គណៈកម្មការបុណ្យ១០០ថ្ងៃសពបណ្ឌិត កែម ឡី នៅមិនទាន់រកទីតាំងប្រារព្ធពិធីបុណ្យបាន
2016.09.25
ពលរដ្ឋនាំគ្នាបន្តគោរពវិញ្ញាណក្ខន្ធបណ្ឌិត កែម ឡី នៅភូមិអង្គតាកុប ឃុំលាយបូរ ស្រុកត្រាំកក់ ខេត្តតាកែវ នៅថ្ងៃទី២៨ ខែកក្កដា ឆ្នាំ២០១៦។ RFA/Yang Chandara
RFA/Yang Chandara
គណៈកម្មការរៀបចំពិធីបុណ្យ ១០០ថ្ងៃ សពលោកបណ្ឌិត កែម ឡី នៅតែមិនទាន់មានព័ត៌មានពីទីតាំងរៀបចំបុណ្យច្បាស់លាស់នៅឡើយទេ រហូតដល់ល្ងាចថ្ងៃអាទិត្យ ទី២៥ ខែកញ្ញា។ សមាជិកគណៈកម្មការរៀបចំពិធីបុណ្យនេះ ឱ្យដឹងថា ការកំណត់អំពីទីតាំងធ្វើបុណ្យនេះ នឹងអាចដឹងនៅក្នុងរយៈពេល ២ ឬ ៣ថ្ងៃទៀត។
អ្នកនាំពាក្យ និងជាសមាជិកគណៈកម្មការរៀបចំពិធីបុណ្យ ១០០ថ្ងៃ នៃសពបណ្ឌិត កែម ឡី គឺលោក សៅ កុសល មានប្រសាសន៍ថា គណៈកម្មការនៅមិនទាន់រកទីតាំងសម្រាប់កំណត់រៀបចំពិធីបុណ្យបាននៅឡើយទេ។
លោក សៅ កុសល ថ្លែងទៀតថា បើទោះជាគណៈកម្មការស្វែងរកនៅទីតាំងមួយចំនួន ហើយអំពាវនាវដល់សាធារណជនឲ្យជួយរកទីតាំងអស់រយៈពេល ៣ថ្ងៃមកហើយក្ដី៖ «ខ្ញុំក៏ទៅទាក់ទងវត្តផ្សេងៗទៀតជាមួយបង ប៉ា ងួនទៀង ហើយជាលទ្ធផល ក៏យើងអត់បានផ្លែផ្កាអីដែរទីកន្លែងសុំធ្វើបុណ្យ ១០០ថ្ងៃរបស់លោកបណ្ឌិត។ ដូច្នេះគណៈកម្មការក៏បានប្រកាសកាលពីថ្ងៃសុក្រ។ មកដល់ពេលនេះ មិនទាន់មានបងប្អូនផ្ដល់ព័ត៌មានថាឲ្យជួល ឬផ្ដល់ទីកន្លែងនៅឡើយទេ គឺនៅស្ងាត់នៅឡើយទេ។ ប៉ុន្តែយើងនឹងធ្វើការងារនៅក្នុងអាទិត្យក្រោយនេះ ដើម្បីរកទីកន្លែងហ្នឹង។ ទីមួយ បើសិនជាគាត់មិនមកទេ យើងនឹងដើរទាក់ទងមើលដីជួល ឬកន្លែងណាដែលសមស្រប»។
គណៈកម្មការរៀបចំពិធីបុណ្យ ១០០ថ្ងៃនៃសពបណ្ឌិត កែម ឡី កាលពីថ្ងៃសុក្រ ទី២៣ ខែកញ្ញា បានចេញសេចក្ដីប្រកាសព័ត៌មានដល់សាធារណជនអំពីកម្មវិធីរយៈពេល ៤ថ្ងៃ នៃការរៀបចំពិធីបុណ្យនេះ ចាប់ពីថ្ងៃទី១៤ ដល់ថ្ងៃទី១៧ ខែតុលា។ កម្មវិធីថ្ងៃទី១៤ ដល់ ១៥ តុលា នៅរាជធានីភ្នំពេញ។ ថ្ងៃទី១៦ តុលា ហែរូបសំណាករបស់លោកបណ្ឌិតទៅខេត្តតាកែវ ហើយកិច្ចបង្ហើយបុណ្យនៅថ្ងៃទី១៧ ខែតុលា នៅផ្ទះសពឯខេត្តតាកែវ នោះ។ ប៉ុន្តែទីតាំងនៅភ្នំពេញ មិនទាន់មាន ដោយសារតែព្រះគ្រូចៅអធិការវត្តចាស់ ស្ថិតនៅសង្កាត់ជ្រោយចង្វារ មិនផ្ដល់ទីតាំងឱ្យធ្វើបុណ្យដូចមុនឡើយ។
