កម្មកររោងចក្រ ប្រេស្ទិច ហ្គាមិន នៅស្រុក កណ្ដាលស្ទឹង ខេត្តកណ្ដាល ជាង១០០នាក់ បាននាំគ្នាឡើងទៅដាក់ញត្តិ នៅក្រសួងការងារនៅរាជធានីភ្នំពេញ នៅព្រឹកថ្ងៃព្រហស្បតិ៍ ទី២៧ ធ្នូ។ តំណាងកម្មករថា ពួកគេទាមទារឲ្យក្រសួងការងារធ្វើអន្តរាគមន៍ទៅឲ្យក្រុមហ៊ុនទទួលយកសហជីពរបស់កម្មករចូលធ្វើការឡើងវិញ។
តំណាងកម្មករម្នាក់ ដែលរងការបណ្ដេញចេញពីការងារនៅរោងចក្រ ប្រេស្ទិច ហ្គាមិន លោក ហួន សុវ៉ិត ប្រាប់ថា មន្ត្រីក្រសួងការងារ បានចេញមកទទួលញត្តិពីកម្មកររោងចក្រ ហើយបានសន្យាថា នឹងផ្ដល់ដំណឹងជូនកម្មករវិញ នៅពេលឆាប់ៗ។
លោក ហួន សុវ៉ិត បន្តថា ក្រោយពេលដាក់ញត្តិនៅក្រសួងការងាររួចរាល់ ក្រុមកម្មករបាននាំគ្នាត្រលប់ទៅផ្ទះវិញ ហើយនៅព្រឹកថ្ងៃទី២៨ ធ្នូ ពួកគេនឹងបន្តប្រមូលផ្ដុំគ្នាតវ៉ានៅមុខរោងចក្រ ប្រេស្ទិច ហ្គាមិន ដើម្បីរង់ចាំការឆ្លើយតបរបស់ក្រសួងការងារ៖ «គាត់បានទទួលញត្តិទៅហើយប៉ុន្តែអត់ទាន់ឃើញការឆ្លើយតប គាត់ ឆ្លើយថាចាំមើលសិន យ៉ាងម៉េចយ៉ាងម៉ាប្រហែលជាស្អែកបានដឹងដំណឹង ខ្ញុំសង្ឃឹមថា ខាងក្រសួងជួយដោះស្រាយឲ្យលឿនបាទ។ ព្រោះរឿងនេះរោងចក្រគាត់បានរំលោភបំពានសិទ្ធិការងារខ្ញុំតែម្ដង»។
រោងចក្រ ប្រេស្ទិច ហ្គាមិន ស្ថិតនៅភូមិជីម៉ៅ ឃុំត្បែង ស្រុកកណ្ដាលស្ទឹង ខេត្តកណ្ដាល។ កម្មករឲ្យដឹងថា រោងចក្រនេះ ទើបតែបានបើកដំណើរការ កាលពីខែឧសភា និងមានថៅកែជាជនជាតិចិន។ កម្មករបាននាំគ្នាធ្វើកូដកម្ម មុខរោងចក្រ កាលពីថ្ងៃទី២៤ ធ្នូ គឺក្រោយពេលក្រុមកម្មករទទួលដំណឹងថា រោងចក្របានបញ្ឈប់តំណាង ដែលពួកគេបោះឆ្នោតឲ្យធ្វើជាសហជីពប្រចាំរោងចក្រ។ រយៈពេល៣ថ្ងៃ នៃការតវ៉ាមុខរោងចក្រ លោក ហួន សុវ៉ិត អះអាងថា ភាគីថៅកែរោងចក្រ បានធ្វើសកម្មភាពជាច្រើន ដើម្បីបំភិតបំភ័យកម្មករកុំឲ្យតវ៉ា ដូចជា បានផ្ញើសារតាមទូរស័ព្ទគំរាមបណ្ដេញកម្មករណា ដែលហ៊ានចូលរួមតវ៉ា ហៅអ្នកលក់មុខរោងចក្រឲ្យចូលទៅលក់ក្នុងបរិវេណខាងក្នុង ដើម្បីបិទទ្វារក្រៅរបស់រោងចក្រជាដើម។
អំឡុងពេលកូដកម្ម ក្រុមកម្មករបានធ្វើលិខិតផ្ទេរសិទ្ធិ ដើម្បីសុំពឹងពាក់សហភាពសហជីពចលនាកម្មករ ដើម្បីជួយដោះស្រាយសំណើកម្មករ ១០ចំណុច ជាមួយភាគីរោងចក្រ ប្រេស្ទិច ហ្គាមិន ដូចជា ជួយអន្តរាគមន៍ឲ្យរោងចក្រទទួលយកសហជីព លោក ហួន សាវ៉ិត ចូលធ្វើការវិញ ឲ្យរោងចក្រធ្វើកាតបេឡាជាតិរបបសន្តិសុខសង្គម ឬ ប.ស.ស ឲ្យកម្មករ នៅពេលកម្មករសុំច្បាប់កន្លះថ្ងៃ ក្រុមហ៊ុន ឬរោងចក្រ មិនត្រូវកាត់លុយ ឬកាត់ថ្លៃបាយកន្លះខែរបស់កម្មករទេ នៅពេលកម្មករឈឺ មានសំបុត្រពេទ្យ ក្រុមហ៊ុនត្រូវរក្សាប្រាក់ឈ្នួលគ្រប់ចំនួនឲ្យកម្មករ ក្រុមហ៊ុនមិនត្រូវបង្ខំឲ្យកម្មករថែមម៉ោងជាដើម។
