អាការៈឈឺក្បាល គឺជាបញ្ហាមួយដែលមនុស្សទូទាំងពិភពលោកជួបប្រទះរាល់ថ្ងៃ។ កាលពីសប្ដាហ៍មុន គ្រូពេទ្យជំនាញខាងសរសៃប្រសាទឲ្យដឹងថា បញ្ហាឈឺក្បាលមានច្រើនសណ្ឋាន ហើយក៏មានកត្តាមូលហេតុផ្សេងៗគ្នាដែរ។
ក្នុងនាទីសុខភាពសប្ដាហ៍នេះ លោក ឡេង ម៉ាលី មានសេចក្ដីរាយការណ៍បន្ត អំពីស្ថានភាពនៃប្រភេទបញ្ហាឈឺក្បាលមួយចំនួនទៀត និងថា តើអាការៈឈឺក្បាលនោះជាការគ្រោះថ្នាក់ ឬទេ?
គ្រូពេទ្យឯកទេសខាងវះកាត់សរសៃប្រសាទនៃមន្ទីរពេទ្យជប៉ុន ឈ្មោះ សាន់រ៉ាយ (Sunrise) លោកវេជ្ជបណ្ឌិត យ៉ូហ្ស៊ីហ៊្វូមី ហាយ៉ាហ៊្សី (Yoshifumi Hayashi) ឲ្យដឹងបន្ថែមថា បញ្ហាឈឺក្បាលប្រភេទមួយចំនួនទៀតដែលអាចជាអាការៈឈឺក្បាលគ្រោះថ្នាក់ដែរនោះ គឺការឈឺដែលកើតឡើងភ្លាមៗដោយឯកឯង៖ «អត់មានអីបុកខួរក្បាល ហើយក៏មិនមានក្ដៅខ្លួនដែរ ប៉ុន្តែស្រាប់តែឈឺតែម្ដង។ ពេលខ្លះមិនធ្ងន់ធ្ងរទេ ប៉ុន្តែសំខាន់វាអាចជាសញ្ញាមួយដ៏ធ្ងន់ធ្ងរ ព្រោះវាអាចបណ្ដាលឲ្យហូរឈាមនៅក្នុងខួរក្បាល»។
លោកវេជ្ជបណ្ឌិតមានប្រសាសន៍ទៀតថា ការហូរឈាមនៅក្នុងខួរក្បាលនេះ មានពីរប្រភេទធំៗខុសគ្នា៖ «ពីរចំណុចដែលសំខាន់ដែលធ្វើឲ្យហូរឈាមនៅក្នុងខួរក្បាល។ ទីមួយ គឺហូរឈាមនៅក្រោមស្រទាប់ទន់នៃខួរក្បាល។ ទីពីរ គឺហូរឈាមក្នុងខួរក្បាលតែម្ដង។ មួយហូរនៅស្រោមខួរ មួយហូរឈាមនៅខួរក្បាល។ មូលហេតុសំខាន់ដែលអាចប្រឈមមុខក្នុងការហូរឈាមបែបនេះ ជាពិសេស គឺអ្នកជក់បារី។ បន្ទាប់មកទៀត គឺអ្នកឡើងសម្ពាធឈាម និងអ្នកឡើងជាតិស្ករក្នុងឈាម»។
លោកវេជ្ជបណ្ឌិត ហាយ៉ាហ្ស៊ី បញ្ជាក់ថា ប្រសិនបើមានអាការៈឈឺក្បាលដូចបានរៀបរាប់មកនេះ គឺវាអាចជារោគសញ្ញាធ្ងន់ធ្ងរ ហើយជាករណីដែលត្រូវបញ្ជូនទៅមន្ទីរពេទ្យដើម្បីសង្គ្រោះបន្ទាន់។
តើធ្វើដូចម្ដេចដើម្បីបង្ការបញ្ហាហូរឈាមក្នុងខួរក្បាលនេះ?
