បុគ្គលិកកម្មករនៅក្រុមហ៊ុនបនល្បែងណាហ្គាវើលដ៍ (Naga World) ទទូចជាថ្មីទៀតឱ្យក្រសួងការងារ និងបណ្ដុះបណ្ដាលវិជ្ជាជីវៈ ផ្ដល់ដំណោះស្រាយតាមការទាមទាររបស់ពួកគេ ឱ្យភាគីក្រុមហ៊ុនទទួលយកបុគ្គលិក និងសហជីពចូលធ្វើការវិញ។ ការលើកឡើងរបស់កម្មករបែបនេះធ្វើឡើងនៅក្រោយពេលដែលក្រសួងការងារ បានចេញសេចក្ដីជូនដំណឹងមួយកាលពីថ្ងៃទី១០ ខែមីនា ណែនាំជាថ្មីទៀតឱ្យក្រុមបុគ្គលិកដែលត្រូវភាគីក្រុមហ៊ុនបញ្ឈប់ពីការងារ និងមិនទាន់ទទួលសំណងឱ្យទៅយកសំណង ដើម្បីបញ្ចប់វិវាទការងារនេះ និងបញ្ចប់ការតវ៉ា។
សេចក្ដីជូនដំណឹងនេះចេញនៅមួយថ្ងៃបន្ទាប់ពីមានកិច្ចប្រជុំកម្រិតរដ្ឋមន្ត្រីបិទទ្វារមួយ នៅសាលារាជធានីភ្នំពេញ ស្ដីពី ការដោះស្រាយវិវាទការងារក្រុមហ៊ុនណាហ្គាវើលដ៍ ដឹកនាំដោយលោក ស ខេង រដ្ឋមន្ត្រីក្រសួងមហាផ្ទៃ។
ប៉ុន្តែកម្មករនៅណាហ្គាវើលដ៍ចាត់ទុកសេចក្ដីជូនដំណឹងរបស់ក្រសួងការងារថា នៅតែបង្ហាញពីចេតនារបស់ក្រសួង ដែលមិនចង់ផ្ដល់ដំណោះស្រាយទៅតាមការទាមទាររបស់កម្មករ និងនៅតែការពារផលប្រយោជន៍របស់ភាគីក្រុមហ៊ុន។
កម្មករម្នាក់អ្នកនាង វ៉ាន់ រីណា ប្រាប់វិទ្យុអាស៊ីសេរីកាលពីយប់ថ្ងៃទី១០ ខែមីនាថា ប្រសិនបើក្រសួងចង់បញ្ចប់វិវាទនេះមែន ក្រសួងគួរតែសម្របសម្រួលឱ្យភាគីក្រុមហ៊ុនទទួលយកសហជីព និងកម្មករជាង៣រយនាក់ ដែលត្រូវបញ្ឈប់ពីការងារឱ្យចូលធ្វើការវិញ ដោះលែងក្រុមមេដឹកនាំសហជីព៨នាក់ និងកម្មករ៣នាក់ ដែលកំពុងជាប់ឃុំ។ រីណាបន្តថា ក្រសួងត្រូវតែធ្វើអធិការកិច្ចតាមស្ថានភាពជាក់ស្ដែង ដើម្បីរកឱ្យឃើញថា ក្រុមហ៊ុនបញ្ឈប់កម្មករពីការងារមិនមែនដោយសារបាត់បង់ប្រាក់ចំណូលទេ តែដោយសារក្រុមហ៊ុនរើសអើងសហជីព ទើបយកលេសវិបត្តិកូវីដ-១៩ បញ្ឈប់សហជីពពីការងារ។ ម្យ៉ាងទៀតមកដល់ពេលនេះការចាប់ខ្លួនសហជីព និងកម្មករទាំង១១នាក់ដាក់ពន្ធនាគារ គឺជាការចោទប្រកាន់ទាំងបំពានទាំងពួកគេគ្មានកំហុស៖ «យើងមើលឃើញច្បាស់ គឺក្រសួងកំពុងចូលដៃជាមួយក្រុមហ៊ុនណាហ្គា ដើម្បីរំលាយសំឡេងសហជីព បង្វែរស្ថានការណ៍ពីមួយស្ថានការណ៍ទៅមួយស្ថានការណ៍។ ក្នុងនាមជាក្រសួង ដែលសម្របសម្រួលទទួលបន្ទុកផ្នែកការងារ គាត់ត្រូវត្រួតពិនិត្យម្ដងទៀតលើច្បាប់ ស្ដីពី ការងារ ច្បាប់ស្ដីពីសហជីព អង្គការវិជ្ជាជីវៈ នីតិបុគ្គល តើក្រសួងអាចបញ្ឈប់បានដែរឬទេ? គាត់មានបានឃ្លាំមើលទេថា តើក្រុមហ៊ុនណាហ្គាបានយកច្បាប់ជាតិ និងច្បាប់អន្តរជាតិមកអនុវត្តបានត្រឹមត្រូវដែរ ឬទេ»។
ក្រសួងការងារកាលពីល្ងាចថ្ងៃទី១០ ខែមីនា បានចេញសេចក្ដីជូនដំណឹងចំនួន៤ទំព័រ ស្ដីពីវឌ្ឍនភាពនៃការដោះស្រាយវិវាទការងាររួមនៅក្រុមហ៊ុនណាហ្គាវើលដ៍ ដោយអំពាវនាវជាថ្មីឱ្យកម្មករណាហ្គាវើលដ៍បញ្ចប់ការតវ៉ារបស់ខ្លួន ហើយភាគីក្រសួងនឹងបន្តដោះស្រាយបញ្ហានេះជាមួយភាគីពាក់ព័ន្ធបន្តទៀត ដើម្បីរក្សាផលប្រយោជន៍សម្រាប់កម្មករផង និងប្រយោជន៍វិនិយោគិនផង។ ក្រសួងបញ្ជាក់ថា មកដល់ត្រឹមថ្ងៃទី៩ ខែមីនា មានបុគ្គលិកដែលត្រូវកាត់ឈ្មោះចំនួន១៤៧នាក់ ក្នុងចំណោម៣៧៣នាក់បានទទួលយកការទូរទាត់ ដូច្នេះនៅមានបុគ្គលិកចំនួន២២៦នាក់មិនព្រមទទួលសំណង។ ក្រសួងការងារក៏មិនភ្លេចបញ្ជាក់ដែរពីការលំបាករបស់ភាគីក្រុមហ៊ុន ដែលថា វិវាទការងាររួមនៅក្រុមហ៊ុន ណាហ្គាវើលដ៍ នេះផ្ដើមចេញពីវិបត្តិនៃការរីករាលដាលជំងឺកូវីដ-១៩ ដែលធ្វើឱ្យប៉ះពាល់ដល់វិស័យជាច្រើននៅលើពិភពលោករួមទាំងវិស័យកាស៊ីណូផង ដែលតម្រូវឱ្យផ្អាកអាជីវកម្ម ឬត្រូវរៀបចំដំណើរការឡើងវិញ ដោយត្រូវកាត់បន្ថយបុគ្គលិក។ ក្នុងបុគ្គលិកណាហ្គាវើលដ៍ចំនួនជាង១ពាន់៣រយនាក់ (១ ៣២៩) ត្រូវបញ្ឈប់ពីការងារ កាលពីខែមេសាឆ្នាំ២០២១។
តែទោះជាយ៉ាងណា អ្នកនាង វ៉ាន់ រីណា មើលឃើញថា ណាហ្គាវើលដ៍មិនបានបង់ខាតដោយសារវិបត្តិកូវីដ-១៩ទេ ព្រោះអាជីវកម្មនៅតែពង្រីក៖ «ឥឡូវបើយើងមើលថា គាត់រងផលប៉ះពាល់ គាត់ខាតបង់ តើណាហ្គា៣នៅដំណើរការដែរឬទេ? ណាហ្គា៣ នៅបុកគ្រឹះរាល់ថ្ងៃបង។ ប្រសិនបើរងផលប៉ះពាល់ក្រុមហ៊ុនមានបិទអាជីវកម្មដែរ ឬទេ? យើងរកចំណុចហ្នឹងទៀត ថាផលប៉ះពាល់ហ្នឹងប៉ះពាល់ទៅលើអី? ប៉ះពាល់ផលចំណេញ ឬប៉ះពាល់ដល់អាជិវកម្ម? ក្រសួងត្រូវពិនិត្យមើលកន្លែងហ្នឹងម្ដងទៀត»។
