ពលរដ្ឋមួយចំនួនបារម្ភថា ក្បួនរថយន្តរាប់រយគ្រឿងរបស់ Gumball 3000 បង្កឱ្យញ័ររញ្ជួយគ្រឹះប្រាសាទ
2024.09.18
ក្បួនរថយន្តរាប់រយគ្រឿងក្នុងព្រឹត្តិការណ៍ Gumball 3000 បើកកាត់ខ្លោងទ្វារប្រាសាទបាយ័ន កាលពីថ្ងៃទី១៦ ខែកញ្ញា ឆ្នាំ២០២៤។
រូប៖ ក្រសួងទេសចរណ៍
ពលរដ្ឋមួយចំនួន បារម្ភថា ក្បួនរថយន្តរាប់រយគ្រឿងក្នុងព្រឹត្តិការណ៍ Gumball 3000 អាចនឹងបង្កឱ្យញ័រប៉ះពាល់ដល់គ្រឹះប្រាសាទអង្គរវត្ត។ ការលើកឡើងនេះ ធ្វើឡើងបន្ទាប់ពីព្រឹត្តិការណ៍ជួបជុំរថយន្តកម្រិតអន្តរជាតិ Gumball 3000 ប្រមូលផ្ដុំនូវរថយន្តសេរីទំនើប ដែលមានកម្លាំងម៉ាស៊ីនធំៗ ជាង ១រយគ្រឿងនៅតំបន់អង្គរ។
អ្នករត់ម៉ូតូកង់បីក្រុងសៀមរាប លោក ឆាយ រ័ត្ន ប្រាប់វិទ្យុអាស៊ីសេរី កាលពីថ្ងៃទី១៧ ខែកញ្ញាថា ក្នុងរយៈពេល ២ថ្ងៃ គឺនៅថ្ងៃទី១៦ និងថ្ងៃទី១៧ នៅតំបន់អង្គរវត្ត មានការកកស្ទះចរាចរណ៍ ដោយសារតែអាជ្ញាធរបិទផ្លូវមួយចំនួនក្នុងតំបន់នោះ។ លោកឲ្យដឹងថា បើទោះជាមានក្បួនរថយន្តរាប់រយគ្រឿងមកទស្សនានៅតំបន់អង្គរវត្ត ក៏ប៉ុន្តែពលរដ្ឋអ្នកមូលដ្ឋាន ដូចជា អ្នករត់ម៉ូតូកង់បីជាដើម បែរជាពុំសូវមានភ្ញៀវដឹកឡើយ។ អ្នករត់ម៉ូតូកង់បីរូបនេះបារម្ភថា ក្បួនរថយន្តទំនើប ដែលមានម៉ាស៊ីនធំៗ និងការប្រើប្រាស់ឧបករណ៍បំពងសំឡេងធំៗ អាចបង្កឱ្យញ័ររញ្ជួយប៉ះពាល់ដល់ប្រាង្គប្រាសាទ។
លោក ឆាយ រ័ត្ន៖ «បាទ! ជាក់ស្ដែង បើតាមអ្វី ដែលខ្ញុំគិតមើលទៅ វាអាចនឹងប៉ះពាល់ដែរ ដោយសារសំឡេងម៉ាស៊ីន សំឡេងខ្លាំងៗ អាចខ្ទ័រដល់ថ្មប្រាសាទអាចប៉ះពាល់ដែរ ប៉ុន្តែ គ្រាន់តែថា បើកម្មវិធីគេរៀបចំអ៊ីចឹងហើយ គឺមិនដឹងថា គេគិតបែបណាទេ។ តាមអ្វីដែលប្រជាជនមើលឃើញដូចខ្ញុំផ្ទាល់មើលឃើញ គឺអាចមើលឃើញព្រោះគ្រឿងម៉ាស៊ីនឮសន្ធឹកខ្លាំងៗ ជាពិសេសការចាក់ធុងបាស»។
សកម្មជនបរិស្ថាន អ្នកនាងលឹម គឹមស័រ ដែលធ្លាប់ធ្វើការជាមួយពលរដ្ឋនៅតំបន់ ដែលរងការបណ្ដេញចេញពីតំបន់អង្គរ លើកឡើងថា ទិសដៅភ្ញៀវទេសចរណ៍ ដែលមកលេងនៅកម្ពុជា គឺមិនត្រឹមតែទស្សនាប្រាង្គប្រាសាទតែប៉ុណ្ណឹងទេ គឺពួកគាត់ក៏ចង់ដឹងពីរបៀបរស់នៅរបស់ពលរដ្ឋនៅតំបន់អង្គរផងដែរ។