ព្រះគ្រូចៅអធិការវត្តចាស់ គឺព្រះតេជព្រះគុណ មាស សុខន មិនអាចបញ្ជាក់ហេតុផលបានទេ នៅល្ងាចថ្ងៃអាទិត្យ ទី២៥ ខែកញ្ញា ដោយសារតែព្រះអង្គជាប់គង់នៅក្នុងពិធីបុណ្យដែលមានសំឡេងអ៊ូអរ។
លោក សៅ កុសល មានប្រសាសន៍បន្ថែមថា គណៈកម្មការរៀបចំពិធីបុណ្យ ១០០ថ្ងៃសពបណ្ឌិត កែម ឡី នឹងប្រជុំគ្នាសម្រេចអំពីបញ្ហាទីតាំងនេះ នៅថ្ងៃអង្គារ ទី២៧ ខែកញ្ញា ប្រសិនបើមិនមានសប្បុរសជនណាផ្ដល់ទីកន្លែងនោះទេ៖ «គណៈកម្មការប្រជុំម្ដងទៀត យើងនឹងសម្រេចហើយថា ឥឡូវបីបួនថ្ងៃអត់មានហើយ អ៊ីចឹងយើងចាប់ផ្ដើមដើរសួររកកន្លែងជួលហើយ ព្រោះយើងមិនប្រាកដថា ការផ្សព្វផ្សាយព័ត៌មានរបស់យើងអាចជ្រាបទៅដល់បងប្អូនដែលមានទីតាំងចង់ជួល ឬឲ្យហ្នឹង។ អ៊ីចឹងយើងនឹងដើរមើលកន្លែងណាដែលសមរម្យ។ យើងនឹងរៀបចំពិភាក្សាគ្នា ហើយជួលគាត់តែម្ដង»។
លោកឱ្យដឹងបន្ថែមថា មានមន្ត្រីគណបក្សនយោបាយចង់ផ្ដល់ទីតាំងសម្រាប់រៀបចំសពបណ្ឌិត កែម ឡី ប៉ុន្តែគណៈកម្មការបុណ្យមិនទទួលយក ព្រោះមិនចង់ឱ្យពិធីបុណ្យនេះពាក់ព័ន្ធនឹងបញ្ហានយោបាយ។
លោក សៅ កុសល ក៏ជាប្រធានអនុគណៈកម្មការកសាងចេតិយលោកបណ្ឌិត កែម ឡី ធ្លាប់បញ្ជាក់កាលពីពីរសប្ដាហ៍មុនថា ការត្រៀមនេះ សម្រេចបានជាង ៥០ភាគរយហើយ សម្រាប់ពិធីបុណ្យ ១០០ថ្ងៃ នៅពាក់កណ្ដាល ខែតុលា ខាងមុខនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ក្រុមប្រឹក្សាអភិវឌ្ឍន៍កម្ពុជាគ្រោងធ្វើបេសកកម្មដើរគោះទ្វាររកវិនិយោគិននៅអាមេរិកជាថ្មី
- ក្រសួងមហាផ្ទៃបញ្ជាក់ថា កូនមន្ត្រីជាន់ខ្ពស់ ដែលបើកឡានបុកមនុស្សស្លាប់ពីរនាក់ នៅអូស្ត្រាលីនោះ គឺឈ្មោះ ឌឿន ឧត្ដមសេនីយ៍
- ជនជាតិឥណ្ឌា ៦៧នាក់ទៀត ត្រូវបានសង្គ្រោះចេញពីកន្លែងឆបោកតាមអនឡាញនៅកម្ពុជា
- តុលាការចោទប្រកាន់ពលករខ្មែរដែលបញ្ជូនពីម៉ាឡេស៊ី ពីបទញុះញង់ និងឃុំខ្លួននៅពន្ធនាគារ
- សារលោក ហ៊ុន សែន បញ្ជាឲ្យកម្ទេចអ្នករិះគន់ «ជាភស្តុតាងអាចប្តឹងទៅតុលាការ ICC»
