អាជ្ញាធរក្រុងតាខ្មៅ រារាំងកម្មកររោងចក្រ ស្យុង យិន មិនឲ្យយកញត្តិទៅដាក់នៅខុទ្ទកាល័យលោក ហ៊ុន សែន និងសាលាខេត្តកណ្ដាល
2020.01.17
អាជ្ញាធរក្រុងតាខ្មៅ ខេត្តកណ្ដាល បានពង្រាយកងកម្លាំងរារាំងក្រុមកម្មករ កម្មការិនី នៃរោងចក្រ ស្យុងយិន (Zhong Yin Cambodia B Textile Co.LTD) ច្រើនរយនាក់ មិនឲ្យធ្វើដំណើរទៅដាក់ញត្តិនៅខុទ្ទកាល័យ លោកនាយករដ្ឋមន្ត្រី ហ៊ុន សែន និងសាលាខេត្តកណ្ដាល នៅព្រឹកថ្ងៃទី១៧ មករា។
កម្មករប្រាប់ថា អាជ្ញាធរខេត្តកណ្ដាល និងកងកម្លាំងច្រើននាក់ បានរារាំងឡានរបស់កម្មករ ធ្វើដំណើរទៅដាក់ញត្តិនៅភ្នំពេញ។ ការរារាំងនេះ គឺនៅចំណុចមុខបន្ទាយកងអង្គរក្ស លោក ហ៊ុន សែន ទួលក្រសាំង ក្រុងតាខ្មៅ។ ទោះយ៉ាងណា ក្រុមកម្មករប្រាប់ថា មិនមានការប៉ះទង្គិចគ្នាឡើយ ដោយសារកម្មករខ្លះភ័យត្រឡប់ទៅវិញ រួចហើយទើបមានមន្ត្រីនៃខុទ្ទកាល័យ លោកនាយករដ្ឋមន្ត្រី ហ៊ុន សែន និងមន្ត្រីសាលាខេត្តកណ្ដាល បានមកទទួលញត្តិ នៅកន្លែងសមត្ថកិច្ចរារាំងនោះ។
អនុប្រធានសហជីពស្មារតីកម្មករខ្មែរ ប្រចាំរោងចក្រ ស្យុងយិន លោក ឈូក មីរ៉ា ប្រាប់ថា នៅពេលថ្ងៃបន្តិច អាជ្ញាធរបានអនុញ្ញាតឲ្យកម្មករទៅដាក់ញត្តិនៅក្រសួងការងារ និងបណ្ដុះបណ្ដាលវិជ្ជាជីវៈ ដោយគ្មានការឃាត់ឃាំង។ លោកថា មន្ត្រីក្រសួងការងារ បានចេញមកទទួលញត្តិពីកម្មករហើយ និងសន្យាកោះហៅ តំណាងកម្មករចំនួន ២០នាក់ និងតំណាងភាគីថៅកែរោងចក្រ ស្យុង យិន ចូលដោះស្រាយជាមួយគ្នា នៅព្រឹកថ្ងៃទី២០ មករា៖ «យើងនៅតែនៅមុខរោងចក្រហ្នឹង ជារៀងរាល់ថ្ងៃធម្មតាសិន ហើយថ្ងៃច័ន្ទ នៅពេលព្រឹក យើងមកដោះស្រាយជាមួយនិយោជក នៅក្រសួងការងារ ដែលគេអញ្ជើញនេះ»។
កម្មករ អះអាងថា រោងចក្រ ស្យុង យិន មានកម្មករសរុបជិត ៦រយ (៥៩២) នាក់ ថៅកែជនជាតិចិន ហើយជារោងដេរសំលៀកបំពាក់ យីហោ H&M និងម៉ាកផ្សេងទៀត។ រោងចក្រនេះ មានសហជីពប្រចាំរោងចក្រចំនួន២ គឺសហជីពស្មារតីកម្មករខ្មែរ និងសហជីពស៊ីខៅឌូ។ សហជីពទាំង២ អះអាងថា ទាំងកម្មករ និងថ្នាក់ដឹកនាំសហជីពប្រចាំរោងចក្រ សុទ្ធតែត្រូវបានថៅកែបញ្ឈប់ការងារទាំងអស់ ចាប់តាំងពីខែកញ្ញា ឆ្នាំ២០១៩មក។
កម្មករ និងសហជីព ប្រាប់ថា ញត្តិ ស្នើសុំដំណោះស្រាយដាក់ទៅខុទ្ទកាល័យ លោក ហ៊ុន សែន សាលាខេត្តកណ្ដាល និងក្រសួងការងារ ក្នុងន័យដូចគ្នា គឺស្នើសុំស្ថាប័នរដ្ឋទាំង៣ ជួយអន្តរាគមន៍ជំរុញទៅថៅកែរោងចក្រ ឲ្យទូទាត់ប្រាក់ឈ្នួល ប្រាក់បំណាច់ អត្ថប្រយោជន៍ តាមច្បាប់ស្ដីពីការងារ ឲ្យកម្មករ និងប្ដឹងទាមទារឲ្យថៅកែទទួលយកកម្មករទាំងអស់ចូលធ្វើការវិញ ដោយសារការបញ្ឈប់កម្មករកន្លងមក បានបំពានច្បាប់ការងារ។
