ពលករ​ខ្មែរ​​ត្អូញពី​ទុក្ខ​លំបាក​​កាន់​​តែ​​ខ្លាំង​ខណៈ​ពួកគេ​បន្ត​ជាប់​​គាំង​​​នៅ​​តំបន់​​​ព្រំដែន​​ថៃ

ពលករ​ខ្មែរ​ដែល​កំពុង​ជាប់​គាំង​នៅ​​ព្រំដែន​​ជាប់​ស្រុក​ម៉ាឡៃ​ខេត្ត​បន្ទាយមានជ័យឱ្យដឹង​ថា ពួកគាត់​​​រស់​នៅ​ក្នុង​ព្រៃ​តំបន់​ព្រំដែន​ថៃ​​​តាម​យថាកម្ម​យ៉ាង​លំបាក​វេទនា ​​​​ហើយ​ប្រឈម​នឹង​សត្វ​សាហាវ​ខាំ​​ជា​រៀង​រាល់​យប់​។ ក្នុង​នោះ​មាន​ពលករ​ម្នាក់​ត្រូវ​ពស់​ខៀវ​ចឹក​​​ក្នុង​ពេល​គាត់​កំពុង​សម្រាន្ត​លក់​នៅ​យប់​ថ្ងៃ​​ទី​១១ ខែ​សីហា​ ហើយ​​អាជ្ញាធរ​ខ្មែរ​​បាន​​បញ្ជូន​ពលករ​រងគ្រោះ​រូប​នោះ ​​ទៅ​សង្គ្រោះ​បន្ទាន់​​នៅ​កម្ពុជា​ទាំង​យប់​។

​ពលករ​​មាន​ស្រុក​កំណើត​នៅ​​ខេត្ត​បន្ទាយមានជ័យ​លោក​ស្រី ​ប៉ុង ស៊ីម រៀបរាប់​ប្រាប់​វិទ្យុ​អាស៊ី​សេរី​ថា ស្ត្រី​រងគ្រោះ​នោះ​អាយុ​ជាង​៣០​ឆ្នាំ​​ ត្រូវ​បាន​ពស់​ខៀវ​ចឹក​​ចំ​ជើង​​ក្នុង​ពេល​គាត់​​សម្រាន្ត​លក់​នៅ​ក្នុង​​តង់​កៅស៊ូ​។ លោក​ស្រី​បន្ត​ថា ​​ភ្លាមៗ​​ក្រោយ​ពេល​កើត​ហេតុ​​លោក​ស្រី​និង​ពលករ​ដទៃ​ទៀត​​ភ័យ​ខ្លាច​​ ហើយ​នាំ​គ្នា​​ងើប​អង្គុយ​ទាំង​យប់​​ ដើម្បី​ការពារ​ខ្លួន ដោយ​​មិន​បាន​សម្រាន្ត​នោះ​ទេ។ ពលករ​វ័យ​ ៣៩ ​ឆ្នាំ​រូប​នេះ​ បន្ត​ថា លោក​ស្រី​​​​និង​​ពលករ​ខ្មែរ​ជាង ​៥០ ​នាក់ ដែល​កំពុង​ជាប់​គាំង​នៅ​​ក្នុង​ព្រៃ​នោះ​ គ្រោង​នាំ​គ្នា​​ធ្វើ​បាតុកម្ម​តវ៉ា​​​​ដោយ​សន្តិវិធី​​ដើរ​ត្រឡប់​ទៅ​កម្ពុជា​វិញ​នៅ​ថ្ងៃ​ទី​១៣ ខែ​សីហានេះ​ ដើម្បី​ទាមទារ​ឱ្យ​អាជ្ញាធរ​ខ្មែរ​បញ្ជូន​ពួកគាត់​ទៅ​ធ្វើ​ចត្តាឡឺស័ក​នៅ​ខាង​កម្ពុជា​វិញ។​ លោក​ស្រី​ប្រាប់​ថា ​​​​ពួក​លោកស្រី​មិន​អាច​ទ្រាំ​នៅ​​វេទនា​បែប​នេះ​បន្ត​ទៅទៀត​បាន​ទេ ពី​ព្រោះ​​ព្រួយបារម្ភ​​ខ្លាច​ឆ្លង​ជំងឺ​កូវីដ​-១៩​ផង​​និង​​ខ្លាច​ពស់​ចឹក​​​ផង៖ «ពួក​ខ្ញុំ​ថា ​បើ​សិន​បន្ត​ឱ្យ​នៅ​ទៀត​ ពួក​ខ្ញុំ​លី​ឥវ៉ាន់​ឆ្លង​ទៅ​ដី​ខ្មែរ​រក​ពេទ្យ​រក​សាលា​រៀន​​ទាំង​អស់​គ្នា​។ ​ព្រោះ​លំបាក​ភ្លើង​ក៏​អត់ ពេល​មេឃ​ភ្លៀង​មក​នាំ​គ្នា​អង្គុយ​​ ហើយ​ម្យ៉ាង​ទៀត​សត្វ​​យប់​ព្រលប់​ និយាយ​រួម​ មិន​ដូច​យើង​នៅ​ផ្ទះ​និង​សាលារៀន​ទេ​ គឺ​វេទនា​ខ្លាំង​។ បើ​យើង​នៅ​ផ្ទះ​យើង​មាន​បង្គន់​ មាន​ភ្លើង​មាន​ទឹក​អីចឹង​អត់​អី​ទេ​។​ ប៉ុន្តែ​អានេះ​យើង​នៅ​កណ្ដាល​ព្រៃ​ ល្ងឹត​ទាំង​អស់​ មើល​ដូច​ចែ​អី​យប់​មិញ​ដេក​ក្នុង​តង់ ពស់​មក​ចឹក​ក្រៅ​តង់​ធ្លុះ​ដល់​ក្នុង​ គិត​មើល​អីចឹង​​ »

