សហភាពអឺរ៉ុប និងអង្គការអន្តរជាតិចំនួន៣ កំពុងជួយរដ្ឋាភិបាលពង្រឹងប្រព័ន្ធគាំពារសង្គមនៅកម្ពុជា។ អង្គការទាំង៣នោះរួមមានអង្គការអន្តរជាតិខាងការងារ (ILO) អង្គការអុកស្វាម (Oxfam) និងមូលនិធិសហប្រជាជាតិសម្រាប់កុមារ ឬយូនីសេហ្វ (UNICEF)។
សហភាពអឺរ៉ុប និងអង្គការទាំង៣នេះកំពុងអនុវត្តគម្រោងគាំទ្រដល់រដ្ឋាភិបាល ក្នុងការកែទម្រង់ប្រព័ន្ធគាំពារសង្គម ដែលមានគោលបំណងរួមចំណែកដល់ការឆ្លើយតបភ្លាមៗចំពោះជំងឺកូវីដ-១៩ និងគាំទ្រការអនុវត្តក្របខណ្ឌគោលនយោបាយជាតិគាំពារសង្គម។
ការគាំទ្រនេះផ្ដល់តាមរយៈគម្រោងចំនួន២ ដែលរួមមាន គម្រោងលើកកម្ពស់ប្រព័ន្ធគាំពារសង្គម និងឆ្លើយតបគ្រោះអាសន្នដល់មនុស្សគ្រប់គ្នា ហៅកាត់ថាហ្វើសតិ៍(First) និងគម្រោងលើកកម្ពស់សេវាគាំពារសង្គមនៅកម្ពុជា។
គម្រោងហ្វើសតិ៍នេះ អង្គការអុកហ្វាម ដែលទទួលបានជំនួយឥតសំណងពីសហភាពអឺរ៉ុបចំនួន ១លាន ៨សែនអឺរ៉ូ (១,៨ លាន) កំពុងធ្វើការជាមួយដៃគូចំនួន១១ មានអង្គការសង្គមស៊ីវិល សហជីព និងសមាគមក្នុងស្រុក និងបន្តរហូតដល់ឆ្នាំ២០២៣។ ចំណែកគម្រោងទី២វិញ ទទួលបានទឹកប្រាក់ជិត ៥លាន ៦សែនអឺរ៉ូ (៥,៦លាន) ដឹកនាំដោយក្រុមប្រឹក្សាជាតិគាំពារសង្គម អនុវត្តដោយអង្គការ ILO និងយូនីសេហ្វ រហូតដល់ឆ្នាំ២០២៤។
សហភាពអឺរ៉ុប សន្យាថា នឹងបន្តផ្តល់ការគាំទ្ររបស់ខ្លួនដើម្បីជួយដល់រដ្ឋាភិបាលកម្ពុជាក្នុងការសម្រេចបាននូវវត្ថុបំណងយូរអង្វែងនៃការពង្រីកការផ្តល់ប្រព័ន្ធគាំពារសង្គមដល់មនុស្សគ្រប់គ្នា ជាពិសេសក្នុងចំណោមកម្មករនិយោជិតនិងពលរដ្ឋងាយរងគ្រោះដែលជាផ្នែកមួយនៃការចូលរួមចំណែកកាត់បន្ថយភាពក្រីក្រនិងវិសមភាពក្នុងសង្គម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។