ក្រុម​យុវជន​ដាក់​ញត្តិ​ស្នើឱ្យ​ក្រសួង​អប់រំ​បញ្ឈប់​ផែនការ​បង្កើត ដេប៉ាតឺម៉ង់​ភាសាវៀតណាម​ក្នុង​គ្រឹះស្ថាន​របស់​រដ្ឋ

ដោយ មាន ឫទ្ធិ
2022.08.29
Share on WhatsApp
Share on WhatsApp
ក្រុម​យុវជន​ដាក់​ញត្តិ​ស្នើឱ្យ​ក្រសួង​អប់រំ​បញ្ឈប់​ផែនការ​បង្កើត ដេប៉ាតឺម៉ង់​ភាសាវៀតណាម​ក្នុង​គ្រឹះស្ថាន​របស់​រដ្ឋ លោក ឆែល ធីលេន តំណាង​យុវជន​ធ្វើការ​សង្គម​មកពីខេត្តសៀមរាបបានយកញត្តិទៅដាក់នៅសកលវិទ្យាល័យភូមិន្ទភ្នំពេញកាលពីរសៀលថ្ងៃទី២៩ ខែសីហា ឆ្នាំ២០២២។
រូប៖ Screenshot

ក្រុម​យុវជន​ធ្វើការងារ​សង្គម​ជាច្រើននាក់​បាន​នាំគ្នា​ចេញ​ដាក់​ញត្តិ​ជូន​រដ្ឋមន្រ្តី​ក្រសួង​អប់រំ​យុវជន និង​កីឡា​លោក ហង់ជួន ណារ៉ុ ស្នើ​បញ្ឈប់​ផែនការ​បង្កើត​អគារ​សិក្សា​ភាសា​វៀតណាម ឬ​ដេប៉ាតឺម៉ង់​ (département) ភាសាវៀតណាម​ក្នុង​គ្រឹះស្ថាន​សិក្សា​របស់​រដ្ឋ។ ពួកគេ​បារម្ភថា ការរៀន​ភាសារៀតណាម​នេះ​អាច​ធ្វើ​ឱ្យ​សង្គម​ជាតិ​ជួប​ហានិភ័យ ខណៈភាគី​វៀតណាម​មិនបាន​ផ្តល់​សិទ្ធិពេញ​លេញ​ចំពោះ​ការ​សិក្សា​ភាសា​ខ្មែរ​នៅ​ប្រទេស​ខ្លួន​ឡើយ។ មន្រ្តីសង្គម​ស៊ីវិលយល់ថា រដ្ឋាភិបាល​គួរតែ​ទទួល​យក​សំណើ​របស់​ពលរដ្ឋ​ទៅ​ពិនិត្យ និង​ដោះស្រាយ​ឱ្យ​បាន​ត្រឹមត្រូវ

ក្រុម​យុវជន​សង្គម​ជាង​ ១០​នាក់ បាន​នាំ​គ្នា​យក​ញត្តិ​មួយ​ច្បាប់​ទៅ​ដាក់​នៅ​ក្រសួង​អប់រំ​នៅ​ពេល​ព្រឹក និង​សកលវិទ្យាល័យ​ភូមិន្ទ​ភ្នំពេញ​នៅ​ពេល​រសៀល​ថ្ងៃទី២៩ ខែសីហា។ ញត្តិ​នោះ​បាន​បញ្ជាក់​ពីការ​បញ្ចេញ​មតិ​យោបល់​មិន​ពេញ​ចិត្ត និង​ប្រតិកម្ម​ជាច្រើន​របស់​ពលរដ្ឋ​ខ្មែរ ដោយ​ស្នើសុំ​រដ្ឋមន្រ្តីក្រសួង​អប់រំ​លោក ហង់ជួន ណារ៉ុ បញ្ឈប់ការ​បង្កើត​អគារសិក្សា​ភាសា​វៀតណាម​ឬ ដេប៉ាតឺម៉ង់​ភាសា​វៀតណាម​ នៅ​សកលវិទ្យាល័យ​ភូមិន្ទ​ភ្នំពេញ