Khmer_Worker_Lock_in_border_Thai_vs_Cambodia_12_08_2021_01.jpg
ពលករខ្មែរដែលជាប់គាំងនៅព្រំដែនកម្ពុជា-ថៃ ប្រឈមនឹងគ្រោះថ្នាក់ក្នុងពេលស្នាក់នៅក្នុងព្រៃដើម្បីរង់ចាំវិលត្រលប់មកកម្ពុជាវិញ។ (រូបថតដោយពលករខ្មែរនៅថ្ងៃទី១២ ខែសីហា ឆ្នាំ២០២១)

​​​​​​​​​​​​​ពលករ​ដែល​ជាប់​គាំង​នៅ​​តំបន់​ព្រំដែន​ថៃ​នោះ ​មាន​​ទាំង​កុមារ​​អាយុ​ក្រោម​ ១០ ​ឆ្នាំ​ និង​ស្ត្រី​មាន​ផ្ទៃ​ពោះ​ជា​ច្រើន​នាក់​។ ពួកគាត់​បាន​ជាប់​គាំង​​នៅ​ព្រំដែន​​ប្រទេស​ថៃ​ជាប់​ស្រុក​ម៉ាឡៃ​ជាង​ ១០ ​ថ្ងៃ​មក​ហើយ​ ប៉ុន្តែ​អាជ្ញាធរ​ខ្មែរ​មិន​ទាន់​បើក​ឱ្យ​​ពួកគេ​ចូល​​ទៅ​កម្ពុជា​នៅ​ឡើយ​ទេ។

