នាយកអង្គការកម្មវិធីអភិវឌ្ឍន៍សហប្រជាជាតិ (UNDP) ប្រចាំកម្ពុជា លោក នីក បេរេសហ្វ័ដ (Nick Beresford) ចង់ឃើញរដ្ឋាភិបាលដាក់ចេញប្រព័ន្ធសោធននិវត្តន៍ និងប្រព័ន្ធគាំពារសង្គមសម្រាប់មនុស្សចាស់ ក្នុងពេលដែលចំនួនប្រជាជនវ័យចំណាស់នៅកម្ពុជាអាយុចាប់ពី ៦០ ឆ្នាំឡើងទៅ កំពុងកើនឡើង។ លោកព្រមានថា បើទោះបីជាពេលនេះកម្ពុជា គឺជាប្រទេសដែលមានប្រជាជនវ័យក្មេងក៏ដោយ ប៉ុន្តែស្ថានភាពដូច្នេះនឹងមិននៅបែបនេះរហូតនោះឡើយ។
លោកគូសបញ្ជាក់ថា នៅពាក់កណ្តាលទសវត្សរ៍ ២០២០ កម្ពុជានឹងឈានដល់ចំណុចរបត់មួយ ដែលចំនួនអ្នកក្នុងបន្ទុកដែលមានវ័យចាស់ នឹងកើនឡើងក្នុងល្បឿនលឿនជាងចំនួនមនុស្សដែលឋិតក្នុងវ័យកម្លាំងពលកម្ម។ ដូច្នេះ លោកស្នើឲ្យរដ្ឋាភិបាលចាំបាច់ត្រូវធ្វើសកម្មភាពចាប់ពីពេលនេះតទៅ ដើម្បីដាក់ឲ្យអនុវត្តនូវប្រព័ន្ធសោធននិវត្តន៍ និងប្រព័ន្ធគាំពារសង្គមសម្រាប់មនុស្សចាស់ ដើម្បីឲ្យពួកគេទទួលបាននូវការឧបត្ថម្ភគាំទ្រពីរដ្ឋ និងសេចក្តីថ្លៃថ្នូរដែលពួកគេសមនឹងទទួលបាន។
ការលើកឡើងនេះ ធ្វើឡើងនៅក្នុងសេចក្តីប្រកាសព័ត៌មានរបស់អង្គការ UNDP ផ្សាយនៅថ្ងៃទី៣១ ខែឧសភា ជុំវិញការចុះកិច្ចព្រមព្រៀងដើម្បីបង្កើនសមត្ថភាពស្ថាប័ន និងដើម្បីអនុវត្តគោលនយោបាយជាតិ ស្តីពី មនុស្សវ័យចាស់នៅកម្ពុជា រវាងអង្គការ UNDP និងក្រសួងសង្គមកិច្ច អតីតយុទ្ធជន និងយុវនីតិសម្បទា។ កិច្ចព្រមព្រៀងរយៈពេលពីរឆ្នាំនេះ ផ្តោតលើកិច្ចសហប្រតិបត្តិការជាច្រើន ដើម្បីផ្តល់ការគាំទ្រដល់មនុស្សវ័យចាស់នៅកម្ពុជា ក្នុងនោះក៏មានការសិក្សាស្រាវជ្រាវពីផលប៉ះពាល់មកលើសង្គមសេដ្ឋកិច្ចបណ្តាលមកពីការពង្រីកការអនុវត្តវិធានការគាំពារសង្គមនានារបស់រដ្ឋ ព្រមទាំងការពិនិត្យលើលទ្ធភាពពង្រីកសេវាថែទាំសុខភាពដោយមិនគិតថ្លៃដល់ពលរដ្ឋមានវ័យជរាផងដែរ។
បើតាមអង្គការ UNDP បច្ចុប្បន្នកម្ពុជា គឺជាប្រទេសដែលមានប្រជាជនវ័យក្មេងជាងគេនៅអាស៊ីអាគ្នេយ៍ ក៏ប៉ុន្តែទន្ទឹមនឹងនេះ ប្រទេសនេះក៏កាន់តែមានប្រជាជនវ័យចំណាស់កើនឡើងផងដែរ។ ក្នុងឆ្នាំ២០១៩ កម្ពុជាមានប្រជាជនវ័យចាស់អាយុចាប់ពី ៦០ ឆ្នាំឡើងទៅ ចំនួនជិត ៩% នៃប្រជាជនសរុប ពោលគឺកើនឡើងជាង ៥% ធៀបនឹងពីរទសវត្សរ៍កន្លងទៅ។ ចំនួននេះនឹងកើនឡើងដល់ទៅ ២១% ក្នុងឆ្នាំ២០៥០ ខាងមុខ។ នេះមានន័យថា ប្រសិនបើគ្មានជំនួយ ឬគោលនយោបាយគាំពារសង្គមច្បាស់លាស់ពីរដ្ឋនោះទេ នោះប្រជាជនក្នុងវ័យកម្លាំងពលកម្ម នឹងក្លាយជាអ្នកទទួលបន្ទុករ៉ាប់រងជួយឧបត្ថម្ភគាំទ្រដល់ក្រុមមនុស្សវ័យចាស់ទាំងនោះដែលមានចំនួនកាន់តែច្រើនឡើង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។