ក្រុម​យុវជន​បន្ត​អំពាវនាវ​រក​ថវិកា​បោះពុម្ពផ្សាយ​សៀវភៅ​ទស្សនទាន​បណ្ឌិត កែម ឡី

ដោយ យ៉ង ចាន់តារា
2016.09.13
មួង​ សូនី ៨៥៥ ប្រធាន​សមាគម​សម្ព័ន្ធ​និស្សិត​បញ្ញវន្ត​ខ្មែរ និង​ជា​សមាជិក​ក្រុម​ចងក្រង​សៀវភៅ​ស្ដីពី​ទស្សនៈ​បណ្ឌិត កែម ឡី លោក មួង សូនី ថ្លែង​ក្នុង​កម្មវិធី​វេទិកា​អ្នក​ស្ដាប់​វិទ្យុ​អាស៊ីសេរី កាល​ពី​ថ្ងៃ​ទី​១៥ ខែ​សីហា ឆ្នាំ​២០១៦។
RFA

សមាគម​សម្ព័ន្ធ​និស្សិត​បញ្ញវន្ត​ខ្មែរ ដែល​ជា​ក្រុម​ចងក្រង​សៀវភៅ​ស្ដីពី​ទស្សនៈ​បណ្ឌិត កែម ឡី អំពាវនាវ​រក​ថវិកា​បន្ថែម​ដើម្បី​បោះពុម្ពផ្សាយ​សៀវភៅ​ដែល​បង្ហាញ​ពី​ស្នាដៃ​របស់​លោក​នៅ​ពេល​ឆាប់ៗ​ខាង​មុខ។ ការ​អំពាវនាវ​នេះ​ធ្វើ​ឡើង​តាម​រយៈ​លិខិត​មួយ​ច្បាប់​ចេញ​ផ្សាយ​នៅ​ថ្ងៃ​ទី​១៣ ខែ​កញ្ញា។

សមាគម​សម្ព័ន្ធ​និស្សិត​បញ្ញវន្ត​ខ្មែរ គ្រោង​បោះពុម្ព​សៀវភៅ​កម្រង​ទស្សនៈ​បណ្ឌិត កែម ឡី ចំនួន ១​ម៉ឺន​ក្បាល ដែល​ក្នុង​មួយ​ក្បាល​ត្រូវ​ចំណាយ​អស់​ថវិកា ៣​ដុល្លារ សរុប​ត្រូវ​ចំណាយ​ថវិកា​អស់​ចំនួន ៣​ម៉ឺន​ដុល្លារ។

ក្រុម​អ្នក​ចងក្រង​ប្រមូល​បាន​ថវិកា​ចំនួន ១​ពាន់​ដុល្លារ ដែល​នៅ​ខ្វះ ២៩.០០០​ដុល្លារ​ទៀត សម្រាប់​ដំណើរ​ការ​បោះពុម្ពផ្សាយ​ឱ្យ​ទាន់​បុណ្យ​ខួប​គម្រប់ ១០០​ថ្ងៃ សព​បណ្ឌិត កែម ឡី។

ប្រធាន​សមាគម​សម្ព័ន្ធ​និស្សិត​បញ្ញវន្ត​ខ្មែរ និង​ជា​សមាជិក​ក្រុម​ចងក្រង លោក មួង សូនី បញ្ជាក់​ថា សៀវភៅ​នេះ​កត់ត្រា​ទុក​អំពី​ទស្សនទាន​របស់​បណ្ឌិត កែម ឡី ជុំវិញ​បញ្ហា​នយោបាយ សេដ្ឋកិច្ច និង​សង្គមកិច្ច​ដែល​បណ្ឌិត កែម ឡី បាន​ថ្លែង​តាម​ប្រព័ន្ធ​ផ្សព្វផ្សាយ តាម​បណ្ដាញ​សង្គម​ហ្វេសប៊ុក (Facebook) និង​ចុះ​បង្រៀន​ផ្ទាល់​ដល់​យុវជន និង​ពលរដ្ឋ​នៅ​តាម​មូលដ្ឋាន។