អ្នកនាង លឹម គឹមស័រ៖ «តែយ៉ាងណាយើងក៏ចំណេញតិចតួចដែរ ត្រង់ថា ក្រុមអ្នកដែលគេធ្វើយូធូប (YouTube) ឬក៏អ្នកធ្វើមាតិកា (Content) ល្បីៗ មក គឺធ្វើឲ្យផ្អើលឲ្យល្បីខាងខ្មែរច្រើនវាជារឿងដែលល្អ ប៉ុន្តែយើងមិនមែនចង់បានតែប៉ុណ្ណឹងទេ យើងចង់ឲ្យក្រសួងរៀបចំការលក់ដូរ ការរស់នៅជូនដល់ប្រជាពលរដ្ឋដើម្បីឲ្យពួកគាត់មានមុខរបរមានចំណូល អាហ្នឹងបានហៅថា ជួយប្រជាជនពិតប្រាកដ។ បើសិនជានាំតែគេមក ឲ្យតែគេស្គាល់ ប៉ុន្តែចំណូលបានទៅតែក្រុមអ្នកមានអូតែល អ្នកមានផ្ទះស្នាក់ធំៗ អត់បានដល់ប្រជាជនខ្មែរយើងដដែលៗ អីចឹងវាអត់មានន័យអ្វីទេ សម្រាប់ប្រជាជនយើង»។
ការលើកឡើងនេះ ធ្វើឡើងបន្ទាប់រថយន្តសេរីទំនើបៗ ដែលមានកម្លាំងម៉ាស៊ីនធំៗ ជាង ១រយគ្រឿង បានធ្វើដំណើរឆ្លងកាត់ខ្លោងទ្វាទន្លេអុំ ស្ថិតនៅទិសខាងត្បូង នៃប្រាសាទអង្គរវត្ត និងបានឈប់បន្តកន្ទុយគ្នានៅមាត់ជណ្ដើរប្រាសាទអង្គរវត្ត ក្នុងខេត្តសៀមរាប កាលពីថ្ងៃទី១៦ និងទី១៧ ខែកញ្ញា។ ក្រៅពីនេះ ក្រសួងទេសចរណ៍ និងអ្នករៀបចំកម្មវិធី ក៏បានរៀបចំជប់លៀង ដោយមានការប្រគំតន្ត្រីលាន់ឮ នៅក្នុងតំបន់បេតិកភណ្ឌផងដែរ។
វិទ្យុអាស៊ីសេរី នៅមិនទាន់អាចទាក់ទងអ្នកនាំពាក្យអាជ្ញាធរជាតិអប្សរា លោក ឡុង កុសល និងអ្នកនាំពាក្យក្រសួងទេសចរណ៍លោក តុប សុភ័គ ដើម្បីសុំការបកស្រាយជុំវិញបញ្ហានេះបាននៅឡើយទេ នៅថ្ងៃទី១៧ ខែកញ្ញា។
កាលពីពេលកន្លងទៅ អាជ្ញាធរជាតិអប្សរា ធ្លាប់ហាមមិនឲ្យយានយន្តឆ្លងកាត់មុខប្រាសាទអង្គរវត្តឡើយ ក្រោមហេតុផល ៣យ៉ាង គឺបញ្ហាកកស្ទះចរាចរណ៍ បញ្ហាយានយន្តចតគ្មានសណ្ដាប់ធ្នាប់បណ្ដាលឲ្យខូចសោភណភាព និងបញ្ហារថយន្តដឹកភ្ញៀវទេសចរខ្លះ បានចតដាក់ភ្ញៀវជិតប្រាសាទ ធ្វើឲ្យញ័ររញ្ជួយដល់ប្រាង្គប្រាសាទអង្គរវត្ត ។
អ្នកសិក្សាផ្នែកវិស្វកម្មសំណង់ស៊ីវិលម្នាក់ ប្រាប់វិទ្យុអាស៊ីសេរី ក្នុងលក្ខខណ្ឌសុំមិនបញ្ចេញឈ្មោះថា ការសាងសង់ផ្លូវថ្នល់នាសម័យអង្គរ គឺដូនតាខ្មែរ ធ្វើឡើងសម្រាប់ប្រើប្រាស់ក្នុងជីវភាពប្រចាំថ្ងៃ ដូចជា ថ្មើរជើង ឬការជិះរទេះប៉ុណ្ណោះ។ លោកថា ផ្លូវថ្នល់ ដែលនៅជាប់ប្រាង្គប្រាសាទទាំងនេះ អាចនឹងរងនឹងកម្លាំងញ័រ ហើយអាយុកាលនៃសំណង់ ក៏នឹងកាត់បន្ថយដែរ។
