ពលរដ្ឋខេត្តត្បូងឃ្មុំសោកស្ដាយដែលមិនបានចូលរួមដង្ហែសពបណ្ឌិត កែម ឡី ដោយផ្ទាល់
2016.07.25
ក្បួនដង្ហែសពបណ្ឌិត កែម ឡី ទៅស្រុកកំណើតរបស់លោកឋិតនៅភូមិអង្គតាកុប ឃុំលាយបូរ ស្រុកត្រាំកក់ ខេត្តតាកែវ នៅថ្ងៃទី២៤ ខែកក្កដា ឆ្នាំ២០១៦។ RFA/Brach Chev
RFA/Brach Chev
ប្រជាសហគមន៍ជាច្រើននៅតាមបណ្ដាស្រុកមួយចំនួនក្នុងខេត្តត្បូងឃ្មុំ សម្ដែងការសោកស្ដាយដោយសារតែពួកគាត់មិនបានទៅចូលរួមដង្ហែសពលោកបណ្ឌិត កែម ឡី ពីភ្នំពេញទៅស្រុកកំណើតនៅឯខេត្តតាកែវ។ មូលហេតុពួកគាត់មិនបានចូលរួម ដោយសារបញ្ហាជីវភាពក្នុងគ្រួសារ និងបញ្ហាខ្វះថវិកា ជាដើម ប៉ុន្តែពួកគេបានគោរពវិញ្ញាណក្ខន្ធលោកបណ្ឌិត កែម ឡី ពីចម្ងាយទៅវិញ។ សង្គមស៊ីវិលមើលឃើញថា រូបភាពសោកស្ដាយ និងការចូលរួមរបស់ពលរដ្ឋដោយប្រយោលនេះ គឺមិនមែនជាការសម្ដែងឡើយ ប៉ុន្តែជាការគោរពចំពោះមនុស្សល្អប៉ុណ្ណោះ។
ប្រជាសហគមន៍ជាច្រើនលើកឡើងថា ដ្បិតតែពួកគាត់មិនអាចចូលរួមដង្ហែសពលោកបណ្ឌិត កែម ឡី ទៅស្រុកកំណើតដោយផ្ទាល់នាឱកាសចុងក្រោយក៏ដោយ ប៉ុន្តែពួកគាត់នៅតែក្តុកក្តួលក្នុងចិត្ត និងសោកស្ដាយចំពោះវីរភាពរបស់បណ្ឌិត កែម ឡី កាលនៅរស់ ដែលបានរួមចំណែកជាច្រើនដើម្បីសិទ្ធិសេរីភាពក្នុងការបញ្ចេញមតិ និងកែលំអចំណុចខ្វះខាតរបស់រាជរដ្ឋាភិបាល។
ប្រជាពលរដ្ឋលើកឡើងថា មូលហេតុពួកគាត់មិនបានចូលរួម គឺដោយសារកត្តាជីវភាពខ្វះខាត ពិសេសខ្វះថវិកាសម្រាប់ធ្វើដំណើរឡើងមកភ្នំពេញ ហើយមានពលរដ្ឋខ្លះភ័យខ្លាចអាជ្ញាធរតាមដានជាដើម។
ប្រជាសហគមន៍នៅឃុំត្រពាំងព្រីង ស្រុកតំបែរ លោក ឈិន យ៉ុង មានប្រសាសន៍ទាំងអួលដើមកថា លោកសោកស្ដាយជាពន់ពេកដែលមិនបានទៅចូលរួមដង្ហែសពលោកបណ្ឌិត កែម ឡី ទៅតម្កល់ទុកនៅឯស្រុកកំណើត។ លោកបញ្ជាក់ថា មូលហេតុមិនបានចូលរួម ដោយសារក្រុមគ្រួសារមានទុក្ខធ្ងន់ ព្រោះប្រពន្ធ និងកូននៅផ្ទះមានជំងឺ ម្យ៉ាងមិនមានថវិកាដើម្បីធ្វើដំណើរទៅភ្នំពេញផង។ ប្រជាសហគមន៍រូបនេះ នៅតែសោកស្ដាយចំពោះការបាត់បង់លោកបណ្ឌិត កែម ឡី ពីព្រោះជាការបាត់បង់កុលបុត្រជាតិ និងធនធានមនុស្សដ៏កម្រមួយរូប៖ «ការបាត់បង់លោកបណ្ឌិត កែម ឡី ជាការបាត់បង់ធនធានមនុស្សយ៉ាងសំខាន់នៅក្នុងប្រទេសខ្មែរទូទៅ។ មិនថាអ្នកក្រអ្នកមានទេ គេស្រឡាញ់គាត់ណាស់ ដោយគាត់ហ៊ាននិយាយ»។
