ចំនួនអ្នកស្លាប់ក្នុងហេតុការណ៍ឆេះអគារកាស៊ីណូ កើនឡើងដល់២៥នាក់ ខណៈប្រតិបត្តិការរុករកកំពុងបន្ត
2022.12.30
ទិដ្ឋភាពអគារកាស៊ីណូ ហ្គ្រេន ដាយមិន ស៊ីធី (Grand Diamond City) នៅទីក្រុងប៉ោយប៉ែត ដែលរងការឆេះ កាលពីយប់ថ្ងៃទី២៨ ខែធ្នូ ឆ្នាំ២០២២។
រូប៖ ហ្វេសប៊ុកស្នងការខេត្តបន្ទាយមានជ័យ
ចំនួនអ្នកស្លាប់នៅក្នុងហេតុការណ៍ឆេះអគារកាស៊ីណូ ហ្គ្រេន ដាយមិន ស៊ីធី (Grand Diamond City) នៅទីក្រុងប៉ោយប៉ែត បន្តកើនឡើងដល់ចំនួន២៥នាក់ និងជនរងគ្រោះជិត១រយ(១០០)នាក់ គិតត្រឹមរសៀលថ្ងៃទី៣០ ខែធ្នូ ខណៈក្រុមជួយសង្គ្រោះកម្ពុជា-ថៃ កំពុងបន្តរុករកជនរងគ្រោះ។ ទន្ទឹមគ្នានេះ ពលរដ្ឋជាច្រើននាក់ កំពុងស្រែកទ្រហោយំ និងកាន់រូបថតសាច់ញាតិដែលបាត់ខ្លួន។ បុគ្គលិកកាស៊ីណូដែលរួចជីវិតពីភ្នក់ភ្លើង អះអាងថា មូលហេតុដែលបណ្ដាលឱ្យអគ្គីភ័យឆេះលឿន បណ្ដាលមកពីកង្វះខាតឧបករណ៍សង្គ្រោះបឋមនៅក្នុងអគារ និងការជួយសង្គ្រោះមានភាពយឺតយ៉ាវ។
សាកសពជនរងគ្រោះ ដែលស្លាប់ដោយសារឆេះអគារកាស៊ីណូ ហ្គ្រេន ដាយមិន ស៊ីធី នៅទីក្រុងប៉ោយប៉ែត ត្រូវបានក្រុមប្រតិបត្តិការរុករក និងសង្គ្រោះរបស់កម្ពុជា និងថៃ បន្តរកឃើញជាបន្តតាំងពីម៉ោង៦ព្រឹកថ្ងៃទី៣០ ខែធ្នូ នេះ។
អភិបាលខេត្តបន្ទាយមានជ័យ លោក អ៊ុំ រាត្រី ប្រាប់វិទ្យុអាស៊ីសេរី នៅថ្ងៃទី៣០ ធ្នូ ថា ក្រុមការងាររុករកកម្ពុជា ថៃ បានរកឃើញសាកសព៦នាក់បន្ថែមទៀត។ លោកបញ្ជាក់ថា គិតត្រឹមរសៀលថ្ងៃទី៣០ ខែធ្នូ ចំនួនអ្នកដែលបានស្លាប់កើនឡើងដល់២៥នាក់ហើយ ខណៈអ្នករបួសធ្ងន់ស្រាលមានជាង៧០នាក់ ក្នុងនោះបញ្ជូនទៅសង្គ្រោះនៅខេត្តស្រះកែវ(Sra Kaeo)ប្រទេសថៃ ចំនួន៤០នាក់ និងមានជនជាតិថៃម្នាក់ស្លាប់នៅតាមផ្លូវ។
លោក អ៊ុំ រាត្រី៖ «ក្នុងការរុករកជួយអន្តរាគមន៍ពីម្សិលមិញ យើងបានជួយសង្គ្រោះអ្នកដែលគេចពីអគ្គីភ័យ នៅលើដំបូលខាងលើនៃអគារកាស៊ីណូហ្នឹង យើងជួយសង្គ្រោះតាមឧទ្ធម្ភាគចក្រហ្នឹង យើងបានជួយជាង៥០នាក់ទៀត»។
ទោះជាយ៉ាងណាកាសែតក្នុងស្រុក និងកាសែតបាងកកប៉ុស្តិ៍ (Bangkok Post ) របស់ថៃ បានចុះផ្សាយថា ចំនួនអ្នកស្លាប់កើនដល់ចំនួន២៧នាក់ ហើយអាជ្ញាធរថៃ និងកម្ពុជា ជឿថា នឹងបន្តរកឃើញសាកសពបន្ថែមទៀតនៅក្នុងគំនរអគារបាក់បែក ព្រោះនៅមានមនុស្សជាច្រើននាក់ទៀត បានបាត់ខ្លួន។
