អាជីវករដឹកដំឡូងទៅលក់នៅប្រទេសវៀតណាម ត្អូញត្អែរពីការលំបាកនៅពេលអាជ្ញាធរខេត្តត្បូងឃ្មុំ តម្រូវឱ្យបិទច្រករបៀងស្ទើរតែទាំងអស់មិនឱ្យឡានដឹកទំនិញអាចឆ្លងកាត់ដូចមុនបាន។ យ៉ាងណាអាជ្ញាធរបញ្ជាក់ថា ច្រករបៀងគឺជាច្រកខុសច្បាប់ ដូចនេះគឺតម្រូវឱ្យចេញចូលតាមអន្តរជាតិតែមួយប៉ុណ្ណោះ។
ឡានដឹកដំឡូងជាច្រើនរបស់ក្រុមអាជីវករត្រូវកកស្ទះនៅតាមច្រកព្រំដែន បន្ទាប់ពីអាជ្ញាធរខេត្តត្បូងឃ្មុំ ចេញគោលការណ៍ឱ្យបិទច្រកព្រំដែនតូចៗ ឬច្រករបៀងនៅជាប់ប្រទេសវៀតណាម ដោយមិនអនុញ្ញាតឱ្យឈ្មួញដឹកទំនិញអាចចេញចូលដូចពេលមុនទេ។ សកម្មភាពនេះ គឺកើតឡើងប្រមាណជិតមួយខែមកហើយ ដែលធ្វើឱ្យអ្នករកស៊ីទាំងនោះត្រូវជួបផលប៉ះពាល់មួយកម្រិតទៀត។
ឈ្មួញកណ្ដាលដែលទទួលទិញដំឡូងមកពីខេត្តក្រចេះ ទៅលក់នៅប្រទេសវៀតណាម លោក វ៉ាន់ ភារិទ្ធិ ឱ្យដឹងថា ការបិទច្រកតូចៗ គឺធ្វើឱ្យពួកគាត់ត្រូវកកស្ទះរថយន្តរាប់រយឡានជារឿងរាល់ថ្ងៃដោយត្រូវរង់ចាំចេញច្រកតែមួយគឺច្រកអន្តរជាតិ ដូង ៧ដើម ក្នុងស្រុកមេមត់។ លោកថា ការកកស្ទះគឺធ្វើឱ្យគុណភាពដំឡូងរបស់លោកត្រូវថយចុះ ដែលនាំឱ្យឈ្មួញទទួលទិញដំឡូងធំនៅវៀតណាម កាន់តែបន្ថោកតម្លៃផលិតផលរបស់ពួកគាត់៖ «វាខូចដែរបង! ឡើងពីរថ្ងៃវាខូចហើយ ឡើងខ្មៅ គេឱ្យថោកទៀត។ ចង់សំណូមពរថា ឱ្យបានលឿនជាងនេះបន្តិច»។
ប្រភពដដែលបន្ថែមថា ក្រៅកកស្ទះតម្លៃក្បាលឡានសម្រាប់ចេញមួយលើកៗ ក៏ខុសគ្នាពីច្រករបៀងដែរ ពោលគឺច្រករបៀងឡានដឹកដំឡូងចេញ មួយជើងគឺត្រូវបង់ថ្លៃ ៥ម៉ឺនរៀល ចំណែកច្រកអន្តរជាតិគឺត្រូវបង់ពី ៧ម៉ឺន ទៅ ៨ម៉ឺនរៀល។
រីឯឈ្មួញនៅស្រុកចម្ការលើ ម្នាក់ទៀត លោក ជា ម៉េង ឱ្យដឹងដែរថា កាលពីមិនទាន់បិទច្រករណប ឬច្រករបៀងលោកអាចដឹកដំឡូងទៅលក់នៅប្រទេសវៀតណាម មួយថ្ងៃមួយជើង ប៉ុន្តែក្រោយពេលបិទច្រកតូចៗនោះមក គឺលោកអាចដឹកបាន ២ថ្ងៃ ឬបីថ្ងៃ តែមួយជើងប៉ុណ្ណោះ៖ «អ៊ីចឹងខ្ញុំចង់ឱ្យចៅហ្វាយខេត្តហ្នឹងទាក់ទងជាមួយវៀតណាម ឱ្យធ្វើម៉េចបើកច្រកដូចមុនៗ ដើម្បីបានប្រើពេលវេលាបានទៅដឹកជញ្ជូនដូចមុន»។