​ពលករ​​​ម្នាក់ទៀតលោក ​ជា​ ស៊ីថា ​ថ្លែង​ថា លោក​អាណិត​ប្រពន្ធ​​យ៉ាង​ខ្លាំង ព្រោះ​​​គាត់​មាន​ផ្ទៃ​ពោះជាង ​៥ ​ខែ​ហើយ ​មិន​គួរណា​មក​ស្នាក់​នៅ​ក្នុង​ព្រៃ​​យ៉ាង​​វេទនា​បែប​​នេះ​ឡើយ​។ ពលករ​វ័យ ​២៦ ​ឆ្នាំ​រូប​នេះ ​​សំណូម​ឱ្យ​អាជ្ញាធរ​ខេត្ត​បន្ទាយមានជ័យ​​បញ្ជូន​គ្រួសារ​លោក​ត្រឡប់​​ទៅ​កម្ពុជា​វិញ​​ជា​បន្ទាន់​ ពី​ព្រោះ​ពួក​លោក​​ព្រួយបារម្ភ​ពី​សុវត្ថិភាព​ ជាពិសេស​ស្ថាន​ភាព​របស់​ប្រពន្ធ​លោក​​៖ «វេទនា​ណាស់​បង​អើយ​ ហើយ​យប់​មិញ​មក​ ៣ នាក់​ទៀត​ គ្មាន​អី​ហូប​ទេ​​លំបាក​ណាស់​។ វា​នៅ​ក្នុង​ហ្នឹង​មាន​មីន​មាន​អី​ មាន​សត្វ​មាន​ពិស​ខាំ​ ហើយ​អាហារ​ហូប​មិន​គ្រប់​គ្រាន់​ វា​ភ្លៀង​​អត់​មាន​អី​បាំង​បិទ​។​ ពេល​ភ្លៀង​ គឺ​​យើង​រត់​ចូល​ជុំ​គ្នា​ កន្លែង​ណា​ដែល​មាន​ហ្នឹង​គឺ​ផ្ដុំ​គ្នា​ តង់​មួយ​ផ្ដុំ​គ្នា​ចូល​​បាំង​ភ្លៀង​ គេ​ចង់​ឱ្យ​រក្សា​គម្លាត​ម៉េច​កើត​បើ​យើង​មាន​តង់​តែ​មួយ​​យើង​ចូល​ទៅ​ជុំ​គ្នា​ការពារ​ទឹក​ភ្លៀង​ »

​ក្រុម​ពលករ​ទាំង​នេះ​​បាន​រត់​​គេច​ពី​ការដ្ឋាន​សំណង់​នៅ​តំបន់​ទីក្រុង​បាងកក​ ត្រឡប់​ទៅ​​កម្ពុជា​វិញ​ជា​បន្តបន្ទាប់ ដោយ​សារ​ពួកគាត់​ព្រួយ​បារម្ភ​ខ្លាច​ឆ្លង​ជំងឺ​កូវីដ-​១៩ ​គ្មាន​គ្រូពេទ្យ​ព្យាបាល​ផង និង​គ្មាន​អាហារ​ហូបចុក​​​ក្នុង​គ្រាអាសន្ន​នេះ​ផង​។

រដ្ឋាភិបាល​លោក ហ៊ុន សែន បាន​ចេញ​សេចក្ដី​ប្រកាស​​នៅ​ថ្ងៃ​ទី​១១ ខែ​សីហា​ ដោយបន្ត​បិទ​ខ្ទប់​ខេត្ត​​ចំនួន​៨ ជាប់​​​ព្រំ​​ដែន​​​ប្រទេស​​​ថៃ​ រហូត​ដល់​ថ្ងៃ​ទី​១៩ ខែ​សីហា​ ដើម្បី​​​ទប់​​​ស្កាត់​​​ការ​​ឆ្លង​​​រាល​​ដាល​​​វីរុស​​​កូវីដ​-១៩ ​​បំប្លែង​​​ថ្មី​ឈ្មោះ​​​ដែលតា (Delta) ដែល​​​​កំពុង​​​​រាតត្បាត​​​កាន់​​​តែ​​​ច្រើន ជា​​ពិសេស​​​ក្នុង​​ចំណោម​​ពលករ​​​ចំណាក​​​ស្រុក​​​ដែល​​​វិល​​​ត្រឡប់​​​ពី​​​ប្រទេស​​​ថៃ។ ​វិធានការ​នេះ​បាន​ធ្វើ​ឱ្យ​ពលរដ្ឋ​ខ្មែរ​ជា​ច្រើន​នាក់បន្ត​ជាប់​គាំង​នៅ​តាម​បណ្តោយ​ព្រំដែនបន្ថែម​ទៀត។ ​រដ្ឋាភិបាល​បាន​បិទ​ខ្ទប់​​ព្រំដែន​នេះ​​អស់​រយៈ​ពេល ​១៤ ​ថ្ងៃ​ហើយ​ គិត​ត្រឹម​ថ្ងៃ​ទី​១២​ ខែសីហា។