ខ្លឹមសារ​ក្នុង​ញត្តិ​នោះ លើកឡើងថា ក្រុម​យុវជន និង​ពលរដ្ឋខ្មែរ​កើតទុក្ខ​មិន​សុខចិត្ត​ទាក់ទង​ការ​បង្កើត​អគារសិក្សា​ភាសាវៀតណាមឬ ដេប៉ាតឺម៉ង់​ភាសាវៀតណាម នៅ​សកលវិទ្យាល័យ​ភូមិន្ទភ្នំពេញ​នោះ​ទេ ពីព្រោះ​ការ​បកស្រាយ​របស់​ក្រសួង​អប់រំ​កន្លងមក​បង្ហាញ​ហេតុផល មិន​សមរម្យ ដូច្នេះ​ពួកគេ​ស្នើឱ្យ​ក្រសួង​បញ្ឈប់​ផែនការ​បង្កើត​អគារសិក្សា​ភាសាវៀតណាម​ក្នុង​គ្រឹះស្ថាន​របស់​រដ្ឋ​មួយ​នេះ ​ក៏ប៉ុន្តែ​ក្រសួង​អាច​បង្កើត​ជា​ស្ថាប័ន​ឯកជន​វិញ។

ញត្តិដដែល​បញ្ជាក់ថា មូលហេតុ​ដែលយុវជន​ចេញដាក់ញត្តិ​ស្នើឱ្យ​ក្រសួង​អប់រំ​ច្រាន​ចោល​សំណើ​របស់​ភាគីវៀតណាម គឺ​ដោយ​សារ​ភាសា​វៀតណាម​មិន​មែន​ជា​តម្រូវ​ការ​ចាំបាច់ និង​មិន​ផ្តល់​អត្ថប្រយោជន៍​ខ្លាំង​នោះ​ទេ បើ​ធៀប​នឹង​អគារសិក្សា​ភាសា​ផ្សេងទៀត ផ្ទុយទៅវិញ​ពួកគេអះអាងថា ភាសា​នេះ​មាន​ហានិភ័យ​ខ្ពស់​សម្រាប់​សង្គមម្យ៉ាង​ទៀត ពួកគេ​អះអាង​ថា រដ្ឋាភិបាល​ធ្វើ​ដូច្នេះ គឺ​ដើម្បី​បំពេញ​តម្រូវការ​របស់​ភាគីវៀតណាម​ដែលមាន​មហិច្ឆតា​ជ្រៀត​ចូលគ្រប់​ចក្ខុវិស័យ​នៅ​កម្ពុជា​តែ​ប៉ុណ្ណោះញត្តិដដែល​លើក​ឡើង​ថា ទន្ទឹម​នឹង​នេះ វៀតណាម គឺជាប្រជាជាតិ​ដែល​កម្ពុជា​គួរ​ប្រុង​ប្រយ័ត្ន​ ចំពោះការ​មាន​ចំណង​មិត្តភាព ​និង​ទំនាក់ទំនង​ផ្សេងៗ ដោយ​យោង​តាម​ប្រវត្តិសាស្រ្ត​រហូត​ដល់​បច្ចុប្បន្ន ព្រោះ​វៀតណាម​មិន​ដែល​បោះបង់​ចោល​មហិច្ឆតា​ឈ្លាន​ពាន​កម្ពុជា​ឡើយ ជាក់​ស្តែង​ការ​បាត់បង់​ធនធាន ទឹកដី ទ្រព្យសម្បត្តិជាតិ​ជាច្រើន​ដូច​កម្ពុជា​ក្រោម និង​កោះត្រល់​ជា​ដើម។ ចំណែក​ហេតុផល​មួយ​ទៀត គឺ​ការ​បង្កើត​ដេប៉ាតឺម៉ង​ភាសាវៀតណាម​នេះ​គ្មាន​តុល្យភាព និង​មិន​ស្មើភាព​នៃ​ការងារ​ការទូត ពីព្រោះ​ភាគី​វៀតណាម​មិន​បាន​ផ្តល់​សិទ្ធិពេញ​លេញ​ដល់​អ្នក​សិក្សា​ភាសាខ្មែរ​នៅ​ប្រទេស​វៀតណាម​ជាពិសេស​ពលរដ្ឋខ្មែរ​នៅទឹកដី​កម្ពុជា​ក្រោម​គ្មាន​សិទ្ធិ​សិក្សា​អក្សរ និង​ភាសាខ្មែរ​ស្របតាម​ច្បាប់​នោះទេញត្តិ​របស់​យុវជន​ក៏ព្រួយបារម្ភ​ពី​របៀប​គ្រប់គ្រង​ដោយ​មនោគមន៍វិជ្ជា និង​ចិត្តសាស្រ្ត​ដោយ​ប្រយោល​មកលើ​កម្ពុជា​ដែល​យុវជន​សង្កេត​ឃើញ​មាន ដូចជា​ការ​ផ្តល់ដី​ ៤០​ហិកតា​ឱ្យ​ជនជាតិ​វៀតណាម​សង់​លំនៅដ្ឋាន​ស្របពេល​ពលរដ្ឋ​ខ្មែរ​ម្ចាស់​ស្រុក​ទទួល​រង​នូវ​វិបត្តិ​ដីធ្លី​ជា​ច្រើន និង​រងនូវការ​បណ្តេញ​ចេញ​ដោយ​បង្ខំលើសពី​នេះ​ទៀត ញត្តិនេះ​ក៏បាន​លើកឡើង​ពី​ការ​ផ្តល់ដី​សម្បទាន​នៅតាម​បណ្តោយ​ព្រំដែន​កម្ពុជា-វៀតណាម និងការ​បង្កើត​តំបន់​ត្រីកោណ (ឡាវ កម្ពុជា វៀតណាមដោយ​វៀតណាម​ជា​អ្នក​ទទួល​គ្រប់គ្រង និង​ទទួល​ផលប្រយោជន៍​ជាដើម

