ក្រុមអង្គការក្រៅរដ្ឋាភិបាលខ្លះដែលធ្វើការផ្នែកសិទ្ធិមនុស្ស និងអភិវឌ្ឍន៍ នៅខេត្តឧត្តរមានជ័យ ឱ្យដឹងថា កម្មករខ្មែរជាច្រើននាក់ដែលថៃ បានបញ្ជូនត្រឡប់មកវិញ កំពុងជួបប្រទះភាពគ្មានការងារធ្វើ ហើយប្រឈមមុខនឹងជីវភាពខ្វះខាតប្រចាំថ្ងៃ។
ដោយសារបញ្ហានេះ កម្មករភាគច្រើននៅតែមានបំណងចូលទៅប្រទេសថៃ ដើម្បីរកការងារធ្វើជាថ្មី ដោយពួកគេមិនអាចទ្រាំរស់នៅក្នុងស្ថានភាពខ្វះខាតបែបនេះឡើយ។
អាជ្ញាធរខេត្តឧត្តរមានជ័យ ដែលមានព្រំដែនជាប់ខេត្តសុរិន្ទ និងខេត្តបូរីរ៉ាំ របស់ថៃ ឱ្យដឹងថា គេកំពុងប្រឹងប្រែងបង្កើតមជ្ឈមណ្ឌលបណ្ដុះបណ្ដាលជំនាញកសិកម្មមួយ ដើម្បីជួយដល់កម្មករខ្មែរដែលបានបញ្ជូនត្រឡប់ពីប្រទេសថៃ ទាំងឡាយណាដែលមិនចង់ចូលទៅធ្វើការនៅប្រទេសថៃ តទៅទៀតនោះ។
មជ្ឈមណ្ឌលមួយកំពុងចាប់ផ្ដើមសាងសង់ ដើម្បីរៀបចំបណ្ដុះបណ្ដាលជំនាញដល់អ្នកភូមិខ្មែរ ឱ្យមានជំនាញផ្នែកដាំដុះ និងចិញ្ចឹមសត្វ ហើយអាចរកកម្រៃបានប្រសើរ ដោយមិនចាំបាច់ធ្វើចំណាកស្រុកទៅរកការងារធ្វើនៅប្រទេសថៃ ដូចកាលពីមុនទៀតឡើយ។
នាយករដ្ឋបាលសាលាខេត្តឧត្តរមានជ័យ គឺលោក ហោ ជិនវិរៈយុទ្ធ។ លោកមានប្រសាសន៍ថា អាជ្ញាធរខេត្តឧត្ដរមានជ័យ បានបង្កើតក្រុមការងារមួយ ដើម្បីចុះពិនិត្យមើលស្ថានភាពកម្មករខ្មែរដែលត្រឡប់មកពីប្រទេសថៃ វិញ។ ការចុះពិនិត្យនោះ គឺអាជ្ញាធរក៏ចង់ជួយលើកស្ទួយដល់ប្រជាពលរដ្ឋណាដែលមិនចង់ចំណាកស្រុក ទៅរកការងារធ្វើនៅប្រទេសថៃ ជាថ្មីទៀត តាមរយៈការជួយបង្ហាត់បង្រៀនជំនាញកសិកម្ម។ លោក ហោ ជិនវិរៈយុទ្ធ បញ្ជាក់ទៀតថា បច្ចុប្បន្ន អាជ្ញាធរខេត្តឧត្តរមានជ័យ កំពុងសហការជាមួយអង្គការក្រៅរដ្ឋាភិបាលជាច្រើន ដើម្បីធ្វើការងារផ្នែកជំនាញកសិកម្មនេះ៖ «ខេត្តយើងបានយកចិត្តទុកដាក់ មានក្រុមការងារចុះតាមក្រុងស្រុកណែនាំគាត់ រហូតដល់ឥឡូវ យើងជំរុញឱ្យមានការបណ្ដុះបណ្ដាលវិជ្ជាជីវៈនៅនឹងខេត្តតែម្ដង។ សំដៅទៅលើវិជ្ជាជីវៈផ្នែកកសិកម្ម ហើយនៅក្នុងហ្នឹង យើងមានអង្គការមួយចំនួនកំពុងតែធ្វើកិច្ចការហ្នឹងហើយ»។
បន្ថែមលើការបង្កើតមជ្ឈមណ្ឌលបណ្ដុះបណ្ដាលជំនាញកសិកម្មនេះ អាជ្ញាធរខេត្តឧត្តរមានជ័យ ក៏កំពុងជំរុញឱ្យមន្ទីរការងារ និងបណ្ដុះបណ្ដាលវិជ្ជាជីវៈ ប្រឹងប្រែងរៀបចំឯកសារនានា សម្រាប់ឱ្យកម្មករជាច្រើនទៀតដែលត្រូវការចូលទៅរកការងារធ្វើ ឯប្រទេសថៃ ជាថ្មីដែរ។