ជា​មួយ​គ្នា​នេះ​អាជ្ញាធរ​ខេត្ត​បន្ទាយមានជ័យ​បាន​​ជូន​ដំណឹង​​ទៅ​អភិបាល​ខេត្ត​ស្រះកែវ​ប្រទេស​ថៃ​នៅ​ថ្ងៃ​ទី១២ ខែ​សីហា​ថា ​កម្ពុជា​នឹង​​បើក​​ព្រំដែនវិញ ​ចាប់​ពី​ម៉ោង​០០ ​រំលង​អាធ្រាត្រ​យប់​​​ថ្ងៃ​ទី​១២ ខែសីហា​ តទៅ​។​

Khmer_Worker_Lockdown_at_bolder_Khmer_Thai_02_08_2021.jpg
ពលករខ្មែរដែលជាប់គាំងនៅព្រំដែនកម្ពុជា-ថៃ ប្រឈមនឹងគ្រោះថ្នាក់ក្នុងពេលស្នាក់នៅក្នុងព្រៃដើម្បីរង់ចាំវិលត្រលប់មកកម្ពុជាវិញ។ (រូបថតដោយពលករខ្មែរនៅថ្ងៃទី២ ខែសីហា ឆ្នាំ២០២១)

​​​​​​​​​​​​​​ទាក់​ទង​នឹង​បញ្ហា​នេះ​ ​ស្នងការ​រង​នគរបាល​ខេត្ត​បន្ទាយមានជ័យ​​ទទួល​បន្ទុក​​ការពារ​ព្រំដែន​លោក​ អ៊ុំ សុផល​ ប្រាប់​វិទ្យុ​អាស៊ី​សេរី​​ថា ​មូលហេតុ​ដែល​​អាជ្ញាធរ​បន្ត​បិទ​ខ្ទប់​មិន​ឱ្យ​ពលករ​ទាំង​នោះ​​ចូល​កម្ពុជា​ ដោយសារ​លោក​​មិន​ទាន់​មាន​បញ្ជា​ពី​ថ្នាក់​លើ​បើក​ឱ្យ​ពលករ​ចូល​​ប្រទេស​នៅ​ឡើយ​ទេ​ គិត​ត្រឹម​រសៀល​ថ្ងៃ​ទី​១២ ខែ​សីហា​។ លោក​បន្ត​ថា នៅ​ព្រំដែន​ខេត្ត​បន្ទាយមានជ័យ​មាន​ពលករ​ខ្មែរ​​ដែល​ជាប់​គាំង​​នៅ​​ប្រទេស​ថៃ​ជាង ​២០០ ​នាក់​ប៉ុណ្ណោះ។ លោក​បញ្ជាក់​ថា ទោះ​ជា​រដ្ឋាភិបាល​បន្ត​បិទ​ព្រំដែន​ក៏ដោយ ក៏​អំឡុង​ពេល​បិទ​នេះ ​​​អាជ្ញាធរ​នឹង​បើក​​ច្រក​​ខ្លះ​​ដើម្បី​ដឹក​ជញ្ជូន​ពលករ​ដែល​ត្រឡប់​មក​ពី​ប្រទេស​ថៃ​​ទៅ​ធ្វើ​ចត្តាឡឺស័ក​​នៅ​​ខាង​ទឹក​ដី​កម្ពុជា​៖ «អីចឹង​តាម​ច្រក​មិន​ឱ្យ​ចូល​នេះ​ ឱ្យ​បិទ​ខ្ទប់​ ប៉ុន្តែ​ឱ្យ​ចូល​តាម​ច្រក​តំបន់​ ការ​ព្រមព្រៀង​គ្នា​ ដែល​​​បាន​ឯកភាព​បញ្ជូន​តាម​ផ្លូវ​ណា​ឱ្យ​បញ្ជូន​តាម​ផ្លូវ​ហ្នឹង​​មក​។ ​បើ​គាត់​មក​ខ្លួន​ឯង​​គាត់​មក​មិន​រួច​ទេ​ ទាល់​តែ​ថៃ​ចាប់​ ព្រោះ​ឥឡូវ​ប្រទេស​ថៃ​គេ​តឹង​ដូច​យើង​ដែរ​ »