លោកវេជ្ជបណ្ឌិតមានប្រសាសន៍ថា វិធីដែលសំខាន់បំផុត គឺការរក្សារបៀបរស់នៅដោយសុខភាពល្អ៖ «ទីមួយ គឺឈប់ជក់បារី។ ទីពីរនោះ ហូបអាហារដែលមានតុល្យភាព គឺអាហារដែលមានជាតិផ្លែឈើច្រើន និងបន្លែច្រើន។ ទីបី ការហាត់កីឡាក៏ជាចំណុចល្អមួយដែរ ដើម្បីទទួលបានសុខភាពល្អ។ ប្រសិនជាមានរោគសញ្ញាដូចខាងលើ វាជាសញ្ញាមួយធ្ងន់ធ្ងរ ហើយត្រូវបញ្ជូនទៅមន្ទីរពេទ្យឲ្យលឿនតាមតែអាចធ្វើទៅបាន»។
លោកវេជ្ជបណ្ឌិតថ្លែងថា នៅប្រទេសជប៉ុន បច្ចុប្បន្ននេះ ការពិនិត្យវាយតម្លៃខួរក្បាល គឺជាការពេញនិយមមួយ។ ការពិនិត្យខួរក្បាល ធ្វើឲ្យគ្រូពេទ្យអាចវាយតម្លៃបានថា មានសរសៃក្នុងខួរក្បាលណាមួយដាច់ហូរឈាម ឬក៏ស្ទះ។
ក្រៅពីអាការៈឈឺក្បាលដែលកើតឡើងភ្លាមៗ ក៏មានអាការៈឈឺក្បាលលក្ខណៈរ៉ាំរ៉ៃដែរ។ លោកវេជ្ជបណ្ឌិតមានប្រសាសន៍ថា អាការៈឈឺក្បាលរ៉ាំរ៉ៃនេះ គឺនិយាយសំដៅអាការៈឈឺក្បាលដែលកើតឡើងជាទៀងទាត់ និងរាល់ថ្ងៃ។ ឧទាហរណ៍ស្ត្រីវ័យ ១៦ឆ្នាំ ដែលមានអាការៈឈឺក្បាលទៀងទាត់ ៣ដងក្នុងមួយខែ។ ការឈឺក្បាលនេះ តែងកើតឡើងបន្ទាប់ពីការទទួលទានអាហារ ឬការហាត់ប្រាណ ឬក្នុងអំឡុងពេលមានរដូវ។ ការឈឺក្បាលនេះ ជួនកាលមានលក្ខណៈធ្ងន់ធ្ងររហូតដល់ធ្វើឲ្យក្អួត។ ការឈឺក្បាលនេះ អាចឈឺពេលចូលគេង ហើយបាត់ទៅវិញពេលភ្ញាក់ពីដំណេក។ លោកវេជ្ជបណ្ឌិត ហាយ៉ាហ្ស៊ី ហៅឈ្មោះអាការៈឈឺក្បាលបែបនេះ ថាជាជំងឺប្រកាំង ឬហៅជាភាសាអង់គ្លេសថា ម៉ៃក្រេន (Migraine)៖ «ជំងឺម៉ៃក្រេនហ្នឹង គឺជាទូទៅវាចាប់ផ្ដើមឡើងក្នុងអាយុពី ១០ ទៅ ៣០ឆ្នាំ ហើយ ៨០% គឺជាស្ត្រី។ វាទាក់ទងទៅនឹងបញ្ហាអ័រម៉ូន (Hormone)»។
លោកបញ្ជាក់ថា មូលហេតុខ្លះបណ្ដាលមកពីបញ្ហាភ្នែក។ បញ្ហាភ្នែក កើតឡើងមុនពេលដែលអាការៈឈឺក្បាលចាប់ផ្ដើមឡើង។
ទាក់ទងនឹងការព្យាបាលវិញ ប្រសិនបើអាការៈឈឺក្បាលនេះមិនសូវធ្ងន់ធ្ងរទេ លោកវេជ្ជបណ្ឌិតគ្រាន់តែឲ្យសម្រាកមួយរយៈពេលខ្លី ការឈឺក្បាលនេះនឹងបាត់ទៅវិញ។ ប៉ុន្តែបើសិនជាលោកអ្នកមានអាការៈឈឺក្បាលប្រកាំងធ្ងន់ធ្ងរ លោកអ្នកអាចត្រូវព្យាបាលដោយថ្នាំ។ លោកវេជ្ជបណ្ឌិតឲ្យដឹងថា ថ្នាំមួយប្រភេទសម្រាប់ជំងឺប្រកាំងមានឈ្មោះថា ហ្សូមិគ (Zomig)៖ «នេះជាថ្នាំប្រើប្រាស់សម្រាប់ព្យាបាល ដែលយើងអាចប្រើថ្នាំហ្នឹងដើម្បីលេបក៏មាន ហើយថ្នាំដែលបាញ់ចូលច្រមុះក៏មាន។ បើមានជំងឺដូចម៉ៃក្រេន ទៅជួបលោកគ្រូពេទ្យ ឬអាចជួបគ្រូពេទ្យនៅគ្លីនិកគីតាហារ៉ា»។
លោកវេជ្ជបណ្ឌិតឲ្យដឹងថា ការឈឺក្បាលប្រកាំងអាចកើតឡើងពី ៣ ទៅ ៦ដងក្នុងមួយខែ ដែលមានលក្ខណៈខុសគ្នាពីអាការៈឈឺក្បាលតឹងសាច់ដុំ និងអាការៈកញ្ចុំ ឬភាសាអង់គ្លេសហៅថា Cluster Headache៖ «Cluster Headache ឬជំងឺឈឺក្បាលជាកញ្ចុំហ្នឹង ភាគច្រើនកើតឡើងនៅខាងក្រោយភ្នែក។ ឈឺនៅម្ដុំកញ្ចុំក្រោយភ្នែកហ្នឹងតែម្ដង ហើយឈឺក្បាលជាកញ្ចុំ Cluster Headache គឺវាឈឺក្បាលនៅតែភ្នែកហ្នឹង ហើយបើគិតពីពេលវេលាវិញ គឺទៀងទាត់។ បើថាថ្ងៃហ្នឹងម៉ោង ៨ ឈឺ ស្អែកឡើងម៉ោង ៨ ឈឺទៀតហើយ។ បើរដូវត្រជាក់ឈឺ ដល់រដូវត្រជាក់ឈឺទៀត។ វាទៀងទាត់អ៊ីចឹង តែមួយកន្លែង ហើយអត់ផ្លាស់ប្ដូរទីកន្លែងទេ»។
រីឯអាការៈឈឺក្បាលដែលបង្កដោយដុះដុំសាច់ក្នុងខួរក្បាលវិញ ត្រូវបានវេជ្ជបណ្ឌិត ហាយ៉ាហ្ស៊ី ពន្យល់ថា មានលក្ខណៈស្រដៀងគ្នានឹងអាការៈឈឺក្បាលប្រភេទដទៃទៀតដែរ ក៏ប៉ុន្តែលក្ខណៈសម្គាល់ពិសេសមួយនៃការឈឺក្បាល ដែលបង្កដោយដុំសាច់ក្នុងខួរក្បាល គឺអាការៈឈឺនោះកាន់តែធ្ងន់ធ្ងរឡើងម្ដងបន្តិចៗរយៈពេលយូរ ហើយឥតស្រាកស្រាន្ត។
លោកវេជ្ជបណ្ឌិតណែនាំថា ប្រសិនបើមានរោគសញ្ញាបែបនេះ ហើយសង្ស័យថាមានដុំសាច់ក្នុងខួរក្បាល អ្នកជំងឺគប្បីទៅជួបពិគ្រោះជាមួយគ្រូពេទ្យ ដើម្បីឆ្លុះមើលខួរក្បាលដោយម៉ាស៊ីនទំនើប។
ជារួម អាការៈឈឺក្បាលទាំងឡាយណាដែលកើតឡើងភ្លាមៗ ហើយមិនស្រាកស្រាន្តបន្ទាប់ពីការសម្រាក ឬហាត់ប្រាណ ត្រូវតែទៅជួបគ្រូពេទ្យ ព្រោះអាចជាករណីធ្ងន់ធ្ងរ ហើយត្រូវការសង្គ្រោះបន្ទាន់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។