មិនខុសគ្នានេះ ពលរដ្ឋមួយរូបទៀត លោក យ៉េត វ៉ន បានបង្ហាញពីការសោកស្ដាយ ខណៈលោកមិនបានទៅចូលរួមគោរពវិញ្ញាណក្ខន្ធ ឬឃើញមុខលោកបណ្ឌិត កែម ឡី ជាលើកចុងក្រោយ ដោយសារតែកត្តាជីវភាពក្រីក្រ ខ្វះខាតថវិកាធ្វើដំណើរ។ លោកបួងសួងឲ្យវិញ្ញាណក្ខន្ធលោកបណ្ឌិត កែម ឡី បានទៅកាន់សុគតិភព និងឆាប់បានចាប់កំណើតជាថ្មី ដើម្បីជួយសង្គមខ្មែរបន្តទៀត៖ «ចង់ឲ្យអន្តរជាតិ និងអង្គការសហប្រជាជាតិ ធ្វើម៉េចរកឃាតកឲ្យឃើញ រកយុត្តិធម៌ឲ្យបានជាក់លាក់»។
ក្រៅពីពលរដ្ឋនៅស្រុកតំបែរ គឺមានពលរដ្ឋជាច្រើនសហគមន៍ផ្សេងទៀតនៅស្រុកក្រូចឆ្មារ ស្រុកមេមត់ ជាដើម សុទ្ធតែបង្ហាញពីការសោកស្ដាយ ព្រោះមិនបានទៅចូលរួមការដង្ហែសពលោកបណ្ឌិត កែម ឡី ជាលើកចុងក្រោយ។
ប្រជាពលរដ្ឋនៅស្រុកក្រូចឆ្មារ លោក សា សុខ ឲ្យដឹងថា ព្រោះតែមិនបានទៅចូលរួមដង្ហែសពដោយផ្ទាល់ ប៉ុន្តែលោកបានបួងសួងនៅគេហដ្ឋានសុំឲ្យលោកបណ្ឌិត បានទៅកាន់ទីឋានបរមសុខកុំបីអាក់ខានឡើយ៖ «សោកស្ដាយ! ចូលរួមគោរពវិញ្ញាណក្ខន្ធរបស់លោកដែលបានបូជាអាយុជីវិត ប្រជាធិបតេយ្យដើម្បីការសម្ដែងមតិឲ្យប្រជាជនបានដឹង»។
ទោះបីជាយ៉ាងនេះក្តី មានតំណាងប្រជាពលរដ្ឋជាច្រើនសហគមន៍នៅខេត្តត្បូងឃ្មុំ នាំគ្នារៃអង្គាសប្រាក់ចូលបុណ្យសព ហើយមានមួយចំនួនរៃប្រាក់គ្នាសម្រាប់ជួលរថយន្តឈ្នួល ឬជិះឡានឈ្នួលដោយខ្លួនឯងទៅរាជធានីភ្នំពេញ ដើម្បីចូលរួមដង្ហែសពលោកបណ្ឌិត កែម ឡី។
ប្រជាសហគមន៍នៅឃុំទន្លូង ស្រុកមេមត់ លោក ប៊ុន សៅ និយាយថា ពួកគាត់នាំគ្នាជិះឡានឈ្នួលទៅចូលរួមដង្ហែសពលោកបណ្ឌិត កែម ឡី ដោយស្ម័គ្រចិត្តព្រោះចង់បង្ហាញពីការគោរពស្រឡាញ់ចំពោះអ្នកចេះដឹង និងអ្នកដែលហ៊ាននិយាយការពិត។