តំណាង​យុវជន​ធ្វើការ​សង្គម​លោក ឆែល ធីលេន ប្រាប់​វិទ្យុអាស៊ីសេរី ក្រោយដាក់​ញត្តិថា មន្រ្តី​ក្រសួង​អប់រំ​បាន​ចេញ​មក​ទទួលញត្តិ​របស់​យុវជន ហើយសន្យាថា នឹងយក​ញត្តិនេះ​ដាក់​ជូន​ថ្នាក់​លើ​ដើម្បី​ពិនិត្យ និង​ឆ្លើយតប​ត្រឡប់​មក​វិញ។ យុវជន​សង្គម​រូបនេះ​ជំរុញ​ឱ្យ​ក្រសួង​ទម្លាក់​ចោល​ការ​បង្កើត​អគារ​ដេប៉ាតឺម៉ង់​ភាសាវៀតណាម ពីព្រោះ​វា​មាន​ហានិភ័យ និង​មិន​ចាំបាច់​នោះ​ទេ ខណៈ ម្ចាស់​ស្រុក​ជា​ច្រើន​មិន​យល់​ស្រប​ពាក់ព័ន្ធ​រឿង​នេះ។ លោកបញ្ជាក់ថា  ទោះបី​រដ្ឋាភិបាល​បាន​សម្រេច​បង្កើត​ដេប៉ាតឺម៉ង់​នេះរួច​ហើយ ឬ​មិនឆ្លើយតប​នឹង​សំណើ​របស់​ក្រុម​យុវជន​ក៏​ដោយ ក៏​ពួក​លោក​នឹង​ប្រើប្រាស់​សិទ្ធិ​គ្រប់​មធ្យោបាយ​តាម​ផ្លូវច្បាប់​ដើម្បី​ដាក់​សម្ពាធ​ផ្សេង​ទៀត ដើម្បី​ផលប្រយោជន៍​សង្គម​នា​ពេល​អនាគត៖ «យើង​យល់ថា ​ជា​ចាំបាច់​ក្រសួង​ត្រូវ​តែ​ផ្លាស់​ប្តូរ​គំនិត​ត្រូវ​តែ​ច្រាន​ចោល​ការ​បង្កើត​អគារ​ដេប៉ាតឺម៉ង​ភាសាវៀតណាម ពីព្រោះ​វា​មាន​ហានិភ័យ​ខ្ពស់​ជាង យើង​ជា​ប្រជាពលរដ្ឋ​ម្ចាស់​ស្រុក​បាន​យក​ប្រតិកម្ម​នេះ យក​មតិ​រិះគន់​ជា​ច្រើន ដោយ​បញ្ជាក់ថា​វាមិន​មែន​ជា​តម្រូវ​ការ​ចាំបាច់​នោះ​ទេ ពីព្រោះ​មហាជន​ជា​ម្ចាស់​ប្រទេស​យើង​មិន​ត្រូវកា»

