កុមារកម្ពុជាកំពុងប្រឈមនឹងហានិភ័យខ្ពស់ពីផលប៉ះពាល់នៃវិបត្តិអាកាសធាតុ ដែលអាចបង្កការគំរាមកំហែងដល់សុខភាព ការអប់រំ និងការទទួលបានការការពាររបស់ពួកគេ។ នេះបើយោងតាមរបាយការណ៍ស្តីពី «វិបត្តិអាកាសធាតុ គឺជាវិបត្តិនៃសិទ្ធិកុមារ៖ សន្ទស្សន៍ហានិភ័យអាកាសធាតុរបស់កុមារ» ចេញផ្សាយដោយអង្គការយូនីសេហ្វេ (UNICEF) កាលពីថ្ងៃទី២០ ខែសីហា។
អង្គការយូនីសេហ្វេ ដាក់ចំណាត់ថ្នាក់កម្ពុជាឱ្យជាប់លេខ ៤៦ ក្នុងចំណោម ១៦៣ ប្រទេសនៅទូទាំងពិភពលោក ស្ថិតក្នុងចំណោមក្រុមប្រទេសដែលប្រឈមហានិភ័យខ្ពស់ទៅនឹងការប្រែប្រួលអាកាសធាតុ។ អង្គការនេះរកឃើញថា កុមារនៅកម្ពុជាប្រឈមមុខខ្ពស់នឹងបញ្ហាខ្វះទឹក គ្រោះទឹកជំនន់តាមដងទន្លេ និងជំងឺឆ្លង។
នាយិកាអង្គការយូនីសេហ្វប្រចាំកម្ពុជាអ្នកស្រី ហ្វ័រូហ្គ ហ្វយូហ្សិថ (Foroogh Foyouzat) ថ្លែងក្នុងសេចក្តីថ្លែងការណ៍ថា វិបត្តិអាកាសធាតុ គឺជាវិបត្តិសិទ្ធិកុមារ ព្រោះថាវិបត្តិនេះបង្កការគំរាមកំហែងដល់គ្រប់ទិដ្ឋភាពទាំងអស់នៃសុខភាព និងសុខមាលភាពរបស់កុមារក្នុងកម្រិតដែលមនុស្សជាតិពុំធ្លាប់ជួបប្រទះកន្លងមក។ អ្នកស្រីបន្តថា វិបត្តិនៃការប្រែប្រួលអាកាសធាតុ ធ្វើឱ្យពិភពលោកក្លាយជាកន្លែងកាន់តែមានហានិភ័យសម្រាប់ការរស់នៅ និងការលូតលាស់ធំធាត់របស់កុមារ។
អង្គការយូនីសេហ្វ ព្រមានថា ប្រសិនបើពុំមានការចាត់វិធានការបន្ទាន់ដែលចាំបាច់ដើម្បីកាត់បន្ថយការបញ្ចេញឧស្ម័នផ្ទះកញ្ចក់នោះទេ នោះកុមារនឹងបន្តទទួលរងគ្រោះធ្ងន់ធ្ងរជាងគេ។ អង្គការនេះពន្យល់ថា បើធៀបនឹងមនុស្សពេញវ័យ កុមារត្រូវការស្បៀង និងទឹកច្រើនជាងមនុស្សពេញវ័យ ហើយមានលទ្ធភាពតិចជាងគេក្នុងការរស់រានពេលដែលមានព្រឹត្តិការណ៍អាកាសធាតុធ្ងន់ធ្ងរ។
អង្គការយូនីសេហ្វេ អំពាវនាវដល់រដ្ឋាភិបាល ក្រុមហ៊ុន និងតួអង្គពាក់ព័ន្ធនានាឱ្យបង្កើនការវិនិយោគលើការផ្តល់សេវានានាដូចជាប្រព័ន្ធទឹកស្អាត អនាម័យ សេវាសុខភាព និងសេវាអប់រំ ជាដើម សម្រាប់កុមារដើម្បីឱ្យពួកគេកាន់តែបន្សាំ និងធន់ទៅនឹងអាកាសធាតុ។ ក្រៅពីនោះ ត្រូវកាត់បន្ថយឧស្ម័នផ្ទះកញ្ចក់ និងផ្តល់ឱ្យកុមារនូវការអប់រំអំពីអាកាសធាតុ និងជំនាញបៃតង ជាដើម។
នៅទូទាំងពិភពលោក កុមារប្រមាណ ១ពាន់លាននាក់ បច្ចុប្បន្នកំពុងរស់នៅក្នុងចំណោមប្រទេស ៣៣ ដែលជាប់ចំណាត់ថ្នាក់ជាក្រុមប្រទេស «មានហានិភ័យខ្ពស់បំផុត» ពីផលប៉ះពាល់នៃវិបត្តិអាកាសធាតុ។ កម្ពុជាមានចំនួនកុមារអាយុចន្លោះពី ១ឆ្នាំ ដល់ ១៧ឆ្នាំ សរុបជិត ៦លាននាក់ (៥,៩ លាននាក់) ស្មើនឹង ៣៧% នៃចំនួនប្រជាពលរដ្ឋសរុបជាង ១៦លាននាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។