រោងចក្រ​ខ្លះ​ចាប់ផ្ដើម​ជូន​ដំណឹង​ព្យួរ​ការងារ និង​ផ្អាក​រយៈពេល​ខ្លី ព្រោះ​មិន​អាច​នាំចូល​វត្ថុ​ធាតុ​ដើម​ពី​ចិន​ទាន់​ពេល

ដោយ សុ ជីវី
2020-02-14
អ៊ីម៉ែល
មតិ
Share
បោះពុម្ព
លោក​នាយករដ្ឋមន្ត្រី ហ៊ុន សែន ​ចុះ​ជួប​សំណេះសំណាល​ជាមួយ​កម្មករ កម្មការិនី​រោងចក្រ ក្នុង​ខណ្ឌ​ឫស្សីកែវ រាជធានី​ភ្នំពេញ កាល​ពី​ព្រឹក​ថ្ងៃ​ទី​៣ ខែ​មករា ឆ្នាំ​២០១៨។
លោក​នាយករដ្ឋមន្ត្រី ហ៊ុន សែន ​ចុះ​ជួប​សំណេះសំណាល​ជាមួយ​កម្មករ កម្មការិនី​រោងចក្រ ក្នុង​ខណ្ឌ​ឫស្សីកែវ រាជធានី​ភ្នំពេញ កាល​ពី​ព្រឹក​ថ្ងៃ​ទី​៣ ខែ​មករា ឆ្នាំ​២០១៨។
Photo courtesy of SPM's Facebook page

រោងចក្រ​មួយ​ចំនួន បាន​ចាប់ផ្ដើម​ជូនដំណឹង អំពី​ការ​ព្យួរ​កិច្ចសន្យាការងារ​របស់​កម្មករ និង​ផ្អាក​សកម្មភាព​រោងចក្រ រយៈពេល​ខ្លី ជា​បណ្ដើរៗ​ហើយ ដោយ​មូលហេតុ​មិន​អាច​នាំចូល​វត្ថុធាតុដើម ពី​ប្រទេស​ចិន​មក​ទាន់​ពេល​។ កម្មករ​ថា ពួកគេ​បារម្ភ​ពី​ជីវភាព​ណាស់ នៅ​ពេល​លឺ​ដំណឹង រោងចក្រ​ផ្អាក​ការងារ​បែបនេះ។

កម្មករ និង​សហជីព នៅ​រោងចក្រ​ខ្លះ ឱ្យ​ដឹង​ថា ភាគី​ថៅកែ​បាន​ហៅ​តំណាង​កម្មករ ប្រជុំ​ប្រាប់​រួច​អស់ហើយ ពី​គម្រោង​ផ្អាក​សកម្មភាព និង​ព្យួរ​ការងារ​កម្មករ រយៈពេល​ខ្លី។

កម្មការិនី​ផ្នែក​អូស​ក្រណាត់ នៅ​រោងចក្រ ស៊ិចផ្លាស (Six Plus) នៅ​ខេត្ត​កណ្ដាល លោកស្រី ប៉ក់ សេងហ៊ាង ឱ្យ​ដឹង​ថា នៅ​រោងចក្រ​ស៊ិចផ្លាស ថៅកែ​សម្រេច​ព្យួរ​ការងារ​កម្មករ​ទាំង​អស់ គឺ​ជិត​បី​ពាន់ (២ ៧០០)​នាក់ ចំនួន​៥​ថ្ងៃ ដោយហេតុថា គ្មាន​វត្ថុធាតុដើម កាត់ដេរ។