មន្ត្រីចងក្រងនៃសហភាពសហព័ន្ធចលនាកម្មករ លោក សុខ វណ្ណាឡុង សង្កេតឃើញថា ក្នុងពេលកម្មករដាក់ញត្តិទៅក្រសួងការងារ នៅព្រឹកថ្ងៃទី២៧ ធ្នូ មន្ត្រីទទួលញត្តិបានប្រើកាយវិការសមរម្យ និងបានចេញមកសួរនាំកម្មករ ផ្ទាលមាត់ ជាច្រើននាក់ ពីការរំលោភសិទ្ធិកម្មករ នៃរោងចក្រ ប្រេស្ទិច ហ្គាមិន។ មន្ត្រីសហជីពរូបនេះ មានជំនឿថា ក្រសួងការងារ នឹងអន្តរាគមន៍ ហើយករណីនេះ នឹងអាចបញ្ចប់ក្នុងពេលឆាប់ៗ នេះ៖ «ខ្ញុំយល់ឃើញថានឹងប្រាកដជាមានដំណោះ ស្រាយព្រោះថា ឥលូវនៅក្នុងពេលនឹងយើងឃើញថាប្រមុខរាជរដ្ឋាភិបាលយកចិត្តទុកដាក់កម្មករ ប៉ុន្តែផ្ទុយទៅវិញមកដល់ពេលនេះនៅមានរោងចក្រអត់គោរពលក្ខខណ្ឌការងាររហូតដល់ថ្នាក់នឹងខ្ញុំគិតថាត្រូវតែមានដំណោះស្រាយ»។
អាស៊ីសេរី មិនមានប្រភពសុំការបំភ្លឺ ពីខាងភាគីរោងចក្រ ប្រេស្ទិច ហ្គាមិន ទេ ខណៈអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ មិនលើកទូរស័ព្ទ នៅថ្ងៃទី២៧ ធ្នូ។
អ្នកសម្របសម្រួលមជ្ឈមណ្ឌលសម្ព័ន្ធភាពសិទ្ធមនុស្ស និងការងារ លោក ឃុន ថារ៉ូ អះអាងថា ទាំងច្បាប់ស្ដីពីការងារ និងច្បាប់សហជីព កម្មករមានសិទ្ធិពេលលេញក្នុងការបង្កើត អង្គការវិជ្ជាជីវៈ សហជីព ក្នុងការតំណាងឲ្យកម្មករ និយោជិក ដើម្បីបម្រើផលប្រយោជន៍ស្របច្បាប់ នៅក្នុងសហគ្រាស គ្រឹះស្ថាន ដោយអនុវត្តន៍ទៅតាមនីតិវិធី។ សង្គមស៊ីវិលរូបនេះ បន្តថា ក្នុងករណីបែបនេះ មេដឹកនាំសហជីព ទទួលបានការ ការពារពិសេសដោយច្បាប់ ទាំងមុនពេលបង្កើត និងក្រោយការបង្កើតសហជីព និង ហាមឃាត់និយោជក ក្នុងការជ្រៀតជ្រែកកិច្ចការ និងសកម្មភាពរបស់សហជីព ឬរកលេសណាមួយក្នុងការបញ្ឈប់មេដឹកនាំសហជីព។ការបង្កើតសហជីពទៀតសោត មិនតម្រូវឲ្យមានការជូនដំណឹងជាមុន ដល់និយោជកទេ និងហាមឃាត់មិនឲ្យនិយោជករើសអើងសហជីព។ ចំណែកការបញ្ឈប់មេដឹកនាំសហជីពដោយខុសនីតិវិធីច្បាប់ គឺ និយោជក មានកាតព្វកិច្ចទទួលយកមេដឹកនាំសហជីពនោះ ឲ្យចូលធ្វើការវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។