ក្រុមគ្រូបង្រៀននៅតាមសាលាខ្លះ បានរអ៊ូរទាំថា ប្រាក់ឧបត្ថម្ភដែលក្រសួងអប់រំ ផ្តល់ជូនគ្រូកំណែ ឬគ្រូទទួលខុសត្រូវនៅតាមមណ្ឌលប្រឡងនានា ក្នុងសម័យប្រឡងសញ្ញាបត្រមធ្យមសិក្សាបឋមភូមិ ឬឌីប្លូម ឆ្នាំនេះ ទទួលបានប្រាក់ឧបត្ថម្ភទាបជាងឆ្នាំមុន។ បញ្ហានេះ មន្ត្រីក្រសួងអប់រំ ថ្លែងថា ដោយសារតែការប្រឡងឌីប្លូម ឆ្នាំនេះ ក្រសួងមិនចល័តគ្រូចេញពីខេត្តមួយទៅខេត្តផ្សេងទេ។
គ្រូបង្រៀននៅតាមរាជធានីខេត្តមួយចំនួន បានរិះគន់ថ្នាក់ដឹកនាំក្រសួងអប់រំ ដែលប្រកាសធ្វើកំណែទម្រង់ស៊ីជម្រៅក្នុងវិស័យអប់រំ ដោយបានកាត់ប្រាក់ឧបត្ថម្ភពីគ្រូកែវិញ្ញាសាប្រឡង ឬអ្នកទទួលខុសត្រូវនៅតាមមណ្ឌលផ្សេងៗក្នុងសម័យប្រឡងឌីប្លូម ឆ្នាំនេះ។
សម័យប្រឡងមធ្យមសិក្សាបឋមភូមិ ឬប្រឡងឌីប្លូម ឆ្នាំ២០១៤ នេះ បានចាប់ផ្ដើមកាលពីថ្ងៃច័ន្ទ ទី១៤ និងបញ្ចប់នៅថ្ងៃអង្គារ ទី១៥ ខែកក្កដា។
លោក បាន វុធ តំណាងឲ្យគ្រូបង្រៀនមួយចំនួននៅវិទ្យាល័យបឹងត្របែក បានអះអាងថា មានគ្រូកំណែវិញ្ញាសាប្រឡង ឬប្រធានមណ្ឌលខ្លះមានសតិអារម្មណ៍មិនល្អ ដែលក្រសួងអប់រំ បានកាត់ប្រាក់ឧបត្ថម្ភពីបុគ្គលិកអប់រំក្នុងពេលប្រឡងឌីប្លូមឆ្នាំនេះទាបជាងឆ្នាំមុន។
លោកបន្តថា សម្រាប់គ្រូកំណែវិញ្ញាសាប្រឡងឆ្នាំមុនៗ គ្រូបង្រៀនម្នាក់ៗទទួលបានប្រាក់ឧបត្ថម្ភពេលប្រឡងឌីប្លូមចំនួន ១៩ម៉ឺនរៀល ប៉ុន្តែឆ្នាំនេះទទួលតែជាង ១១ម៉ឺនរៀលទេ៖ «លុយវាខុសពីគ្នាដាច់ពេក។ ឧបមាថា អ្នកកែវិញ្ញាសាពីមុនគេឲ្យ ១៩ម៉ឺនរៀល ឥឡូវគេឲ្យតែ ១១ម៉ឺន ៤ពាន់រៀល វាខុសគ្នាប៉ុន្មាន? ហើយធ្វើការតែ ៣ថ្ងៃដូចគ្នា ហើយឆ្នាំមុនក៏ធ្វើការ ៣ថ្ងៃដូចគ្នា ហេតុអីក៏គេឲ្យខុសគ្នា។ កែទម្រង់សុទ្ធតែគុណនឹងទ្វេដង។ តើបងឯងដែលមើលទូរទស្សន៍ទេ ប៉ុស្តិ៍បាយ័ន និងទូរទស្សន៍ជាតិ ជាដើម គេនិយាយថាគុណនឹង២ដង។ ឲ្យតែផ្តល់ជូនដូចឆ្នាំមុនទៅ យើមិនបាច់ដល់បាន ២ដងទេ? វាដូចមើលងាយដល់គ្រូបង្រៀនពេក»។
ចំណែក លោក ម៉ៃ សុភត្រា គ្រូបង្រៀននៅសាលាអនុវិទ្យាល័យគគីរ ស្រុកកៀនស្វាយ ខេត្តកណ្ដាល មិនរិះគន់ចំពោះការផ្តល់ប្រាក់ឧបត្ថម្ភជូនគ្រូអនុរក្ស ឬគ្រូទទួលខុសត្រូវនៅតាមមណ្ឌលប្រឡងនីមួយៗទេ។ ប៉ុន្តែលោករិះគន់ចំពោះវិញ្ញាសាប្រឡងនៅតាមសាលានីមួយៗ ថាមានភាពសាមញ្ញ ឬមិនសមជាការប្រឡងថ្នាក់ជាតិដូចឆ្នាំមុនៗទេ៖ «វិញ្ញាសាចេញមកជាលក្ខណៈធម្មតាៗ មិនមែនជាលក្ខណៈប្រឡងខ្នាតអន្តរជាតិ ឬក៏ថ្នាក់ប្រទេសនោះទេ។ យើងឃើញថា វិញ្ញាសាធម្មតាតែម្តង គឺគ្រូនៅតាមសាលានីមួយៗ គាត់ចេញវិញ្ញាសាទៅតាមមុខវិជ្ជារៀងៗខ្លួន»។