លោក ឈូក មីរ៉ា អះអាងថា សំណើក្នុងញត្តិដាក់ជូនស្ថាប័នទាំង៣ នេះ ជាលទ្ធផល ដែលក្រុមប្រឹក្សាអាជ្ញាកណ្ដាល បានកាត់ក្ដីរួចហើយ ឲ្យថៅកែសង និងដោះស្រាយឲ្យកម្មករ តែថៅកែរោងចក្រមិនអនុវត្តសេចក្ដីសម្រេចរបស់ក្រុមប្រឹក្សាអាជ្ញាកណ្ដាល ហើយគ្មានស្ថាប័នណា ហ៊ានចាប់បង្ខំឲ្យថៅកែគោរពសេចក្ដីសម្រេចនេះសោះ។
សហជីពថា ក្រៅពីស្ថាប័នទាំង៣ នេះ កម្មករបានពឹងមេធាវីរបស់មជ្ឈមណ្ឌលអាម៉េរិកាំងសម្រាប់សាមគ្គីភាពការងារអន្តរជាតិ ហៅកាត់ថា អង្គការអេស៊ីល (Acil) ឲ្យជួយដាក់ពាក្យប្ដឹងទៅតុលាការបន្ថែមទៀត។ មេធាវីរបស់អង្គការអេស៊ីល អ្នកស្រី ហេង បុង ប្រាប់អាស៊ីសេរីថា លោកស្រីបានទទួលលិខិតស្នើសុំពីខាងកម្មកររួចហើយ និងកំពុងប្រជុំពិភាក្សា ជាមួយក្រុមការងារ។
ពាក់ព័ន្ធការតវ៉ារបស់កម្មករប្រឆាំងនឹងការបញ្ឈប់ពីសំណាក់ថៅកែ ក្រុមកម្មករឲ្យដឹងថា ក្រោយការដាក់ញត្តិនៅក្រសួងការងាររួច ពួកគេនៅសល់គ្នាប្រហែល ៥០នាក់ បាននាំគ្នាត្រឡប់មកតវ៉ានៅមុខរោងចក្រវិញ។ នៅម៉ោងប្រហែល ៣រសៀល ពេលត្រឡប់មកដល់រោងចក្រ កម្មករអះអាងថា ភាគីថៅកែបានចេញមកប្រកាសប្រាប់ថា នឹងប្ដូរឈ្មោះរោងចក្រ ពី ស្យុង យិន ទៅឈ្មោះ ស្យុង តាយ វិញ និងប្រាប់ឲ្យកម្មករ ដែលមិនទាន់ត្រូវក្រុមហ៊ុនបញ្ចប់កិច្ចសន្យាឲ្យចូលធ្វើការវិញ ហើយព្រមបើកប្រាក់ឈ្នួល ៥០ភាគរយ សម្រាប់កម្មករ ដែលបានបញ្ឈប់កាលពីខែធ្នូ។
កម្មការិនីផ្នែកត្រួតពិនិត្យខោអាវ លោកស្រី ផា ផាត ប្រាប់ថា កម្មករសម្រេចគ្នាហើយថា នឹងមិនព្រមចូលធ្វើការវិញ និងមិនព្រមទទួលយកប្រាក់ឈ្នួល ៥០ភាគរយឡើយ គឺកម្មករចង់បានដំណោះស្រាយ និងអត្ថប្រយោជន៍ឲ្យស្របតាមច្បាប់ការងារ៖ «ខ្ញុំអត់ចូលទេ ព្រោះអ្វីគេឲ្យចូលតែអ្នកដែលអត់ទាន់គេបញ្ចប់(កិច្ចសន្យា) ហើយអ្នកបញ្ចប់ គេអត់ឲ្យចូលទេ។ ខ្ញុំអត់ទាន់ដល់កិច្ចសន្យាទេ គាត់(រោងចក្រ)បញ្ចប់ខ្ញុំ មុនកិច្ចសន្យា»។
អាស៊ីសេរី មិនអាចសុំការបញ្ជាក់ពីភាគីថៅកែរោងចក្រ ស្យុង យិន បានទេ នៅថ្ងៃទី១៧ មករា ដោយសារមន្ត្រីរដ្ឋបាលរោងចក្រ ឈ្មោះ តុំ គឹមសឿន មិនទទួលទូរស័ព្ទ។ ចំណែកអ្នកនាំពាក្យក្រសួងការងារ ផ្នែកដោះស្រាយកូដកម្ម លោក ទេស រុក្ខាផល ក៏មិនអាចទាក់ទងបានដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។