អ្នករងគ្រោះដាក់លុយវិនិយោគជាមួយក្រុមហ៊ុន ជា សារ៉ន ស្នើឱ្យអាជ្ញាធរជំរុញទៅតុលាការពន្លឿនការដោះស្រាយជូនពួកគាត់

ដោយ ខាន់ លក្ខិណា
2024.08.31

អ្នករងគ្រោះដាក់លុយវិនិយោគជាមួយក្រុមហ៊ុន ជា សារ៉ន ស្នើឱ្យអាជ្ញាធរជំរុញទៅតុលាការពន្លឿនការដោះស្រាយជូនពួកគាត់

លោក ជា សារ៉ន ម្ចាស់ក្រុមហ៊ុនអចលនទ្រព្យ ដែលមានពលរដ្ឋជាច្រើនចាញ់បោកនៅខេត្តកំពត។

រូប៖ ហ្វេសប៊ុកលោក ជា សារ៉ន

ស្ដាប់ ឬទាញយកសំឡេង

អ្នករងគ្រោះដោយការដាក់លុយវិនិយោគជាមួយក្រុមហ៊ុន ជា សារ៉ន ទទូចឱ្យអភិបាលខេត្តកំពត ជួយជំរុញទៅតុលាការឱ្យពន្លឿនការដោះស្រាយជូនពួកគាត់ បើមិនដូច្នេះ ធនាគារនឹងរឹបអូសយកផ្ទះ និងដីស្រែចម្ការរបស់ពួកគាត់។ មន្ត្រីមនុស្សលើកឡើងថា អាជ្ញាធរក៏ដូចជាតុលាការគួរពន្លឿននីតិវិធីក្នុងការដោះស្រាយ ដើម្បីកុំឱ្យពលរដ្ឋរងគ្រោះកាន់តែធ្ងន់។

ពលរដ្ឋរងគ្រោះដោយការដាក់លុយវិនិយោគជាមួយក្រុមហ៊ុន ជា សារ៉ន ស្នើទៅអភិបាលខេត្តកំពតនិងតុលាការពន្លឿនដំណោះស្រាយ ឬក៏ដោះលែងអតីត ឧកញ៉ា ជា សារ៉ន នៅក្រៅឃុំវិញ ដោយពួកគាត់ថា ដើម្បីឱ្យលោក ជា សារ៉ន ចេញដោះស្រាយសំណងជូនពលរដ្ឋ។

ពលរដ្ឋរងគ្រោះវិនិយោគលុយជាមួយក្រុមហ៊ុន ជា សារ៉ន សុំមិនបញ្ចេញឈ្មោះប្រាប់វិទ្យុអាស៊ីសេរីនៅថ្ងៃទី៣០ ខែសីហា ថា ពួកគាត់រង់ចាំដំណោះស្រាយពីអាជ្ញាធរខេត្តជាង ១ឆ្នាំមកហើយ ។ លោកស្រីស្នើឱ្យអភិបាលខេត្តកំពត លោក ម៉ៅ ធនិន ជួយជំរុញទៅតុលាការពន្លឿនការដោះស្រាយដល់ពួកគាត់ឱ្យបានឆាប់ ពីព្រោះ បច្ចុប្បន្នពួកគាត់ធ្លាក់ខ្លួនក្រីក្រ និងជំពាក់បំណុលវ័ណ្ឌក ដោយសារតែរង់ចាំ ដំណោះស្រាយរបស់អាជ្ញាធរ និងតុលាការ។

ពលរដ្ឋថ្លែងលាក់ឈ្មោះ៖ «មិនដឹងយ៉ាងណាទេទៅមុខងាប់អស់មិនដឹង ពិបាកចិត្តចង់ងាប់ហើយរាល់ថ្ងៃ។ ចង់ឱ្យគាត់ពន្លឿនការដោះស្រាយឱ្យបានលឿនបំផុតដែលអាចធ្វើបាន រងគ្រោះៗក៏រងគ្រោះជំពាក់រឹតតែច្រើន រឹតខ្លាំងអាហ្នឹង អ្នកណាដូចអ្នកណាហ្នឹង»។

ស្រដៀងគ្នានេះដែរ ពលរដ្ឋរងគ្រោះម្នាក់ទៀត សុំមិនបញ្ចេញឈ្មោះប្រាប់វិទ្យុអាស៊ីសេរីនៅថ្ងៃទី៣០ ខែសីហាថា លោក ជា សារ៉ន មានទ្រព្យសម្បត្តិអាចលក់ ឡាយឡុងសងពួកគាត់វិញបាន ប៉ុន្តែអាជ្ញាធរបែរជាមិនទុកឱកាសឱ្យលោក ជា សារ៉ន នៅដោះស្រាយជាមួយប្រជាពលរដ្ឋទៅវិញ។ លោកថា ចាប់តាំងពីអាជ្ញាធរ ចាប់ខ្លួនលោក ជា សារ៉ន ទៅឃុំខ្លួននៅពន្ធនាគារជាង ១ឆ្នាំមកនេះ ពួកគាត់មិនទទួលបានដំណឹង និងដំណោះស្រាយអ្វីពីអាជ្ញាធរឡើយ។