ប្រជាសហគមន៍ទាំងនោះ ចង់ឲ្យមានការកសាងរូបសំណាកលោកបណ្ឌិត កែម ឡី ដ៏ធំមួយសម្រាប់ទុកឲ្យក្មេងជំនាន់ក្រោយបានស្គាល់ពីវីរភាពរបស់លោក។
មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តត្បូងឃ្មុំ លោក នាង សុវ៉ាត មើលឃើញថា ការចូលរួមរបស់ពលរដ្ឋពេលនេះ ពុំមែនជាសកម្មភាពធ្វើតាមគ្នា ឬជាការសម្ដែងនោះទេ ប៉ុន្តែវាបង្ហាញពីការឲ្យតម្លៃដល់អ្នកចេះដឹង និងជនដែលហ៊ាននិយាយការពិត ព្រមទាំងគោរពចំពោះបុគ្គលដែលបានធ្វើល្អនៅក្នុងសង្គម៖ «ចង់លើកទឹកចិត្តដល់អ្នកក្រោយដែលធ្វើហ្នឹងឲ្យមានសេចក្តីក្លាហានទៅ ព្រោះអីសេចក្តីល្អវាមិនសាបសូន្យទេ វាមិនមែនដូចអំពើអាក្រក់ទេ»។
មន្ត្រីសិទ្ធិមនុស្សដដែលយល់ថា ការស្នើសុំរបស់ប្រជាសហគមន៍ចង់ឲ្យកសាងរូបសំណាកលោកបណ្ឌិត កែម ឡី គឺជារឿងល្អមួយ ពីព្រោះការកសាងរូបសំណាកវីរជននៅក្នុងសង្គមខ្មែរ គឺជាវប្បធម៌ពីបុរាណមក និងសម្រាប់ទុកឲ្យខ្មែរជំនាន់ក្រោយបានស្គាល់ពីវីរភាព និងស្នាដៃរបស់លោកបណ្ឌិត កែម ឡី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សមត្ថកិច្ចចាប់ខ្លួនជំនួយការផ្ទាល់របស់លោក ហ៊ុន សែន គឺលោក ដួង តារា ស្ងាត់ៗ
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- ក្រុមឆបោកតាមអនឡាញនៅខេត្តជាប់ព្រំដែនថៃ និងវៀតណាម «រីករាលដាលខ្លាំង»
- APHR ជំរុញឱ្យកម្ពុជាដោះលែងពលករខ្មែរ នួន តឿន និងអ្នកកាសែត លោក ម៉ិច ដារ៉ា
- អ្នកឃ្លាំមើលសង្គមបារម្ភថា ក្រុម Hacker កូរ៉េខាងជើងចូលលួចយកទិន្នន័យក្នុងស្ថាប័ននៅកម្ពុជាប៉ះពាល់ដល់សន្តិសុខជាតិ
អត្ថបទពេញនិយម
សង្គម
- ក្រុម Hacker កូរ៉េខាងជើងចូលលួចយកទិន្នន័យក្នុងស្ថាប័នសំខាន់ៗនៅកម្ពុជា
- ក្រសួងមហាផ្ទៃចាត់ទុកព័ត៌មានដែលថា កម្ពុជាលាក់រឿងផ្ដល់សញ្ជាតិឲ្យជនបរទេស ជាការមួលបង្កាច់
- សមត្ថកិច្ចនៅមិនទាន់ចាប់ខ្លួនឧកញ៉ា លី សាម៉េត បាននៅឡើយ
- មនុស្ស ៣៥នាក់ រងរបួសក្នុងហេតុការណ៍ក្រឡាប់រថយន្តដឹកកម្មករ នៅខេត្តកំពង់ស្ពឺ