វិទ្យុ​អាស៊ី​សេរី​មិន​អាច​ទាក់​ទង​មន្ត្រី​ស្ថានទូត​ខ្មែរ​ប្រចាំ​នៅ​ប្រទេស​ថៃ​ ដើម្បី​សុំ​អត្ថាធិប្បាយ​បន្ថែម​ជុំ​វិញ​ពី​ក្ដី​កង្វល់​របស់​ពលករ​​នេះ​បាន​ទេ​នៅ​ថ្ងៃ​ទី​១២ ខែ​សីហា។

​ទោះ​ជា​យ៉ាង​ណា​មន្ត្រី​សម្របសម្រួល​សមាគម​ការពារ​សិទ្ធិមនុស្ស​អាដហុក​(Adhoc)​ខេត្ត​បន្ទាយមានជ័យ​លោក​ ស៊ុំ ច័ន្ទគា​ ជំរុញ​ឱ្យ​អាជ្ញាធរ​គួរតែ​​​បញ្ជូន​ពលករ​​​ចូល​មក​កម្ពុជា​ឱ្យ​បាន​ឆាប់ ដើម្បី​សុវត្ថិភាពរបស់ពួកគាត់​។ ​​លោកបញ្ជាក់​ថា ​​​​នៅ​ពេល​មាន​ភ្លៀង​ម្ដង​ៗ ក្រុម​ពលក​ច្រើន​តែប្រមូល​គ្នា​ជ្រក​ក្នុង​តង់​កៅស៊ូ​កកកុញ​​ ដែល​ងាយ​នឹង​ឆ្លង​ជំងឺ​កូវីដ​-១៩​។ បន្ថែម​ពី​នេះលោក​ថា ​​ពួកគាត់​ហូប​អាហារ​ក្រៀមក្រោះ​​យូរ​​ពេក​ធ្វើ​ឱ្យ​សុខភាព​​ទ្រុឌទ្រោម ហើយ​ងាយ​ប្រឈម​​នឹង​​ឆ្លង​ជំងឺ​ផ្សេង​ៗ​ទៀត​៖ «ព្រោះ​មនុស្ស​ដែល​ញាំ​របស់​ទាំង​នោះ​វា​​មិន​អាច​ជួយ​ដល់​សរីរាង្គ​បាន​គ្រប់​គ្រាន់​ទេ​ ពីព្រោះ​ញាំ​ម្ហូប​ដដែល​ៗ​​ធុញ​ហើយ​។ ​អីចឹង​ហើយ​ ​ពួកគាត់​ទាំង​ធុញ​ម្ហូប​ផង​ ទាំង​ការ​រស់​​ផង​ វា​ប៉ះពាល់​​ទៅ​លើ​ផ្លូវ​ចិត្ត​គាត់​យ៉ាង​ខ្លាំង​ហើយ​។​ អីចឹង​ហើយ​ ​បើ​គាត់​ឆ្លង​ដែន​អី​​អាជ្ញាធរ​គួរ​តែ​ជួយ​សម្រួល​​ដល់​ពួកគាត់​ ដើម្បី​ឱ្យ​ពួកគាត់​ហ្នឹង​បាន​រស់​នៅ​កន្លែង​សមរម្យ​ មាន​កន្លែង​ព្យាបាល​អី​ត្រឹមត្រូវ​មាន​ការ​​ដេក​ពួន​ធ្វើ​ចត្តាឡឺស័ក​ឱ្យ​បាន​ត្រឹមត្រូវ​ជា​ការ​ប្រសើរ​ »

