តំណាង​​សហជីព​​ថា​​និយោជក​​បំពាន​​វិធានការ​​បង្ការ​​ជំងឺ​កូវីដ​-​១៩​ ដែល​​ធ្វើ​​ឲ្យ​​កម្មករ​​ប្រឈម​​ការ​​ឆ្លង​​ជំងឺ​នេះ​​

ដោយ មួង ណារ៉េត
2021-05-17
Share
តំណាង​​សហជីព​​ថា​​និយោជក​​បំពាន​​វិធានការ​​បង្ការ​​ជំងឺ​កូវីដ​-​១៩​ ដែល​​ធ្វើ​​ឲ្យ​​កម្មករ​​ប្រឈម​​ការ​​ឆ្លង​​ជំងឺ​នេះ​​ រូបភាពពី​ខាង​ក្នុង​រោង​ចក្រ​ ឌីនហាន​ (Din​ Han​) ដែល​បង្ហាញ​ឲ្យ​ឃើញ​ភាព​​ចង្អៀត​ណែន​​ណាន់​តាន់​តាប់​ នៅ​ម្តុំ​ច្រកទ្វារ​ចេញ​​ពី​​រោង​ចក្រ​ កាលពីយប់ថ្ងៃទី១៧ ខែឧសភា ឆ្នាំ២០២១។​
រូប៖ គេ​ផ្ដល់​ឱ្យ

រូប​ភាព​​ពី​ខាង​ក្នុង​រោង​ចក្រ​ ឌីនហាន​ (Din​ Han​) ដែល​បង្ហាញ​ឲ្យ​ឃើញ​ភាព​​ចង្អៀត​ណែន​​ណាន់​តាន់​តាប់​ នៅ​ម្តុំ​ច្រកទ្វារ​ចេញ​​ពី​​រោង​ចក្រ​ ដែល​​កម្មករ​​ប្រជ្រៀ​ត​​គ្នា​ចេញ​​ពី​ធ្វើ​ការ​វេន​ពីរ​ នៅ​ម៉ោង​ ៧:៣០​ យប់​ ថ្ងៃ​ទី១៧​ ខែ​ឧសភា​ ដើម្បី​​ប្រញាប់​​ចេញ​​ឲ្យ​ទាន់​មុន​ម៉ោង​បម្រាម​គោចរ​នោះ​ ត្រូវ​​បាន​ចែក​ផ្សាយ​តាម​បណ្ដាញ​សង្គម​ហ្វេស​ប៊ុក​។

រោង​ចក្រ​ ឌីន​ហាន​ (Din​ Han​) ដែល​មាន​កម្មករ​ជាង​ ២.៥០០​ នាក់​ និង​​ដែល​ផ្អាក​ដំណើរ​ការ​ជាង​មួយ​ខែ​មក​ហើយ​ ក្រោយ​កម្មករ​ប្រមាណ​ ១.០០០​​​នាក់​​ បាន​ឆ្លង​ជំងឺ​​កូវីដ​-១៩​ ឥឡូវ​ចាប់​​បើក​ដំណើរ​ការ​ឡើងវិញ​ហើយ​។ ពេល​ចូល​ធ្វើការ​វិញ​នេះ ​កម្មករ​ត្រូវ​ធ្វើការ​ឆ្លាស់​វេន​គ្នា​ ដោយ​វេន​ព្រឹក​ចូល​ធ្វើការ​ពីម៉ោង​ ៦និង៣០នាទី ​ចេញ​ម៉ោង​ ១និង៣០នាទី​ ពេល​ល្ងាច​ពីម៉ោង​ ១និង៣០ានាទី​ ដល់​ម៉ោង​ ៧​ និង៣០នាទី​។

