អង្គការយូនីសេហ្វ (Unicef) ថាការបើកសាលារៀនឡើងវិញ មិនអាចពន្យាពេលបន្តទៀតនោះទេ ព្រោះចាប់តាំងពីជំងឺកូវីដ-១៩ រាតត្បាតជាងមួយឆ្នាំមកនេះ ភស្តុតាងបានបង្ហាញថា ជំងឺនេះ មិនបានបង្កគ្រោះថ្នាក់ខ្ពស់ដល់កុមារនោះឡើយ ហើយសាលារៀន មិនមែនជាកត្តានាំឲ្យមានការចម្លងក្នុងសហគមន៍ជុំវិញនោះដែរ។
ផ្ទុយទៅវិញ អង្គការនេះរកឃើញថាការបិទទ្វារសាលារៀនយូរបង្កផលប៉ះពាល់ច្រើនដល់កុមារដូចជាកុមារមិនទទួលបានជំនាញ បាត់បង់សក្តានុពលក្នុងការរកចំណូល បញ្ហាសុខភាពផ្លូវកាយនិងផ្លូវចិត្តជាដើម។
មិនតែប៉ុណ្ណោះពេលដែលកុមារមិនបានទៅរៀនក្នុងថ្នាក់ផ្ទាល់ពួកគេជួបប្រទះនឹងភាពឯកាកាន់តែច្រើនជាងមុន។ ពួកគេពិបាកផ្ចង់អារម្មណ៍និងមានអារម្មណ៍ថប់បារម្ភពាក់ព័ន្ធនឹងការរៀនសូត្រក្នុងកម្រិតខ្ពស់ផងដែរ។ បញ្ហាទំាងនេះនឹងរឹតតែធ្ងន់ធ្ងរទៅៗនៅពេលសាលារៀនត្រូវបន្តបិទទ្វារកាន់តែយូរ។
ក្រោយផ្ទុះការរីករាលដាលនៃជំងឺកូវីដ-១៩ កាលពីដើមឆ្នាំ២០២០ រដ្ឋាភិបាលកម្ពុជាបានប្រកាសបិទសាលារៀនទាំងអស់នៅទូទាំងប្រទេសមួយរយៈដោយឲ្យសិស្សទាំងអស់រៀនតាមប្រព័ន្ធអនឡាញ (Online) ពីផ្ទះជំនួសវិញ។
ប៉ុន្តែអង្គការ យូនីសេហ្វរកឃើញថាការរៀនពីផ្ទះបែបនេះមិនអាចជំនួសឲ្យការរៀនផ្ទាល់បានឡើយ ព្រោះលទ្ធភាពរៀនតាមប្រព័ន្ធអនឡាញនៅពុំទាន់មានសម្រាប់គ្រប់គ្នាដោយកុមារជួបការលំបាករួមទាំងកុមារពិការ កុមាររងផលប៉ះពាល់ពីការធ្វើចំណាកស្រុកនិងក្រុមកុមារក្នុងគ្រួសារក្រីក្រដែលពុំសូវទទួលបានការគាំទ្រ។ កុមារទាំងនេះខាតបង់ការសិក្សាព្រោះពួកគេពុំមានលទ្ធភាពទទួលបានការអប់រំតាមប្រព័ន្ធឌីជីថលនេះ។
អង្គការយូនីសេហ្វ ថាសាលាដែលគួរបើកវិញមុនគេគឺសាលាបឋមសិក្សាសាលាមត្តេយ្យសិក្សានិងមជ្ឈមណ្ឌលអភិវឌ្ឍន៍កុមារតូចៗប៉ុន្តែគួរបើកដោយអនុវត្តតាមវិធានការសុវត្ថិភាពឲ្យបានសមស្រប។
ទោះជាយ៉ាងនេះក្ដី មន្រ្តីក្រសួងអប់រំ ប្រកាសប្រាប់អ្នកសារព័ត៌មានថា រដ្ឋាភិបាលនឹងនៅតែបន្តបិទសាលារៀនទាំងរដ្ឋ និងឯកជនតទៅទៀត ដោយសារតែការចម្លងជំងឺកូវីដ-១៩ ក្នុងសហគមន៍មិនទាន់ចប់នៅឡើយ។ អ្នកនាំពាក្យក្រសួងនេះ គឺលោក រស់ សុវាចា ថាក្រសួងអបរំនៅបន្តតាមដាននិងវាយតម្លៃស្ថានភាពព្រឹត្តិការណ៍សហគមន៍ ២០ កុម្ភៈសិន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។