សង្គម​ស៊ីវិល​និង​អ្នកដំណើរ​ថា ការ​អំពាវនាវ​កុំ​ឱ្យ​រថយន្ត​តាក់ស៊ី​ឡើង​ថ្លៃ​ពេល​ចូល​ឆ្នាំ​គ្មាន​ប្រសិទ្ធភាព

ដោយ មួង ណារ៉េត
2019-04-14
អ៊ីម៉ែល
មតិ
Share
បោះពុម្ព
ពលរដ្ឋ​ដើរ​តម្រង់​ទៅ​រថយន្ត​ឈ្នួល​នៅ​ម្ដុំ​ក្បាលថ្នល់ រាជធានី​ភ្នំពេញ ដើម្បី​ធ្វើ​ដំណើរ​ទៅ​ស្រុក​កំណើត នៅ​ថ្ងៃ​ទី​១៣ ខែ​មេសា ឆ្នាំ​២០១៧។
ពលរដ្ឋ​ដើរ​តម្រង់​ទៅ​រថយន្ត​ឈ្នួល​នៅ​ម្ដុំ​ក្បាលថ្នល់ រាជធានី​ភ្នំពេញ ដើម្បី​ធ្វើ​ដំណើរ​ទៅ​ស្រុក​កំណើត នៅ​ថ្ងៃ​ទី​១៣ ខែ​មេសា ឆ្នាំ​២០១៧។
Photo: RFA

មន្ត្រី​អង្គការ​សង្គម​ស៊ីវិល ក្រុម​យុវជន និង​អ្នក​ធ្វើដំណើរ​ត្អូញត្អែរ ពី​តម្លៃ​ឈ្នួល​ឡាន​តាក់ស៊ី និង សេវាកម្ម​ដឹក​អ្នកដំណើរ​របស់​ក្រុមហ៊ុន​ឯកជន​មួយ​ចំនួន ហក់​ឡើង​ខ្ពស់​ទ្វេដង។ ពួកគេ​កត់សម្គាល់​ថា​លោក ហ៊ុន សែន បាន​អំពាវនាវ​ឱ្យ​អ្នក​រត់​តាក់ស៊ី និង​ក្រុមហ៊ុន​ដឹក​អ្នកដំណើរ​ទាំងអស់ មិន​ឱ្យ​ឡើងថ្លៃ​ឈ្នួល​ដឹក​អ្នកដំណើរ មុន​បុណ្យចូលឆ្នាំ​ខ្មែរ គឺ​គ្មាន​ប្រសិទ្ធភាព។

មន្ត្រី​អង្គការ​សង្គម​ស៊ីវិល ក្រុម​យុវជន និង​អ្នកដំណើរ​រិះគន់​ថា ប្រព័ន្ធ​គ្រប់គ្រង​រថយន្ត​ផ្ដល់​សេវាកម្ម​ដឹក​អ្នកដំណើរ របស់​របប​ក្រុងភ្នំពេញ​នៅ​មាន​កម្រិត​ទាប ឬ​ខ្សោយ​នៅឡើយ។ ពួកគេ​សង្កេត​ឃើញ​ថា ពិធី​បុណ្យ​ជាតិ ឬ​បុណ្យចូលឆ្នាំ​ខ្មែរ​ម្តងៗ រថយន្ត​តាក់ស៊ី​ឯកជន​ភាគច្រើន ដឹក​មនុស្ស​លើស​ចំណុះ ចាប់​ម៉ូយ​រញ៉េរញ៉ៃ និង​ការ​យក​ថ្លៃឈ្នួល ខ្ពស់​ទ្វេដង​ជាដើម​។ បាតុភាព​នេះ បាន​កើតមាន​ជាច្រើន​ឆ្នាំ​មក​ហើយ មិន​ត្រូវ​បាន​រដ្ឋាភិបាល​ដោះស្រាយ​នោះ​ទេ។

