កម្មករ​រោងចក្រ​កាត់ដេរ Nugget Textile ទាមទារ​ឲ្យ​ថៅកែ​គោរព​ច្បាប់​ការងារ

កម្មករ​កម្មការិនី​រោងចក្រ​ដេរ​សំលៀកបំពាក់ ប្រមាណ​ជាង ២០០នាក់ ធ្វើ​កូដកម្ម​នៅ​ថ្ងៃ​ព្រហស្បតិ៍​ទី​៤ សីហា។
ដោយ ខែ សុណង
2011.08.05
Share on WhatsApp
Share on WhatsApp
កម្មករ ៣០៥ ៤-សីហា-២០១១ ៖ កម្មករ​កម្មការិនី​ធ្វើ​កូដកម្ម​នៅ​មុខ​រោងចក្រ ណាក់ហ្គេត ថិចស្តាយ (Nugget Textile)។
RFA/Khe Sonorng

កូដកម្ម​របស់​កម្មករ​កម្មការិនី​បាន​កើត​ឡើង​នៅ​រោងចក្រ ណាក់ហ្គេត ថិចស្តាយ (Nugget Textile)  ដែល​មាន​ទី​តាំង​ស្ថិត​នៅ​ភូមិ​ទ្រា សង្កាត់​ស្ទឹងមានជ័យ ខណ្ឌ​មានជ័យ ដើម្បី​ទាមទារ​ឲ្យ​ថៅកែ​ក្រុមហ៊ុន​នេះ​គោរព​ច្បាប់​ការងារ និង​បញ្ឈប់​ការ​រើសអើង​ថ្នាក់​ដឹកនាំ​សហជីព​ក្នុង​រោងចក្រ។

ក្រុម​កម្មករ​កម្មការិនី​និង​មន្ត្រី​សហព័ន្ធ​សហជីព​នៃ​រោងចក្រ ណាក់ហ្គេត ថិចស្តាយ Nugget Textile បាន​នាំ​គ្នា​ធ្វើ​ការ​ទប់ស្កាត់​មិន​ឲ្យ​ក្រុមហ៊ុន​នេះ​ដឹក​ទំនិញ​ចេញ​ពី​រោងចក្រ ដោយ​ចោទ​ប្រកាន់​​ថា ​ថៅកែ​​បាន​​បញ្ឈប់​​ស្ត្រី​មាន​ផ្ទៃពោះ​ពី​ការងារ​ និង​មិន​គោរព​ច្បាប់​ស្ដី​ពី​ការងារ​នៃ​ប្រទេស​កម្ពុជា។

ប្រធាន​សហភាព​ជាតិ​កម្ពុជា​ការងារ​កម្មករ លោក សាត់ ឈាងហួ បាន​ឲ្យ​ដឹង​នៅ​ថ្ងៃ​ទី​៤ សីហា ថា ក្នុង​ចំណោម​កម្មករ​រោងចក្រ​នេះ​ជាង​៦រយ​នាក់ មាន​កម្មករ​តែ​ជាង​១រយ​នាក់ ប៉ុណ្ណោះ​ដែរ​បាន​ចូល​ធ្វើ​ការ ដោយ​សារ​តែ​ពួកគេ​មាន​ការ​ព្រួយ​បារម្ភ​ខ្លាច​បាត់បង់​ការងារ។លោក​ថា អ្វី​ដែល​នាំ​ឲ្យ​កម្មករ​​មាន​សន្ទុះ​ក្នុង​ការ​ទាម​ទារ​នៅ​ថ្ងៃ​នេះ​ដោយ​ព្រោះ​តែ​ក្រុមហ៊ុន​បាន​បញ្ឈប់​ស្ត្រី​មាន​ផ្ទៃ​ពោះ​២​នាក់ ជា​បន្ត​បន្ទាប់ ដោយសារ​ពួកគេ​មិន​ព្រម​ទទួល​យក​កិច្ច​សន្យា​ការងារ​ថ្មី។

លោក សាត់ ឈាងហួ ៖ «ចំណុចក្ដៅថ្ងៃនេះ គឺ​​ថៅកែ​បញ្ឈប់​កម្មករ ដែល​មាន​ផ្ទៃពោះ។ មួយ​ទៀត​ទាក់ទង​ទៅ​នឹង​ការ​រើសអើង​សហជីព បិទ​សិទ្ធិ​សេរីភាព​របស់​សហជីព​កម្មករ។ ​សុំ​​ច្បាប់​​​ក៏​​ធ្វើ​ការ​​ព្រមាន​​ដែរ។ បំបិទ​​សិទ្ធិ​សេរីភាព​​របស់​​កម្មករ អត់​​បាន​​អនុវត្ត​​តាម​​ច្បាប់​​ការងារ»។

កម្មការិនីមួយរូបក្នុងចំណោមអ្នកតវ៉ាជាច្រើនរូប ​ដែល​កំពុង​ឈរ​តវ៉ា​នៅ​មុខ​រោងចក្រ កញ្ញា ផាន់ តូយ បាន​ថ្លែង​ថា កម្មករ​ទាមទារ​ឲ្យ​ថៅកែ​ក្រុមហ៊ុន​គោរព​ទៅ​តាម​លក្ខខ័ណ្ឌ​និង​ច្បាប់​ស្ដី​ពី​ការងារ​ចំនួន​១០​ចំណុច ក្នុង​នោះ​មាន​ដូចជា ក្រុមហ៊ុន​មិន​ត្រូវ​បង្ខំ​កម្មករ​ឲ្យ​ធ្វើ​ការ​ថែម​ម៉ោង ត្រូវ​ផ្ដល់​ប្រាក់​ធ្វើ​ដំណើរ​ឲ្យ​កម្មករ​ទាំង​អ្នក​ចាស់ និង​អ្នក​ទើប​ចូល​ធ្វើ​ការ​ថ្មី ក្រុមហ៊ុន​ត្រូវ​ចេញ​ថ្លៃ​ព្យាបាល​នៅ​ពេល​កម្មករ​គ្រោះថ្នាក់​ការងារ ក្រុមហ៊ុន​ត្រូវ​អនុញ្ញាត​ច្បាប់​សម្រាល​មាតុភាព និង​រក្សា​ប្រាក់​ឈ្នួល​ដល់​កម្មករ មួយ​ចំណុច​ទៀត កម្មករ​ធ្វើ​ការ​លើស​ពី​ពីរ​ឆ្នាំ​ត្រូវ​ក្លាយ​ជា​កម្មករ​មិន​កំណត់​កិច្ចសន្យា ឬ​ពេញ​សិទ្ធិ និង​មិន​ត្រូវ​រើសអើង​ថ្នាក់​ដឹកនាំ​សហជីព​ជាដើម។

កញ្ញា ផាន់ តូយ ៖ «កម្មករខ្ញុំទាំងអស់គ្នាហ្នឹង តវ៉ាពីរឿង​លុយ​ផ្លូវ​ហ្នឹង​ឲ្យ​មិន​ស្មើភាព​គ្នា លុយ​ធ្វើ​ដំណើរ​ណា។ អ្នក​ថ្មី​​ប្រហែល​ជា​មួយ​ឆ្នាំ​ចុះ​ក្រោម​អត់​បាន។ បញ្ឈប់​អ្នក​ពោះ​ធំ​អត់​មាន​មូលហេតុ ហើយ​បំណាច់​ឆ្នាំ ធ្វើ​មួយ​ឆ្នាំ​អី​បើក​អត់​បាន​ទេ ទាល់តែ​មួយ​ឆ្នាំ​ទៅ​មុខ​ទៀត​បាន​បើក​បាន។ ថៅកែ​ហ្នឹង​ឆ្លើយ​ថា អ្នក​ធ្វើ​កើត​ធ្វើ អ្នក​ធ្វើ​មិន​កើត​ឲ្យ​ចេញ។ ក្រុមហ៊ុន​​ហ្នឹង​​មើល​​ងាយ​​កម្មករ​​ អត់​​ឲ្យ​​តម្លៃ​​ពួក​​ខ្ញុំ​​ទេ»។

វិទ្យុ​អាស៊ី​សេរី​នៅ​ពុំ​អាច​ទាក់ទង​ដើម្បី​សុំ​ការ​បំភ្លឺ​ពី​តំណាង​ក្រុមហ៊ុន​បាន​ទេ រហូត​មក​ដល់​រសៀល​ថ្ងៃ​ទី​៤ សីហា ដោយសារ​តែ​កិច្ច​ជំនួប​រវាង​អាជ្ញាធរ​ដែនដី ភាគី​ថៅកែ​ក្រុមហ៊ុន តំណាង​កម្មករ មន្ត្រី​ដោះ​ស្រាយ​វិវាទ​ការងារ​នៃ​ក្រសួង​ការងារ និង​មន្ត្រី​សហព័ន្ធ​សហជីព កំពុង​ជួប​ចរចា​គ្នា​ស្វែង​រក​ដំណោះ​ស្រាយ​នៅ​ឡើយ។

ប្រភព​ពី​មន្ត្រី​សហជីព​បាន​ឲ្យ​ដឹង​ថា លទ្ធផល​បឋម​នៃ​ការ​ចរចា​គ្នា​នោះ ភាគី​ថៅកែ​រោងចក្រ បាន​យល់​ព្រម​ចំនួន​ ២​ ចំណុច​​ហើយ រួម​មាន​​ក្រុមហ៊ុន​​លែង​​បង្ខំ​​ឲ្យ​​កម្មករ​​ធ្វើ​​ការ​​ថែម​​ម៉ោង​​ ហើយ​​បើ​ធ្វើ​ទាល់​តែ​​មាន​​ការ​​ព្រមព្រៀង​​គ្នា និង​​ចំណុច​​ទី​២ ក្រុមហ៊ុន​​នឹង​​ចំណាយ​​ថ្លៃ​​ព្យាបាល​​ដល់​​កម្មករ ​នៅ​ពេល​​មាន​​គ្រោះថ្នាក់​ការងារ ដែល​​រក្សា​​ទុក​​នូវ​​ប្រាក់​​ឈ្នួល និង​​ប្រាក់​​បន្ទាប់​បន្សំ​​ផ្សេងៗ ​ទៀត៕

រឿង​ដែល​គេ​អាន​​ច្រើន​បំផុត
RFA
ធនាគារ​ABA មិន​ព្រម​បើកប្រាក់​ជាង​១​ម៉ឺន ៥​ពាន់​ដុល្លារ ដែល​ឧបត្ថម្ភ​ដល់​បុគ្គលិក​ណាហ្គាវើលដ៍
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

មតិយោបល់៖

Anonymous
Aug 08, 2011 10:29 PM

ថៅកែរោងចក្រមិនគោរពច្បាប់ពីព្រោះគេមានក្រុមហ៊ុនឬក្រុមសែនជាខ្នងបង្អែក។