កម្មការិនី​រូប​នេះ ប្រាប់​ថា នៅ​ខែ​បន្តបន្ទាប់ ថៅកែ​នឹង​ប្រកាសប្រាប់ អំពី​លទ្ធភាព​វិសាលភាព​ការងារ ឬ​ត្រូវ​ព្យួរ​ការងារ​បន្ថែម​ទៀត គឺ​អាស្រ័យ​ថា មាន​ក្រណាត់ ឬ​វត្ថុធាតុដើម ឬ​អត់​។ លោកស្រី​ថា រោងចក្រ​ស៊ិចផ្លាស ចាប់ផ្ដើម​អស់​អីវ៉ាន់​ដេរ​ខ្លាំង តាំងពី​ដើម​ឆ្នាំ​២០២០​មក៖ «ចា​! អីវ៉ាន់​មក​អត់​ទាន់ ផ្គត់ផ្គង់​អត់​ទាន់ អត់​មាន​ឥវ៉ាន់​ធ្វើ​ផង ឥឡូវនេះ រង្វើលៗ មែនទែន​ហ្មង​ណា​។ យូរៗ បាន​ធ្វើ​មួយ​បន្តិច មួយ​ចប (Job) ៗ អ៊ីចឹង​ណា អត់​មាន​អីវ៉ាន់​ធ្វើ​ផង​។ អើយ​! ខ្ញុំ​ជា​កម្មករ​នេះ ប៉ះពាល់​ខ្លាំង​ហ្មង ជីវភាព​អត់​គ្រប់គ្រាន់ ហូបចុក អត់​គ្រប់គ្រាន់ លុយ​កូន​ទៅ​រៀន អត់​គ្រប់គ្រាន់​។ និយាយ​ទៅ ពិបាក​មួយ​ចប់​តែម្ដង​ណា ពេល​មាន​បញ្ហា​អ៊ីចឹង»

ចំណែក​នៅ​តាម​រោងចក្រ​ខ្លះ​ទៀត មិន​ប្រកាស​ផ្អាក​សកម្មភាព និង​ព្យួរ​កិច្ចសន្យា​កម្មករ​ទាំងស្រុង​ទេ តែ​ព្យួរ​កិច្ចសន្យា​ពាក់កណ្ដាល ធ្វើ​ការងារ​ពាក់កណ្ដាល (​ស៊ី​៥០%) និង​រោងចក្រ​ខ្លះ ផ្លាស់​វេន​គ្នា​ធ្វើការ។

កម្មការិនី​ម្នាក់ ធ្វើការ​នៅ​រោងចក្រ​កាត់ដេរ​សំលៀកបំពាក់ កាលីស្ដូ អែបភីរែល (Callisto Apparel) នៅ​ខណ្ឌ​ព្រែកព្នៅ រាជធានី​ភ្នំពេញ លោកស្រី ហល់ ស្រីម៉ៅ ឱ្យ​ដឹង​ថា ថៅកែ​នៅ​រោងចក្រ​ដែល​លោកស្រី ចាប់ផ្ដើម​បែងចែក​ឱ្យ​កម្មករ​ផ្លាស់​វេន​គ្នា ឈប់​សម្រាក​បន្ថែម ដោយសារ គ្មាន​វត្ថុធាតុដើម​សម្រាប់​ដេរ។ រោងចក្រ​នេះ មាន​កម្មករ ជាង​មួយ​ពាន់​នាក់​។ តែ​យ៉ាងណា លោកស្រី ថា ថៅកែ សន្យា​ផ្ដល់​ប្រាក់​ឈ្នួល​ឱ្យ​៥០​ភាគរយ សម្រាប់​ការ​ព្យួរ​ការងារ មួយ​សប្ដាហ៍​២​ថ្ងៃ៖ «អត់​សូវ​មាន​អីវ៉ាន់​ចូល​អ៊ីចឹង គេ​ដូរ​ឈប់​ជា​ក្រុម ដូច​ថា មួយ​អាទិត្យ​អ៊ីចឹង ឈប់​៣​ក្រុម ឈប់​រយៈពេល​២​ថ្ងៃ ចូល​ធ្វើការ​វិញ ហើយ​ដូរ​ទៅ​ក្រុម​ផ្សេងទៀត វា​ចល័ត​ក្រុម​រហូត​អ៊ីចឹង​ណា​បង​។ គេ​អត់​ឱ្យ​ឈប់​ម្ដង​ទាំងអស់​ទេ គេ​ខ្លាច​កម្មករ​ក្នុង​រោងចក្រ​ហ្នឹង​ឈប់​។ ដល់ពេល​អ៊ីចឹង​ទៅ គេ​ឱ្យ​ឈប់​ម្នាក់​ម្ដងៗ អ៊ីចឹង​ណា​។ មួយ​អាទិត្យ មាន​បី​ក្រុម មួយ​ក្រុម​មាន​២៨​នាក់ ទៅ​៣០​នាក់ អ៊ីចឹង​ណា​បង​។ វា​តាម​ក្រុម មាន​គ្នា​តិច មាន​គ្នា​ច្រើន​។ ខ្ញុំ​ឈប់​ស្អែក​ហ្នឹងហើយ ឈប់​ថ្ងៃ​សុក្រ ថ្ងៃ​សៅរ៍​។ ទើបតែ​(​ចាប់ផ្ដើម​អនុវត្ត​) ឈប់ អាទិត្យ​ហ្នឹង​តើ​បង»