ប្រធាន​សមាគម​សម្ព័ន្ធ​និស្សិត​បញ្ញវន្ត​ខ្មែរ លោក មួង សូនី ឱ្យ​ដឹង​នៅ​ថ្ងៃ​ទី​១៣ មេសា​ថា រដ្ឋាភិបាល​នៅ​មិន​ទាន់​មាន​គោលនយោបាយ​ច្បាស់លាស់ កែតម្រូវ​ប្រព័ន្ធ​គ្រប់គ្រង ក្រុមហ៊ុន​ផ្ដល់​សេវាកម្ម​ដឹក​អ្នកដំណើរ និង​រថយន្ត​តាក់ស៊ី​ទាំងអស់ ឱ្យ​ល្អ​ប្រសើរ​នៅឡើយ​ទេ ដែល​ជា​ហេតុ​ធ្វើ​ឱ្យ​ប៉ះពាល់​ជីវភាព​ពលរដ្ឋ​ក្រីក្រ ខ្វះ​សណ្ដាប់ធ្នាប់ និង​ងាយ​នាំ​ឱ្យ​កើតមាន​គ្រោះថ្នាក់​ចរាចរណ៍​ជាដើម​។ លោក​បន្ថែម​ថា ជា​រៀងរាល់​ឆ្នាំ នៅ​មុន​ពេល​បុណ្យជាតិ​សំខាន់ៗ​ដូចជា បុណ្យចូលឆ្នាំ​ខ្មែរ និង​បុណ្យ​ភ្ជុំបិណ្ឌ គ្រប់​អ្នក​ប្រកប​របរ​ដឹកជញ្ជូន​សេវា​ឯកជន ដោយ​រួម​ទាំង​រថយន្តក្រុង រថយន្តឈ្នួល និង​កង់​បី ម៉ូតូឌុប​ផង បាន​ដំឡើងថ្លៃ​ភ្លាមៗ​ពី​អ្នកដំណើរ​៖ «យើង​ឃើញ​ប្រព័ន្ធ​នៃ​ការ​ធ្វើ​ដំណើរ ចរាចរ​ស្រុក​ខ្មែរ​យើង​គឺ នៅ​មាន​កម្រិត​ខ្សោយ​ណាស់ បើ​យើង​ប្រៀបធៀប​ជាមួយ​ថៃ អត្តចរិត​ប្រជាជន​នៅ​មិន​ទាន់​មាន​ការ​ផ្លាស់ប្ដូរ​ល្អ ហើយ​រដ្ឋាភិបាល ក៏​ខ្ញុំ​ឃើញ​ថា មិនទាន់​មាន​វិធានការ ឬ​គោលនយោបាយ​រៀបចំ​ឱ្យ​ប្រព័ន្ធ​នៃ​ការ​ធ្វើ​ដំណើរ​សេវា​សាធារណៈ មាន​ភាព​ល្អ​ប្រសើរ​នៅឡើយ​ទេ»

ថ្មីៗ​នេះ លោក​នាយករដ្ឋមន្ត្រី ហ៊ុន សែន បាន​អំពាវនាវ​ឱ្យ​ក្រុមហ៊ុន​ឯកជន​ផ្ដល់​សេវាកម្ម​ដឹកនាំ​អ្នកដំណើរ និង​រថយន្តឈ្នួល​តាក់​ស៊ី ដឹកនាំ​អ្នកដំណើរ​ទាំងអស់ កុំ​ដំឡើងថ្លៃ មុន​ចូលឆ្នាំ​ខ្មែរ និង​ក្រោយ​ចូលឆ្នាំ។ លើស​ពី​នេះ សាលា​រាជធានី​ភ្នំពេញ បាន​ផ្ដល់​រថយន្តក្រុង​ជាង ១​រយ​គ្រឿង​(១២០) ដឹក​ពលរដ្ឋ និង​កម្មករ​កម្ម​ការិនី​ដោយ​មិន​គិត​ថ្លៃ មុន​ចូលឆ្នាំ។