អាជ្ញាធរខេត្តឧត្តរមានជ័យ ឱ្យដឹងថា ចាប់តាំងពីប្រទេសថៃ បញ្ជូនកម្មករខ្មែរត្រឡប់មកវិញកាលពីដើមខែមិថុនា គឺមានកម្មករខ្មែរជាង ១ម៉ឺន ២ពាន់នាក់ ត្រូវបានបញ្ជូនតាមច្រកទ្វារព្រំដែនអូស្មាច់ ក៏ប៉ុន្តែចំនួននេះមិនមែនសុទ្ធតែជាប្រជាពលរដ្ឋរស់នៅក្នុងខេត្តឧត្តរមានជ័យ ទាំងអស់ទេ។ អាជ្ញាធរមូលដ្ឋាន និងក្រុមអង្គការក្រៅរដ្ឋាភិបាលខ្លះ រកឃើញថា ចាប់តាំងតែពីប្រទេសថៃ ចាប់បញ្ជូនកម្មករខ្មែរត្រឡប់មកវិញ គឺកម្មករខ្លះដែលមករស់នៅតាមភូមិនាខេត្តឧត្តរមានជ័យ មានស្ថានភាពគ្រួសារយ៉ាប់យ៉ឺន ដោយសារតែជំពាក់បំណុល និងគ្មានការងារធ្វើ។
មេឃុំគោកមន នៃស្រុកបន្ទាយអំពិល លោក អួន វី មានប្រសាសន៍ថា អ្នកភូមិរបស់លោកដែលជាកម្មករចំនួនប្រមាណ ៣០០នាក់ ត្រូវប្រទេសថៃ បញ្ជូនត្រឡប់មកវិញ។ ក្នុងចំណោមកម្មករទាំងនោះ ភាគច្រើន គឺជាអ្នកមានដីស្រែ និងចម្ការ ប៉ុន្តែពួកគេចូលទៅធ្វើការក្នុងប្រទេសថៃ គ្រាន់តែរកប្រាក់កម្រៃបន្ថែម។ ទោះយ៉ាងណា លោកមេឃុំទទួលស្គាល់ថា ក្នុងចំណោមកម្មករទាំងនោះក៏មានខ្លះជាគ្រួសារទីទ័លក្រមែនទែន។ ក្រុមអ្នកទីទ័លគ្មានដីស្រែ និងចម្ការទាំងនោះ នឹងមិនអាចទ្រាំរស់នៅដោយគ្មានការងារធ្វើបានទេ គឺពួកគេកំពុងធ្វើបែបបទចេញទៅធ្វើការនៅប្រទេសថៃ ជាថ្មីជាបន្តបន្ទាប់៖ «អ្នកអត់មានគាត់ត្រឡប់ទៅវិញអស់ហើយ ក៏ប៉ុន្តែអត់ច្រើនទេ។ គាត់បានលិខិតឆ្លងដែនគាត់ទៅវិញខ្លះ ក៏ប៉ុន្តែអ្នកខ្លះមិនទាន់បានទៅ ភាគតិចណាស់ដែលត្រឡប់ទៅវិញ គាត់រង់ចាំលិខិតឆ្លងដែនធ្លាក់មកសិន»។
អ្នកសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តឧត្តរមានជ័យ លោក ស្រី ណារ៉េន ឱ្យដឹងថា កម្មករខ្មែរខ្លះដែលរដ្ឋាភិបាលថៃ បញ្ជូនត្រឡប់មកវិញ គឺកំពុងរស់នៅក្នុងជីវភាពក្រីក្រ និងលំបាក។ លោក ស្រី ណារ៉េន បញ្ជាក់ថា នៅជិតផ្ទះរបស់លោកមានប្ដីប្រពន្ធ១គ្រួសារ ទើបតែវិលត្រឡប់ពីប្រទេសថៃ គឺមិនមានការងារធ្វើទេ។ ជារៀងរាល់ថ្ងៃ ប្ដីប្រពន្ធនោះតែងនាំគ្នាដើរទិញអេតចាយដើម្បីបានប្រាក់កម្រៃចិញ្ចឹមជីវិត៖ «ពីមុនមកគាត់ទៅថៃ តែឥឡូវទំនេរ គាត់ទៅរកទិញអេតចាយទិញអី។ គាត់មិនទាន់ធ្វើលិខិតឆ្លងដែនបាន ដល់អ៊ីចឹងគាត់មានមុខរបរគាត់ចេះតែរកតិតក់នៅស្រុកខ្មែរទៅ»។
