កីឡាករប្រដាល់គុនខ្មែរ (Kun Khmer) គាំទ្រឱ្យការរៀបចំកម្មវិធីបណ្ដុះបណ្ដាលកីឡាករនៅតាមថ្នាក់មូលដ្ឋានដើម្បីលើកកម្ពស់វិស័យកីឡាប្រដាល់គុនខ្មែរ។ ពួកគាត់អះអាងថា កីឡាប្រដាល់គុនខ្មែរបច្ចុប្បន្នពុំសូវមានការចាប់អារម្មណ៍ពីយុវជននោះទេដោយសារតែអាជីពមួយនេះផ្ដល់ប្រាក់ចំណូលតិច និងកង្វះការយកចិត្តទុកដាក់ពីរដ្ឋាភិបាល។
ក្រុមកីឡាករប្រដាល់គុនខ្មែរចង់ឃើញរដ្ឋាភិបាលគិតគូរពីជីវភាពដល់កីឡាករ និងរៀបចំកម្មវិធីប្រកួតឱ្យបានច្រើនដើម្បីផ្ដល់ឱកាសឱ្យកីឡាករថ្មីៗបានបញ្ចេញសមត្ថភាពរបស់ខ្លួន។
កីឡាករប្រដាល់គុនខ្មែរម្ចាស់មេដៃមាសស៊ីហ្គេម លោក ឃីម បូរ៉ា ប្រាប់វិទ្យុអាស៊ីសេរីនៅថ្ងៃទី២ ខែវិច្ឆិកា ថា លោកសាទរចំពោះការរៀបចំសង្វៀនប្រកួតថ្នាលគុនខ្មែរ ពីព្រោះបច្ចុប្បន្ននៅតាមបណ្ដាខេត្តមួយចំនួនគ្មានសង្វៀនប្រកួតដើម្បីឱ្យកីឡាករបានបញ្ចេញសមត្ថភាពឡើយ។ លោកបន្តថា អាជីពជាកីឡាករប្រដាល់នេះ ពុំបានធ្វើឱ្យលោកក្លាយជាអ្នកមានឡើយ ពោលគឺក្នុងមួយការប្រកួតទទួលបានប្រាក់ឧបត្ថម្ភចំនួន ៤លានរៀល ហើយចំពោះកីឡាករប្រកួតថ្មីទទួលបានប្រាក់លើកទឹកចិត្តចំនួន ២០ម៉ឺនរៀល។
លោក ឃីម បូរ៉ា៖«សំណូមពរឱ្យថ្នាក់ដឹកនាំគាត់រៀបចំថ្នាលឱ្យច្រើន ប្រសិនបើចង់ឱ្យពីព្រោះកីឡាខ្លាំងទាល់តែហាត់ពីតូចវ៉ៃពីតូចទាល់តែមានថ្នាលយើងមិនអាចចាំផ្ដើមភ្លាមធំខ្លាំងទេអ៊ីចឹងបើមានថ្នាលច្រើនគុនខ្មែរយើងនឹងអភិវឌ្ឍន៍កាន់តែច្រើន»។
ស្រដៀងគ្នានេះដែរ អតីតនាយកមជ្ឈមណ្ឌលកីឡាកងទ័ពខេមរភូមិន្ទលោក តែម ម៉ឺន ថ្លែងថា គឺជារឿងល្អដែលរដ្ឋាភិបាលរៀបចំក្លឹបគុនខ្មែរឱ្យមានការបណ្ដុះបណ្ដាលជំនាញត្រឹមត្រូវដើម្បីចូលរួមផ្សព្វផ្សាយគុនខ្មែរឱ្យបានទូលំទូលាយ។ លោកអំពាវនាវឱ្យពលរដ្ឋជួយគាំទ្រ និងថែរក្សាការពារកីឡាប្រដាល់នេះ។
លោក តែម ម៉ឺន៖«សូមឱ្យប្រជាពលរដ្ឋ យុវជន យុវនារីរបស់យើងគាំទ្រផែនការសកម្មភាពក្នុងការអភិរក្ស និងការអភិវឌ្ឍន៍សិល្បៈក្បាច់គុនបុរាណខ្មែរនឹងឱ្យល្អជាទីបំផុតតាមជំហានៗ»។
