លោកគ្រួអ្នកគ្រូនៅសាលារៀនដាច់ស្រយាលមួយឈ្មោះថា អនុវិទ្យាល័យ អង្គរជុំត្រពាំងឈូក ក្នុងខេត្តកំពត ព្រមានធ្វើបាតុកម្មមិនបង្រៀនសិស្ស បើសិនមិនមានការតែងតាំងនាយកថ្មីដោយមានការបោះឆ្នោតត្រឹមត្រូវ នាពេលឆាប់ៗ ទេនោះ។
ក្រុមលោកគ្រូៗអនុវិទ្យាល័យ អង្គរជុំត្រពាំងឈូក ក្នុងស្រុកកំពង់ត្រាច តវ៉ានៅថ្ងៃទី១៦ វិច្ឆិកា ដោយចោទថា ការតែងតាំងនាយកថ្មីរបស់អនុវិទ្យាល័យនេះ ធ្វើឡើងមានបក្សពួកនិយម ដោយនាយកចាស់ លោក ហ៊ុន ប្រុស ដែលបានចាកចេញពីដំណែងទៅហើយនោះ បានសម្រេចតែងតាំងលេខារបស់គាត់គឺលោក សំ ធី ឡើងធ្វើជានាយកជំនួស ដោយមិនមានការយល់ព្រមពីលោកគ្រូអ្នកគ្រូ នៅក្នុងសាលា។
លោកគ្រូៗដែលតវ៉ា និងសុំមិនបញ្ចេញឈ្មោះនោះ បញ្ជាក់ថា មូលហេតុដែលពួកគាត់មិនព្រមទទួលយកលោកនាយកថ្មីនោះ គឺមានមូលហេតុបីសំខាន់។ គឺលោក សំ ធី ដែលជានាយកថ្មី មានផ្ទះនៅឆ្ងាយពីសាលា ជាគ្រូសាលាផ្សេង តែងមកសាលារៀនយឺតពេល ជួនកាលបិទទ្វារការិយាល័យមិនមកធ្វើការ ធ្វើឲ្យលោកគ្រូអ្នកគ្រូមិនអាចចូលយកសម្ភារៈ ឬឯកសារក្នុងការិយាល័យបង្រៀនសិស្សបាន ជាញឹកញាប់។
ក្រុមលោកគ្រូអ្នកគ្រូតវ៉ាថា ការតែងតាំងនាយកសាលាថ្មី ត្រូវតែជ្រើសរើសលោកគ្រូអ្នកគ្រូណាដែលរស់នៅក្បែរសាលារៀន ព្រោះថា នាយកសាលាដែលរស់នៅជិតសាលារៀនអាចបើកទ្វារសាលាទាន់ពេល និងធ្វើការងារសាលាបានដិតដល់ជាងនាយកមកពីចម្ងាយ៖ « មើលអត់ឃើញពីចំណេះដឹង ពីសារៈសំខាន់របស់បុគ្គលិកនៅសាលាផ្ទាល់ បែរជាទៅសម្លឹងឃើញគ្រូដែលជាបុគ្គលិកនៅសាលាផ្សេងយកមកធ្វើជាគណៈគ្រប់គ្រងវិញ អ៊ីចឹងពួកខ្ញុំដាច់ខាតមិនទទួលយក សុំធ្វើការបដិសេធ »។ លោកគ្រូម្នាក់ទៀត៖ « គឺថាកន្លងមកយើងឃើញថា ការតែងតាំងនាយកដែលមកពីកន្លែងឆ្ងាយ មានផលវិបាកដោយសារសាលានេះនៅឆ្ងាយពីទីប្រជុំជន អ៊ីចឹងការតែងតាំងមកបង្កផលវិបាកជាច្រើននៅក្នុងសាលា »។
