កម្មករប្រមាណ ២០០នាក់ ក្នុងចំណោមកម្មករជាង ៧០០នាក់នៃរោងចក្រកាត់ដេរសម្លៀកបំពាក់ ផាញ ហ្គ្រេត (Pine Great) ស្ថិតក្នុងសង្កាត់បឹងទំពុន ខណ្ឌមានជ័យ រាជធានីភ្នំពេញ បានបិទផ្លូវលេខ៣៧១ ដើម្បីទាមទារប្រាក់ឈ្នួលចុងក្រោយរបស់ពួកគេ នៅថ្ងៃទី១០ ខែឧសភា។
ការបិទផ្លូវត្រូវបានធ្វើឡើងបន្ទាប់ពីភាគីក្រុមហ៊ុនមិនបានគោរពការសន្យា ដែលថានឹងបើកប្រាក់ឈ្នួលឲ្យកម្មករនៅថ្ងៃទី១០ ខែឧសភា ក្រោយពីថៅកែរោងចក្រមួយនេះបានរត់ចោលកម្មករទៅហើយនោះ។
តំណាងកម្មករនៃរោងចក្រ ផាញ ហ្គ្រេត លោកស្រី កែ សុខុម ថ្លែងថា ការបិទផ្លូវ គឺជាជម្រើសចុងក្រោយរបស់ពួកគាត់ បន្ទាប់ពីការតវ៉ាអស់រយៈពេល ៣ថ្ងៃមិនទទួលបានលទ្ធផល។
អភិបាលរងខណ្ឌមានជ័យ លោក ហៀក ចាន់លាង មានប្រសាសន៍ថា អាជ្ញាធរដែនដីបានត្រឹមតែជួយសម្របសម្រួលប៉ុណ្ណោះ ចំណែកសំណងដែលរោងចក្រជំពាក់កម្មករនោះ គឺជាដំណោះស្រាយរវាងកម្មករ ក្រុមហ៊ុន និងក្រសួងការងារ។
ទោះយ៉ាងណាក្ដី អគ្គលេខាធិការរងសហជីពសេរីកម្មករនៃព្រះរាជាណាចក្រកម្ពុជា លោក ឃឹម ចំណាន អះអាងថា បញ្ហានេះវាមិនពិបាកអ្វីទេ បើសិនជាអាជ្ញាធរ និងស្ថាប័នរដ្ឋាភិបាលដែលពាក់ព័ន្ធមានសុឆន្ទៈក្នុងការនាំខ្លួនថៅកែរោងចក្រឲ្យមកទទួលខុសត្រូវចំពោះកម្មករនោះ។
ពុំមានភាគីពាក់ព័ន្ធណាមួយបញ្ជាក់ថា ក្រុមហ៊ុន ផាញ ហ្គ្រេត បានបង់ប្រាក់តម្កល់សម្រាប់ដំណើរការអាជីវកម្មរបស់ខ្លួននៅកម្ពុជា នោះទេ។ មន្ត្រីសហជីពមួយចំនួន បានឲ្យដឹងថា ជាទូទៅនៅពេលដែលរោងចក្រ ឬក្រុមហ៊ុនមួយក្ស័យធន ម្ចាស់ក្រុមហ៊ុនតែងរត់បាត់ ចំណែកឯកម្មករត្រូវខាតបង់អត្ថប្រយោជន៍ទាំងស្រុង។
កម្មកររោងចក្រ ផាញ ហ្គ្រេត បានបិទផ្លូវពេញមួយថ្ងៃ ហើយពួកគេថានឹងបន្តការបិទផ្លូវទៀត ប្រសិនបើនៅតែគ្មានដំណោះស្រាយនោះ។ ក្រៅពីការបិទផ្លូវនៅថ្ងៃទី១០ ខែឧសភា ក្រុមអ្នកតវ៉ាក៏បានប៉ុនប៉ងហែក្បួនទៅផ្ទះលោកនាយករដ្ឋមន្ត្រី ហ៊ុន សែន នៅក្បែរវិមានឯករាជ្យដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។