ឆ្លើយតបបញ្ហានេះ លោក រស់ សាលីន នាយកខុទ្ទកាល័យ និងជាមន្ត្រីនាំពាក្យក្រសួងអប់រំ បានទទួលស្គាល់ថា សម័យប្រឡងឌីប្លូមឆ្នាំនេះ ក្រសួងអប់រំ បានកាត់ប្រាក់ឧបត្ថម្ភតិចតួចពីអ្នកទទួលខុសត្រូវនៅតាមមណ្ឌលប្រឡង ឬគ្រូកំណែពិតមែន។ លោកបញ្ជាក់ថា ដោយសារតែការប្រឡងឌីប្លូមឆ្នាំនេះ ក្រសួងមិនតម្រូវឲ្យគ្រូចល័តចេញពីខេត្តមួយទៅខេត្តផ្សេងទេ គឺធ្វើការប្រឡងនៅតាមសាលានីមួយៗ ទើបមានកាត់ប្រាក់ឧបត្ថម្ភតិចតួច៖ «និយាយរួមទៅទឹកប្រាក់ហ្នឹងវាអាចធ្លាក់ចុះជាងមុនបន្តិច ដោយសារតែយើងមិនចល័តគ្រូទេ។ គ្រូនៅសាលាណា គឺគាត់ធ្វើមេប្រយោគនៅទីនោះ។ ដូច្នេះ គាត់ទៅធ្វើមេប្រយោគហ្នឹង ដូចជា គាត់ទៅបង្រៀនធម្មតាអ៊ីចឹង? ពេលព្រឹក ដែលគាត់អញ្ជើញទៅ គឺគាត់ធ្វើមេប្រយោគទៅថ្ងៃរសៀល គឺគាត់ត្រឡប់មកផ្ទះវិញទៅ។ ដូច្នេះយើងមិនចល័តគ្រូពីតំបន់មួយទៅកន្លែងមួយ ឬពីសាលាមួយទៅសាលាមួយ ហើយប្រាក់បេសកកម្មនេះ វាថយជាងឆ្នាំមុនបន្តិច គឺតិចតួចទេ មិនច្រើនទេ»។
ទាក់ទិនការប្រឡងសញ្ញាបត្រឌីប្លូម និងបាក់ឌុបឆ្នាំនេះ ក្រសួងអប់រំ បានបង្កើតក្រុមការងារដើម្បីសម្របសម្រួល និងឆ្លើយតបរាល់សំណួរ ឬយោបល់ផ្សេងៗពីមជ្ឈដ្ឋាននានា។ ការប្រឡងទាំងពីរកម្រិតនេះ សិស្សានុសិស្ស និងសាធារណជន អាចសួរ ឬបញ្ចេញមតិយោបល់តាមបណ្ដាញទំនាក់ទំនងសង្គមផ្លូវការរបស់ក្រសួងអប់រំ តាមរយៈទំព័រហ្វេសប៊ុក (facebook) និងតាមរយៈសារអេឡិចត្រូនិក។ រាល់ចម្ងល់ និងសំណួរផ្សេងៗរបស់សាធារណជនផ្ញើមកក្រសួងអប់រំ ក្រសួងអប់រំ នឹងឆ្លើយតបទៅម្ចាស់សំណួរវិញទៅតាមពេលវេលាសមរម្យជាបន្តបន្ទាប់។
ការប្រឡងមធ្យមសិក្សាបឋមភូមិ ឬឌីប្លូមឆ្នាំនេះ ចាប់ផ្ដើមពីថ្ងៃទី១៤ ខែកក្កដា និងប្រឡងមធ្យមសិក្សាទុតិយភូមិ ឬបាក់ឌុប នឹងចាប់ផ្ដើមពីថ្ងៃទី៤ ខែសីហា ឆ្នាំ២០១៤។ បេក្ខជនប្រឡងឌីប្លូមឆ្នាំនេះសរុបមានចំនួនជាង ១៤ម៉ឺននាក់ នៅទូទាំងប្រទេសកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។