កាលពីថ្ងៃទី១០ ខែសីហា កន្លងទៅ អនុរដ្ឋមន្ត្រីក្រសួងអប់រំ​នៃសាធារណរដ្ឋ​សង្គមនិយម​វៀតណាម​លោក ង្វៀន វ៉ាន់ហ្វុក (Nguyễn Văn Phúc ) បាន​ស្នើ​ទៅកាន់​រដ្ឋលេខាធិការ​ក្រសួង​អប់រំ យុវជន និង​កីឡា លោក ពិ ចំណាន ឱ្យ​បង្កើត​ផ្នែក ឬ​ដេប៉ាតឺម៉ង់​សិក្សា​ភាសា​វៀតណាម នៅក្នុង​សកលវិទ្យា​ភូមិន្ទភ្នំពេញ។ លោក ង្វៀន វ៉ាន់ ហ្វុក ស្នើបែបនេះ​ក្រោម​ហេតុផលថា​ ការ​សិក្សា​ភាសា​វៀតណាម នឹង​ជួយ​ឱ្យ​និស្សិត​របស់​កម្ពុជា​អាច​ចេះ​ភាសា​បរទេស​មួយ​បន្ថែម​ទៀត។

ក្រោយការ​ស្នើសុំ​នេះ​បាន​រយៈពេល​ពីរ​ថ្ងៃ ពោល​គឺ​នៅថ្ងៃទី១២ ខែសីហា ក្រសួង​អប់រំ​បាន​ឯកភាព​បង្កើត​ឱ្យ​មាន​ដេប៉ាតឺម៉ង់​សិក្សា​ភាសា​មួយ​នេះ ទៅ​តាម​ការ​ស្នើសុំ​របស់​ភាគី​វៀតណាម

ឆ្លើយតប​រឿង​នេះ​អ្នកនាំពាក្យ​ក្រសួង​អប់រំ យុវជន និងកីឡា លោក រស់ សុវាចា ប្រាប់​វិទ្យុអាស៊ីសេរី​តាម​ប្រព័ន្ធតេឡេក្រាមថា លោក​សុំមិន​អធិប្បាយ​បន្ថែម​លើ​ករណី​នេះ ពីព្រោះ​ក្រសួង​បាន​ចេញ​ប្រកាស​ព័ត៌មាន​រួច​ហើយ

