ឧកញ៉ាលោក ឌួង ងៀប ដែលធ្លាប់ចោទប្រកាន់តុលាការថា ពុករលួយបង្ខំឱ្យលោកសូកប៉ាន់នោះ ត្រូវបានសមត្ថកិច្ចចាប់ខ្លួនហើយ។
នគរបាលបានចាប់ខ្លួនលោក ឌួង ងៀប ដែលមានតំណែងជាឧត្តមសេនីយ៍នៃក្រសួងមហាផ្ទៃពាក់ផ្កាយ៣ផងនោះ នៅថ្ងៃទី១៤ ខែកុម្ភៈនេះ ដោយចោទប្រកាន់ ពី«បទឆបោក»និង«បទមិនបំពេញកាតព្វកិច្ចចំពោះឧបករណ៍អាចជួញដូរបានករណីចេញសែកស្អុយ» ឲ្យទៅជនជាតិតៃវ៉ាន់២នាក់ ក្នុងការរកស៊ីបណ្ដាក់ទុនជាមួយគ្នា។
ប្រព័ន្ធផ្សព្វផ្សាយក្នុងស្រុកជាច្រើន (Fresh news, Thmeythmey, Kampuche thmey) បានចុះផ្សាយព្រមៗគ្នាដោយស្រង់សម្តីមន្ត្រីជាន់ខ្ពស់នៃស្នងការដ្ឋាននគរបាលរាជធានីភ្នំពេញ ដោយបញ្ជាក់ថា លោក ឌួង ងៀប ត្រូវចាប់ខ្លួននៅមុខសណ្ឋាគារមួយកន្លែង ក្នុងសង្កាត់អូរបែកក្អម ខណ្ឌសែនសុខ ហើយបានបញ្ជូនទៅតុលាការភ្លាមៗ តាមដីកាបង្គាប់ឲ្យចាប់ខ្លួន។ ប្រភពដដែលបញ្ជាក់ថា ក្រោយបញ្ជូនដល់តុលាការ ចៅក្រមស៊ើបសួរលោក អ៊ឹម វណ្ណៈ បានសម្រេចឃុំលោក ឌួង ងៀប ដាក់ពន្ធនាគាររាជធានីភ្នំពេញ (PJ) បណ្តោះអាសន្ន។
ការចាប់ឃុំខ្លួននេះ ធ្វើឡើង១ថ្ងៃ ក្រោយពេលលោក ឌួង ងៀប បានចេញមកសុំទោសប្រធានសាលាដំបូងរាជធានីភ្នំពេញលោក តាំង ស៊ុនឡាយ ចំពោះការប្រកាសក្នុងន័យថា លោកអស់លុយពីខ្លួនសម្រាប់សូកប៉ាន់ចៅក្រមទៀតហើយ ព្រោះចៅក្រម២នាក់កន្លងមក បានធ្វើឲ្យសំណុំរឿងរបស់លោកប្រែពីសទៅជាខ្មៅ ហើយពួកគេតែងតែជំរិតយកលុយពីលោករាល់ពេល មានការកោះហៅឲ្យចូលតុលាការម្ដងៗ។
ជុំវិញរឿងនេះ វិទ្យុអាស៊ីសេរីមិនអាចសុំការបញ្ជាក់ពីអ្នកនាំពាក្យស្នងការដ្ឋាននគរបាលរាជធានីភ្នំពេញលោក សាន សុខសីហា និងអ្នកនាំពាក្យតំណាងអយ្យការអមសាលារាជធានីភ្នំពេញលោក ប្លង់ សុផល បានទេ នៅថ្ងៃទី១៤ ខែកុម្ភៈ។
សង្គមស៊ីវិល នៅតែជំរុញឲ្យស្ថាប័នមានសមត្ថកិច្ចស៊ើបអង្កេត និងលាតត្រដាងករណីចៅក្រមបង្ខំលោក ឌួង ងៀប ឲ្យសូកប៉ាន់។ នាយិកាអង្គការគណៈកម្មាធិការប្រឆាំងអំពើពុករលួយអ្នកស្រី ម៉ម ស៊ីថា មិនជំទាស់នឹងការចាប់ខ្លួនលោក ឌួង ងៀប ទេ ក្នុងករណីឧកញ៉ារូបនេះបានប្រព្រឹត្តកំហុស ឬឆបោកពិតប្រាកដមែន។ ប៉ុន្តែអាជ្ញាធររដ្ឋ ក៏ត្រូវបើកការស៊ើបអង្កេតលើករណីចៅក្រមបង្ខំឲ្យភាគីបណ្ដឹងសូកប៉ាន់ខ្លួនដែរ ដើម្បីធានាឲ្យបានថា ពលរដ្ឋមានសិទ្ធិស្មើគ្នាចំពោះមុខច្បាប់។
កាលពីថ្ងៃទី៧ ខែកុម្ភៈ លោក ឌួង ងៀប បានទៅឈរនៅមុខក្លោងទ្វារពន្ធនាគារព្រៃស រួចបង្ហោះវីដេអូមួយក្នុងហ្វេសប៊ុក (facebook) ដោយបញ្ជាក់ថា លោកត្រៀមដើរចូលពន្ធនាគារ ក្រោយពេលចៅក្រមនៃសាលារាជធានីភ្នំពេញចំនួន២នាក់ ស្រាក់ដៃគ្នាជាប្រព័ន្ធគាបសង្កត់យកលុយពីលោកអស់ពីខ្លួនរលីង ពាក់ព័ន្ធនឹងបទចោទប្រកាន់ឆបោកលុយក្នុងសំណុំរឿងកិច្ចព្រមព្រៀមពាណិជ្ជកម្ម ក្នុងទំហំទឹកប្រាក់ច្រើនលានដុល្លារ ជាមួយជនជាតិតៃវ៉ាន់។
លោក ឌួង ងៀប អះអាងថា ចៅក្រមបានធ្វើឲ្យសំណុំរឿងរបស់លោកប្រែពីសទៅជាខ្មៅ ពោលគឺពួកគេមានចេតនាជំរិតយកលុយពីលោកដោយឥតឈប់ឈរ។
ក្នុងវីដេអូដដែលនោះ លោក ឌួង ងៀប មិនបានបង្ហាញថា លោកត្រូវប្រគល់លុយចំនួនប៉ុន្មាន និងត្រូវប្រើវិធីណា ដើម្បីប្រគល់លុយទៅឲ្យចៅក្រមណាខ្លះនោះទេ។ ប៉ុន្តែលោក ឌួង ងៀប អះអាងថា ក្រោយរងការជំរិតទារប្រាក់នេះ លោកធ្លាប់ទៅសុំជំនួយពីលោកនាយករដ្ឋមន្ត្រី ហ៊ុន សែន និងមន្ត្រីកំពូលៗជាច្រើនទៀត ប៉ុន្តែពុំបានប្រយោជន៍ឡើយ ដោយពួកគេបានរុញដាក់គ្នាពីមួយទៅមួយ។ ក្រៅពីនេះលោកឧកញ៉ា ឌួង ងៀប ក៏បង្ហាញការសោកស្តាយដែរ ដែលលោក ខិតខំជួយដល់គណបក្សប្រជាជនកម្ពុជា ប៉ុន្តែចុងក្រោយលោកបែរជាជួបរឿងអយុត្តិធម៌ទៅវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។