសម្របសម្រួលការិយាល័យអង្គការលីកាដូ (LICADHO) ប្រចាំខេត្តបន្ទាយ មានជ័យ និងសៀមរាប លោក អ៊ិន គង់ជិត យល់ថា ទង្វើរបស់អាជ្ញាធរខេត្តសៀមរាបប៉ះពាល់ដល់សិទ្ធិសេរីភាព និងការប្រកបមុខរបររបស់ពលរដ្ឋនៅតាមដងផ្លូវ ដែលពួកគាត់តែងតែលក់ដូរម្ហូបអាហារដាក់តុឱ្យភ្ញៀវចួបជុំគ្នាច្រើនជជែកកម្សាន្ត។
លោកស្នើដល់អាជ្ញាធរថា គួរតែពិចារណាបន្ធូរបន្ថយស្ថានភាពនេះ ចៀសវាងប៉ះពាល់ដល់ភ្ញៀវទេសចរកាន់តែធ្ងន់។
លោក អ៊ិន គង់ជិត៖ «អ្វីដែលជាការបង្ហាញកម្លាំងគគ្រឹកគ្រេង កាត់បន្ថយកម្លាំងនៅរក្សាគោលដៅសំខាន់ៗ ដូចជាទាក់ទងនឹងបញ្ហាសន្តិសុខសំខាន់វាទាក់ទងនឹងជ្រុងនេះវិញ គឺពួកបរទេសគាត់ចូលមកមានការភ័យខ្លាច ហើយគាត់គិតថាប្រទេសយើងមានសន្តិភាពសោះហេតុអ្វីមានការដាក់ពង្រាយកម្លាំងច្រើន»។
មន្ត្រីសង្គមស៊ីវិលរូបនេះបន្ថែមថា ភ្ញៀវទេសចរអាចនឹងភិតភ័យនៅពេលពួកគេប្រទះឃើញ សមត្ថកិច្ចពង្រាយកម្លាំងប្រដាប់អាវុធចម្រុះច្រើនដូច្នេះ ហើយពលរដ្ឋនៅខេត្តដទៃទៀតក៏ខ្លាចរអាមិនហ៊ានមកលេងខេត្តសៀមរាបដែរ។
មិនត្រឹមតែនៅខេត្តសៀមរាបប៉ុណ្ណោះទេ នៅឯខេត្តបាត់ដំបង និងខេត្តបន្ទាយមានជ័យ ក៏មានសេចក្ដីរាយការណ៍ពីពលរដ្ឋដែរថា អាជ្ញាធរបានពង្រាយកម្លាំងសមត្ថកិច្ចរឹតត្បិតពលរដ្ឋមិនឱ្យតវ៉ា ប្រឆាំងនឹងត្រីកោណអភិវឌ្ឍន៍បីប្រទេស គឺកម្ពុជា ឡាវ និងវៀតណាម (CLV-DTA)ដែរ។
ពលរដ្ឋបន្ថែមថា ទង្វើរបស់អាជ្ញាធរ ជារូបភាពគំរាមកំហែងសេរីភាពដើរហើរ របស់ពលរដ្ឋ បំពានរដ្ឋធម្មនុញ្ញ ប៉ះពាល់ដល់វិស័យទេសចរណ៍ ដែលកំពុងតែធ្លាក់ដុនដាបស្រាប់ ហើយអ្នកដែលទទួលប្រយោជន៍គឺប្រទេសជិតខាង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ក្រសួងមហាផ្ទៃបញ្ជាក់ថា កូនមន្ត្រីជាន់ខ្ពស់ ដែលបើកឡានបុកមនុស្សស្លាប់ពីរនាក់ នៅអូស្ត្រាលីនោះ គឺឈ្មោះ ឌឿន ឧត្ដមសេនីយ៍
- ក្រុមប្រឹក្សាអភិវឌ្ឍន៍កម្ពុជាគ្រោងធ្វើបេសកកម្មដើរគោះទ្វាររកវិនិយោគិននៅអាមេរិកជាថ្មី
- លោក ហ៊ុន សែន បង្កើនការគំរាមកំហែងឆ្លងដែនលើអ្នករិះគន់
- លោក ហ៊ុន ម៉ាណែត ប្រតិកម្មអ្នករិះគន់ព្រឹត្តិការណ៍ Gumball 3000
- សមត្ថកិច្ចម៉ាឡេស៊ីចាប់ពលករខ្មែរម្នាក់ពាក់ព័ន្ធរិះគន់រដ្ឋាភិបាលកម្ពុជា