មន្រ្តី​សហជីព​នៅ​រោងចក្រ​នេះ​ឲ្យ​អាស៊ីសេរី​ដឹង​ថា​ ក្នុង​វេន​នីមួយៗ​ មាន​កម្មករ​ប្រមាណ​ ៨០០​ នាក់​។ ចំនួន​នេះ​នឹង​កើន​ឡើង​បន្ថែម​ទៀត​ នៅ​ពេល​កម្មករ​ដែល​កំពុង​ជាប់​គាំង​នៅ​តំបន់​ក្រហម​ និង​​តំបន់​លឿង​ទុំ​ អាច​វិល​ចូល​ធ្វើការ​វិញ​ដែរ​។  ទោះ​ជា​កម្មករ​មិនទាន់​ចូល​ធ្វើការ​វិញ​បាន​គ្រប់​គ្នា​នៅ​ឡើយ​ក្ដី​ ក៏​ប្រធាន​​សហជីព​​ប្រជាធិបតេយ្យ​​កម្មករ​​កាត់ដេរ​​កម្ពុជា​ (​C-CAWDU​) លោក​ ឡុង​ សក្កដា​ ថា​ចំនួន​នេះ​នៅ​តែ​ច្រើន​ ដោយសារ​តែ​ថៅ​កែ​រោងចក្រ​ មិន​ព្រម​បើក​ច្រក​ចេញ​ពីរ​ផ្សេង​ទៀត​ ដើម្បី​សម្រួល​ភាព​ប្រជ្រៀត​គ្នា​ និង​​ចង្អៀត​ណែន​នេះ​។ លោក​ ឡុង​ សក្កដា​ ថា​លោក​បាន​ព្យាយាម​គ្រប់បែបយ៉ាង​អស់ហើយ​ ដើម្បី​ឲ្យ​ថៅកែ​រោង​ចក្រ​ បើក​ច្រក​មួយ​​បន្ថែម​ទៀត​ ដើម្បី​រម្លែក​ចំនួន​កម្មករ​ផ្តុំ​គ្នា​នេះ​ ប៉ុន្តែ​ លោក​ថា​ គ្មាន​នរណា​យក​ចិត្ត​​ទុក​ដាក់​ស្ដាប់​កង្វល់​ និង​​សំណូម​នេះ​ឡើយ​៖ «អត់​បើក​!​ ខ្ញុំ​ប្រាប់​តាំង​ពី​មុន​ហ្នឹង​​ថា​​ឲ្យ​បើក​ទៅ​ ច្រក​មួយ​ទៀត​ហ្នឹង​​ឲ្យ​បាន​​ពីរ​​ទៅ​ ឲ្យរ​ក្សា​គម្លាត​​បាន​ងាយ​ស្រួ​ល​ ព្រោះ​​កម្មករ​​ច្រើន​​ហើយ​​បើ​​ចេញ​​តែ​​មួយ​​ច្រក​​បែប​​នេះ​​ ពួក​​គាត់​​ប្រញាប់​​ ណា​មួយ​​ហេវ​​បាយ​​ផង​​ ហើយ​​ផ្ទះ​​ឆ្ងាយ​​ផង​​ ពួក​​គាត់​​ចេះ​​តែ​​ប្រជ្រៀត​​ហើយ​​ យើង​​មិន​​អាច​​ទប់​​ស្កាត់​​ពួក​គាត់​​បាន​ទេ​! ​គេ​​ (​ថៅកែ​រោង​ចក្រ​)​អ​ត់​​ស្ដាប់​​យើង​​»។