លោកគ្រួៗបន្ថែមថា ទំនាស់ក្នុងការតែងតាំងនាយកថ្មីនេះ កើតមានឡើងអស់រយៈពេលជិតមួយឆ្នាំ ហើយពូកគាត់បានដាក់លិខិតតវ៉ាដល់មន្ទីរអប់រំយុវជន និងកីឡាស្រុកកំពង់ត្រាចតែមិនមានដំណោះស្រាយ ។ លោកគ្រូម្នាក់ទៀតដែលសុំមិនបញ្ចេញឈ្មោះដែរនោះ បានព្រមានថា លោកគ្រូអ្នកគ្រូទាំងអស់នឹងធ្វើកូដកម្មឈប់បង្រៀនសិស្ស ប្រសិនបញ្ហានេះមិនត្រូវបានដោះស្រាយឆាប់ៗទេនោះ ៖ « ព្រោះថាកន្លងពីមួយខែទៅមួយខែ គឺអស់អស់រយៈពេលជិតមួយឆ្នាំទៅហើយ គាត់អត់ដោះស្រាយសោះ ហើយគាត់នៅតែដាក់មកគ្រប់គ្រង ហើយអ្នកដែលមកនឹងតាំងនាមជានាយកគ្មានលិខិតស្នាមច្បាស់លាស់ ហេតុដូច្នេះហើយ គឺសុំឲ្យការិយាល័យក៏ដូចជាមន្ទីរអប់រំយុវជននិងកីឡាចុះមកដោះស្រាយជូនពួកខ្ញុំ បើមិនចុះមកដោះស្រាយពួកខ្ញុំមិនបង្រៀនទេ »។
ឆ្លើយតបទៅនឹងអះអាងនេះ អតីតនាយក អនុវិទ្យាល័យ អង្គរជុំត្រពាំងឈូក លោក ហ៊ុន ប្រុស បដិសេធថា លោកមិនមានបក្សពួកនិយមទេ ចំណែកការតែងតាំងលោក សំ ធី ជំនួសដំណែងលោកនេះគឺដោយសារ លោក សំ ធី ជាលេខារបស់លោក កាលលោកនៅធ្វើនាយកសាលា។
លោក ហ៊ុន ប្រុស ដែលឲ្យដឹងថាលោកលាចេញពីដំណែងនាយកដោយសារផ្ទះលោកនៅឆ្ងាយពីសាលានោះ បន្ថែមថា ការតែងតាំងនាយកថ្មីបណ្ដោះអាសន្ននេះ គឺធ្វើឡើងតាមក្រឹត្យក្រមរដ្ឋបាល របស់សាលា នៅពេលនាយកចាស់លាលែងទៅ គឺលេខាត្រូវឡើងជំនួសជាស្វ័យប្រវត្តិ ដូច្នេះហើយ។ តែទោះយ៉ាងណា លោកថា នេះជាការតែងតាំងជាបណ្ដោះអាសន្ន ទម្រាំសាលាមានពេលជ្រើសរើសនាយកថ្មី ព្រោះថានៅពេលនេះ សាលាកំពុងមមាញឹកនិងកិច្ចការសាលាពេលចូលកងឆ្នាំសិក្សាថ្មី។
រីឯអនុប្រធានការិយាល័យអប់រំយុវជន និងកីឡាស្រុកកំពង់ត្រាច លោក ហេង រស្មី ក៏បានបញ្ជាក់ដូចគ្នាដែរ លោកថា ការតែងតាំងនាយកថ្មីនឹងធ្វើឡើងតាមវិធីបោះឆ្នោតដែលមានការចូលរួមពីលោកគ្រូអ្នកគ្រូនៅក្នុងសាលាទើបយកជាការបាន ៖ « នេះគ្រាន់តែថាបណ្ដោះអាសន្នទេ ព្រោះឥឡូវតាមនីតិវិធីតែងតាំង មាននីតិវិធីតែងតាំងមិនមែនចេះតែធ្វើតាមការតែងតាំងបានទេ តាមនីតិវិធីថ្មី ឥឡូវយើងរង់ចាំនីតិវិធីថ្មីនឹង មិនទាន់តែងតាំងឯណា »។
តែលោក ហេង រស្មី មិនអាចបញ្ជាក់បានថា តើការតែងតាំងតាមនីតិវិធីថ្មីនេះ នឹងធ្វើឡើងនៅពេលណាទេ។
អនុវិទ្យាល័យ អង្គរជុំត្រពាំងឈូក ដែលមានសិស្សានុសិស្សប្រមាណ២រយនាក់ ស្ថិតក្នុងភូមិកោះតាមូង ឃុំបឹងសាលាខាងជើង ស្រុកកំពង់ត្រាច ខេត្តកំពត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។