អង្គការខុមហ្រ្វែលដែលជាអង្គការសង្គមស៊ីវិលមានកម្មវិធីឃ្លាំមើលសភានិងអ្នកតំណាងរាស្រ្តនៅក្នុងប្រទេសកម្ពុជា កាលពីពេលថ្មីៗនេះបានចេញរបាយការណ៍ប្រចាំខែតុលានិងវិច្ឆិកា ឆ្នាំ២០០៨ ឲ្យដឹងថា អ្នកតំណាងរាស្រ្តពីគណបក្សសមរង្ស៊ីនិងគណបក្សសិទ្ធិមនុស្សដែលជាបក្សប្រឆាំងបានថ្លែងចេញនូវបញ្ហាលំបាកជាច្រើនដែលពួកគាត់ប្រឈមមុខពេលចេញបំពេញតួនាទីរបស់គាត់ ដូចជាត្រួតពិនិត្យមើលសេចក្តីព្រាងច្បាប់និងចុះធ្វើកិច្ចការងារនៅតាមមណ្ឌលរៀងៗខ្លួន។
បញ្ហាលំបាកក្នុងការត្រួតពិនិត្យមើលសេចក្តីព្រាងច្បាប់គឺដោយសារតែបក្សប្រឆាំងទាំងពីរគ្មានតំណាងរាស្រ្តរបស់ខ្លួនណាម្នាក់មានវត្តមានជាសមាជិកគណៈកម្មការជំនាញរបស់រដ្ឋសភា និងដោយសារការបង្កើតក្រុមតំណាងរាស្រ្តដែលតម្រូវឲ្យមានចំនួនពី១០រូបឡើងទៅ។
លោក យឹម សុវណ្ណ អ្នកតំណាងរាស្រ្តមណ្ឌលភ្នំពេញមកពីគណបក្សសមរង្ស៊ី និងធ្លាប់ជាប្រធានគណៈកម្មការជំនាញទី៤របស់រដ្ឋសភានីតិកាលទី៣ ទទួលបន្ទុកមហាផ្ទៃ អង្កេត បោសសម្អាត និងមុខងារសាធារណៈ បានចាត់ទុករដ្ឋសភានីតិកាលទី៤បច្ចុប្បន្នថា ស្ទើរតែជារបបផ្តាច់ការក្នុងការផ្តល់ព័ត៌មាន។
ចំណែក លោក យ៉ែម បុញ្ញឬទ្ធិ អ្នកតំណាងរាស្រ្តមកពីគណបក្សសិទ្ធិមនុស្សបានបង្ហាញពីការលំបាកដូចគ្នានេះដែរ និងមានប្រសាសន៍ថាក្រុមលោកទទួលបានព័ត៌មាននិងសេចក្តីព្រាងច្បាប់ឬរបៀបវារៈនានាកៀកពេលនឹងថ្ងៃបើកកិច្ចប្រជុំពេញអង្គ ដែលជាការបង្កបញ្ហាលំបាកច្រើនដល់អ្នកតំណាងរាស្រ្តទាំងនោះ។
នៅក្នុងរបាយការណ៍៤ទំព័ររបស់អង្គការខុមហ្រ្វែលដដែលនោះបានឲ្យដឹងផងដែរថា រដ្ឋសភាកម្ពុជានៅមិនទាន់បានទទួលការបំភ្លឺពីរដ្ឋាភិបាលដែលមានលោក ហ៊ុន សែន ជានាយករដ្ឋមន្រ្តី បំភ្លឺប្រាប់អំពីបញ្ហាការឈ្លានពានរបស់ប្រទេសថៃលើដែនដីខ្មែរភាគខាងលិចនៅឡើយទេ។
ប៉ុន្តែលោក ខៀវ កាញារីទ្ធ អ្នកនាំពាក្យរដ្ឋាភិបាលនិងជារដ្ឋមន្រ្តីក្រសួងព័ត៌មាន បានចាត់ទុកការអញ្ជើញរដ្ឋាភិបាលឲ្យទៅបំភ្លឺប្រាប់រដ្ឋសភាអំពីបញ្ហានេះគឺជាការខាតពេលវេលា ដោយលោកបញ្ជាក់ថា អ្នកម៉ូតូឌុបក៏ដឹងថារដ្ឋាភិបាលធ្វើការដល់ណាហើយដែរឥឡូវនេះ។
អង្គការខុមហ្រ្វែលរំឭកថា កាលពីនីតិកាលទី៣ មានលិខិតពីអ្នកតំណាងរាស្រ្តបក្សប្រឆាំងចំនួន២៣លិខិតបានដាក់ជូនរាជរដ្ឋាភិបាលដើម្បីស្នើសុំឲ្យទៅបំភ្លឺជុំវិញបញ្ហានានានិងការងាររបស់រដ្ឋាភិបាលនៅសម័យប្រជុំពេញអង្គរបស់រដ្ឋសភា ក៏ប៉ុន្តែមន្រ្តីតំណាងរដ្ឋាភិបាលចូលទៅបំភ្លឺបានតែ៤លើកប៉ុណ្ណោះជូនរដ្ឋសភាកម្ពុជា៕