ការ​មិន​​ពង្រីក​ ឬ​បន្ថែម​ច្រក​ចេញ​ចូល​ ដើម្បី​សម្រួល​ភាព​ប្រជ្រៀត​គ្នា​របស់​កម្មករ​នេះ​ ក៏​ផ្ទុយ​ទៅ​នឹង​​សេចក្តី​ណែនាំ​​របស់​ក្រសួង​​ការងារ​ ក្នុង​ការ​កែសម្រួល​ស្ថានភាព​​នៅ​​កន្លែង​​ធ្វើការ​ ក្រោយ​​ការ​​ផ្ទុះ​​ជំងឺ​កូវីដ​-​១៩​ ចូល​ដល់​រោង​ចក្រ​នេះ​ដែរ​។​ ប៉ុន្តែ​លោក​ ឡុង​ សក្កដា​ ថា​មិន​ឃើញ​ក្រុម​អធិការកិច្ច​របស់​ក្រសួង​​ការងារ​ ចុះ​មក​ពិនិត្យ​រឿង​នេះ​នៅ​ឡើយ​ទេ​។​ ការណ៍​ដែល​ថៅកែ​រោងចក្រ​បំពាន​វិធានការ​សុវត្ថិភាព​ និង​មិន​ស្តាប់​សហជីព​នេះ​ លោក​ ឡុង​ សក្កដា​ ថា​លោក​ចាប់​ផ្តើម​ទាល់​តម្រិះ​ ​និង​​គ្មាន​ជម្រើស​អ្វី​ក្រៅ​ពី​ដង្ហោយ​រក​អន្តរាគមន៍​តាម​​ប្រព័ន្ធ​ផ្សព្វ​ផ្សាយ​​តែ​ប៉ុណ្ណោះ​ ដើម្បី​ជួយ​យក​ចិត្ត​ទុក​ដាក់​ដល់​សុវត្ថិភាព​ និង​​សុខុមាលភាព​​របស់​កម្មករ​​​ទាំង​​អស់​។

អាស៊ីសេរី​ មិន​អាច​សុំ​ការ​បំភ្លឺ​រឿង​នេះ​ពី​រដ្ឋបាល​រោងចក្រ​ ឌីន​ហាន​ (Din​ Han​) និង​អ្នក​នាំពាក្យ​ក្រសួង​​ការងារ​លោក​ ហេង​ សួរ​​ បាន​​នៅ​ឡើយ​ទេ​។ ប៉ុន្តែ​ សេចក្តី​សម្រេច​របស់​គណៈកម្មការ​ប្រឹក្សា​ការងារ​ កាល​ពី​ដើម​ខែ​ឧសភា​ ថា​រាល់​រោងចក្រ​ដែល​បើក​ដំណើរការ​ឡើងវិញ​ ត្រូវ​​អនុវត្ត​គោលការណ៍​ ១៤​ ចំណុច​ ដើម្បី​បង្ការ​ជំងឺ​កូវីដ​-​១៩​។ ចំណុច​ទី​ ៦​ ចែង​អំពី​​ការរៀបចំ​ឲ្យ​មាន​ច្រក​ចេញ​ចូល​បន្ថែម​ ដើម្បី​កុំ​ឲ្យ​កម្មករ​ប្រជ្រៀត​គ្នា​។​

 

បន្ថែម​លើ​ចំណុច​ទាំង​ ១៤​ នេះ ​ក្រសួង​​ការងារ​ តែង​តែ​រម្លឹក​ឲ្យ​ថៅ​កែ​រោង​ចក្រ​ និង​​កម្មករ​​ អនុវត្ត​វិធានការ​ ៣​កុំ​ និង​​៣​ការពារ​ ឲ្យ​បាន​ម៉ឺង​ម៉ាត់​​បំផុត​។ ក្នុង​វិធានការ​ទាំង​នេះ​ មាន​ចែង​អំពី​ការរក្សា​គម្លាត​ពីគ្នា​ ឲ្យ​បាន​យ៉ាង​តិច​ ១​ម៉ែត្រ​កន្លះ​។

