ពលរដ្ឋ​​មួយ​ចំនួន​រិះ​គន់​ ក្រសួង​អភិវឌ្ឍន៍​ជនបទ​ថា ​មិន​សូវ​យក​ចិត្ត​ទុក​ដាក់​ដល់​កសិករ​

ដោយ អូន ភាព
2020-02-17
អ៊ីម៉ែល
មតិ
Share
បោះពុម្ព

ប្រជាពលរដ្ឋ​នៅ​ខេត្ត​មួយ​ចំនួន​ រិះ​គន់​​​ក្រសួង​អភិវឌ្ឍន៍​ជនបទ​ថា ​មិន​សូវ​យក​ចិត្ត​ទុក​ដាក់​ជួយ​ដល់​កសិករ​នៅ​ទី​ជនបទ ដើម្បី​​ឱ្យ​មាន​ជីវភាព​ធូរធារ​ឡើយ។ ការ​លើក​នេះ​ បន្ទាប់​ពី​មន្ត្រី​ក្រសួង​នេះ បាន​អះអាង​អំពី​សមិទ្ធផល​របស់​ខ្លួន​ជា​ច្រើន​​ដែល​បាន​អភិវឌ្ឍន៍​នៅ​ទី​ជនបទ​ និង​ធ្វើ​ឱ្យ​ជីវភាព​ប្រជាពលរដ្ឋ​ប្រសើរ​ឡើង។

ប្រជាពលរដ្ឋ​លើក​ឡើង​ស្រដៀង​គ្នា​ថា ក្រសួង​អភិវឌ្ឍន៍​ជនបទ​បង្ហាញ​តែ​តួលេខ​នៅ​លើ​ក្រដាស ប៉ុន្តែ​ការ​អនុវត្ត​ជាក់​ស្ដែង​មិន​ដូច្នេះ​ឡើយ។

ពលរដ្ឋ​ម្នាក់​រស់​នៅ​ឃុំ​ព្រះផុស ស្រុក​គាស់ក្រឡ ខេត្ត​បាត់ដំបង លោក ស៊ឹប គួ ថ្លែង​នៅ​ថ្ងៃ​ទី​១៧ ​កុម្ភៈ​ថា ក្នុង​ឃុំ​ដែល​លោក​រស់​នៅ​ជួប​ការ​​​លំបាក​ខ្លាំង​ទាំង​រដូវប្រាំង​នឹង​រដូវវស្សា ដោយសារ​ពុំ​មាន​ការ​អភិវឌ្ឍន៍​ណា​មួយ​ឡើយ​ ជា​ពិសេស​ផ្លូវ​ដី​ហុយ​និង​​មាន​ភក់​ពិបាក​ធ្វើ​ដំណើរ​នៅ​រដូវវស្សា ហើយ​គ្មាន​ទឹក​ប្រើប្រាស់​នៅ​រដូវប្រាំង៖ «បាទ! ទាល់​តែ​ប្រជាពលរដ្ឋ​បាន​ដឹង​ទុក្ខធុរៈ​ហ្នឹង​តាម​ការ​ពិត​អាជ្ញាធរ​ខ្លះ គាត់​លើក​ជា​បញ្ហា​ស្រួល​ៗ​ ខ្ញុំ​មើល​ទៅ​មិន​មាន​យុត្តិធម៌​ទេ​។មិន​​មាន​យុត្តិធម៌​ត្រង់​ថា គាត់​រាយការណ៍​ថា​ គាត់​អភិវឌ្ឍន៍​គាត់​ធ្វើ​ ប៉ុន្តែ​ការ​ធ្វើ​ហ្នឹង​បាន​ប្រហែល​តែ​៣០​ភាគ​រយ​អី​ទេ​។ព្រោះ​នៅ​ក្នុង​ភូមិ​តានួត​ដែល​ខ្ញុំ​រស់​នៅ​ហ្នឹង​គឺ​អត់​មាន​គ្រួស ក្រហម​សោះ​តែ​ម្ដង​​ គឺ​មាន​តែ​​ផ្លូវ​ដី​ស​ធម្មតា​ទេ»

