ជំងឺស្ទះរន្ធបង្ហូរទឹកភ្នែក
2013.11.26
ជំងឺស្ទះរន្ធបង្ហូរទឹកភ្នែក គឺជាជំងឺរលាកម្យ៉ាងកើតឡើងនៅបំពង់សម្រាប់បង្ហូរទឹកភ្នែកចុះមកច្រមុះ ដែលនៅគល់ភ្នែកយើងទាំងសងខាង។
គ្រូពេទ្យជំនាញខាងជំងឺភ្នែក ឱ្យដឹងថា ជំងឺស្ទះរន្ធបង្ហូរទឹកភ្នែកអាចកើតឡើងចំពោះមនុស្សគ្រប់វ័យ។ ក៏ប៉ុន្តែ ជាទូទៅ ជំងឺនេះច្រើនកើតមានលើកុមារតូចៗ ដែលកើតមកមានបញ្ហាស្ទះរន្ធទឹកភ្នែកនេះពីកំណើត ឬដោយសារតែកុមារទាំងនោះមានបំពង់បង្ហូរទឹកភ្នែកតូចចង្អៀត។
ទាក់ទងនឹងមូលហេតុនេះដែរ គ្រូពេទ្យជំនាញខាងជំងឺភ្នែកនៅមន្ទីរពេទ្យបង្អែកខេត្តកំពង់ស្ពឺ លោកវេជ្ជបណ្ឌិត កាក់ វឌ្ឈនៈ មានប្រសាសន៍បញ្ជាក់ថា កុមារដែលមានជំងឺស្ទះរន្ធបង្ហូរទឹកភ្នែកភាគច្រើន មិនមានអ្វីជាបញ្ហាធំដុំទេ ព្រោះអាចធូរស្បើយទៅវិញនៅពេលដែលគេចម្រើនវ័យ ហើយបំពង់បង្ហូរទឹកភ្នែកនោះលូតលាស់ធំបន្តិច៖ «ក្មេងភាគច្រើនវាស្ទះតែមួយរយៈ ពេលវាធំអាយុ ៥ខែ ឬ ៦ខែ គឺវាបាត់ទៅវិញ។ ប៉ុន្តែសម្រាប់មនុស្សធំចាស់អីហ្នឹងពីអាយុ ២០ ទៅ ៣០ឆ្នាំទៅហ្នឹង គឺចាប់មានហើយ។ ប៉ុន្តែភាគច្រើនអាយុហាជាងអីហ្នឹងសម្បូរណ៍ ហ្នឹងទាក់ទងរលាកផ្លូវទឹកភ្នែកយើងហ្នឹង។ ហើយជំងឺមួយចំនួនធ្វើឱ្យគាត់រលាកទៅ វាស្អិតរន្ធទឹកភ្នែកទៅ អ៊ីចឹងធ្វើឱ្យភ្នែកយើងអត់ចូលទៅបាន វាចេះតែហៀរចេញមកក្រៅ។ ភាគច្រើនបណ្ដាលមកពីមេរោគដែលធ្វើឱ្យរលាករន្ធទឹកភ្នែកគាត់ ធ្វើស្អិតជាប់គ្នាទៅស្ទះរន្ធហ្នឹង»។
ក្រៅពីនេះ មូលហេតុខ្លះទៀតដែលនាំឱ្យកើតជំងឺស្ទះរន្ធបង្ហូរទឹកភ្នែក ចំពោះមនុស្សចាស់ ជាធម្មតាដោយសារតែបំពង់បង្ហូរទឹកភ្នែករួមតូច បណ្ដាលមកពីឆ្អឹងដែលនៅជុំវិញនោះបន្តដុះខុសធម្មតា។ បំពង់បង្ហូរទឹកភ្នែកអាចស្ទះបណ្ដាលមកពីរបួស ឬការប៉ះទង្គិចភ្នែក ឬច្រមុះ ដូចជា ការបាក់ឆ្អឹងខ្ទង់ច្រមុះ ឬការដុះសាច់ក្នុងច្រមុះជាដើម។
រោគសញ្ញា៖