ក្រុមហ៊ុនបនល្បែងណាហ្គាវើលដ៍ (Nagacorp) បានប្រកាសនៅមុនពេលជូនដំណឹងបញ្ឈប់បុគ្គលិកកាលពីខែមេសាឆ្នាំទៅថា ខ្លួនបានប្រាក់ចំណេញជាង១០០លានដុល្លារ បើទោះជាមានវិបត្តិជំងឺកូវីដ-១៩ក្ដី។ ប៉ុន្តែក្រុមហ៊ុននេះបញ្ជាក់ថា ប្រាក់ចំណូលបានធ្លាក់ចុះខ្លាំងក្នុងឆ្នាំ២០២០ បើធៀបនឹងឆ្នាំ២០១៩ ដែលគ្មានជំងឺកូវីដ-១៩។ ទោះជាយ៉ាងណាមានសញ្ញានៃការងើបឡើងវិញនៃអាជីវកម្មនេះនៅចុងឆ្នាំ២០២១។ បើពិនិត្យមើលសកម្មភាពអាជីវកម្មរបស់ក្រុមហ៊ុនយក្សនេះទំនងជាមិនមានផលប៉ះពាល់ធ្ងន់ធ្ងរដោយវិបត្តិជំងឺកូវីដ-១៩ ឡើយ ដ្បិតដំណើរការសាងសង់កាស៊ីណូនៅតាមប្រទេសគោលដៅនៅតែបន្ត ដូចជានៅកម្ពុជាបន្តសាង់សង់អគារណាហ្គាវើលដ៍៣ និងសំណង់នៅប្រទេសរូស្សី (Russia) ជាដើម ដែលទើបនឹងប្រកាសផ្អាកនៅពេលផ្ទុះសង្រ្គាមបង្កដោយរូស្ស៊ី (Russia) នៅប្រទេសអ៊ុយក្រែន (Ukraine) កាលពីពេលថ្មីៗនេះ។
ទាក់ទងនឹងសេចក្ដីជូនដំណឹងរបស់ក្រសួងការងារវិញ សេចក្ដីជូនដំណឹងនេះចេញនៅមួយថ្ងៃបន្ទាប់ពីលោក ស ខេង រដ្ឋមន្រ្តីក្រសួងមហាផ្ទៃបានដឹកនាំកិច្ចប្រជុំស្ដីពីការដោះស្រាយវិវាទការងារក្រុមហ៊ុនណាហ្គាវើលដ៍ នៅសាលារាជធានីភ្នំពេញ ដោយមានការចូលរួមពីរដ្ឋមន្រ្តីនៃក្រសួងមួយចំនួនដូចជា ក្រសួងការងារ ក្រសួងយុត្តិធម៌ ក្រសួងសុខាភិបាល និងអាជ្ញាធរពាក់ព័ន្ធក្នុងរាជធានីភ្នំពេញ។ កិច្ចប្រជុំបិទទ្វារកាលពីល្ងាចថ្ងៃទី៩ ខែមីនា នោះ មិនបានប្រកាសលទ្ធផលឱ្យសាធារណៈជន រួមទាំងភាគីកម្មករនៅណាហ្គាវើលដ៍បានដឹងនៅឡើយ។ សារព័ត៌មានក្នុងស្រុកស្រង់សម្ដីប្រភព ដែលបានទៅចូលរួមប្រជុំមកចុះផ្សាយថា លោក ស ខេង បានស្តាប់របាយការណ៍ និងបានពិភាក្សាគ្នា ដើម្បីបន្តនីតិវិធីដោះស្រាយ ដោយសន្តិវិធី និងតាមច្បាប់។
ក្រុមអង្គការសង្គមស៊ីវិល ដែលបានរួមគ្នាដាក់ញត្តិសុំអន្តរាគមន៍ពីក្រសួង ស្ថាប័នពាក់ព័ន្ធទាំងនេះមួយចំនួន នៅតែមានសង្ឃឹមថា ក្រសួងពាក់ព័ន្ធនឹងផ្ដល់ដំណោះស្រាយតាមការទាមទាររបស់កូដករ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។