ទោះជា​យ៉ាង​នេះ​ក្ដី​ ក្រសួង​​ការងារ​ និង​​ថៅ​កែ​រោង​ចក្រ​ មិន​បាន​រក​ដំណោះ​ស្រាយ​ ក្នុង​ការ​បញ្ចេញ​រថយន្ត​បន្ថែម​ ដើម្បី​រម្លែក​ចំនួន​កម្មករ​ កុំ​ឲ្យ​ជិះ​រថយន្ត​ប្រជ្រៀត​គ្នា​ដូច​ម្រាម​ដៃ​​នោះ​ឡើយ​។ ជាង​នេះ​ទៅ​ទៀត​ ​ថៅ​កែ​​រោង​ចក្រ​ ឌីន​ហាន​ មិន​បាន​បញ្ចេញ​រថយន្ត​ ដែល​ក្រុម​ហ៊ុន​ជួល​មួយ​ខែ​ ៣០០​ ដុល្លារ​ ​ដើម្បី​ដឹក​កម្មករ​ទេ ​ដោយ​ទុក​ឲ្យ​កម្មករ​រក​មធ្យោបាយ​ធ្វើ​ដំណើរ​ដោយ​​ខ្លួន​ឯង​​ទៅ​វិញ​។ មិន​តែ​ប៉ុណ្ណោះ​ ថៅកែ​រោង​ចក្រ​ មិន​​​ចេញ​ថវិកា​ឧបត្ថម្ភ​ដល់​កម្មករ​ពេល​ផ្តាច់​មធ្យោបាយ​ធ្វើដំណើរ​របស់​ពួកគាត់​នោះ​ទេ​។​ ប្រការ​នេះ​ លោក​ ឡុង​ សក្កដា​ ថា​​វា​ធ្វើ​ឱ្យ​កម្មករ​កាន់​តែ​លំបាក​ផ្នែក​ជីវភាព​ ព្រោះ​ត្រូវ​រក​ម៉ូតូ​ឌុប​ជិះ​មក​ធ្វើការ​ និង​​ប្រឈម​មុខ​នឹង​​ការ​ឆ្លង​ជំងឺ​ទៀត​ផង​ ដោយ​សារ​ត្រូវ​ប្តូរ​អ្នក​រត់​ម៉ូតូ​ឌុប​ញឹក​ញាប់​៖ «ចង់​ដក​ឡាន​ពួក​គាត់​ អយុត្តិ​ធម៌​កាន់​តែ​ធ្ងន់​ទៅ​ទៀត​ហើយ​!​ ដំណាក់​កាល​នេះ​​ គឺ​កំពុង​​តែ​លំបាក​​រឿង​សេដ្ឋកិច្ច​ផង​ ហើយ​ត្រូវ​​ចំណាយ​​លើមធ្យោបាយ​​ខ្លួន​ឯង​​ផង​ ហើយ​តៃ​កុង​ឡាន​ក៏​សេដ្ឋកិច្ច​គ្នា​​រឹត​តែ​យ៉ាប់​ទៅ​ទៀត​ ព្រោះ​គ្នា​អត់​អី​ដឹក​»។​

រោង​ចក្រ​​ ​ឌី​ន​​ហាន​​ ​ ​ជា​​រោង​ចក្រ​​ធំ​​ដំបូង​​គេ​​ ​ដែល​​ផ្ទុះ​​ករណី​​ចម្លង​​ជំងឺ​​កូ​វី​ដ​​-​​១​៩​​ ​កាល​ពី​ដើម​​ខែ​​មេសា​​។​ ​ភ្លាម​​ៗ​​មាន​​កម្ម​ករ​​​ប្រមាណ​​​ ​៧០០​​ ​នាក់​ ​ត្រូវ​​​ក្រសួង​សុខាភិបាល​​រក​​ឃើញ​​ថា​ ​មាន​​ផ្ទុក​​ជំងឺ​​នេះ​​។​ ​ក្រោយៗ​​មក​​ទៀត​​ ​កម្មករ​​នៅ​​​រោង​ចក្រ​រាប់​រយ​​ផ្សេង​​ទៀត​​ ​បាន​​ឆ្លង​​ជំងឺ​​នេះ​​ដែរ​​។​​ ​បើ​​តាម​​សេចក្តី​ជូន​ដំណឹង​​​របស់​​រដ្ឋបាល​​​រាជធានី​​ភ្នំពេញ​​ ​គិត​​ត្រឹម​​ថ្ងៃ​​ទី​​​១៧​​ ​ខែ​​​ឧសភា​​ ​មាន​​ ​៤៣១​ រោង​ចក្រ​​ ​ដែល​​មាន​កម្ម​ករ​​ឆ្លង​​ជំងឺ​​កូ​វី​ដ​​-​​១​៩​​។​​ ​ចំនួន​​នេះ​​ ​នៅ​​មិន​ទាន់​​រាប់​បញ្ចូល​​រោង​ចក្រ​​ជាង​​ ​៥០​​ ​ទៀត​​នៅ​​ខេត្ត​​តាកែវ​​ ​ខេត្តព្រះ​​សី​ហ​នុ​ ​ស្វាយ​រៀង​​ ​កំពង់​ចាម​​ ​និង​​ខេត្តកំពង់​ឆ្នាំង​​នៅ​ឡើយ​​។​