កាលពីថ្ងៃទី១៦ ខែសីហា ក្រសួងអប់រំបាន​បញ្ជាក់​ថា ការបញ្ចូល​ភាសាវៀតណាម​ទៅក្នុង​ប្រព័ន្ធអប់រំ​របស់​កម្ពុជា ជា​យន្តការ​ថ្មី​មួយ និង​ជា​កិច្ចសហប្រតិបត្តិការ​ដើម្បី​ពង្រឹង​វិស័យ​អប់រំ កម្រិត​ឧត្ដម​សិក្សា រវាង​កម្ពុជា-វៀតណាម។ នៅក្នុងដេប៉ាតឺម៉ង់​សិក្សា​ភាសាវៀតណាម​នេះ ផ្ដោត​លើ​ជំនាញ​កម្រិត​បរិញ្ញាប័ត្រ​ចំនួន​៣ ដូចជា មុខ​ជំនាញ​សិក្សា​ភាសាវៀតណាម មុខជំនាញ​បកប្រែ​ភាសា​វៀតណាម និង​មុខ​ជំនាញ​បកប្រែ​ភាសា​វៀតណាម​សម្រាប់​ទំនាក់ទំនង​ធុរកិច្ច។

ជុំវិញ​រឿង​នេះ ប្រធាន​សមាគម​សម្ព័ន្ធ​និស្សិត​បញ្ញវន្តខ្មែរ​លោក កើត សារ៉ាយ ថ្លែងថា ការចេញ​ដាក់​ញត្តិ​របស់​យុវជន​ទាំង​នោះ​គឺ​ជា​សិទ្ធិ​សម្តែង​មតិ​ដែល​ពួកគេ​ចេះ​ឈឺ​ឆ្អល់​អំពី​បញ្ហា​សង្គម។ លោកថា ប្រតិម្ម​របស់មហាជន​ទាក់ទង​ការបង្កើត​ដេប៉ាតឺម៉ង់​រៀនភាសាវៀតណាម​កើតឡើង​ដោយសារ​ក្រសួង​បកស្រាយ​កន្លង​មក​មិន​ទាន់​ច្បាស់​លាស់​ផង និង​កត្តា​ប្រវត្តិសាស្រ្ត​រវាង​ប្រទេស​ទាំង​ពីរ​ផង។ លោក កើត សារ៉ាយ បញ្ជាក់​ថា លោក​មិន​បដិសេធ​ការ​បង្កើត​ដេប៉ាតឺម៉ង់​នោះ​ទេ ប៉ុន្តែ​លោកយល់ថា ក្រសួង​អប់រំ​ត្រូវ​ធានា​អះអាង និង​ទទួល​យក​សំណើ​របស់​យុវជន​យក​ទៅ​ពិនិត្យ  និងស្រាវជ្រាវ​អំពី​គុណសម្បត្តិ គុណ​វិបត្តិភាសា​នេះ ដើម្បី​ឱ្យ​ប្រជាពលរដ្ឋ​ខ្មែរ​ទូទៅ​មាន​ទំនុកចិត្ត​ជាង​នេះ៖ «សម្រាប់​ភាសា​យួន​សម្រាប់​ខ្ញុំ​មិន​បដិសេធ​ទេ ប៉ុន្តែ​ត្រូវ​ឆ្លើយតប​ទៅកាន់​ប្រជាពលរដ្ឋ ហើយ​ត្រូវធានាថា អ្វី​ដែល​ជា​ការ​រៀបចំ​របស់​ក្រសួង​ហ្នឹង​មាន​ការ​ទទួល​ខុស​ត្រូវ​គ្រប់គ្រាន់។ ទោះយ៉ាងណា ប្រជាពលរដ្ឋ ខ្ញុំ​មើល​ឃើញ​ថា ភាព​មិន​ទុក​ចិត្ត ឬ​បាត់បង់​ជំនឿ​ចិត្ត ហើយ​កំហុស​នេះ​មិន​មែន​មក​ពី​ពលរដ្ឋ​ទេ គឺ​កំហុស​នេះ​មក​ពី​ក្រសួង ឬរដ្ឋាភិបាល​ផ្ទាល់​ដែល​តែងតែ​ធ្វើឱ្យ​ប្រជាពលរដ្ឋ​បាត់បង់​ទំនុកចិត្ត​ក្នុង​ការ​ធានា​នូវ​អធិបតេយ្យ​របស់​ខ្លួន»