ការលើកឡើងរបស់ក្រុមកីឡាប្រដាល់គុនខ្មែរបែបនេះធ្វើឡើងបន្ទាប់ពីប្រធានព្រឹទ្ធសភាលោក ហ៊ុន សែន កាលពីថ្ងៃទី១ ខែវិច្ឆិកា បានថ្លែងក្នុងកម្មវិធីសំណេះសំណាល និងពិសាអាហារសាមគ្គីជាមួយក្រុមកីឡាបាល់ទាត់តារាកម្ពុជា និងក្រុមកីឡាប្រដាល់គុនខ្មែរថា កីឡាគុនខ្មែរកំពុងមានការរីកចម្រើនតែក្នុងរាជធានីភ្នំពេញ។ លោក ហ៊ុន សែន អំពាវនាវឱ្យមានការពិចារណាជួយគាំទ្រការបណ្ដុះបណ្ដាលតាមបណ្ដាក្លឹបនៅតាមខេត្តទូទាំងប្រទេស ជាពិសេសជំរុញឱ្យឧកញ៉ា និងមន្ត្រីក្រោមឱវាទរបស់លោកចូលលុយផងដែរ។
លោក ហ៊ុន សែន៖«តាមរយៈការបណ្ដុះបណ្ដាលថ្នាលកីឡានៅមូលដ្ឋាន ដោយផ្សារភ្ជាប់ជាមួយការសិក្សារបស់យុវជន និងការមកហ្វឹកហាត់នៅក្លឹប។ យើងផ្ដល់ថវិកាប្រចាំខែឱ្យពួកគេឱ្យទទួលបានការទទួលទានអាហារគ្រប់គ្រាន់សម្រាប់ការហ្វឹកហាត់គឺជាការធានាមួយឱ្យមាននិរន្តរភាពសម្រាប់កីឡាករ កីឡាករ នីសម្រាប់កម្ពុជាយើង»។
បើទោះជាយ៉ាងណា តម្លៃខ្លួនរបស់អ្នកប្រដាល់ពេលឡើងវ៉ៃមួយលើកៗអ្នកឈ្នះបានប្រាក់៤លានរៀល និងអ្នកចាញ់បានជិត ៤លានរៀល ហើយគូរប្រកួតខ្លះអាចទទួលបានប្រាក់ឧបត្ថម្ភច្រើនដោយសារពួកគេជាកីឡាករមានឈ្មោះបោះសំឡេងដែលមានម្ចាស់ឧបត្ថម្ភកម្មវិធីធំ និងអ្នកសហការជាច្រើនផ្ដល់ឱ្យ ប៉ុន្តែចំនួនលុយនេះនៅតិចតួចនៅឡើយបើធៀបទៅនឹងប្រទេសអ្នកជិតខាង។ ដោយឡែក កីឡាប្រដាល់ខ្មែរមួយចំនួនទៀតបានបង្ខំចិត្តបោះបង់អាជីពមួយនេះចោលដោយសារគ្មានថវិកាផ្គត់ផ្គង់ជីវភាពគ្រួសារ ហើយនៅពេលចប់ការប្រកួតថវិកាដែលទទួលបានមានចំនួនតិចតួចមិនគ្រប់សូម្បីតែថ្លៃព្យាបាលរបួស។
ក្រុមកីឡាករប្រដាល់ស្នើឱ្យរដ្ឋាភិបាលយកចិត្តទុកដាក់ចំពោះកីឡាករ និងធានារ៉ាប់រងទាំងស្រុងក្នុងការផ្គត់ផ្គង់ជីវភាពដើម្បីឱ្យពួកគាត់មានទឹកចិត្តក្នុងប្រកួត និងថែរក្សាកីឡាគុនខ្មែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។