ប្រភពសុំមិនបញ្ចេញឈ្មោះ៖ «ប្រាសាទហ្នឹង យើងដឹងតែស្រុតហើយ បើវារងរំញ័រដែរ ហើយដីប្រាសាទគេមិនមានធ្វើគ្រឹះមកពីណា ដោយគ្រាន់យកបន្តុបលើគ្នាឲ្យជាប់»។
ព្រឹត្តិការណ៍ជួបជុំឡានអន្តរជាតិ ហ្គាំបល ៣០០០ លើកទី២៥ (2024 Gumball 3000 Rally) ធ្វើឡើងនៅតំបន់អាស៊ី ដែលចេញដំណើរពីប្រទេសវៀតណាម (Vietnam) ឆ្លងកាត់រាជធានីភ្នំពេញ និងខេត្តសៀមរាប ហើយបន្តដំណើរទៅប្រទេសថៃ (Thailand) រួចឆ្ពោះទៅប្រទេសម៉ាឡេស៊ី (Malaysia) ហើយគោលដៅចុងក្រោយនៅប្រទេសសិង្ហបុរី (Singapore) ក្នុងរយៈពេល ៨ថ្ងៃ ចាប់ពីថ្ងៃទី១៤ ដល់ថ្ងៃទី២២ ខែកញ្ញា។ ក្បួនរថយន្តទាំងនេះ បានឆ្លងកាត់ប្រទេសកម្ពុជា (Gumball 3000 Rally in Cambodia) កាលពីថ្ងៃទី១៥ ដល់ថ្ងៃទី១៧ ខែកញ្ញា។
គេសង្កេតឃើញភាគច្រើននៃអ្នកចូលរួមព្រឹត្តិការណ៍ ហ្គាំបល ៣០០០ គឺជាជនជាតិខ្មែរ ហើយមានជនបរទេសតិចតួចប៉ុណ្ណោះ ដែលក្នុងនោះមានកីឡាករ សហគ្រិន តារាល្បីៗ និងអ្នកមានឥទ្ធិពល (influencers) លើពិភពលោក ។
ចំណែកកូនចៅអ្នកមានលុយមានអំណាចនៅកម្ពុជាវិញ បានប្រមូលផ្ដុំរថយន្តទំនើបៗ ជាង ១រយគ្រឿង នៅទីក្រុងភ្នំពេញ កាលពីថ្ងៃទី១៦ ខែកញ្ញា ដើម្បីចូលរួមកម្មវិធីនេះ។ ប៉ុន្តែរថយន្តមួយចំនួន ដែលយកមកចូលរួមនេះ មិនបំពាក់ស្លាកលេខឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ក្រសួងមហាផ្ទៃបញ្ជាក់ថា កូនមន្ត្រីជាន់ខ្ពស់ ដែលបើកឡានបុកមនុស្សស្លាប់ពីរនាក់ នៅអូស្ត្រាលីនោះ គឺឈ្មោះ ឌឿន ឧត្ដមសេនីយ៍
- ក្រុមប្រឹក្សាអភិវឌ្ឍន៍កម្ពុជាគ្រោងធ្វើបេសកកម្មដើរគោះទ្វាររកវិនិយោគិននៅអាមេរិកជាថ្មី
- លោក ហ៊ុន សែន បង្កើនការគំរាមកំហែងឆ្លងដែនលើអ្នករិះគន់
- លោក ហ៊ុន ម៉ាណែត ប្រតិកម្មអ្នករិះគន់ព្រឹត្តិការណ៍ Gumball 3000
- សមត្ថកិច្ចម៉ាឡេស៊ីចាប់ពលករខ្មែរម្នាក់ពាក់ព័ន្ធរិះគន់រដ្ឋាភិបាលកម្ពុជា
