ប្រជាពលរដ្ឋនៅស្រុកមេសាង ខេត្តព្រៃវែង កំពុងតែព្រួយបារម្ភអំពីអសន្តិសុខចោរលួចគោក្របីតាមភូមិ ដែលបានកើតមានជាបន្តបន្ទាប់ ជាពិសេសនៅពេលយប់តែម្ដង។ ពួកគាត់បញ្ជាក់ថា ដើម្បីថែរក្សាទ្រព្យសម្បត្តិរបស់ខ្លួនឲ្យបានគង់វង្ស អ្នកភូមិនាំគ្នាប្រុងប្រយ័ត្នការពារគោក្របីដោយខ្លួនឯង ហើយជារៀងរាល់យប់ ម្នាក់ៗស្ទើរតែមិនបានដេកពួននោះទេ។ ប៉ុន្តែអធិការប៉ូលិសស្រុកបញ្ជាក់ថា ចោរលួចគោក្របីបានថយចុះជាងឆ្នាំមុនៗ ហើយក៏ពុំមានអ្វីគួរឲ្យព្រួយបារម្ភដូចការលើកឡើងរបស់អ្នកភូមិនោះដែរ។
ក្រុមអ្នកភូមិរៀបរាប់ថា ការបាត់គោក្របីចេះតែកើតឡើងជាបន្តបន្ទាប់ដោយពុំមានការធូរស្បើយឡើយ ជាពិសេសអំឡុងដើមឆ្នាំ២០១៤ នេះតែម្ដង។ អ្នកភូមិអំពាវនាវសុំអាជ្ញាធរពាក់ព័ន្ធ ចាត់វិធានការទប់ស្កាត់សកម្មភាពចោរលួចគោក្របីនេះជាបន្ទាន់។
ប្រជាពលរដ្ឋម្នាក់ដែលបាត់ក្របីនាពេលកន្លងទៅ លោក នាង សុភ័ណ្ឌ រស់នៅភូមិអង្គក្អោត ឃុំរៃទទឹង ស្រុកមេសាង ថ្លែងនៅថ្ងៃទី៨ មេសា ថា លោកបានបាត់ក្របី ៣ក្បាល កាលពីថ្ងៃទី១ មេសា កន្លងទៅ។ ចំណែកឯអ្នកភូមិដទៃទៀត ក៏ត្អូញត្អែរថាបាត់គោក្របី និងខ្លះបាត់មាន់ទាជាបន្តបន្ទាប់ ដោយគ្មានអាជ្ញាធរណាអើពើពីរឿងអសន្តិសុខចោរលួចទ្រព្យសម្បត្តិរបស់អ្នកភូមិនេះទេ។
លោកថា មួយថ្ងៃៗចេះតែព្រួយបារម្ភ ហើយនាំគ្នាការពារដោយខ្លួនឯងជារៀងរាល់យប់ ស្ទើរតែមិនបានដេកពួនទេ៖ «ឆ្មាដើរមួយភ្លែតក៏បាត់ដែរ ឥឡូវហ្នឹងពិបាកណាស់ បាត់ទាបាត់មាន់បាត់អី។ ឥឡូវមិនសូវបានដេកទេភ័យតែហ្មងឥឡូវ លេងសើចអីបើលួចពេក វេទនាមែនទែនឥឡូវហ្នឹង ពិបាកណាស់ មួយយប់ៗមិនដែលហ្នឹងបានទេ ឲ្យប៉ូលិសនៅឃុំព្រៃទទឹង ហ្នឹង មកមើលការខុសត្រូវឲ្យបានមែនទែន ព្រោះពិបាកណាស់ប៉ូលិស អាដែងដូចលេងបាយឡុកបាយឡអ៊ីចឹង ពិបាកណាស់បាទ!»។
អ្នកភូមិម្នាក់ទៀតមកពីឃុំព្រៃទទឹង លោក ទុត នាត មានប្រសាសន៍ថា អសន្តិសុខចោរលួចគោក្របី ច្រើនធ្វើសកម្មភាពនៅពេលយប់ គឺផ្ទះខ្លះបាត់គោក្របី ២ក្បាល បីក្បាល កើតឡើងជាបន្តបន្ទាប់ពុំមានសញ្ញាណាដែលបញ្ជាក់ថាធូរស្រាលឡើយ។ លោកបន្តថា ប្រជាពលរដ្ឋមានការភ័យខ្លាចពីសុវត្ថិភាពចោរលួចគោក្របីនេះ ហើយរៀងរាល់យប់ម្នាក់ៗក៏មិនហ៊ានទៅចោលផ្ទះសម្បែងរបស់ខ្លួនដែរ៖ «ព្រួយបារម្ភអារឿងចោរច្រើនគ្មានសមត្ថកិច្ចណារកឃើញ ហើយអស់លោកប៉ូលិសហ្នឹងគ្រាន់តែមកធ្វើកំណត់ហេតុក្របីយ៉ាងម៉េចសម្បុរអី ប៉ុណ្ណា ឈ្មោលមេអ៊ីចឹងទៅ ដល់ហើយទៅចាំរកមិនដឹងទៅរកឯណាវិញ។ ដេកមិនលក់ទេទាំងអស់គ្នាហ្នឹង មួយយប់ៗហ្នឹងអាដែងគេមកលួចគេមកប្លន់ហ្នឹង ចោរទាំងហ្វូងដូចទៅរកត្រីបឹងអ៊ីចឹង។ ហើយប្រជាពលរដ្ឋគ្នាមានអី វាលួចអស់ៗ អ៊ីចឹងរដូវធ្វើស្រែផង»។
ឆ្លើយតបនឹងបញ្ហានេះ អធិការប៉ូលិសស្រុកមេសាង លោក នៅ ហាច មានប្រសាសន៍ថា កន្លងទៅអ្នកភូមិធ្លាប់មានបាត់គោក្របីខ្លះមែន ប៉ុន្តែការបាត់គោក្របីនេះច្រើនតែកើតមាននៅពេលថ្ងៃប៉ុណ្ណោះ។ ហើយបញ្ហានេះកើតឡើងដោយសារតែការធ្វេសប្រហែសរបស់អ្នកភូមិ ដែលពួកគាត់ច្រើនតែចិញ្ចឹមលែងគោក្របីឲ្យដើរពាសវាលពាសកាល ធ្វើឲ្យគោក្របីវង្វេងរកផ្លូវមកផ្ទះវិញមិនឃើញ។ លោក នៅ ហាច បញ្ជាក់បន្ថែមថា បើទោះជាមានចោរលួចគោក្របីឆ្នាំនេះខ្លះមែនក៏ដោយ ប៉ុន្តែចោរលួចគោក្របីឆ្នាំនេះបានថយចុះជាងឆ្នាំមុនៗច្រើន។ លោកថា អាជ្ញាធរបានចាត់វិធានការទប់ស្កាត់ជាបន្តបន្ទាប់មកដែរ ហើយក៏ពុំមានអ្វីគួរឲ្យព្រួយបារម្ភដូចការលើកឡើងរបស់អ្នកភូមិនោះឡើយ។
លោក នៅ ហាច៖ «អ្នករាយចេះតែរាយ ប៉ុនមិនមែនទេ ឆ្នាំ២០១៣ កន្លងមកវាមានមែនម្ដងម្កាលមែន ប៉ុន្តែសមត្ថកិច្ចយើងកំពុងធ្វើការបំបាត់ ហើយដល់ឆ្លងឆ្នាំ២០១៤ ហ្នឹង វាអត់មានទេ។ វាមិនមែនចោរទៅទាំងអស់ណា អានេះជាការធ្វេសប្រហែស ជួនក្របីគោដូចខ្ញុំនិយាយមិញវាដោយញីឈ្មោល វាវង្វេងអីអ៊ីចឹងទៅ ព្រោះត្រង់ហ្នឹងវាតំបន់ព្រៃដែរ ស្មាច់នោះណាស់។ ហើយគាត់ប្រុងប្រយ័ត្នខ្លួនគាត់ខ្លះ អាការមើលហ្នឹងមិនមែនថាខែប្រាំងអាងថាវាល ហើយលែងទៅហ្នឹង មិនមើលអ៊ីចឹង វាដោយញីឈ្មោល ជួនវាចេះតែរកស៊ីតាមជើងកញ្ជ្រាំងខៀវៗ ចេះតែទៅវាវង្វេងអ៊ីចឹងណាស់»។
តែយ៉ាងណា អ្នកភូមិឲ្យដឹងថា គោក្របីដែលបាត់នៅពេលថ្ងៃ ភាគច្រើនតាមរកឃើញមកវិញ ចំណែកឯគោក្របីដែលបាត់នៅពេលយប់មិនអាចរកឃើញវិញឡើយ។ ម្យ៉ាង ថ្ងៃដែលបាត់គោក្របីនោះ ច្រើនតែសង្កេតឃើញកើតមានករណីការដាក់ថ្នាំបំពុលឆ្កែរបស់អ្នកភូមិ ហើយករណីដែលអ្នកភូមិបាត់គោក្របីច្រើននៅខែមីនា ឆ្នាំ២០១៤៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។