អង្គការអភិវឌ្ឍន៍កុមារ ដែលហៅកាត់ថា ស៊ី.ឌី.អេ (CDA) ក្នុងខេត្តឧត្តរមានជ័យ គឺជាផ្នែកមួយនៃគម្រោងជួយដល់ជីវភាពកម្មករក្រីក្រខ្លះ ដែលបញ្ជូនត្រឡប់មកពីប្រទេសថៃ ដែរ។ ប្រធានអង្គការអភិវឌ្ឍន៍កុមារ លោក ជី បូរ៉េត មានប្រសាសន៍ថា កន្លងទៅអង្គការរបស់លោកបានចុះពិនិត្យនៅតាមភូមិមួយចំនួនដែលនៅជុំវិញទីក្រុង ហើយបានរកឃើញថា ក្នុងចំណោមកម្មករជាច្រើនដែលប្រទេសថៃ បញ្ជូនត្រឡប់មកវិញ គឺមានខ្លះបានខ្ចីបុលប្រាក់ធនាគារ ដើម្បីទៅរកការងារធ្វើ ក៏ប៉ុន្តែទើបតែធ្វើការបានកន្លះខែ មិនទាន់បានប្រាក់ឈ្នួលផងក៏ត្រូវរដ្ឋាភិបាលថៃ ចាប់បញ្ជូនត្រឡប់មកវិញ។ បញ្ហានេះ ធ្វើឱ្យបន្ទុកគ្រួសាររបស់គេទទួលអម្រែកកាន់តែធ្ងន់ធ្ងរ ដោយសារតែម្ចាស់បំណុលតាមទារ ហើយរកប្រាក់ឱ្យគេមិនបាន។
លោក ជី បូរ៉េត បញ្ជាក់ទៀតថា អង្គការរបស់លោកក៏បានចូលវិភាគទានខ្លះទៅឱ្យគម្រោងជួយបណ្ដុះបណ្ដាលជំនាញកសិកម្ម ដល់កម្មករទាំងនោះ និងម្យ៉ាងទៀត អង្គការរបស់លោកក៏ជាអ្នកជួយបង្ហាត់បង្រៀនដល់គ្រួសារកម្មករមួយចំនួនទៀតដែរ៖ «នៅតាមតំបន់គោលដៅដែលយើងធ្វើការការងារជនចំណាកស្រុកវិលត្រឡប់មកវិញ ក្នុងឃុំបន្សាយរក្ស និងសំរោង យើងមានការបណ្ដុះបណ្ដាលមួយចំនួនដែរ។ យើងមានបង្រៀនអំពីការចិញ្ចឹមសត្វ ចិញ្ចឹមជ្រូក ប៉ុន្តែនៅកន្លែងខ្លះយើងមានបណ្ដុះបណ្ដាលដាំដំណាំ យើងមានផ្ដល់ពូជឱ្យគាត់ដាំសម្រាប់គ្រួសាររបស់គាត់»។
អង្គការក្រៅរដ្ឋាភិបាលដែលកំពុងធ្វើការងារនៅខេត្តឧត្តរមានជ័យ ឱ្យដឹងថា ពេលបច្ចុប្បន្នកម្មករខ្មែរជាច្រើនដែលរដ្ឋាភិបាលថៃ បានបញ្ជូនមកវិញ គឺនៅតែមានបំណងចូលទៅរកការងារធ្វើក្នុងប្រទេសថៃ ទៀត ដោយពួកគេកំពុងប្រឹងប្រែងរៀបចំឯកសារ ដើម្បីទទួលបានលិខិតឆ្លងដែនស្របច្បាប់មួយ។ ក៏ប៉ុន្តែ ក្រុមកម្មករខ្លះទៀតមិនអាចរង់ចាំទទួលលិខិតឆ្លងដែនស្របច្បាប់ទេ ដោយសារតែបញ្ហាជីវភាពខ្វះខាត ពួកគេបាននាំគ្នាឆ្លងដែនខុសច្បាប់ទៅប្រទេសថៃ បាត់ទៅហើយ។
កាលពីថ្ងៃទី៤ ខែកក្កដា កន្លងទៅ អាជ្ញាធរថៃ ខេត្តសុរិន្ទ ធ្លាប់បានរិះគន់អាជ្ញាធរខេត្តឧត្តរមានជ័យ ថាមិនបានផ្ដល់ Border Pass ឱ្យកម្មករខ្មែរដែលចង់ចូលទៅធ្វើការនៅក្នុងប្រទេសថៃ ទាន់ពេលវេលាទេ។ ការរិះគន់នេះ ធ្វើឡើងនៅពេលដែលអាជ្ញាធរថៃ បានបង្កើតមណ្ឌលមួយចំនួនជិតៗព្រំដែន ចាំទទួលយកកម្មករខ្មែរទៅធ្វើការងារឡើងវិញ។
អាជ្ញាធរខេត្តឧត្តរមានជ័យ បានបដិសេធចោលការរិះគន់នេះ ដោយថា គឺអាជ្ញាធរថៃ ទៅវិញទេដែលមិនយល់អំពីបែបបទ ពីព្រោះពាក្យថា Border Pass មិនមែនសម្រាប់ចេញឱ្យកម្មករខ្មែរទូទៅដែលចង់ទៅធ្វើការនៅឯប្រទេសថៃ ឡើយ គឺ border Pass សម្រាប់តែចេញឱ្យប្រជាពលរដ្ឋខ្មែរថៃ ដែលនៅជាប់ព្រំដែនគ្នា ចេញចូលធ្វើការប្រកបរបរចិញ្ចឹមជីវិត មិនអាចស្នាក់នៅបានយូរថ្ងៃឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។