វិទ្យាស្ថាន​ភាសាបរទេស​នៅ​សាកលវិទ្យាល័យ​ភូមិន្ទភ្នំពេញ ដែល​បង្រៀន​ថ្នាក់​បរិញ្ញាបត្រ និង​បរិញ្ញាបត្រ​ជាន់ខ្ពស់ មាន​ ៧​ដេប៉ាតឺម៉ង់ គឺដេប៉ាតឺម៉ង់​សិក្សា​អន្តរជាតិ ដេប៉ាតឺម៉ង់​ភាសា​អង់គ្លេស បារាំង ជប៉ុន កូរ៉េ ចិន និងថៃ។ រដ្ឋមន្ត្រីក្រសួងអប់រំលោក ហង់ជួន ណារ៉ុន ធ្លាប់​អះអាង​ថា បច្ចុប្បន្ន នៅ​ប្រទេស​វៀតណាម ក៏មាន​សាលាបង្រៀន ដែលមាន​កម្មវិធី​សិក្សា​ភាសា​ខ្មែរ​ដែរ​នៅ​តាម​សាលា​មួយ​ចំនួនក៏​ប៉ុន្តែ សហព័ន្ធខ្មែរកម្ពុជា​ក្រោម តែងតែ​លើកឡើង​ពី​ការ​ធ្វើ​ទុក្ខ​បុក​ម្នេញ​របស់​អាជ្ញាធរ​វៀតណាម​ មិន​អនុញ្ញាត​ឱ្យ​ពលរដ្ឋ​ខ្មែរ​កម្ពុជា​ក្រោម​អាច​សិក្សា​រៀនសូត្រ​ភាសា និង​អក្សរសាស្ត្រ​ខ្មែរ​បាន​ជា​ផ្លូវ​ការ និង​ដោយ​បើកចំហ​ឡើយ។ សហព័ន្ធខ្មែរកម្ពុជា​ក្រោម តែង​ស្នើ​ឱ្យ​អាជ្ញាធរ​វៀតណាម ជាពិសេស​ក្រសួង​អប់រំ​នៃ​ប្រទេស​នេះ ដាក់​បញ្ចូល​ការសិក្សា​ភាសាខ្មែរ​ទៅក្នុង​កម្មវិធី​សិក្សា​ផ្លូវការ​ចាប់​ពី​ថ្នាក់​បឋម​សិក្សា​រហូត​ដល់​កម្រិត​ឧត្តម​សិក្សា។

ក្រុម​យុវជន និង​អ្នកវិភាគ​លើក​ឡើង​ថា ការបើក​ដេប៉ាតឺម៉ង់​ភាសាវៀតណាម​ក្នុង​សកលវិទ្យាល័យ​ភូមិន្ទភ្នំពេញ​នៅ​កម្ពុជា កំពុង​បង្ហាញ​ភាព​មិន​ស្មើគ្នា​រវាង​ប្រទេស​ទាំងពីរ ខណៈភាសាខ្មែរ​ហាក់​ត្រូវ​បាន​រឹតត្បិត​មិន​ឱ្យ​សិក្សា​ក្នុង​ប្រទេស​វៀតណាម​ឡើយពួកគាត់​ស្នើឱ្យ​រដ្ឋាភិបាល​ត្រូវ​លុប​ចោល​ការ​បង្កើត​អគារដេប៉ាតឺម៉ង់​ភាសាវៀតណាម​មិន​ទាន់​ចាំបាច់​នេះ​ជា​ដាច់​ខាត ខណៈពលរដ្ឋ​ខ្មែរ​រិះគន់​ខ្លាំងៗ ​ក្នុង​រឿង​នេះ

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។