សមាគម​រោងចក្រ​កាត់ដេរ​នៅ​កម្ពុជា និង​លោកនាយក​រដ្ឋមន្ត្រី ហ៊ុន សែន បាន​ប្រកាស​ថា កម្មករ​ធ្វើការ​នៅ​តាម​រោងចក្រ នឹង​ប្រឈម​បញ្ហា​គ្មាន​ការងារ​ធ្វើ​រយៈពេល​ខ្លី ដោយសារតែ​រោងចក្រ​ផលិត​វត្ថុធាតុដើម នៅ​ក្នុង​ប្រទេស​ចិន ផ្អាក​ដំណើរការ​បណ្ដោះអាសន្ន ព្រោះ​ប្រឈម ជំងឺ​រលាក​ផ្លូវ​ដង្ហើម​កូវិត​១៩ (Covid-19)​។​

 

សមាគម​រោងចក្រ​កាត់ដេរ​នៅ​កម្ពុជា ប្រកាស​ព័ត៌មាន​ថា វត្ថុធាតុដើម ក្នុង​ស្ដុក​សម្រាប់​ផលិតកម្ម ក្នុង​វិស័យ​កាត់ដេរ នឹង​ត្រូវ​ប្រើ​អស់​នៅ​សប្ដាហ៍​ក្រោយ គឺ​ចុង​ខែ​កុម្ភៈ ឬ​សប្ដាហ៍​បន្តបន្ទាប់​។ ហេតុ​នេះ រោងចក្រ​មួយ​ចំនួន នឹង​គ្មាន​វត្ថុធាតុដើម សម្រាប់​ផលិតកម្ម នៅ​ចុងខែ​កុម្ភៈ និង​ខែ​មេសា។

ទោះ​យ៉ាងណា សមាគម​ថៅកែ​រោងចក្រ និង​លោកនាយក​រដ្ឋមន្ត្រី ហ៊ុន សែន ប្រកាស​អះអាង​ដូចគ្នា​ថា ការ​ផ្អាក​សកម្មភាព​រោង​ចក្រ​បណ្ដោះអាសន្ន​នេះ មិន​ពាក់ព័ន្ធ​នឹង​ការ​ដក​ប្រព័ន្ធ​អនុគ្រោះ​ពន្ធ EBA (២០%) របស់​សហភាព​អឺរ៉ុប​ឡើយ៖ «ប្រសិនបើ​មានការ​បិទ​រោងចក្រ​ណាមួយ មិនមែន​មកពី​បញ្ហា អា EBA ហ្នឹង​ទេ​។ នៅ​ពេល​ខាងមុខ ចាំ​មើល​ទៅ បើ​ទោះ​បី​ជា​មាន ឬ​គ្មាន អា​EBA ព្រោះ​អាច​នឹង​វត្ថុធាតុដើម មួយ​ចំនួន ដែល​កំពុងតែ​យក​មក​ដេរ​នៅ​ស្រុក​ខ្មែរ រួចហើយ​បន្ត​នាំ​ចេញទៅ​។ យើង​អត់​សាច់​ក្រណាត់ តើ​យើង​បាន​អ្វី​ដេរ​? ដូច្នេះ​កម្មករ ច្បាស់​ជា​ជួបប្រទះ​បញ្ហា ខ្វះ​ការងារ​ធ្វើ»