ពលរដ្ឋថ្លែងលាក់ឈ្មោះ៖ «យើងនៅតែដេកមិនលក់ បក់មិនល្ហើយ ដោយសារតែ យើងមិនដឹងថ្ងៃណាគេ ដោះស្រាយអ៊ីចឹង ពីមួយខែទៅមួយខែ។ ប៉ុន្តែអ្វីដែលខ្ញុំយល់ គឺគាត់យល់ថា នៅពេលគាត់បើកវេទិកាជាមួយអភិបាលខេត្ត គាត់សន្យា ខ្ញុំឆ្ងល់គាត់សន្យាហើយ ហេតុអីបានចាប់គាត់ទៅអ៊ីចឹង មិនទុកពេលមិនទុកពេលឱ្យគាត់ធ្វើតាមសន្យាសិនទៅ បើធ្វើមិនបានចាំចាប់គាត់ទៅ។ ខ្ញុំឆ្ងល់អ៊ីចឹង។ អ្វីដែលខ្ញុំដឹងទ្រព្យមានច្រើនមានជាក់ស្ដែងពិតប្រាកដ ពីព្រោះខ្ញុំនៅឃុំហ្នឹង ខេត្តហ្នឹង ខ្ញុំដឹងទាំងអស់ ខ្ញុំដឹងច្រើន ព្រោះទ្រព្យគាត់ល្អៗ»។

វិទ្យុអាស៊ីសេរីមិនអាចសុំការអត្ថាធិប្បាយបញ្ហានេះ ពីអភិបាលខេត្តកំពតលោក ម៉ៅ ធនិន និងអ្នកនាំពាក្យសាលាដំបូងខេត្តកំពត លោក ម៉ាន់ បូរេត បានទេ នៅថ្ងៃទី៣០ ខែសីហា ដោយទូរស័ព្ទចូលតែគ្មានអ្នកទទួល។

លោក ជា សារ៉ន និងបក្ខពួក ត្រូវបានសមត្ថកិច្ចចាប់ខ្លួន កាលថ្ងៃទី២២ ខែមេសា ឆ្នាំ២០២៣ នៅក្នុងវេទិកាសាធារណៈដោះស្រាយវិវាទក្រៅប្រព័ន្ធតុលាការនៅខេត្តកំពត តាមបណ្ដឹងរបស់ប្រជាពលរដ្ឋតវ៉ាពីរឿងចាញ់បោកការវិនិយោគរបស់ក្រុមហ៊ុនសរុបជាទឹកប្រាក់ជិត ៤០លានដុល្លារ។

ក្រោយការចាប់ខ្លួនតុលាការបានឃុំខ្លួនលោក ជា សារ៉ន និងបក្ខពួកនៅពន្ធនាគារ បណ្ដោះអាសន្ន ពាក់ព័ន្ធករណីឆរបោកប្រជាពលរដ្ឋក្រោមរូបភាពវិនិយោគដីឡូតិ៍។

ក្រៅពីឃុំខ្លួននោះ នៅថ្ងៃទី២៥ ខែមេសា ឆ្នាំ២០២៤ សាលាដំបូងខេត្តកំពត សម្រេចបង្កកគណនីធនាគារ និងគ្រឹះស្ថានមីក្រូហិរញ្ញវត្ថុរបស់ក្រុមហ៊ុន ជា សារ៉ន ចំនួន៩៥ គណនី រួមនឹងបង្កកអចលនវត្ថុប្រភេទដីធ្លីចំនួន ១.៧៩១ក្បាលដី។

ជុំវិញរឿងនេះ នាយកទទួលបន្ទុកកិច្ចការទូទៅនៃអង្គការលីកាដូ(Licadho) លោក អំ សំអាត យល់ថា រដ្ឋាភិបាលគួរផ្ដល់មេធាវីដល់ពួកគាត់ សម្រាប់ការពារតាមផ្លូវ ច្បាប់ ជាពិសេសពិនិត្យមើលទ្រព្យសម្បត្តិ និងធនធានដែលក្រុមហ៊ុន សារ៉ន មាន ដើម្បីលក់ឡាយឡុងដោះស្រាយសំណងជូនប្រជាពលរដ្ឋរងគ្រោះ។

លោក អំ សំអាត៖ «មិនមែនចាំបាច់តែទៅដល់ដោះលែង ដើម្បីធ្វើការដោះស្រាយទេ ដូចក្រុមហ៊ុនពិភពដីមាសអីជាដើម យើងឃើញថា មានការដោះលែងប៉ុន្តែអ្វីដែលជាដំណោះស្រាយនៅតែមិនទាន់ឃើញមាន។ ប៉ុន្តែ សំខាន់បំផុត អាជ្ញាធរពាក់ព័ន្ធក៏ដូចជាតុលាការត្រូវចាត់វិធានការ ទាំងអស់ហ្នឹង ហើយនឹងដោះស្រាយជូនប្រជាពលរដ្ឋឱ្យបានឆាប់។ អាហ្នឹងជារឿងមួយដែលចាំបាច់»។

ប្រជាពលរដ្ឋដែលដាក់លុយជាមួយក្រុមហ៊ុន ជា សារ៉ន លើកឡើងថា បើការដោះស្រាយ នៅតែអូសបន្លាយយូរទៀត ធនាគារចេះតែគុណការប្រាក់បន្ថែមរហូតនោះ ពួកគាត់មុខជាមិនមានលទ្ធភាពសងហើយអាចធនាគាររឹបអូសដីនិងផ្ទះរបស់ពួកគាត់៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

អត្ថបទពេញនិយម

RFA

ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