អ្នកនាំពាក្យក្រសួងការបរទេសសហរដ្ឋអាមេរិក លោក ភី ជេ ក្រាវលី (P.J.Crowley) មានប្រសាសន៍ក្នុងសន្និសីទសារព័ត៌មានថា សហរដ្ឋអាមេរិកគាំទ្រប្រធានអាស៊ាន និងជារដ្ឋមន្ត្រីការបរទេសឥណ្ឌូណេស៊ី ដែលបានស្នើឲ្យកម្ពុជា និងថៃ បន្តកិច្ចចរចាព្រំដែនជាលក្ខណៈទ្វេភាគីនៅពេលឆាប់ៗខាងមុខនេះ។
សេចក្ដីថ្លែងការណ៍របស់សហរដ្ឋអាមេរិក ធ្វើឡើងក្រោយពីប្រទេសចិន បានស្វាគមន៍កម្ពុជា និងថៃ ក្នុងការដោះស្រាយវិបត្តិព្រំដែនផងដែរ។ ក្រសួងការពារជាតិឥណ្ឌូណេស៊ី បានប្រកាសកាលពីថ្ងៃពុធ ទី២៣ ខែកុម្ភៈថា ឥណ្ឌូណេស៊ីបានត្រៀមបញ្ជូនអ្នកសង្កេតការណ៍ជនជាតិឥណ្ឌូណេស៊ី ទៅកាន់តំបន់ជម្លោះព្រំដែនកម្ពុជា និងថៃ។
ការប្រកាសរបស់ក្រសួងការពារជាតិឥណ្ឌូណេស៊ី ត្រូវបានស្វាគមន៍ដោយនាយករដ្ឋមន្ត្រីថៃ លោក អាភីស៊ិត វេតឆាឈីវ៉ាក់ (Abhisit Vejjajiva) ប៉ុន្តែលោកបានប្រកាសថា ថៃនឹងមិនដកកងទ័ពចេញពីតំបន់ជម្លោះព្រំដែននោះទេ៕