ប្រធាន​សហជីព​រោងចក្រ​ឯករាជ្យ​កម្លាំង​សាមគ្គី​កម្មករ ប្រចាំ​រោងចក្រ​ស៊ិកផ្លាស (Six Plus) លោក ម៉ៃ ប៊ុនហៃ អះអាង​ថា រោងចក្រ​ស៊ិចផ្លាស គ្មាន​វត្ថុធាតុដើម ឱ្យ​កម្មករ​ដេរ​យូរ​ខែ​មក​ហើយ ដោយ​កម្មករ​នៅ​តាម​អគារ​ខ្លះ ធ្វើការ​ក្នុង​ក្របខ័ណ្ឌ​កិច្ចសន្យាការងារ​ពាក់កណ្ដាល គឺ​ទទួល​បាន​ប្រាក់​ឈ្នួល​៥០​ភាគរយ ច្រើន​ខែ​ហើយ៖ «អត់​មាន​អ្វី​ធ្វើ​មែន ដោយសារតែ​រាល់ថ្ងៃ​ហ្នឹង យើង​ចេញ​ម៉ោង​៤​កន្លះ​ហ្នឹង​មួយ​ខែ​ហើយ​។ មាន​ន័យថា យើង​ធ្វើ​ម៉ោង​៧​ព្រឹក ចេញ​ម៉ោង​៤​កន្លះ​ល្ងាច ហើយ​ឥឡូវ​ហ្នឹង អត់​មាន​អ្វី​ធ្វើ​មែន ដោយសារ​មាន​អគារ​ខ្លះ គាត់​ស៊ី​៥០​ភាគរយ ពី​មុន​មក គឺ​មាន​២​បី​ថ្ងៃ មាន​រហូតដល់​កន្លះ​ខែ​អ្វី​នោះ អគារ​ខ្លះ​ដែល​អត់​មានការ​ងារ​ធ្វើ​អ៊ីចឹង​ណា​។ តែ​ឥឡូវនេះ ក្រុមហ៊ុន​ជជែក​ហ្នឹង គឺ​ទាំងអស់​គ្នា​។ ក្រុមហ៊ុន​គាត់​ថា គាត់​អត់​មានលទ្ធភាព​ក្នុង​ការជូន​៥០​ភាគរយ អ៊ីចឹង​ណា​បង»

សម្រាប់​ការព្យួរ​កិច្ចសន្យាការងារ​៥​ថ្ងៃ នៅ​រោងចក្រ ស៊ិចផ្លាស លោក ម៉ៃ ប៊ុនហៃ និយាយ​ថា បាន​ប្រជុំ​ជាមួយ​ភាគី​ថៅកែ ៤​ដង​ហើយ ដោយ​ថៅកែ​សម្រេច​ថា នឹង​ផ្ដល់​ប្រាក់​ឈ្នួល​៥០​ភាគរយ សម្រាប់​ការ​ព្យួរ​ការងារ​២​ថ្ងៃ​កន្លះ ឯ​២​ថ្ងៃ​កន្លះ​ទៀត កម្មករ​ជា​អ្នក​ខាត ព្រោះ​ថៅកែ ឱ្យ​ចាត់​ចូល​ក្នុង​ថ្ងៃ​ឈប់សម្រាក ប្រចាំ​ឆ្នាំ​របស់​កម្មករ។

តាំងពី​មានការ​ប្រកាស​របស់​រដ្ឋាភិបាល និង​សមាគម​រោងចក្រ​កាត់ដេរ​មក មិន​មាន​របាយការណ៍ ឬ​តួលេខ​ជាក់​លាក់​ណា បង្ហាញ​ថា មាន​រោងចក្រ​ចំនួន​ប៉ុន្មាន​ហើយ បាន​ជូនដំណឹង​ពី​ការ​ផ្អាក​សកម្មភាព រយៈពេល​ខ្លី ដោយសារ​បញ្ហា​គ្មាន​វត្ថុ​ធាតុដើម។

អាស៊ីសេរី មិន​អាច​សុំ​ការ​បញ្ជាក់​បន្ថែម​ពី​អ្នកនាំពាក្យ​ក្រសួង​ការងារ លោក ហេង សួរ បាន​ទេ នៅ​ថ្ងៃ​ទី​១៣ កុម្ភៈ ដោយសារ​ទូរស័ព្ទ​រោទ៍​ច្រើនដង គ្មាន​អ្នក​ទទួល។