​លោក មួង សូនី អំពាវនាវ​ដល់​សប្បុរសជន​នានា ឲ្យ​ជួយ​ឧបត្ថម្ភ​ថវិកា​បន្ថែម​ដើម្បី​បោះ​ពុម្ព​ផ្សាយ​ស្នាដៃ​គតិបណ្ឌិត​របស់​លោក កែម ឡី ក្នុង​គោលបំណង​រក្សា​ទុក​សម្រាប់​មនុស្ស​ជំនាន់​ក្រោយ«បង​ប្អូន​អាច​គាំទ្រ​ស្នាដៃ​របស់​បណ្ឌិត កែម ឡី តាម​រយៈ​គណនេយ្យ​ធនាគារ​អេស៊ីលីដា (ACLEDA) ដែល​មាន​ឈ្មោះ​ថា Khmer Student Intelligent League ដែល​មាន​លេខ​កូដ ០០០១-០២-០៦៨៩៣៣--៣ ឬ​ក៏​បង​ប្អូន​អាច​ទំនាក់ទំនង​តាម​អ្នក​គ្រប់គ្រង​ថវិកា​ហ្នឹង​ផ្ទាល់ តាម​រយៈ​លេខ ០១៥ ៩៤៩ ៩៤៨ ឬ ០៩២ ៩០០ ១២០»

សៀវភៅ​ទស្សនទាន​បណ្ឌិត កែម ឡី នឹង​ត្រូវ​បែងចែក​ជា ២​ភាគ ដោយ​មួយ​ភាគៗ មាន​កម្រាស់​ជាង ២០០​ទំព័រ។ សៀវភៅ​នេះ​អាច​នឹង​លក់​ក្នុង​តម្លៃ ៥​ដុល្លារ សម្រាប់​ទីផ្សារ​ក្នុង​ស្រុក និង ២០​ដុល្លារ​សម្រាប់​ទីផ្សារ​ក្រៅ​ប្រទេស។ ថវិកា​ដែល​ប្រមូល​បាន​ពី​ការ​លក់​សៀវភៅ នឹង​ត្រូវ​បែងចែក​មួយ​ភាគ​សម្រាប់​ទ្រទ្រង់​ការងារ​ចងក្រង​ស្នាដៃ​បណ្ឌិត កែម ឡី ជា​បន្ត​ទៀត មួយ​ចំណែក​ទៀត នឹង​ត្រូវ​បរិច្ចាគ​ទៅ​មន្ទីរពេទ្យ​គន្ធបុប្ផា ព្រមទាំង​ជូន​ក្រុម​គ្រួសារ​បណ្ឌិត កែម ឡី។

​គណៈកម្មការ​ត្រួតពិនិត្យ​សៀវភៅ និង​ជា​សាស្ត្រាចារ្យ​ផ្នែក​វិទ្យាសាស្ត្រ​នយោបាយ លោក ហេង ស្រ៊ាង បញ្ជាក់​ថា ការ​បែង​ចែង​ជា​ពីរ​ភាគ​នេះ ដោយសារ​តែ​សៀវភៅ​មាន​ច្រើន​រយ​ទំព័រ និង​ដោយសារ​ប្រធានបទ​ខ្លះ​មាន​លក្ខណៈ​ស្រដៀង​គ្នា​ដែល​ចាំបាច់​ត្រូវ​ច្របាច់​បញ្ចូល​គ្នា។

លោក​បន្ត​ថា ក្រុម​របស់​លោក​បាន​បញ្ចប់​ការ​ត្រួត​ពិនិត្យ​សៀវភៅ​ភាគ​១ រួចរាល់​ហើយ និង​កំពុង​ពិនិត្យ​មើល​អក្ខរាវិរុទ្ធ និង​សម្រួល​ឃ្លាឃ្លោង​សៀវភៅ​ភាគ​២ បន្ត​ទៀត។ លោក​រំពឹង​ថា នឹង​បញ្ចប់​ការ​ត្រួត​ពិនិត្យ​សៀវភៅ​ភាគ​២ នៅ​សប្ដាហ៍​ក្រោយ ហើយ​ថា នឹង​សម្រេច​ដាក់​ឈ្មោះ​សៀវភៅ​ទៅ​តាម​ខ្លឹមសារ​នៃ​ភាគ​នីមួយៗ។

​លោក ហេង ស្រ៊ាង អះអាង​ថា សៀវភៅ​ទាំង ២​ភាគ នឹង​ត្រូវ​បោះ​ពុម្ព​ផ្សាយ​យ៉ាង​យូរ​បំផុត​ត្រឹម​ចុង​ខែ​កញ្ញា នេះ ដើម្បី​ចាត់ចែង​ឱ្យ​ទាន់​ពិធី​បុណ្យ​ខួប ១០០​ថ្ងៃ​របស់​បណ្ឌិត កែម ឡី ដែល​នឹង​ប្រព្រឹត្ត​ទៅ​ចាប់ពី​ថ្ងៃ​ទី​១៤ ដល់​ថ្ងៃ​ទី​១៧ ខែ​តុលា ខាង​មុខ«សៀវភៅ​ហ្នឹង​មាន​ខ្លឹមសារ​សម្រាប់​ការ​សិក្សា និង​ក៏​មាន​ខ្លឹមសារ​សម្រាប់​ជា​ចំណេះ​ដឹង​របស់​បង​ប្អូន​ជា​ទូទៅ​ផង។ នៅ​ក្នុង​ភាគ​២ និយាយ​អំពី​ទស្សនទាន​របស់​គាត់​អំពី​សង្គម និង​នយោបាយ គឺ​សម្រាប់​អ្នក​នយោបាយ និង​គណបក្ស​នយោបាយ​ទៅ​អនាគត អាច​មើល​ទៅ ហើយ​ចំណុច​ណា​អាច​មាន​ន័យ​សម្រាប់​ចូលរួម​ក្នុង​សង្គម អា​ហ្នឹង​យើង​នាំ​គ្នា​ជួយ​មើល យក​គំនិត​ល្អៗ​របស់​គាត់ ដើម្បី​ជួយ​ដឹកនាំ​សង្គម ចៀសវាង​ការ​ឈ្លោះ​គ្នា ពីព្រោះ​ទស្សនៈ​របស់​គាត់​គ្មាន​អ្វី​ក្រៅ​ពី​ធ្វើ​ឲ្យ​សង្គម​យើង​ប្រសើរ កុំ​ឲ្យ​យើង​មាន​ជម្លោះ​សង្គម​ត​ទៅ​ទៀត»

​ក្រុម​ការងារ​ចងក្រង​សៀវភៅ​អះអាង​ថា សៀវភៅ​នេះ​អាច​នឹង​ត្រូវ​ចែក​ជូន​គ្រឹះស្ថានសិក្សា បណ្ណាល័យ និង​មណ្ឌល​សិក្សា​ស្រាវជ្រាវ​ដោយ​ឥត​គិត​ថ្លៃ បើសិនជា​ពួកគេ​ទទួល​បាន​វិភាគទាន​គ្រប់គ្រាន់​សម្រាប់​ការ​បោះពុម្ព។

ការ​ចងក្រង និង​បោះ​ពុម្ព​ផ្សាយ​សៀវភៅ​កម្រង​ទស្សនទាន​បណ្ឌិត កែម ឡី គឺ​ជា​ជំហាន​ដំបូង​នៃ​ការ​ប្រមូល​ផ្តុំ​ស្នាដៃ​របស់​បណ្ឌិត កែម ឡី កាល​លោក​នៅ​មាន​ជីវិត។ ក្រុម​អ្នក​ចងក្រង​បញ្ជាក់​ថា ជំហាន​បន្ទាប់​របស់​ពួក​គេ គឺ​ការ​ប្រមូលផ្ដុំ​ការ​សិក្សា​ស្រាវជ្រាវ​ទាំង​ឡាយ​របស់​បណ្ឌិត កែម ឡី ដែល​លោក​ធ្លាប់​បាន​ធ្វើ​ឱ្យ​អង្គការ​សង្គម​ស៊ីវិល​ជាតិ-​អន្តរជាតិ ព្រមទាំង​ស្ថាប័នរដ្ឋ​ដើម្បី​ទុកជា​ឯកសារ​រឹងមាំ​សម្រាប់​អ្នក​ចង់​សិក្សា​ស្វែង​យល់​អំពី​បញ្ហា​នានា ដែល​កំពុង​កើត​មាន​នៅ​កម្ពុជា និង​ដឹង​អំពី​ដំណោះស្រាយ​បញ្ហា​ទាំង​អស់​នោះ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។