ចំណែក​កសិករ​ម្នាក់​រស់​នៅ​ស្រុក​បារាយ​ខេត្ត​កំពង់ធំ ថ្លែង​សុំ​មិន​ឱ្យ​បញ្ចេញ​ឈ្មោះ​ ដើម្បី​ការពារ​សុវត្ថិភាព​ថា ពលរដ្ឋ​ក្នុង​មូលដ្ឋាន​ស្រុក​បារាយណ៍​បោះបង់​ការ​ធ្វើ​ស្រែ​បណ្ដើរ​ៗ​ហើយ ដោយសារ​តម្លៃ​ស្រូវ​ចុះ​ថោក ហើយ​គ្មាន​អាជ្ញាធរ​ណា​អើពើ​ជួយ​ដល់​ពួកគាត់​ឡើយ​។ កសិករ​រូប​នេះ​បន្ថែម​ថា លោក​ស្រី​ធ្វើ​ស្រែ​​ ២០​ហិកតារ បាន​ផល​គួរ​សម​ដែរ ប៉ុន្តែ​លក់​មិន​បាន​ប្រាក់​កម្រៃ​ដោះស្រាយ​ជីវភាព​គ្រួសារ​ឡើយ​ ព្រោះ​តម្លៃ​ស្រូវ​ចុះ​ថោក​ ដោយ​ស្រូវ​សែន​ក្រអូប​ តម្លៃ​ ៨០០​រៀល​ក្នុង​មួយ​គីឡូក្រាម​។លោក​ស្រី​បញ្ជាក់​ទៀត​ថា ប្រជាពលរដ្ឋ​ក្នុង​មូលដ្ឋាន​ចង់​នាំ​គ្នា​តវ៉ា ឱ្យ​ប្ដូរ​មេ​ដឹក​នាំ​ថ្មី ដើម្បី​អភិវឌ្ឍន៍​ប្រទេស​រីក​ចំរើន​ជាង​ពេល​បច្ចុប្បន្ន​ដែរ ប៉ុន្តែ​មិន​អាច​ជួប​ប្រជុំ​គ្នា​​សម្ដែង​មតិ​បាន៖ «គេ​ថា ជួយៗ ប៉ុន្តែ​ ដឹង​ជួយ​របៀប​ម៉េច​ទេ​បើ​របស់​ធ្វើ​បាន​អីចឹង​អត់​មាន​ហាងឆេង​ផង​ គេ​ដឹង​ជួយ​ដោះ​ស្រាយ​អីចឹង​។គេ​ស្រេច​តែ​មាត់​គេ​ថា​ យើង​ក្រីក្រ​ដឹង​ទៅ​ហ៊ាន​និយាយ​ណា​បាន​ ហើយ​អង្ករ​ទីផ្សារ​ដូច​អាច​ទទួល​យក​បាន​តម្លៃ​ ដល់​ពេល​ស្រូវ​ដូច​ថា​សម្លាប់​ប្រជាជន​ ដឹង​ថា​រើ បម្រាស់​ទៅ​ណា​ទេ​​ ម្នាក់​ៗ ​ចេះ​​តែ​​សម្ងំ​ត្អូញ​ទ្រាំ​រស់​ទៅ»

ប្រតិកម្ម​របស់​ប្រជាពលរដ្ឋ​នេះ បន្ទាប់​ពី​មន្ត្រី​នៃ​ក្រសួង​អភិវឌ្ឍន៍​ជនបទ ​បង្ហាញ​របាយការណ៍​ពី​ការ​អភិវឌ្ឍន៍​របស់​ខ្លួន​នា​ពេល​កន្លង​ទៅ​ថា ​ក្រសួង​​នេះ​បាន​ធ្វើ​ផ្លូវ​ថ្នល់​បណ្ដុះបណ្ដាល​ប្រជាពលរដ្ឋ​ឱ្យ​មាន​ជំនាញ​​ជា​ច្រើន​មុខ​ ដើម្បី​ប្រកប​មុខ​របរ​រក​ប្រាក់​ចំណូល​ក្នុង​គ្រួសារ​ ហើយ​ធ្វើ​ប្រឡាយ​ទឹក និង ​សំណង់​ជា​ច្រើន​ទៀត ដែល​ធ្វើ​ឱ្យ​ប្រជាពលរដ្ឋ​មាន​ជីវភាព​ប្រសើរ​ឡើង។

