កម្មករម្នាក់ក្នុងចំណោមកម្មករទាំង ១៣នាក់ គឺលោក ប៊ែន សុភី អាយុ ៣០ឆ្នាំ មានស្រុកកំណើតនៅខេត្តកំពង់ឆ្នាំង បានឲ្យដឹងនៅថ្ងៃទី១៦ ឧសភា ថា ពួកគាត់ទាំង ១៣នាក់ បានសម្រេចចិត្តសុំមេការវិលត្រឡប់មកស្រុកកំណើតវិញ ដោយសារអត់ទ្រាំមិនបានចំពោះការងារធ្ងន់ហួសកម្លាំង ពុលរលកសមុទ្រនៅលើទូក និងការគំរាមកំហែងវាយធ្វើបាបមកកម្មករ។ ពួកគាត់បានដើរពីសមុទ្ររ៉ាក់យ៉ង ប្រទេសថៃ មកដល់ច្រកចាំយាម ខេត្តកោះកុង នៅយប់ថ្ងៃទី១៥ ខែឧសភា ឆ្នាំ២០១៣។
បុរសដដែលបានបញ្ជាក់ថា ពួកគាត់ទៅធ្វើការលើទូកនេសាទនេះបានចំនួន ១០ថ្ងៃ តាមរយៈមេខ្យល់ឈ្មោះ លីម នៅភូមិវត្តថ្មី ខេត្តកំពង់ឆ្នាំង ដែលសន្យាថាផ្ដល់ប្រាក់ឈ្នួលក្នុងមួយខែ ៨ពាន់បាត ឬប្រមាណ ២៧០ដុល្លារអាមេរិក ប៉ុន្តែការវិលត្រឡប់នេះ ពួកគាត់មិនបានប្រាក់ឈ្នួលនោះទេ។
លោក ប៊ែន សុភី៖ «ពិបាកពេក ណាមួយគេគំរាមខ្ញុំ ចាក់ ជាពិសេសគឺវាយប្អូនខ្ញុំតែម្ដង។ ប្អូនខ្ញុំពុលរលក ដល់ពេលនេះគ្នាឈប់បន្តិចបន្តួចគេថាឲ្យប្អូនខ្ញុំទៅធ្វើ ដល់តែប្អូនខ្ញុំរៀបទៅហើយ គេដាក់ប្អូនខ្ញុំមួយដៃផាំង ទង្គិចនឹងទ្វារទូកហ្មង។ ពុលទាំងអស់ វារតាមគែមទូកដូចសត្វបង្កួយអ៊ីចឹង ធ្វើតាំងពីម៉ោង៨ ដល់ទល់ភ្លឺដល់ម៉ោង ១០ថ្ងៃ។ ដេកមិនបានប៉ុន្មានទេ គេឲ្យជួសអួនជួសអី មិនសូវបានដេកប៉ុន្មានទេ យ៉ាប់យឺនពេក។ ខ្ញុំប្រាប់មេការគេថាខ្ញុំទៅផ្ទះហើយ មេការគេថា កុំទៅ! ទៅធ្វើស្អី? មេការខ្មែរដែលនាំខ្ញុំទៅហ្នឹង មេការហ្នឹងហើយដែលវាយប្អូនខ្ញុំហ្នឹង។ នរណាទៅផ្ទះអាលុយហ្នឹងមិនបាច់យកទេ គេគំរាមអ៊ីចឹងទៀត។ ខ្ញុំមកអត់មានលុយមួយរៀលទេ ដើរដាច់បាយមួយយប់មួយថ្ងៃហើយ តាំងពីរ៉ាក់យ៉ង មក ចេះតែដើរព្រាលៗមកទេ»។
បុរសកម្មករទាំង ១៣នាក់ បានមកដល់ទឹកដីខេត្តកោះកុង បានចូលមករាយការណ៍ករណីនេះទៅសមាគមការពារសិទ្ធិមនុស្សអាដហុក (Adhoc) ប្រចាំខេត្តនេះ។ មន្ត្រីសមាគមអាដហុក កំពុងធ្វើរបាយការណ៍ដាក់ជូនទៅការិយាល័យប្រឆាំងការជួញដូរមនុស្ស ដើម្បីជំរុញឲ្យមានចំណាត់ការលើករណីនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។