នៅខាងបរិវេណអាគារដែលឆាបឆេះវិញ ប្រជាពលរដ្ឋជាច្រើននាក់ដែលមានសមាជិកគ្រួសារធ្វើការក្នុងកាស៊ីណូនោះ បានឈរស្រែកទ្រហោយំ និងកាន់រូបថតសាច់ញាតិដែលកំពុងបាត់ខ្លួនក្នុងគ្រោះថ្នាក់អគ្គីភ័យនេះ។ មកទល់ពេលនេះ ក្រុមជួយសង្គ្រោះកម្ពុជា-ថៃ នៅតែបន្តរុករកជនរងគ្រោះនៅក្នុងអគារកាស៊ីណូ ហ្គ្រេន ដាយមិន ស៊ីធី។
ភ្នាក់ងារជួយសង្គ្រោះមូលនិធិ ប៉តឹកតឹង ប្រទេសថៃ (POH TECK TUNG FOUNDATION) លោក ចានីន សាអាត (Chanin Sa At) ឱ្យវិទ្យុអាស៊ីសេរីដឹង នៅថ្ងៃទី៣០ ធ្នូ ថា អាជ្ញាធរថៃ បានបញ្ជូនក្រុមការងារជួយសង្គ្រោះប្រមាណជាង ២រយនាក់ដើម្បីស្វែងរកជនរងគ្រោះ។ លោកបន្តថា បេសកកម្មរុករកក្នុងអគារកាស៊ីណូនេះ ត្រូវការភាពប្រុងប្រយ័ត្នខ្ពស់ដោយសារសំណល់អគារដែលឆាបឆេះហើយ អាចនឹងបាក់រលំ។
ជនរងគ្រោះដែលនៅមានជីវិត ខ្លះត្រូវបានបញ្ជូនទៅសង្គ្រោះនៅប្រទេសថៃ និងខ្លះទៀត បញ្ជូនទៅមន្ទីរពេទ្យក្បែរកន្លែងកើតហេតុ នៅក្នុងប្រទេសកម្ពុជា។
ជនរងគ្រោះម្នាក់ជាបុគ្គលិកកាស៊ីណូ ហ្គ្រេន ដាយមិន ស៊ីធី លោក ទូច រស្មី ឱ្យដឹងថា កត្តាដែលបណ្ដាលឱ្យអគ្គីភ័យឆាបឆេះខ្លាំងបែបនេះ ដោយសារការសាងសង់ និងការតុបតែងលម្អក្នុងអគារ មិនបានផ្ដោតទៅលើប្រព័ន្ធបង្ការហានិភ័យឡើយ។ លោកបញ្ជាក់ថា នៅក្នុងអគារកាស៊ីណូ មិនបានបំពាក់សារ៉ែនប្រកាសអាសន្ន បំពង់ពន្លត់អគ្គីភ័យមានចំនួនតិច ជាពិសេសច្រកចេញពេលមានអាសន្នគ្មានសុវត្ថិភាព ជាហេតុបណ្ដាលឱ្យជនរងគ្រោះដែលជាប់នៅក្នុងអគារពិបាករំដោះខ្លួនរួច។ ទោះជាយ៉ាងណា លោកមើលឃើញថា អាជ្ញាធរខាងកម្ពុជាដែលមានកាតព្វកិច្ចជួយសង្គ្រោះ ហាក់នៅខ្វះបច្ចេកទេស ឧបករណ៍ជួយសង្គ្រោះ និងមិនសូវមានភាពរហ័សរហួន នៅពេលអគ្គីភ័យចាប់ផ្ដើមឆេះ។
លោក ទូច រស្មី៖ «ក្នុងហ្នឹងភាគច្រើនសុទ្ធតែជា កុងផ្លាកកេ ដែលគេដេគ័រ។ ពេលដែលឆាបឆេះទៅ គឺឆេះលឿន ប្រភេទដែលងាយនឹងឆេះ ហើយនិងមានអេប៉ុង និងអ្វីផ្សេងៗទៀតដែលងាយនឹងឆាបឆេះ។ អត់ដឹងថា ហេតុអ្វីបានជាពន្លត់មិនទាន់ ពេលដែលវាឆេះដំបូង។ កាស៊ីណូហ្នឹង ក្នុងពេលដែលបិទកូវីដនេះ ពេលប៉ុន្មានខែនេះហ្នឹង គេចាប់ផ្ដើមរៀបចំសាងសង់ ដេគ័រ កែប្រែថ្មីច្រើន»។
កាលពីយប់ថ្ងៃទី២៨ ខែធ្នូ ឆ្នាំ២០២២ អគ្គិភ័យ បានឆេះកាស៊ីណូ ហ្គ្រេន ដាយមិន ស៊ីធី ស្ថិតក្នុងក្រុងប៉ោយប៉ែត ខេត្តបន្ទាយមានជ័យ ដែលផ្ដើមដំបូងចេញពីអគារ ហ្គ្រេន ដាយមិន និងបានរីករាលដាលទៅកាន់សណ្ឋាគារ ហ្គ្រេន ដាយមិន ស៊ីធី និងអគារប៉ោយប៉ែត រីសត។ អាជ្ញាធរបានរាយការណ៍ជំហានដំបូង ចំពោះមូលហេតុបណ្ដាលឱ្យឆេះអគារកាស៊ីណូនេះថា ដោយសារឆ្លងចរន្ដអគ្គិសនីនៅទីតាំងជាន់ក្រោម និងបានរីករាលដាលទៅអគារដែលនៅក្បែរនោះ។
កាស៊ីណូ ហ្គ្រេន ដាយមិន ស៊ីធី មានបុគ្គលិកបម្រើការប្រុសស្រីប្រមាណជាង៤០០នាក់។ ក្នុងចំណោមជនរងគ្រោះដែលស្លាប់ និងរបួស មានទាំងបុគ្គលិកជនជាតិខ្មែរ ថៃ និងភូមា (Myanmar)។ ជនរងគ្រោះមួយចំនួនទៀត នៅមិនទាន់កំណត់អត្តសញ្ញាណឡើយ។ ក្នុងនោះជនរងគ្រោះខ្លះស្លាប់នៅក្នុងបន្ទប់ ខ្លះទៀតស្លាប់នៅផ្លូវដើរ កាំជណ្ដើរ និងខ្លះទៀតលោតទម្លាក់ពីលើអគារ។ តាមការសន្និដ្ឋានរបស់ប៉ូលិស ឱ្យដឹងថា ជនរងគ្រោះទាំងនោះ ហាក់ព្យាយាមរកច្រកចេញពីអគ្គិភ័យ តែរត់មិនរួចដោយសារភ្លើងឆេះខ្លាំង និងមានផ្សែងអាប់អួ។
ជុំវិញរឿងនេះ ប្រធានសមាគមការពារសិទ្ធិមនុស្សអាដហុក(ADHOC) លោក នី សុខា លោកសង្កេតឃើញថា ករណីគ្រោះថ្នាក់ដោយសារអគារសាងសង់ដែលធ្វេសប្រហែសលើប្រព័ន្ធសុវត្ថិភាពនេះ កើតមានជាច្រើនរួចមកហើយ ដូច្នេះអាជ្ញាធរ គួរយកករណីទាំងនេះធ្វើជាមេរៀន ដើម្បីកុំឱ្យកំហុសនេះ នៅតែកើតឡើងដដែលៗ។ លោកបន្តថា ក្រុមជួយសង្គ្រោះ ក៏គួរតែហ្វឹកហ្វឺន ទាំងសមត្ថភាព និងបច្ចេកទេសបន្ថែមទៀត ដើម្បីបង្កើនប្រសិទ្ធភាពការងារជួយសង្គ្រោះនេះ ឱ្យកាន់តែល្អ និងកាន់តែឆាប់រហ័សបន្ថែមទៀត។
លោក នី សុខា៖ «មិនមែនតែកាស៊ីណូមួយទេ គឺថាអាជ្ញាធររដ្ឋគួរតែទទួលខុសត្រូវនៅក្នុងរឿងនឹងដែរ។ ពិសេសគឺកិច្ចការអាជ្ញាធររដ្ឋ ដែលមានសមត្ថកិច្ចទទួលខុសត្រូវរឿងហ្នឹង ដែលមិនបានយកចិត្តទុកដាក់ក្នុងការត្រួតពិនិត្យតាំងពីការសាងសង់ តាំងពីការរៀបចំហេដ្ឋារចនាសម្ព័ន្ធ នៅក្នុងកាស៊ីណូហ្នឹង គឺថាត្រូវតែមានទំនួលខុសត្រូវដែរ។ បើនៅវិញ អាជ្ញាធររដ្ឋនៅក្នុងតំបន់ ដែលមានបញ្ហានឹង ហើយខ្វះការទទួលខុសត្រូវបែបនឹង គឺថាគេលាលែងចេញពីតំណែង។ ប៉ុន្តែដោយឡែកនៅស្រុកយើងវាហាក់ដូចជាវការទួលខុសត្រូវនឹង នៅមានកម្រិតខ្សោយណាស់»។
គ្រោះថ្នាក់ដែលបង្កឡើងដោយសារខ្វះបច្ចេកទេស និងរៀបចំប្រព័ន្ធសុវត្ថិភាពមិនបានល្អ បានកើតឡើងជាច្រើនករណីមកហើយរយៈពេលប៉ុន្មានឆ្នាំកន្លងមកនេះ។ ចំណែកបច្ចេកទេសជួយសង្គ្រោះជនរងគ្រោះ ក៏នៅមានកម្រិតនៅឡើយ។
ជនរងគ្រោះមួយចំនួន អះអាងថា នៅពេលអគ្គីភ័យចាប់ផ្ដើមឆាបឆេះនោះ មនុស្សមួយចំនួនក្នុងកាស៊ីណូ នាំគ្នាផ្អើលរត់ទៅជាន់ខាងលើដោយសង្ឃឹមថា អាជ្ញាធរ នឹងបញ្ជូន យន្តហោះ ឬរថយន្តស្ទូចពួកគេ ប៉ុន្តែភ្លើងបន្តឆាប់រាលដាលកាន់តែខ្លាំងដល់ជាន់ខាងលើដោយសារកម្លាំងខ្យល់បោកបក់ខ្លាំង ហើយមិនឃើញមានអាជ្ញាធរជួយទាន់ពេលឡើយ។ លើសពីនេះ ក្នុងអគារទាំងមូល បានដាច់ភ្លើងអគ្គិសនី ដែលធ្វើឱ្យជនរងគ្រោះ ងងឹតរកផ្លូវរត់ចេញមិនបាន។ ជនរងគ្រោះ និងគ្រួសាររបស់អ្នកដែលបាត់ខ្លួន ជឿថា ប្រសិនបើអាជ្ញាធរ ពន្លឿនការជួយសង្គ្រោះ និងមានឧបករណ៍គ្រប់គ្រាន់ គឺនឹងមិនបណ្តាលឱ្យមានមនុស្សជាច្រើនបានស្លាប់ និងរងរបួសបែបនេះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សមត្ថកិច្ចចាប់ខ្លួនជំនួយការផ្ទាល់របស់លោក ហ៊ុន សែន គឺលោក ដួង តារា ស្ងាត់ៗ
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- អ្នកឃ្លាំមើល ស្នើអាជ្ញាធរឱ្យបង្ហាញការស៊ើបអង្កេតលើទីប្រឹក្សាលោក ហ៊ុន សែន ពាក់ព័ន្ធករណីទទួលលុយរត់ការឡើងតំណែង
- តុលាការចោទប្រកាន់ជំនួយការផ្ទាល់លោក ហ៊ុន សែន គឺលោក ដួង តារា ពីបទ «ឆបោក»
- ក្រុមឆបោកតាមអនឡាញនៅខេត្តជាប់ព្រំដែនថៃ និងវៀតណាម «រីករាលដាលខ្លាំង»
អត្ថបទពេញនិយម
សង្គម
- សមត្ថកិច្ចនៅមិនទាន់ចាប់ខ្លួនឧកញ៉ា លី សាម៉េត បាននៅឡើយ
- ក្រសួងមហាផ្ទៃចាត់ទុកព័ត៌មានដែលថា កម្ពុជាលាក់រឿងផ្ដល់សញ្ជាតិឲ្យជនបរទេស ជាការមួលបង្កាច់
- ពលករខ្មែររាប់រយនាក់ធ្វើការនៅលើកោះមួយនៅថៃបារម្ភពីការចាប់ខ្លួនដាក់គុក
- មនុស្ស ៣៥នាក់ រងរបួសក្នុងហេតុការណ៍ក្រឡាប់រថយន្តដឹកកម្មករ នៅខេត្តកំពង់ស្ពឺ