អ្នក​នាំ​ពាក្យ​ក្រសួង​អភិវឌ្ឍន៍​ជនបទ​ លោក ចាន់ ដារ៉ុង ​បាន​ថ្លែង​នៅ​ក្នុង​សន្និសីទ​សារព័ត៌មាន​ស្តីពី«បច្ចុប្បន្នភាព និង​វឌ្ឍនភាព​ក្រសួង​អភិវឌ្ឍន៍​ជនបទ» នៅ​ទីស្ដីការ​គណៈរដ្ឋមន្ត្រី នៅ​ព្រឹក​ថ្ងៃ​ទី១៧ កុម្ភៈ​ថា ក្រសួង​មួយ​នេះ​នឹង​​បន្ត​ការងារ​​យុទ្ធសាស្ត្រ​ចតុកោណ​ដំណាក់​កាល​ទី​៤​រដ្ឋាភិបាល ឱ្យ​កាន់​តែ​សកម្ម​បន្ថែម​ទៀត ​ដើម្បី​​រួម​ចំណែក​សម្រេច​បាន​កំណើន​សេដ្ឋកិច្ច​​៧ភាគរយ​នៅ និង​ការ​កាត់​បន្ថយ​ភាព​ក្រីក្រ​​ឱ្យ​ស្ថិត​នៅ​ក្រោម​១០​ភាគរយ​ទៀត​ផង៖ «អីចឹង​យើង​ពិនិត្យ​ឃើញ​ថា​ជា​រួម​ជីវភាព​បងប្អូន​ប្រជាពលរដ្ឋ​នៅ​ជនបទ​ មាន​ការ​កើន​ឡើង​ ហើយ​ដោយសារ​ផ្លូវ​ថ្នល់​របស់​យើង​ធ្វើ​បាន​ច្រើន​ គឺ​ងាយ​ស្រួល​ក្នុង​ការ​ធ្វើ​ដំណើរ​ជិះ​ម៉ូតូ ឬ​ក៏​បើ​ត្រាក់ទ័រ​បើក​គោយន្ត​ទៅ​កាន់​ស្រែ​ចំការ​របស់​គាត់​​ ដោយសារ​តែ​ផ្លូវ​ថ្នល់​របស់​យើង​មាន​ការ​កែលំអ​ច្រើន​។ទោះ​បី​ថា​មិន​មាន​ផ្លូវ​កៅស៊ូ ផ្លូវ​បេតុង​ក្ដី​​ក៏​យើង​មាន​ផ្លូវ​គ្រួស​ក្រហម​និង​មាន​ផ្លូវ​កម្រាល​ផ្សេង​ៗ​ទៀត​ ដែល​ធ្វើ​គាត់​ងាយ​ស្រួល​ក្នុង​ការ​ប្រើប្រាស់​នូវ​យានយន្ត​ទាំង​អស់​នោះ»

ផ្ទុយ​ពី​ការ​លើក​នេះ​ ប្រធាន​សម្ព័ន្ធ​សហគមន៍​កសិករ​កម្ពុជា លោក ថេង សាវឿន មាន​ប្រសាសន៍​ថា ការ​អភិវឌ្ឍន៍​ផ្លូវ​ថ្នល់ ប្រព័ន្ធ​ធារាសាស្ត្រ​ របស់​ក្រសួង​អភិវឌ្ឍន៍​ជនបទ​ មា​តែ​តួលេខ​ ប៉ុន្តែ​ការអនុវត្ត​ជាក់​ស្ដែង​មាន​តិចតួច​ ម្យ៉ាង​ទៀត​ការ​សាងសង់​យឺតយ៉ាវ និង​មិន​មាន​ស្តង់ដារ​នោះ​ទេ។លោក​បន្ត​ថា ប្រជាកសិករ​នៅ​ទី​ជនបទ ភាគ​ច្រើន​​ដាំដុះ​ពឹងផ្អែក​ទៅ​លើ​ចំណេះ​ដឹង​ពី​ធម្មជាតិ ខ្វះ​ការ​យក​បង្ហាត់​បង្រៀន​ពី​ក្រសួង​ពាក់ព័ន្ធ និង​គ្មាន​ទីផ្សារ​លក់​កសិផល​ដែល​មាន​តម្លៃ​សមរម្យ​ជា​ដើម៖ «ហើយ​មួយ​វិញ​ទៀត​ខ្ញុំ​មើល​ថា​ ​ប្រជាពលរដ្ឋ​នៅ​តែ​ខ្វះខាត​ទឹក​ ដែល​ជា​បញ្ហា​មួយ​ដែល​មាន​ទឹក​តែ​ក្នុង​រដូវវស្សា ដោយសារ​តែ​អំណោយ​ផល​ពី​ធម្មជាតិ។ប៉ុន្តែ​ចាប់​ពី​ខែ​វិច្ឆិកា​រហូត​មក​ដល់​បច្ចុប្បន្ន​នេះ​គឺ ថា​ទឹក​អត់​មាន​សម្រាប់​ពលរដ្ឋ​ស្រោចស្រព​ទេ ហើយ​តំបន់​មួយ​ចំនួន​ដែល​យើង​ទទួល​បាន​​ព័ត៌មាន​ហ្នឹង​គឺ​ថា​ទឹក​ស្ទើរ​តែ​មិន​មាន​ឱ្យ​គោក្របី​ផឹក​ទៅ​ទៀត​ ឥឡូវ​នេះ​ចាប់​ផ្ដើម​ហើយ»

លោក​បន្ត​ថា ​ក្រសួង​អភិវឌ្ឍន៍​​ជនបទ​​ក៏​មិន​ទាន់​អភិវឌ្ឍន៍​បាន​គ្រប់​ទីកន្លែង ​ដែល​ប្រជាពលរដ្ឋ​​ជួបការ​លំបាក ដោយ​តំបន់​ខ្លះ​ ពលរដ្ឋ​នៅ​តែ​​គ្មាន​ផ្លូវ​​ធ្វើ​ដំណើរ​​ឱ្យ​បាន​សមរម្យ​ និង​គ្មាន​ទឹក​​ស្រោចស្រព​​​ផល​ដំណាំ​​ជា​ដើម។ មន្ត្រី​សង្គម​ស៊ីវិល​រូប​នេះ ​ជំរុញ​ឱ្យ​ក្រសួង​មួយ​នេះ គួរ​សហការ​ជាមួយ​អាជ្ញាធរ​ពាក់​ព័ន្ធ​បន្ថែម​ទៀត​ ចុះ​មូលដ្ឋាន​ឱ្យ​បាន​ច្រើន ដើម្បី​ប្រមូល​ព័ត៌មាន​ពិត អំពី​ការ​អត់​ឃ្លាន​របស់​ពលរដ្ឋ ជា​ពិសេស នៅ​តំបន់​ជនបទ​ដែល​ពលរដ្ឋ​ខ្វះ​ទឹក​ប្រើប្រាស់ ហើយ​នាំ​យក​បញ្ហា​ទាំង​នោះ​ដោះស្រាយ​ឱ្យ​បាន​ឆាប់ និង​ឱ្យ​ត្រូវ​តាម​ការ​ចង់​បាន​របស់​អ្នក​ស្រុក។លោក ថេង សាវឿន បន្ថែម​ថា ការ​សង់​ប្រឡាយ​ទឹក​ឱ្យ​បាន​ច្រើន​ជា​រឿង​សំខាន់​របស់​កសិករ ព្រោះ​ធ្វើ​ឱ្យ​ពួកគាត់​អាច​ដាំដុះ​រក​ប្រាក់​ចំណូល​បាន​គ្រប់​រដូវ។ លោក​ថា ប្រសិន​បើ​រដ្ឋាភិបាល​មិន​បាន​ដោះស្រាយ​បញ្ហា​ទាំង​អស់​នេះ​ទេ នឹង​ធ្វើ​ឱ្យ​ជីវភាព​របស់​ប្រជាពលរដ្ឋ​កាន់​តែ​ក្រីក្រ ហើយ​នាំ​គ្នា​ធ្វើ​ចំណាក​ស្រុក​កាន់​តែ​ច្រើន ដើម្បី​រក​ប្រាក់​ដោះ​ស្រាយ​ជីវភាព​គ្រួសារ៕
កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល