ទស្សនៈ​ពលរដ្ឋ​ចំពោះ​គម្រោង​វិនិយោគ​របស់​ក្រុមហ៊ុន​ណាហ្គាខប នៅ​ជិត​តំបន់​អង្គរ

ដោយ សុជីវី
2020-11-22
Share
ណាហ្គា ខប ​គេហទំព័រ​របស់ក្រុមហ៊ុន​ណាហ្គា ខប (Naga Corp)។
Photo Screenshot

ពលរដ្ឋ​ក្នុង​និង​ក្រៅ​ប្រទេស​មួយ​ចំនួន​បង្ហាញ​ទស្សនៈ​ផ្សេងៗ​គ្នា​ពី​គម្រោង​វិនិយោគ​របស់​ក្រុមហ៊ុន​ណាហ្គា ខប (Naga Corp) នៅ​ជិត​តំបន់​អង្គរ​ខេត្ត​សៀមរាប​។ ពួកគេ​ព្រួយបារម្ភ​ថា គម្រោង​នេះ​ជា​អាវុធ​មុខ​ពីរ​ដែល​អាច​ផ្ដល់​ប្រយោជន៍​ផង និង​អាច​ប៉ះពាល់​ដល់​ពលរដ្ឋ និង​បរិស្ថាន​ក្នុង​ខេត្ត​សៀមរាប។

ពលរដ្ឋ​មិនទាន់​មាន​ជំនឿ​ថា ការ​វិនិយោគ​របស់​ក្រុមហ៊ុន​ណាហ្គាខប នៅ​ជិត​តំបន់​អង្គរ​ខេត្ត​សៀមរាប​នឹង​មិន​ប៉ះពាល់​ពលរដ្ឋ គ្រឹះ​ប្រាសាទ និង​សោភណភាព​តំបន់​អង្គរ ដូច​មន្ត្រី​រដ្ឋាភិបាល​អះ​អាង​នោះ​ទេ​។ ពួកគេ​ចង់​ឃើញ​រដ្ឋាភិបាល​ផ្ដល់​ព័ត៌មាន​ពិស្ដារ​ពី​ទីតាំង និង​ផែនការ​វិនិយោគ​នៅ​តំបន់​នេះ​ឱ្យ​បាន​ទូលំទូលាយ។

មគ្គុទ្ទេសក៍​ទេសចរណ៍​ក្នុង​ខេត្ត​សៀមរាប លោក ពុយ ឡេង យល់​ថា បើ​កា​រវិន​យោគ​អាច​ទាក់ទាញ​ភ្ញៀវ​ទេសចរណ៍​បាន​ច្រើន​នឹង​អាច​ធ្វើ​ឱ្យ​ពលរដ្ឋ​នៅ​ខេត្ត​សៀមរាប បានការ​ងា​រ​ធ្វើ​ថែមទៀត៖ «គម្រោង​ហ្នឹង​បើ​សិន​ដំណើរ​អី​ល្អ​ភ្ញៀវ​ចាប់អារម្មណ៍​អី គាត់​បាន​នៅ​តំបន់​អង្គរ​បាន​ច្រើន»

ពលរដ្ឋ​ម្នាក់​រស់នៅ​ខេត្ត​សៀមរាប លោក ទី ឡេង យល់​ថា បើ​ការ​អភិវឌ្ឍ​នេះ​មិន​ធ្វើ​ឱ្យ​ពលរដ្ឋ​ប៉ះពាល់​ដល់​ពលរដ្ឋ​គឺជា​រឿង​ល្អ៖ «បើ​អភិវឌ្ឍ​ល្អ​ផ្នែក​ទេសចរណ៍​ផង​ព្រោះ​ឃើញ​ដាក់​ថា អត់​មាន​កាស៊ីណូ​អី​ទេ មានតែ​សណ្ឋាគារ សួន​កម្សាន្ត​អ៊ីចឹង​អាច​ទាញ​ភ្ញៀវ​ទេសចរណ៍​ទៅ​ច្រើន​ទៅ​ប្រជាជន​ក្នុង​ខេត្ត​សៀមរាប​ក៏​បាន​ទទួល​បាន​ផលប្រយោជន៍​ពី​ការ​អភិវឌ្ឍ​ហ្នឹង​ដែរ»

រីឯ​ពលករ​ធ្វើការ​នៅ​ប្រទេស​ថៃ លោក ស៊ុន សីហា ស្នើ​ឱ្យ​ការ​អភិវឌ្ឍ​នេះ​ធ្វើ​ឱ្យ​ពលរដ្ឋ​សប្បាយចិត្ត កុំ​ឱ្យ​ពលរដ្ឋ​ទឹកភ្នែក​បាត់បង់​ដីធ្លី៖ «យើង​គាំទ្រ​ក្នុង​ការ​អភិវឌ្ឍ ប៉ុន្តែ​ធ្វើ​ម៉េច​ឱ្យ​មាន​តម្លាភាព ឱ្យ​បាន​ដល់​ប្រជាជន​យើង ដល់​ប្រទេសជាតិ​យើង​ពិតប្រាកដ​កុំ​ការ​អភិវឌ្ឍ​ហ្នឹង​ធ្វើ​ឱ្យ​ពលរដ្ឋ​ទឹកភ្នែក»

ចំណែក​ពលរដ្ឋ​រស់នៅ​រាជធានី​ភ្នំពេញ កញ្ញា ឡេង ចិន្តា យល់​ថា បើ​ការ​បោះ​ទុន​វិនិយោគ​នេះ​ផ្ដល់​ការងារ ផ្ដល់​ប្រយោជន៍​ដល់​ពលរដ្ឋ​ក្នុង​ខេត្ត​សៀមរាប​កញ្ញា​គាំទ្រ ប៉ុន្តែ​បើ​ការ​វិនិយោគ​នេះ​ធ្វើ​ឱ្យ​ប៉ះពាល់​សោភ័ណភាព​ទីក្រុង​បុរាណ ឬ​ដណ្ដើម​ការងារ​ពលរដ្ឋ​នៅ​ខេត្ត​នេះ កញ្ញា​មិន​គាំទ្រ​ទេ៖ «បើ​អភិវឌ្ឍ​យូរៗ​ទៅ​បាត់​អត្តសញ្ញាណ​នៅ​ក្នុង​តំបន់​អង្គរ​អស់ គ្រាន់តែ​អភិវឌ្ឍ​ឱ្យ​ពេញ​ដី​ហើយ​គ្មាន​មនុស្ស​ទៅ​ខ្ញុំ​អត់​គាំទ្រ​ទេ»

រីឯ​ពលរដ្ឋ​ខ្មែរ​ធ្វើការ​នៅ​ប្រទេស​ជប៉ុន​វិញ​លោក ហៃ វណ្ណា សង្កេត​ឃើញ​ថា រាល់​ពេល​មានការ​អភិវឌ្ឍ​រដ្ឋាភិបាល​តែង​អួត​សរសើរ​ពី​គម្រោង​នោះ ប៉ុន្តែ​ពេល​អភិវឌ្ឍ​ជាក់ស្ដែង​តែង​ខុស​ពី​ការពិត​។ លោក​ស្នើ​ឱ្យ​មានការ​ពន្យល់​និង​ផ្ដល់​ព័ត៌មាន​ឱ្យ​ពលរដ្ឋ​បាន​ដឹង​ទូលំទូលាយ៖ «មាន​ការ​បកស្រាយ​ត្រឹមត្រូវ​ហើយ​អ្វី​ដែល​គេ​ធ្វើ​ឱ្យ​ដូច​ការ​បកស្រាយ ប៉ុន្តែ​អ្វី​ដែល​ខ្ញុំ​ព្រួយបារម្ភ​នោះ​អ្វី​ដែល​គេ​បាន​បកស្រាយ​ហើយ​លទ្ធផល​នោះ​គឺ​ផ្ទុយ»

ពលរដ្ឋ​ខ្មែរ​ម្នាក់ទៀត​កំពុង​ធ្វើ​ការ​នៅ​ប្រទេស​កូរ៉េខាងត្បូង​លោក ឈុន ប៊ុនហ៊ី យល់​ថា គម្រោង​វិនិយោគ​ដែល​មាន​ចម្ងាយ ៥០០​ម៉ែត្រ ពី​ឧទ្យាន​ជាតិ​អង្គរ ជិត​តំបន់​មិន​ល្អ ចំពោះ​តំបន់​អង្គរ​ទេ​លោក​ស្នើ​ឱ្យ​គម្រោង​វិនិយោគ​ក្រោម​ផ្លាក​អភិវឌ្ឍ​នេះ​ធ្វើ​ឱ្យ​ឆ្ងាយ​ជាង​នេះ៖ «បើ​ចង់​ធ្វើ​លើទឹក​ដី​សៀមរាប​ធ្វើ​នៅ​ឯ​ណា​ធ្វើ​ទៅ ប៉ុន្តែ​កុំ​ឱ្យ​ធ្វើ​នៅ​ជិត​តំបន់​អ៊ីចឹង​ពេក អត់​ត្រឹមត្រូវ ឆ្ងាយ​ពី​តំបន់​អង្គរ​ពី ១០​ទៅ ១៥​គីឡូ​ម៉ែត្រ​ពី​តំបន់​អង្គរ»