ក្រៅពីឈ្មួញទាំងនេះ ក៏មានឈ្មួញមកខេត្តឆ្ងាយៗ រួមមានខេត្តកំពង់ធំ ព្រះវិហារ ជាដើម ក៏បានត្អូញត្អែរស្រដៀងគ្នានេះដែរ។
ទាក់ទងបញ្ហានេះអភិបាលខេត្តត្បូងឃ្មុំ លោក ប្រាជ្ញ ចន្ទ មានប្រសាសន៍មុនដាច់ខ្សែទូរស័ព្ទថា ច្រកតូចៗទាំងនោះជាច្រកមិនផ្លូវការ ហើយវាមិនសូវសំខាន់ឡើយ តែក៏ដាច់ទូរស័ព្ទទៅ។ យ៉ាងណាអភិបាលស្រុកមេមត់ លោក ចេង ប៊ុណ្ណារ៉ា មានប្រសាសន៍ថា ច្រករបៀងតូចៗទាំងនោះជាច្រកខុសច្បាប់ ដូចនេះអាជ្ញាធរតម្រូវឱ្យឈ្មួញទាំងអស់ត្រូវចេញចូលតាមច្រកអន្តរជាតិតែមួយ ជៀសវាងមានបទល្មើសផ្សេងៗកើតឡើង៖ «ជាច្រកមិនផ្លូវការទេ ជាច្រកខុសច្បាប់ អ៊ីចឹងគោលការណ៍អភិបាលខេត្តគឺថា មិនឱ្យមានការធ្វើចរាចរណ៍អីតាមហ្នឹងទេ គឺត្រូវមកតាមច្រកផ្លូវការដែលជាច្រកត្រឹមត្រូវតាមច្បាប់វិញ»។
លោកថា ការកកស្ទះខ្លះអាចមានមែន គឺបណ្ដាលមកពីភាគីវៀតណាម ពីព្រោះនៅប្រទេសវៀតណាម គេមានពេលវេលាកំណត់សម្រាប់ការដឹកទំនិញចេញចូលច្បាស់លាស់។ លោកបន្ថែមថា ប្រសិនបើច្រកណាអាចបើកជាច្រកសម្រាប់ដឹកទំនិញចេញចូលថ្នាក់តំបន់បានអាជ្ញាធរនឹងស្នើទៅរដ្ឋាភិបាលដើម្បីជួយសម្រួលដល់ប្រជាពលរដ្ឋ តែយ៉ាងណាលោកថា ពលរដ្ឋក៏ត្រូវយោគយល់វិញដែរ។
ចំណែកសមាជិកក្រុមប្រឹក្សាខេត្តត្បូងឃ្មុំ មកពីបក្សសង្គ្រោះជាតិ លោក ស៊ូ យាន មានប្រសាសន៍ថា ការបិទច្រករបៀង ឬច្រកតូចៗ គឺមិនអាចទប់ស្កាត់បទល្មើសបានទាំងស្រុងឡើយ ប៉ុន្តែគឺអាស្រ័យលើមន្ត្រីដែលអនុវត្តច្បាប់នៅតាមព្រំដែនទៅវិញទេ៖ «បញ្ហាសំខាន់នៅលើមន្ត្រីនៅតាមច្រកទ្វារហ្នឹង គាត់អនុវត្តច្បាប់ឱ្យបានទៅវាអត់មានអីទៅបញ្ហាទេ។ ប៉ុន្តែធ្វើអ៊ីចឹង គឺប៉ះពាល់ផលប្រយោជន៍ប្រជាពលរដ្ឋគាត់ដឹកទំនិញទៅលក់នៅវៀតណាម»។
ដោយឃើញពលរដ្ឋជាច្រើនជួបបញ្ហាដោយសារការបិទច្រកតូចៗ សមាជិកក្រុមប្រឹក្សាខេត្តរូបនោះនឹងលើកពីបញ្ហានេះសម្រាប់កិច្ចប្រជុំនៅថ្នាក់ខេត្តដើម្បីធ្វើយ៉ាងណាស្នើឱ្យភ្នាក់ងាររាជរដ្ឋាភិបាលសម្រួលការលំបាករបស់ប្រជាពលរដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។