Khmer_Worker_Lockdown_at_bolder_Khmer_Thai_02_08_2021_02.jpg
ពលករខ្មែរដែលជាប់គាំងនៅព្រំដែនកម្ពុជា-ថៃ ប្រឈមនឹងគ្រោះថ្នាក់ក្នុងពេលស្នាក់នៅក្នុងព្រៃដើម្បីរង់ចាំវិលត្រលប់មកកម្ពុជាវិញ។ (រូបថតដោយពលករខ្មែរនៅថ្ងៃទី២ ខែសីហា ឆ្នាំ២០២១)

​​​​​របាយ​ការណ៍​​របស់​​អាជ្ញាធរ​ថៃ បង្ហាញ​​ថា ​​​ចាប់​​ពី​​​​ចុង​​ខែ​​មីនា ​ដល់​​ថ្ងៃ​​ទី​៥ ខែ​សីហា​​​​មាន​​ពលករ​​ខ្មែរ​​ជាង​​មួយ​​ម៉ឺន​(១៤.១៩៤)​នាក់​​​ហើយ​ឆ្លង​​ជំងឺ​​កូវីដ-​១៩។ ​ក្នុង​នោះ​​យ៉ាង​​ហោច​​ណាស់​​​មាន​​ពលករ​​ខ្មែរ​​ចំនួន​​ ​២ ​នាក់​​​ ស្លាប់​​​​កាល​​ពី​​​​ខែ​​មេសា និង​​ខែ​​ឧសភា ស្រប​​ពលករ​​​​ឆ្លង​​ជំងឺ​​កូវីដ​​-១៩ ​​ជា​​ច្រើន​​ទៀត កំពុង​​​ព្យាបាល​​ក្នុង​ការ​ដ្ឋាន​​សំណង់ និង​​បន្ទប់​​ជួល​​​តាម​​​យថា​កម្ម​​​​​រៀងៗ​​ខ្លួន​។ ដោយ​សារ​តែបែបនេះហើយ ទើបពលករខ្មែរជាច្រើន​នាក់​នាំគ្នា​ប្រថុយ​ធ្វើដំណើរ​មក​កម្ពុជាវិញ ហើយ​ក៏​ជាប់​គាំង​នៅតំបន់​ព្រំដែន។

មន្ត្រីសិទ្ធិមនុស្ស លោក​ ស៊ុំ ច័ន្ធគា​ ​ជឿ​ថា អំឡុង​ពេល​នេះ​​មាន​ពលករ​ខ្មែរ​​រាប់​ពាន់​នាក់​កំពុង​ជាប់​គាំង​​នៅ​ព្រំដែន​ប្រទេស​ថៃ ហើយ​ពួកគាត់​​ភាគ​ច្រើន​រស់​នៅដោយ​លំបាក​វេទនា។ លោក​ស្នើយ៉ាង​ទទូច​ដល់​អាជ្ញាធរ​កម្ពុជា​ឱ្យគិតគូរពីសុខទុក្ខ និង​ដោះស្រាយ​បញ្ហា​ប្រឈម​​របស់ពលករនៅក្នុងស្ថាន​ភាព​ដ៏​លំបាក​នេះ៕​​​

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។