ការ​លើកឡើង​របស់​ពល​រដ្ឋ​បែប​នេះ ក្រោយ​ពេល​រដ្ឋាភិបាល​លោក ហ៊ុន សែន បាន​សម្រេច​អនុញ្ញាត​ឱ្យ​ក្រុមហ៊ុន​ណាហ្គា ខប ដែល​ជា​ក្រុមហ៊ុន​ធំ​នៃ​ក្រុមហ៊ុន​កាស៊ីណូ ណាហ្គាវើល៍ (Nagaworld) ជួល​ដី​រយៈពេល ៥០​ឆ្នាំ ទំហំ ៧៥​ហិកតារ ដែល​មាន​ចម្ងាយ ៥​រយ ម៉ែត្រ ពី​ឧទ្យាន​ជាតិ​អង្គរ។ គម្រោង​ដែល​មាន​ទឹកប្រាក់​ជំហាន​ដំបូង​ក្នុង​តម្លៃ ៣៥០ លាន​ដុល្លារ ធ្វើ​ការ​វិនិយោគ សណ្ឋាគារ​ផ្កាយ​ប្រាំ កន្លែង​កម្សាន្ត ឧទ្យាន​វប្បធម៌​បែប​ប្រវត្តិសាស្ត្រ និង​ទីក្រុង​សៀមរាប ឆៃណាថោន (Siem Reap China Town ) ដែល​ក្រុមហ៊ុន​ដាក់ឈ្មោះ​ជា​រួម​ថា «Angkor Lake of Wonder»

មន្ត្រី​រដ្ឋាភិបាល​និង​អ្នកនាំពាក្យ​អាជ្ញាធរ​ជាតិ​អប្សរា​អះអាង​ថា គម្រោង​អភិវឌ្ឍ​នេះ​គ្មាន​កាស៊ីណូ​ទេ​ហើយ​កន្លែង​នោះ​ជា​តំបន់​ទេសចរណ៍ គឺ​ស្ថិតនៅ​ខាងក្រៅ​តំបន់​ឧទ្យានជាតិ​អង្គរ។

ទោះ​យ៉ាងណា ពលរដ្ឋ​ម្នាក់​លោកស្រី បូ សូនី និយាយ​ថា លោកស្រី​មិន​គាំទ្រ​ការ​អភិវឌ្ឍ​នេះ​ទេ ដោយ​លោកស្រី​យល់​ថា គម្រោង​សៀមរាប ឆៃណាថោ​ន នឹង​ធ្វើ​ឱ្យ​ប៉ះពាល់​ដល់​វប្បធម៌​ខ្មែរ៖ «បង​អត់​គាំទ្រ អត់​សប្បាយចិត្ត​បើ​រដ្ឋាភិបាល​សម្រេច​ឱ្យ​គម្រោង​ចេញ​មែន​យូរៗ​ទៅ​បំបាត់​វប្បធម៌​យើង យើង​មើល​ប្រជាជន​យើង​ឆាប​ចាប់​វប្បធម៌​គេ​លឿន​ណាស់»

អង្គការ​យូណេស្កូ (UNESCO) បាន​ដាក់​ប្រាសាទ​ទាំងឡាយ​នៅ​ក្នុង​តំបន់​អង្គរ​ទាំងមូល​ព្រមទាំង​បរិវេណ និង​ព្រៃព្រឹក្សា​នៅ​តំបន់​អង្គរ​ដែល​មាន​ទំហំ​ប្រមាណ​ជាង ៤០០​គីឡូម៉ែត្រ​ការ៉េ ចូល​ជា​សម្បត្តិ​បេតិកភណ្ឌ​ពិភពលោក​នៅ​ខែ​ធ្នូ ឆ្នាំ​១៩៩២​។ ប្រាសាទ​បុរាណ​នេះ​រក​ចំណូល​ឲ្យ​កម្ពុជា​បាន​រាប់​លាន​ដុល្លារ​សហរដ្ឋអាមេរិក​ក្នុង​មួយឆ្នាំៗ តាមរយៈ​ការ​លក់​សំបុត្រ​ឲ្យ​ភ្ញៀវ​ទេសចរ​អន្តរជាតិ​ចូល​ទស្សនា​។ ពលរដ្ឋ និង​អ្នកសង្កេតការណ៍​ស្នើ​ទៅ​រដ្ឋាភិបាល​មុន​សម្រេច​ឱ្យ​ក្រុមហ៊ុន​ឯកជន​វិនិយោគ​ក្នុង​ខេត្ត​វប្បធម៌​នេះ ត្រូវ​គិតគូរ​ឱ្យ​បាន​ជាក់លាក់​ពី​ផល​ប៉ះពាល់​ដល់​ពលរដ្ឋ សោភ័ណភាព គ្រឹះ​ប្រាសាទ និង​ភ្ញៀវ​បរទេស​ផ្សេងទៀត​ដែល​មិនមែន​ជា​ជនជាតិ​ចិន​ក្នុង​ខេត្ត​នេះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។