មន្រ្តី​ក្រសួង​ការងារ​លោក​ ហេង ហួរ​ ថ្លែង​ក្នុង​សន្និសីទ​សារព័ត៌មាន​កាល​ពី​ចុង​ខែ​មេសា​ ថា​គិត​ត្រឹម​ថ្ងៃ​ទី​២៨​ ខែ​មេសា​ មាន​កម្មករ​ជាង​ ១.៦០០​ (​១.៦៧៣​) នាក់​ ឆ្លង​ជំងឺ​នេះ​។​ ប៉ុន្តែ​​លោក​មិន​បាន​បញ្ជាក់​ថា ​កម្មករ​​ឆ្លង​ជំងឺ​កូវីដ​-​១៩​ ដោយ​​របៀបណា​​នោះ​ឡើយ​។

ទោះ​ជា​យ៉ាង​នេះ​ក្ដី​ ​ម​ន្រ្តី​​សង្គម​​ស៊ីវិល​ ​​អ្នក​​វេជ្ជ​​សា​ស្រ្ត​ ​និង​​ម​ន្រ្តី​​សហជីព​​ ​ថា​​ការ​​ជិះ​រថយន្ត​​ប្រជ្រៀត​គ្នា​​ដូច​​ម្រាម​ដៃ​​ ​ការរស់​នៅ​​បន្ទប់​​ជួល​​ផ្តុំ​​គ្នា​​ច្រើន​​ ​និង​​ការ​​មិន​​អាច​​​​រក្សា​​គ​ម្លា​ត​​បាន​​នៅ​​តាម​​រោង​ចក្រ​​ ​គឺ​ជា​​កត្តា​​​ដែល​​ធ្វើ​ឲ្យ​កម្មករ​​ឆ្លង​​ជំងឺ​​នេះ​​ ​យ៉ាង​​រាល​ដាល​​បែប​​នេះ​​។​​

ក្នុង​​ស្ថានភាព​​ ​ដែល​​នៅ​តែ​​គ្មាន​​ការ​​យក​ចិត្ត​ទុក​ដាក់​​ពី​​ភាគី​​ថៅកែរោងចក្រ ​អំពី​​មធ្យោបាយ​​ធ្វើ​ដំណើរ​​របស់​​កម្មករ​​ និង​ការ​មិន​យក​ចិត្ត​ទុកដាក់​លើ​ស្ថានភាព​ក្នុង​​​កន្លែង​រោងចក្រ​ ​ ​ម​ន្រ្តី​​សហជីព​​ ព្រមាន​​ថា​​ ​ការ​​ប្រយុទ្ធ​​ប្រឆាំង​​នឹង​​​ជំងឺ​​កូ​វី​ដ​​-​​១​៩​​ ​នឹង​​មិន​​ទទួល​​បាន​​ជោគជ័យ​​នោះ​​ទេ​​។​ ​ជាង​​នេះ​​ទៅ​ទៀត​​ ​អ្នក​ដែល​ងាយ​ប្រឈម​គ្រោះ​ថ្នាក់​ជាង​គេ​ គឺ​កម្មករ​រោង​ចក្រ​៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល