មន្ត្រីសង្គមស៊ីវិល និងអ្នកបរិស្ថានជំរុញទៅរដ្ឋាភិបាលពន្លឿននាំយកប្រេងឆៅមកកម្ពុជាវិញ
2021.12.25
ក្រុមហ៊ុនប្រេង គ្រីសអែណឺជី (KrisEnergy) ដែលកាលពីដាច់ឆ្នាំ២០២០ បូមបានតំណក់ប្រេងដំបូងនៅកម្ពុជា ឥឡូវប្រកាសក្ស័យធនហើយ។
រូប៖ KrisEnergy
អ្នកធ្វើការងារផ្នែកបរិស្ថាន និងមន្ត្រីសង្គមស៊ីវិលជំរុញទៅរដ្ឋាភិបាលពន្លឿនការចរចានាំយកប្រេងឆៅមកកម្ពុជាវិញ ខណៈសំណុំរឿងបានអូសបន្លាយជិត៣ខែមកហើយ ។ ឆ្លើយតបការលើកឡើងនេះ មន្ត្រីរដ្ឋាភិបាលនិយាយថា សំណុំរឿងនេះមានភាពស្មុគស្មាញដែលអាចប្រើពេលយូរដើម្បីអាចយកប្រេងនោះមកកម្ពុជាវិញបាន។
គិតមកដល់ពេលនេះប្រេងឆៅកម្ពុជាជិត ៣០ ម៉ឺនធុង មានតម្លៃលើសពី២០លានដុល្លារ ដែលត្រូវបាននាវាឈ្មោះ ស្ត្រូវ៉ូឡូស (Strovolos) ដឹកចេញពីកម្ពុជានោះ មិនទាន់មានតម្រុយណាមួយថានឹងអាចបញ្ជូនមកកម្ពុជាក្នុងពេលណាឲ្យប្រាកដនៅឡើយទេ។ ចំណែកព័ត៌មាននៃការវិវឌ្ឍឬការចរចារវាងរដ្ឋាភិបាលកម្ពុជា និងឥណ្ឌូណេស៊ី នោះ ក៏មិនទាន់ត្រូវបានរដ្ឋាភិបាលបង្ហាញឲ្យដឹងនោះដែរ។
សកម្មជនបរិស្ថានកញ្ញា ភួន កែវរស្មី ដែលធ្លាប់ជាប់ពន្ធនាគារព្រោះកិច្ចការពារបរិស្ថាន យល់ថា បញ្ហាដែលកើតឡើងដូចសព្វថ្ងៃនេះ បណ្ដាលមកពីការគ្រប់គ្រងធនធានមិនល្អរបស់រដ្ឋាភិបាល។ សកម្មជនបរិស្ថានរូបនេះ សង្ឃឹមថា រដ្ឋាភិបាលនឹងប្រឹងប្រែងទាមទារយកប្រេងឆៅទាំងនោះមកកម្ពុជាវិញក្នុងពេលឆាប់ៗនេះដើម្បីបំរើប្រយោជន៍ជាតិ៖ «មើលថែរក្សាវា(ប្រេងឆៅ)ឲ្យបានល្អឬក៏យកវាមកអភិវឌ្ឍន៍ឲ្យបានល្អទេ បែរជាមានការធ្វេសប្រហែស ឲ្យគេលួចយកទៅបាត់រហូតមកដល់ឥឡូវអត់ទាន់ឃើញមានការចរចាណាមួយមានប្រសិទ្ធភាពអាចយកប្រេងនោះវិញសម្រាប់ប្រជាពលរដ្ឋខ្មែរ»។
ស្រដៀងគ្នានេះដែរ នាយកប្រតិបត្តិមជ្ឈមណ្ឌលប្រជាពលរដ្ឋដើម្បីការអភិវឌ្ឍន៍និងសន្តិភាព លោក យង់ គិមអេង ព្រួយបារម្ភថា ប្រេងឆៅនេះអាចនឹងត្រូវបាត់បង់ បើនៅមានការអូសបន្លាយពេលវេលារាប់ខែបែបនេះទៀត។ លោកជំរុញទៅរដ្ឋាភិបាល បង្ហាញពីកិច្ចប្រឹងប្រែងរបស់ខ្លួនក្នុងការទាមទារប្រេងនេះ៖ «ជាការព្រួយបារម្ភថាតើមានករណីលួចអ៊ីចឹងយើងមិនចេះតាមដានត្រឹមត្រូវយើងមិនបានស្នើសុំយកមកវិញទេ ជារឿងមួយយើងមានការព្រួយបារម្ភសម្រាប់ការបាត់បង់ជាបន្តបន្ទាប់ថ្លៃក្រោយទៀត»។
ជុំវិញបញ្ហានេះ អ្នកនាំពាក្យរដ្ឋាភិបាល លោក ផៃ ស៊ីផាន និយាយថា លោកស្វាគមន៍ការលើកឡើងរបស់មន្ត្រីសង្គមស៊ីវិល ព្រោះរដ្ឋាភិបាលក៏មានជំហរនាំយកប្រេងឆៅទាំងនោះមកកម្ពុជាឲ្យបានលឿនដែរ។ ទោះយ៉ាងណា លោកថា សំណុំរឿងនេះអាចនឹងត្រូវប្រើពេលយូរបន្តិចព្រោះជាករណីស្មុគស្មាញ និងជាប់ទាក់ទងនឹងការសម្រេចរបស់តុលាការនៅប្រទេសឥណ្ឌូណេស៊ីផង៖ «ស្ថិតក្នុងការប្ដឹងប្ដល់របស់តុលាការទឹកដៃកប៉ាល់ហ្នឹងចតដែលគេចាប់នៅប្រព័ន្ធតុលាការឥណ្ឌូណេស៊ីម្ល៉ោះហើយយើងអត់សិទ្ធិអូសកប៉ាល់មកវិញនៅឡើយទេ»។
ទោះមានការលើកឡើងបែបនេះក្ដី ក្រុមអ្នកឃ្លាំមើលសង្ស័យថា រឿងករណីកប៉ាល់លួចប្រេងឆៅកម្ពុជានេះ អាចជាប់ទាក់ទងនឹងអំពើពុករលួយរបស់រដ្ឋាភិបាលលោក ហ៊ុន សែន ទើបភាគីកម្ពុជាបង្ហាញព័ត៌មានតិចតួច និងពេលខ្លះផ្ដល់ដំណឹងមិនច្បាស់លាស់ថែមទៀតផង។ អាជ្ញាធរឥណ្ឌូណេស៊ីធ្លាប់អះអាងថា ការប្រគល់ប្រេងឆៅឱ្យកម្ពុជាវិញនោះ គឺត្រូវមានការសម្រេចដោយដោយតុលាការប្រទេសនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
រឿងដែលគេអានច្រើនបំផុត
RFA
- លោកស្រី សំ សុខា អតីតអ្នកជាប់ឃុំករណីគប់ស្បែកជើងលើរូបលោក ហ៊ុន សែន ស្នើលោកឱ្យពិចារណាកំហុសរបស់ខ្លួនឡើងវិញថា ហេតុអ្វីបានជាពលរដ្ឋគប់ស្បែកជើងដាក់លោក
- លោក ហ៊ុន សែន បន្តឌឺដងដាក់សហភាពអឺរ៉ុបរឿងដក EBA
- បទសម្ភាសន៍៖ អំពីលទ្ធផលទស្សនកិច្ចលោក សម រង្ស៊ី ទៅប្រទេសអូស្ត្រាលី និងបច្ចុប្បន្នភាពនយោបាយ
- លោក ហ៊ុន សែន មិនឱ្យរៀបចំព្រះរាជពិធីច្រត់ព្រះនង្គ័លទេ នៅឆ្នាំ២០២២នេះ
- ទស្សនជុំវិញពលរដ្ឋខ្មែរអាមេរិកកាំងយកស្បែកជើងគប់លោក ហ៊ុន សែន ក្នុងពេលជួបអ្នកគាំទ្រនៅអាមេរិក