ចំពោះរោគសញ្ញាសម្រាប់ជំងឺស្ទះរន្ធបង្ហូរទឹកភ្នែក លោកវេជ្ជបណ្ឌិត កាក់ វឌ្ឍនៈ ពន្យល់ថា មានជាសំខាន់ គឺឈឺឡើងក្រហម ហើមនៅដើមភ្នែកខាងក្រោម៖ «សញ្ញាទីមួយ គឺហូរទឹកភ្នែក។ ហូរទឹកភ្នែករហូតទាំងយប់ទាំងថ្ងៃ។ មួយទៀត គាត់មានអារម្មណ៍ឈឺនៅគល់ភ្នែកយើងហ្នឹង។ អាហ្នឹងពេលវារលាកខ្លាំង បង្កមកពីមេរោគខ្លាំង វាធ្វើឱ្យគាត់ឈឺហើម។ ជួនកាលវាអាចធ្លាយនៅម្ដុំគល់ភ្នែកហ្នឹង ធ្លាយថង់ទឹកភ្នែកយើងហ្នឹង ដូចបូសអ៊ីចឹង។ គល់ភ្នែកហ្នឹង វាមានថង់នៅពីក្រោមហ្នឹង។ អ៊ីចឹងពេលមានមេរោគករនៅកន្លែងហ្នឹងយូរទៅ ទៅជាដូចបូសអ៊ីចឹង ធ្លាយហើមមួយចំហៀងមុខ មានការឈឺចាប់ខ្លាំង។ វាអាចបណ្ដាលឱ្យក្ដៅខ្លួននៅពេលវាមានហើមមុខខ្លាំងទៅ ធ្វើឱ្យយើងក្ដៅខ្លួន។ ហ្នឹងគឺពួកមេរោគមានអ៊ីនហ្វិចហ្សិន (Infection បង្ករោគ) នៅកន្លែងហ្នឹង មានន័យថាក្ដៅខ្លួនហើយ»។
ការព្យាបាល៖
រីឯការព្យាបាលវិញ លោកវេជ្ជបណ្ឌិតថ្លែងថា នៅពេលណាបំពង់បង្ហូរទឹកភ្នែកស្ទះ ការព្យាបាលមានតែវិធីវះកាត់ទេដែលអាចជួយបើកឱ្យបំពង់ទឹកភ្នែកស្រឡះវិញបាន៖ «ក្មេងបើមានពីកំណើតមក ភាគច្រើនវាបាត់ទៅវិញ។ គេគ្រាន់តែមានវិធីព្យាបាល ម៉ាស្សាកន្លែងថង់ទឹកហ្នឹង ហើយគេគ្រាន់តែដាក់ថ្នាំការពារកុំឱ្យវាឡើងហើមធ្លាយដូចបូស។ ភាគច្រើនក្មេងវាបាត់ទៅវិញពេល ៦ខែ ៨ខែអីហ្នឹង វាបាត់ទៅវិញ។ អាហ្នឹងនៅពេលកើតជំងឺហ្នឹងហើយ ទាល់តែមកពេទ្យភ្នែក។ ពេទ្យភ្នែកគេមានវិធីលាងមើលរន្ធហ្នឹង តើវាស្ទះនៅកន្លែងណា។ អ៊ីចឹងគេត្រូវធ្វើការវះកាត់។ មានតែវះកាត់ទេដែលធ្វើឱ្យយើងបាត់ហូរទឹកភ្នែក»។
ក៏ប៉ុន្តែ គ្រូពេទ្យឱ្យដឹងថា នៅពេលណាជំងឺស្ទះបំពង់បង្ហូរទឹកភ្នែកបង្កឡើងដោយមេរោគ ហើយមិនបានព្យាបាលឱ្យទាន់ពេលវេលា ហើយរោគសញ្ញានោះចេះតែផ្ដុំច្រើនឡើងយូរៗទៅ ជំងឺនេះនឹងក្លាយទៅជាជំងឺស្ទះបំពង់ទឹកភ្នែករ៉ាំរ៉ៃ និងរឹតតែពិបាកព្យាបាលឱ្យជាណាស់។
លោកវេជ្ជបណ្ឌិត កាក់ វឌ្ឍនៈ បញ្ជាក់ថា ជំងឺស្ទះបំពង់ទឹកភ្នែកមិនមានផលវិបាកធ្វើឱ្យភ្នែកងងឹតទេ ក្រៅពីការរំខានខ្លះៗ៖ «ផលវិបាកសម្រាប់ជំងឺហ្នឹង ទីមួយ គាត់ហៀរទឹកភ្នែក។ នៅពេលហៀរទឹកភ្នែក យើងចេះតែផ្សិតទៅ ធ្វើឱ្យយើងរលាកភ្នែក ហើយមួយទៀត បើយើងអត់ព្យាបាលវាបណ្ដាលដូចបូសអ៊ីចឹង វាធ្លាយនៅគល់ភ្នែកហ្នឹង។ វាមិនបណ្ដាលឱ្យខូចភ្នែក ឬងងឹតភ្នែកអីទេជំងឺហ្នឹង។ ផលវិបាក គឺហៀរទឹក ហើយនិងហើមធ្លាយដូចបូស»។
វិធីបង្ការ៖
លោកវេជ្ជបណ្ឌិតបញ្ជាក់ថា ដោយសារតែជំងឺស្ទះបំពង់ទឹកភ្នែកនេះកើតឡើងពីកំណើត គេមិនមានវិធីជាក់លាក់ណាមួយ ដើម្បីបង្ការទេចំពោះកុមារ៖ «បើមនុស្សធំ បើសិនជាគាត់ឧស្សាហ៍ឈឺភ្នែក ឬរលាកភ្នែក វាអាចបង្កការរលាករន្ធទឹកភ្នែកហ្នឹងច្រើនជាង ហើយបើសិនជាគាត់កើតជំងឺស្ទះរន្ធទឹកភ្នែកហើយ ដើម្បីកុំឱ្យធ្លាយទៅជាបូស គាត់ត្រូវឧស្សាហ៍ច្របាច់ចេញ។ ពេលមកពេទ្យ ពេទ្យគេប្រាប់យើងច្របាច់ទៅ ព្រោះកន្លែងហ្នឹងជាថ្នក់ទឹក។ អ៊ីចឹងបើថ្នក់ទឹកដក់ករជាខ្ទុះច្រើន ទុកយូរទៅវាទៅជាបូស។ អ៊ីចឹងបើមកពេទ្យគេប្រាប់វិធីច្របាច់ ឧស្សាហ៍ច្របាច់ដាក់ថ្នាំទៅ អត់ឡើងជាបូសជាអីទេ។ វាគ្រាន់តែហៀរទឹកភ្នែកជាប្រចាំ»។
លោកវេជ្ជបណ្ឌិត កាក់ វឌ្ឍនៈ ណែនាំថា ប្រសិនបើលោកអ្នកមានបញ្ហាចេះតែហៀរទឹកភ្នែក លោកអ្នកគប្បីទៅជួបពិគ្រោះជាមួយគ្រូពេទ្យជំនាញខាងភ្នែក ដើម្បីបានយល់ពីជំងឺអ្វីជាក់លាក់ និងវិធីព្យាបាល។ ជាពិសេស លោកអំពាវនាវឱ្យអ្នកមានបញ្ហានេះ ទៅជួបពិគ្រោះជាមួយលោកនៅមន្ទីរពេទ្យបង្អែកខេត្តកំពង់ស្ពឺ ដែលកំពុងផ្ដល់សេវាវះកាត់ជំងឺស្ទះរន្ធបំពង់ទឹកភ្នែក រហូតដល់ថ្ងៃទី២៩ វិច្ឆិកា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- កញ្ញា ឈឹម ស៊ីថរ រក្សាជំហរតស៊ូ ដើម្បីសេរីភាពសហជីព និងការពារផលប្រយោជន៍កម្មករក្រោយមានសេរីភាព
- ហេតុអ្វីបានជាអាមេរិកដាក់ទណ្ឌកម្ម «ស្តេចកោះកុង»?
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់
- សមត្ថកិច្ចចាប់ខ្លួន លោក ហោ សុខុន អតីតព្រះចៅអធិការវត្តច្បារអំពៅ និងមនុស្ស ៣ទៀត