អ្នកដំណើរ​ម្នាក់ គឺ​អ្នកនាង ជីង កន្និកា ឱ្យ​ដឹង​ថា សំបុត្រ​ឡានក្រុង របស់​ក្រុមហ៊ុន អង្គរ​អ៊ីប៊ុកឃីង (Angkor e-booking) ផ្ដល់​សេវាកម្ម​ដឹកនាំ​អ្នកដំណើរ ពី​ភ្នំពេញ ទៅ​ខេត្ត​សៀមរាប បាន​ឡើងថ្លៃ​ជាង ២​ម៉ឺន​រៀល ក្នុង​រដូវ​បុណ្យចូលឆ្នាំ​។ អ្នកនាង​បញ្ជាក់​ថា តម្លៃ​ធម្មតា​ដែល​ពុំ​មែនមាន​បុណ្យទាន គឺ ៣​ម៉ឺន ៧​ពាន់​រៀល (៣៧០០០) សម្រាប់​មនុស្ស​ម្នាក់ៗ​។ លើស​ពី​នេះ​ក្រុមហ៊ុន​ដឹក​អ្នកដំណើរ​ផ្សេងទៀត និង​រថយន្ត​តាក់ស៊ី​ភាគច្រើន​ក៏​ឡើងថ្លៃ​ដូចគ្នា​នេះ​ដែរ។

ប្រធាន​មជ្ឈមណ្ឌល​ប្រជាពលរដ្ឋ​ដើម្បី​អភិវឌ្ឍន៍ និង​សន្តិភាព លោក យង់ គិមអេង យល់ថា រដ្ឋាភិបាល​គួរ​មាន​វិធានការ និង​គោលនយោបាយ​ច្បាស់លាស់ ដើម្បី​ចាត់វិធានការ​ដោះស្រាយ​បញ្ហា​នេះ ជាជាង​ត្រឹមតែ​ការ​អំពាវនាវ និង​ចេញ​សេចក្ដី​ប្រកាស គឺ​គ្មាន​ប្រសិទ្ធភាព​នោះ​ទេ។ លោក​ចាត់ទុក​ហេតុផល​ដែល​នាំ​ឱ្យ​រថយន្ត​តាក់ស៊ី​ហក់​ឡើង​ហួសហេតុ គឺ​រដ្ឋ​គ្មាន​សមត្ថភាព និង​ឆន្ទៈ​ត្រួតពិនិត្យ​សេវាកម្ម​ដឹកជញ្ជូន​អ្នកដំណើរ របស់​ក្រុមហ៊ុន​ឯកជន ពេល​មាន​បុណ្យទាន​ម្ដងៗ​។ លោក​ថា ការ​បណ្ដោយ​ឱ្យ​ក្រុមហ៊ុន​ឯកជន ដឹកនាំ​អ្នកដំណើរ និង​អ្នក​មានមុខ​របប​ដឹក​អ្នកដំណើរ​អាជីព​ធ្វើ​ព្យុះភ្លៀង ឬ​ជិះ​សេះ​លែងដៃ គឺជា​ដើមហេតុ ធ្វើ​ឱ្យ​តម្លៃ​ឈ្នួល​រថយន្ត​ហក់​ឡើង​ខ្ពស់​តាម​អំពើ​ចិត្ត ជះឥទ្ធិពល​អាក្រក់​ដល់​ជីវភាព​ពលរដ្ឋ​ក្រីក្រ​៖ «រដ្ឋ​ត្រូវ​មាន​វិធានការ​ពិនិត្យមើល ការ​អនុវត្ត​ក្រុមហ៊ុន​ឡានក្រុង​ជាដើម កុំ​ឱ្យ​ឡើងថ្លៃ បើ​មិន​អ៊ីចឹង​ទេ ពួកគាត់​ឡើងថ្លៃ​ស្រេច​តែ​អំពើ​ចិត្ត​។ អីចឹង​ការ​អំពាវនាវ​ឱ្យ​រដ្ឋាភិបាល គឺ​គេ​មិន​ស្ដាប់​ទេ ហើយ​អ្នក​ដែល​យក​ថ្លៃ​ហួស​នៅតែ​យក​អីចឹង»

នៅមុន​ពិធីបុណ្យ​ចូលឆ្នាំ​ខ្មែរ ពលរដ្ឋ​ខ្មែរ​ដែល​រស់នៅ​រាជធានី​ភ្នំពេញ និង​ខេត្ត​នានា ជាពិសេស​កម្មករ​កម្ម​ការិនី បាន​សម្រុក​ធ្វើដំណើរ​មកលេង​ស្រុកកំណើត តែងតែ​ធ្វើដំណើរ តាម​រថយន្ត​តាក់ស៊ី និង​ក្រុមហ៊ុន​ដឹក​អ្នកដំណើរ​ជាដើម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល