ពលករខ្មែរដែលកំពុងធ្វើការងារខុសច្បាប់នៅប្រទេសថៃកំពុងសំងំធ្វើការទាំងភ័យខ្លាច
2018.11.08
ពលករខ្មែរ ដែលសមត្ថកិច្ចថៃចុះចាប់បាននៅផ្សារស៊ីមុមមឿង ខេត្តប៉ាក់ថុមថានី ជាប់ទីក្រុងបាងកក កាលពីថ្ងៃទី៦ ខែវិច្ឆិកា ឆ្នាំ ២០១៨។
Provided photo
មន្ត្រីសង្គមស៊ីវិលដែលធ្វើការពារសិទ្ធិពលករខ្មែរនៅក្រៅប្រទេស ស្នើសុំឲ្យរបបក្រុងភ្នំពេញជួបជជែកជាមួយភាគីថៃ ដើម្បីរកដំណោះស្រាយជួយពលករខ្មែរ ដែលកំពុងធ្វើការងារខុសច្បាប់។ សំណើសុំនេះ គឺដោយសារតែពលករខ្មែរ ដែលកំពុងធ្វើការងារខុសច្បាប់នៅប្រទេសថៃអះអាងថា ពួកគេកំពុងសំងំធ្វើការងារទាំងភ័យខ្លាច ព្រោះខ្លាចសមត្ថកិច្ចអន្តោប្រវេសន៍ថៃចាប់ខ្លួន។
ពលករខ្មែរស្នើសុំទៅរបបក្រុងភ្នំពេញចុះអន្តរាគមន៍ដល់ពួកគេដែលកំពុងប្រឈមនឹងការចាប់ខ្លួនពីសំណាក់សមត្ថកិច្ចថៃ។ ពលករដែលធ្វើការងារខុសច្បាប់ទាំងនោះលើកឡើងថា ពួកបានបង់លុយទៅថៅកែថៃ និងអ្នករត់ការ ដើម្បីធ្វើលិខិតស្នាមឲ្យស្របតាមច្បាប់ប្រទេសថៃ ប៉ុន្តែថៅកែ និងអ្នករត់ការយកប្រាក់ពួកគេហើយ មិនបានធ្វើលិខិតស្នាមទាំងនោះឲ្យពួកគេទេ។
ពលករធ្វើការងារនៅសិប្បកម្មខ្នាតតូចមួយនៅប្រទេសថៃ លោក ហេង ពៅ ឲ្យអាស៊ីសេរីដឹងថា នៅកន្លែងលោកធ្វើការមានពលករខ្មែរជិត ១០០នាក់កំពុងធ្វើការងារខុសច្បាប់នៅទីនេះ។ លោកប្រាប់ថា ចំពោះរូបលោកផ្ទាល់គ្មានបំណងធ្វើការងារខុសច្បាប់នៅប្រទេសថៃឡើយ គឺលោកបានប្រគល់ប្រាក់ជាងពីរម៉ឺនបាតទៅឲ្យថៅកែរបស់លោក ដើម្បីរត់ការធ្វើលិខិតស្នាម ប៉ុន្តែថៅកែមិនបានធ្វើឲ្យនោះទេ៖ ««អ្នកដែលបើកអាជីវកម្មខ្នាតតូចហ្នឹង គេអះអាងហ្នឹងរត់ការឯកសារ។ តម្លៃរត់ការឯកសារកន្លែងខ្លះពីរម៉ឺនបាត កន្លែងខ្លះទៀតជាងពីរម៉ឺនបាត អ្នកខ្លះកាត់លុយអស់ហើយ ក៏មិនទាន់បានឯកសារដែរ ម្ចាស់អាជីវកម្មហ្នឹងគាត់ចេះតែសន្យាថ្ងៃនេះថ្ងៃនោះ»។
លោក ហេង ពៅ ព្រួយបារម្ភថា ថ្ងៃណាមួយសមត្ថកិច្ចថៃនឹងចាប់បញ្ជូនខ្លួនលោកត្រឡប់ទៅប្រទេសកម្ពុជាវិញដូចពលករខ្មែរផ្សេងទៀត ខណៈដែលសមត្ថកិច្ចកំពុងសម្រុកចុះចាប់ពលករខុសច្បាប់ស្ទើររាល់ថ្ងៃ។ ពលកររូបនេះ ស្នើសុំទៅស្ថានទូតខ្មែរប្រចាំប្រទេសថៃ ឬមន្រ្តីនៃរបបក្រុងភ្នំពេញជួយអន្តរាគមន៍ ដើម្បីឲ្យពួកលោកមានភាពស្របច្បាប់ក្នុងប្រទេសថៃ៖ «សំណូមពរឲ្យរដ្ឋាភិបាលកម្ពុជាគាត់ទំនាក់ទំនងជាមួយអាជ្ញាធរថៃ ដើម្បីជួយសម្រួលដល់បងប្អូនពលករខ្មែរនៅប្រទេសថៃ ដែលមានបញ្ហា។ អ៊ីចឹងពួកខ្ញុំមិនដឹងថា ទៅដោះស្រាយនៅឯណាទេ»។
ចំណែកពលករម្នាក់ទៀត លោក យន្ត ម៉ាប់ ប្រាប់ថា មេការកន្លែងលោកធ្វើការ បានកាត់ប្រាក់ខែពីលោកចំនួនពីរពាន់បាតក្នុងមួយខែ ដោយសន្យាថា នឹងធ្វើលិខិតស្នាម ដើម្បីឲ្យលោកអាចធ្វើការងារស្របច្បាប់នៅប្រទេសថៃ។ ប៉ុន្តែមកដល់ពេលនេះ គេមិនបានធ្វើឲ្យលោកនោះទេ ហើយលោកក៏ត្រូវបង្ខំចិត្តធ្វើការងារទាំងខុសច្បាប់។ លោកបន្តថា ខណៈដែលសមត្ថកិច្ចថៃសម្រុកចុះចាប់ពលករខ្មែរខុសច្បាប់ដូចសព្វថ្ងៃនេះ លោកស្ទើរតែមិនហ៊ានទៅធ្វើការ ហើយ ពេលត្រឡប់មកពីធ្វើការវិញ គឺលោកពួនសំងំតែក្នុងបន្ទប់៖ «ចេះតែភ័យដែរបង តែធ្វើម៉េចយើងទ័ល ហើយមានតែសំងំមួយកន្លែងសិនទៅ អត់ហ៊ានដើរទៅណាដែរ។ បើខ្ញុំទៅខ្មែរឥឡូវ ក៏គ្មានលទ្ធភាពធ្វើប៉ាស្ទ័រឡើងមកវិញ»។
ការព្រួយបារម្ភរបស់ពលករខ្មែរបែបនេះ ខណៈសមត្ថកិច្ចអន្តោប្រវេសន៍ថៃរាប់ពាន់នាក់ កំពុងសម្រុកចុះចាប់ខ្លួនពលករខ្មែរ ដែលកំពុងធ្វើការ និងរស់នៅខុសច្បាប់លើទឹកដីថៃដល់កន្លែងពួកគេស្នាក់នៅតែម្តង ហើយរាល់ការចុះចាប់ម្តងៗ គឺប្រមូលបានពលករខ្មែរជាង ១០០នាក់។
អាស៊ីសេរីមិនទាន់សុំការឆ្លើយតបពីមន្រ្តីស្ថានទូតកម្ពុជាប្រចាំប្រទេសថៃ អ្នកនាំពាក្យក្រសួងការងារ លោក ហេង សួរ អ្នកនាំពាក្យរបបក្រុងភ្នំពេញ លោក ផៃ ស៊ីផាន និងអ្នកនាំពាក្យក្រសួងការបរទេស លោក កេត សោផាន់ បានទេ ដោយសារទូរសព្ទរោទ៍ជាច្រើនដង ប៉ុន្តែគ្មានអ្នកទទួល។
ដំណាលគ្នានៃការចាប់បញ្ជូនពលករខ្មែរនេះដែរ មន្ត្រីសម្របសម្រួលសមាគមការពារសិទ្ធិមនុស្ស អាដហុក (Adhoc) ខេត្តបន្ទាយមានជ័យ លោក ស៊ុំ ច័ន្ទគា ឲ្យអាស៊ីសេរីដឹងថា ក្រុមពលរដ្ឋដែលត្រូវបញ្ជូនត្រឡប់មកកម្ពុជាទាំងនោះ បាននាំគ្នាត្រឡប់ទៅធ្វើការងារនៅប្រទេសថៃដោយខុសច្បាប់វិញតាមច្រករបៀង។ លោកបន្តថា សមត្ថកិច្ចនៅតាមច្រកទាំងនោះបានយកប្រាក់ពីពលករ ដើម្បីជាថ្នូរ និងការឆ្លងដែនខុសច្បាប់៖ «តាមច្រករបៀងមិនដែលមានត្រូវច្បាប់ទេ មានពួកទាហានពួកប៉ូលិសបើកដៃបើកជើង ដើម្បីទទួលបានផលប្រយោជន៍»។
ចំណែកប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ និយាយថា ថៅកែជនជាតិថៃខិលខូចមួយចំនួន នៅពេលខឹងពលករខ្មែរ ដែលធ្វើការងារខុសច្បាប់នៅទីនោះ គឺពួកគេតែងតែប្រាប់សមត្ថកិច្ចថៃឲ្យមកចុះចាប់ពលករខ្មែរមុនថ្ងៃបើកប្រាក់ខែ។ លោក វន់ ពៅ ស្នើសុំរបបក្រុងភ្នំពេញថា គួរជួបចរចារជាមួយភាគីថៃ ដើម្បីស្វែងរកដំណោះស្រាយដ៏សមរម្យជូនដល់ពលករខ្មែរ។
មន្ត្រីកម្មវិធីសិទ្ធិការងារនៃអង្គការសម្ព័ន្ធភាពការងារ និងសិទ្ធិមនុស្ស ហៅកាត់ថា សង់ត្រាល់ (CENTRAL) លោក ឌី ថេហូយ៉ា និយាយថា បញ្ហាដែលធ្វើឲ្យពលករខ្មែរចេញទៅធ្វើការងារនៅប្រទសថៃខុសច្បាប់ ព្រោះការបំពេញបំពេញឯកសារ គឺមានភាពស្មុគស្មាញ និងប្រើរយៈពេលយូរ ពិសេសចំណាយលុយច្រើន។ លោកបន្តថា ទោះរបបលោក ហ៊ុន សែន តម្រូវពលករធ្វើលិខិតឆ្លងដែនអស់លុយតិចក្តី ប៉ុន្តែក្រុមហ៊ុនដែលបញ្ជូនពលករទៅប្រទេសថៃតម្រូវឲ្យពលករបង់លុយជាច្រើន ទើបពួកគេអាចទៅធ្វើការងារនៅប្រទេសថៃបាន៖ តម្លៃធ្វើឯកសារពីខ្មែរទៅ គេរត់ការមួយសព្វគ្រប់ ពលករត្រូវចំណាយពី ២៥០ ទៅ ៣០០ដុល្លារ បើបង់ផ្តាច់តែម្តង ៦០០ដុល្លារ ហើយម៉្យាងទៀត បើបង់ត្រឹមពី ២៥០ ទៅ ៣០០ដុល្លារ គេត្រូវទៅកាត់នៅស្រុកថៃ ប្រហែល ១៨.០០០ (មួយម៉ឺនប្រាំបីពាន់)បាតទៀត»។
ក្នុងជំនួបមួយកាលពីថ្ងៃទី៧ ខែវិច្ឆិកា រវាងសមាគមទីភ្នាក់ងារហត្ថពលកម្មកម្ពុជា (MAC) សមាគមទីភ្នាក់ងារជ្រើសរើសពលករកម្ពុជា (ACRA) និងសមាគមទំនាក់ទំនងកម្ពុជាថៃ (TCRA) និងក្រសួងការងារបានផ្តួចផ្តើមរៀបចំឲ្យមានកន្លែងស្នាក់នៅបណ្ដោះអាសន្នសម្រាប់ពលករកម្ពុជានៅថៃអំឡុងពេលដែលប្ដូរការងារ និងរង់ចាំដំណោះស្រាយវិវាទការងារជាមួយថៅកែនិយោជក។ អ្នកពាក់ព័ន្ធរំពឹងថា កន្លែងស្នាក់នៅបណ្ដោះអាសន្ននេះ មិនមែនត្រឹមតែជាកន្លែងស្នាក់នៅប៉ុណ្ណោះទេ ប៉ុន្ដែក៏ជាកន្លែងប្រឹក្សាយោបល់សម្រាប់ពលករផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