អ្នកគ្រប់គ្រង​កម្មវិធី​សិទ្ធិ​ការងារ នៃ​មជ្ឈមណ្ឌល​សម្ពន្ធភាព​សិទ្ធិមនុស្ស និង​ការងារ លោក ឃុន ថារ៉ូ ឱ្យ​ដឹង​ថា ខាង​លោក​ទទួល​បាន​ដំណឹង​ថា មាន​រោងចក្រ​ជាង​១០​ហើយ មាន​គម្រោង​ប្រកាស​ផ្អាក​សកម្មភាព រយៈពេល​ខ្លី ហើយ​ក្នុង​នោះ មាន​៣​រោងចក្រ បាន​ជូនដំណឹង​ប្រាប់​កម្មករ​រួចហើយ​។ លោក​ពន្យល់​ថា ការ​សម្រេច​ផ្អាក​បណ្ដោះអាសន្ន និង​ព្យួរ​កិច្ចសន្យាការងារ​កម្មករ លុះត្រាតែ​មានការ​យល់ព្រម​ពី​ក្រុម​អធិការកិច្ច​នៃ​ក្រសួង​ការងារ ទើប​អាច​ធ្វើ​ទៅ​បាន ហើយ​ថៅកែ​មាន​កាតព្វកិច្ច បើកប្រាក់​ឈ្នួល​៥០​ភាគរយ ឱ្យ​កម្មករ និយោជិក សម្រាប់​រយៈពេល​នៃ​ការ​ព្យួរ​ការងារ។

លោក ឃុន ថារ៉ូ ថា មាន​មូលហេតុ​២ បណ្ដាល​ឱ្យ​មានការ​ព្យួរ​ការងារ​របស់កម្មករ គឺ​បញ្ហា​ការ​ដក​ប្រព័ន្ធ​អនុគ្រោះ​ពន្ធ នាំ​ចេញទៅ​អឺរ៉ុប (EBA) សម្រាប់​វិស័យ​កាត់ដេរ និង​បញ្ហា​ខ្វះ​វត្ថុធាតុដើម​។ លោក ឃុន ថារ៉ូ អះអាង​ថា រោងចក្រ​តូចៗ ឬ​រោងចក្រ​ប្រភេទ​ម៉ៅការ​បន្ត​ខ្លះ បាន​ប្រឈម​ការ​បិទទ្វារ ឬ ប្រឈម​ការ​ផ្អាក​សកម្ម​ភាព តាំងពី​ចុង​ឆ្នាំ​២០១៨​មក​ម្ល៉េះ ហើយ​វា​គាប់​ជួន ខ្វះ​វត្ថុធាតុដើម​នៅ​ពេល​នេះ៖ «អាហ្នឹង​រឿង​ទី​១ អ៊ីចឹង​នៅ​ពេល​ដែល​គណៈកម្មការ​អឺរ៉ុប ហ្នឹង​បានសម្រេច​នីតិវិធី​នៅ​ក្នុង​ការ​ឈាន​ទៅដល់​ការសម្រេច​ព្យួរ​ហ្នឹង គឺ​មាន​តាំងពី​ដើម​ឆ្នាំ​២០១៨​មក​ម្ល៉េះ​។ ចំណុច​ទី​២ ដោយសារ​វា​មាន​ភាព​ចៃដន្យ វិបត្តិ​សង្គម វីរុស​កូរ៉ូណា ហ្នឹង​ទៅ យើង​ឃើញ​ថា វិស័យ​កាត់ដេរ​នៅ​ក្នុង​ប្រទេស​កម្ពុជា​ហ្នឹង គឺ​វា​ពឹងផ្អែក​ទៅលើ​រូបធាតុ​ដើម»

កម្មការិនី រោងចក្រ និយាយ​ថា បើ​ទោះ​ការ​ព្យួរ​ការងារ រយៈពេល​ខ្លី ឬ​រយៈពេល​វែង សុទ្ធតែ​ប៉ះពាល់​ដល់​ជីវភាព​ប្រចាំថ្ងៃ​។ ពួកគេ​ព្រួយចិត្ត​ថា ប្រសិនបើ ការ​ព្យួរ​ការងារ អូស​បន្លាយ​ពេល​វែង នឹង​ធ្វើ​ឱ្យ​ពួកគាត់ កាន់តែ​លំបាក គ្មាន​ផ្ញើ​ទៅ​ឱ្យ​គ្រួសារ នៅ​ស្រុកកំណើត ថ្លៃ​បន្ទប់​ជួល ទឹក​ភ្លើង និង​ជំពាក់​បំណុល​ធនាគារ៕

ព័ត៌មាន (0)
Share
គេហទំព័រ​ទាំងមូល